6 Yuj chiꞌ ix bꞌat ebꞌ schecabꞌ vin̈ rey chiꞌ dꞌa masanil yol yic Israel yedꞌ dꞌa yol yic Judá, ix yicꞌanbꞌat yumal ebꞌ, aton ix schec bꞌojoc vin̈ rey chiꞌ yedꞌ ebꞌ ayoch yajalil yedꞌoc, bꞌaj syal vin̈ icha tic: Ex quetisraelal, meltzajan̈ecxi dꞌa Jehová sDiosal vin̈ co mam quicham aj Abraham, vin̈aj Isaac yedꞌ vin̈aj Israel, yic ol ochxoc eyedꞌoc a ex man̈ ex cannacoc dꞌa yol scꞌabꞌ ebꞌ vin̈ sreyal Asiria. 7 Mocabꞌ lajanoc tzeyutej e bꞌa icha ebꞌ e mam eyicham, icha pax ebꞌ quetisraelal, ix spitej val sbꞌa ebꞌ dꞌa Jehová co Diosal yedꞌ ebꞌ co mam quicham chiꞌ. A val co Diosal chiꞌ ix satanel ebꞌ icha val tzꞌaj quilan ticnaic. 8 Yuj chiꞌ man̈ eyacꞌ pitbꞌoc e bꞌa, icha yutejnac sbꞌa ebꞌ co mam quicham chiꞌ. Aqꞌuecxioch e bꞌa dꞌa yol scꞌabꞌ Jehová co Diosal, cotan̈ec dꞌa stemplo sicꞌbꞌilel yuj dꞌa masanil tiempo, tzeyacꞌan servil yic maxtzac cot yoval scꞌol dꞌayex. 9 Tato ol eyacꞌxioch Jehová dꞌa e cꞌool, axo ebꞌ ajcꞌol icꞌjinacbꞌat ebꞌ quetisraelal yedꞌ ebꞌ eyuninal dꞌa preso chiꞌ, ol ocꞌ scꞌol ebꞌ dꞌa ebꞌ, ol acꞌjoc meltzaj ebꞌ dꞌa co chon̈abꞌ tic. Yujto a Jehová co Diosal, te ay snivancꞌolal, ay pax yoqꞌuelcꞌolal, man̈ ol ex spatiquejcaneli tato ol eyacꞌxioch e bꞌa dꞌa yol scꞌabꞌ, xchibꞌat vin̈ rey chiꞌ dꞌa ebꞌ.

10 Ix bꞌat ebꞌ checabꞌ chiꞌ dꞌa masanil yol yic Efraín yedꞌ dꞌa yol yic Manasés, ix bꞌatn̈ej ebꞌ dꞌa junjun chon̈abꞌ, masanto ix cꞌoch ebꞌ dꞌa yol yic Zabulón. Palta a ebꞌ anima chiꞌ, ton̈ej ix tzevaj ebꞌ, ix bꞌuchvaj pax ebꞌ dꞌa ebꞌ checabꞌ chiꞌ. 11 Palta ay jayvan̈ ebꞌ vin̈ vinac dꞌa yin̈tilal Aser, dꞌa yic Manasés yedꞌ dꞌa yic Zabulón ix och ebꞌ ejmelal dꞌa Dios chiꞌ, ix javi ebꞌ dꞌa Jerusalén chiꞌ. 12 A Dios ix acꞌan snaꞌ masanil ebꞌ anima dꞌa Judá chiꞌ, yic scꞌanabꞌajan ebꞌ jun checnabꞌil ix yal vin̈ rey chiꞌ yedꞌ ebꞌ ayoch yajalil yedꞌoc, icha ix aj yalan Jehová.

13 Yuj chiꞌ a val dꞌa schabꞌil uj, ix smolbꞌan sbꞌa jantac anima dꞌa Jerusalén chiꞌ, ix yacꞌanoch qꞌuin̈ ebꞌ yic ixim pan malaj yich. 14 Ix syamanoch ebꞌ yicꞌanel masanil juntzan̈ altar yedꞌ juntzan̈ lugar bꞌajtac sn̈uschaj incienso dꞌa Jerusalén chiꞌ. Ix syumancanem ebꞌ dꞌa schꞌolanil aꞌ Cedrón. 15 Ayic 14 yoch schabꞌil uj chiꞌ, ix smilancham nocꞌ quelem calnel ebꞌ yic qꞌuin̈ chiꞌ.

Axo ebꞌ vin̈ sacerdote yedꞌ ebꞌ vin̈ levita, ix te qꞌuixviqꞌue ebꞌ vin̈, yuj chiꞌ ix sacbꞌitej sbꞌa ebꞌ vin̈ icha yalan ley. Ix yicꞌanbꞌat nocꞌ silabꞌ ebꞌ vin̈ sn̈usjitzꞌa smasanil dꞌa stemplo Jehová. 16 Icha chiꞌ ix aj yochxi ebꞌ vin̈ dꞌa yopisio, icha yalan ley Moisés vin̈ schecabꞌ Dios. A ebꞌ vin̈ sacerdote ix tzicanem schiqꞌuil nocꞌ silabꞌ ix yacꞌ ebꞌ vin̈ levita. 17 Yujto tzijtumto ebꞌ dꞌa scal masanil anima chiꞌ manto sacbꞌitejlaj sbꞌa, yuj chiꞌ a ebꞌ vin̈ levita chiꞌ ix milancham nocꞌ silabꞌil yic qꞌuin̈ chiꞌ yuj ebꞌ anima chiꞌ, yic tzꞌoch yopisio nocꞌ dꞌa qꞌuin̈ chiꞌ. 18-19 Te nivan ebꞌ dꞌa yin̈tilal Efraín, dꞌa yic Manasés, dꞌa yic Isacar yedꞌ dꞌa yic Zabulón ix comon chiꞌan nocꞌ silabꞌ yic qꞌuin̈ chiꞌ, man̈ ichaoc yaj stzꞌibꞌchajcani, yujto maj sacbꞌitej sbꞌa ebꞌ icha yalan ley. Palta a vin̈aj rey Ezequías chiꞌ ix lesalvi yuj ebꞌ, ix yalan vin̈ icha tic: Mamin Jehová, co Diosal ach yedꞌ ebꞌ co mam quicham, te vachꞌ a pensar. Acꞌ nivancꞌolal ebꞌ syacꞌoch dꞌa scꞌol yalan sbꞌa dꞌayach, vachꞌchom maj sacbꞌitej sbꞌa ebꞌ icha yalan sleyal a templo, xchi vin̈.

20 Ix yabꞌ Jehová slesalvi vin̈aj rey Ezequías chiꞌ, yuj chiꞌ ix yacꞌ nivancꞌolal dꞌa yibꞌan̈ masanil anima chiꞌ. 21 Uqueꞌ cꞌual ix ecꞌ ebꞌ israel chiꞌ dꞌa Jerusalén, te tzalajcꞌolal ix ecꞌ qꞌuin̈ yic ixim pan malaj yich chiꞌ. Axo ebꞌ vin̈ sacerdote yedꞌ ebꞌ vin̈ levita, junjun cꞌu sbꞌitan ebꞌ vin̈, syalan vachꞌ lolonel ebꞌ vin̈ dꞌa Jehová yedꞌ masanil yamcꞌabꞌ yic bꞌit te vachꞌ yic Jehová yaji. 22 A vin̈aj Ezequías chiꞌ, ix yacꞌ yuj diosal vin̈ dꞌa ebꞌ vin̈ levita, yujto ix schꞌoxel sbꞌecancꞌolal ebꞌ vin̈ yacꞌan servil Jehová.

Uqueꞌ cꞌual ix schi nocꞌ silabꞌ yic qꞌuin̈ chiꞌ ebꞌ, ix yacꞌanpax nocꞌ silabꞌ ebꞌ yic juncꞌolal, ix yalan vachꞌ lolonel ebꞌ dꞌa Jehová sDiosal smam yicham. 23 Ix lajvi chiꞌ, ix yalan ebꞌ smasanil to syacꞌ uqueocxo cꞌual qꞌuin̈ chiꞌ. Te tzalajcꞌolal ix aj yoch qꞌuin̈ chiꞌ yuj ebꞌ. 24 A vin̈aj Ezequías sreyal Judá chiꞌ, mil nocꞌ mam vacax yedꞌ 7 mil nocꞌ calnel ix siej vin̈ dꞌa ebꞌ anima chiꞌ. Yedꞌ ebꞌ vin̈ yajal dꞌa junjun chon̈abꞌ ix siejpax mil nocꞌ vacax chiꞌ ebꞌ vin̈ yedꞌ 10 mil nocꞌ calnel. Nivan ebꞌ vin̈ sacerdote ix sacbꞌitej sbꞌa icha yalan ley. 25 Masanil ebꞌ aj Judá chiꞌ yedꞌ ebꞌ vin̈ sacerdote yedꞌ ebꞌ vin̈ levita yedꞌ masanil ebꞌ ix laj cot dꞌa yol yic Israel yedꞌ masanil ebꞌ chꞌoc chon̈abꞌil ix ja cajan dꞌa yol yic Israel chiꞌ, ma dꞌa yol yic Judá, ix te tzalaj ebꞌ. 26 Jantac tzalajcꞌolal ix uji dꞌa Jerusalén chiꞌ, yujto atax yic yacꞌannac reyal vin̈aj Salomón yuninal vin̈aj David, manta bꞌaj tzuji icha jun ix uji dꞌa Jerusalén chiꞌ. 27 Ix lajvi chiꞌ, ix qꞌue lin̈an ebꞌ vin̈ sacerdote yedꞌ ebꞌ vin̈ levita yic scꞌanan svachꞌcꞌolal Jehová ebꞌ vin̈ dꞌa yibꞌan̈ masanil ebꞌ anima. Ix abꞌchaj slesal ebꞌ vin̈ chiꞌ dꞌa satchaan̈ bꞌaj cajan Dios.