2 Ix lajvi chiꞌ ix spojanecꞌ ebꞌ vin̈ sacerdote yedꞌ ebꞌ vin̈ levita vin̈aj Ezequías dꞌa stzolal, junjun macan̈ ebꞌ vin̈ yedꞌ yopisio: A ebꞌ vin̈ sacerdote, a ebꞌ vin̈ tzꞌacꞌan silabꞌ sn̈usjitzꞌa smasanil yedꞌ silabꞌ yic schꞌoxan sjuncꞌolal ebꞌ yedꞌ Jehová. Axo ebꞌ vin̈ levita tzꞌacꞌan yuj diosal dꞌa Jehová chiꞌ, syalanpax vachꞌ lolonel ebꞌ vin̈ dꞌay dꞌa bꞌital, ay pax ebꞌ vin̈ stan̈van spuertail templo. 3 A vin̈ rey chiꞌ, a nocꞌ smolbꞌetzal nocꞌ vin̈ ix yacꞌ silabꞌil: Aton nocꞌ silabꞌ sn̈usjitzꞌa smasanil tzꞌacꞌji dꞌa qꞌuin̈ibꞌalil yedꞌ dꞌa yemcꞌualil yedꞌ pax silabꞌ sn̈usjitzꞌa dꞌa scꞌual icꞌoj ip yedꞌ pax silabꞌ tzꞌacꞌji yic tzꞌoch qꞌuin̈ ayic tzꞌalji qꞌuen uj yedꞌ silabꞌ tzꞌacꞌji dꞌa juntzan̈xo qꞌuin̈ nivac yelcꞌochi, icha yaj stzꞌibꞌchajcan dꞌa sley Jehová. 4 Ix yalanpax vin̈ rey chiꞌ dꞌa masanil ebꞌ anima cajan dꞌa Jerusalén chiꞌ to syacꞌ scolval ebꞌ syacꞌtaxon dꞌa ebꞌ vin̈ sacerdote yedꞌ dꞌa ebꞌ vin̈ levita, yic vachꞌ an̈ej Jehová syacꞌ servil ebꞌ vin̈ icha yalan ley. 5 Ayic ix alchajel jun checnabꞌil chiꞌ, ix yacꞌ ebꞌ israel jantac val ix el dꞌa scꞌool yacꞌani: Aton ixim trigo vachꞌ, vino, aceite, nocꞌ yal chabꞌ yedꞌ masanil sat avbꞌen te vachꞌ slaj smol ebꞌ. Ix yicꞌanpaxcot sdiezmoal masanil tas syavej ebꞌ. Te nivan ix yacꞌ ebꞌ.

6 An̈ejtonaꞌ pax ebꞌ aj Israel chiꞌ yedꞌ ebꞌ cajan dꞌa juntzan̈xo chon̈abꞌ dꞌa yol yic Judá chiꞌ, ix yicꞌcot sdiezmoal nocꞌ smolbꞌetzal nocꞌ ebꞌ: Aton nocꞌ vacax, nocꞌ calnel, nocꞌ chiva yedꞌ pax sdiezmoal masanil tastac ay dꞌa ebꞌ to yicxo Jehová Dios yaji. Juyjumbꞌa ix laj yutej ebꞌ yacꞌancani. 7 Ayic yoxil uj yoch jun abꞌil chiꞌ, ix och ijan ebꞌ smolbꞌan masanil juntzan̈ chiꞌ. Ato dꞌa yuquil uj ix och vaan ebꞌ yacꞌani. 8 Ayic ix bꞌat yilan masanil juntzan̈ ix molchaj chiꞌ vin̈aj Ezequías yedꞌ ebꞌ ayoch yajalil yedꞌ vin̈, ix yalan vachꞌ lolonel ebꞌ dꞌa Jehová yedꞌ dꞌa chon̈abꞌ Israel. 9 Ix lajvi chiꞌ ix scꞌanbꞌan vin̈aj Ezequías chiꞌ dꞌa ebꞌ vin̈ sacerdote yedꞌ dꞌa ebꞌ vin̈ levita yuj masanil juntzan̈ tas ix javi chiꞌ. 10 Ix tacꞌvi vin̈aj sat sacerdote Azarías yin̈tilal vin̈aj Sadoc icha tic: Yictax ix schaanel yich ebꞌ yicꞌancot scolval dꞌa stemplo Jehová tic, ayn̈ej tas sco vaꞌa, ayto pax scani. Masanil juntzan̈ tic toxo ix cani, yujto ix yacꞌ val svachꞌcꞌolal Jehová dꞌa yibꞌan̈ ebꞌ quetchon̈abꞌ tic, xchi vin̈.

11 Yuj chiꞌ, ix schec vin̈aj Ezequías bꞌochaj yedꞌtal bꞌaj smolchaj juntzan̈ chiꞌ dꞌa templo chiꞌ. Axo yic toxo ix bꞌo jun yedꞌtal chiꞌ, 12 vachꞌ ix yutej ebꞌ smolbꞌan juntzan̈ colval chiꞌ dꞌa yool yedꞌ diezmo ix yicꞌcot ebꞌ anima chiꞌ yedꞌ masanil tas to yic Jehová yaji. Axo jun vin̈ levita scuchan Conanías sat ix ajcan yilani, axo jun vin̈ yucꞌtac vin̈ scuchan Simei ix och schabꞌiloc yilan juntzan̈ chiꞌ. 13 A vin̈aj rey Ezequías yedꞌ vin̈aj Azarías chiꞌ sat yaj dꞌa ebꞌ vin̈ tzꞌilan templo chiꞌ. A ebꞌ vin̈ ix acꞌanoch juntzan̈xo ebꞌ vin̈ levita dꞌa yalan̈ smandar vin̈aj Conanías yedꞌ vin̈aj Simei chiꞌ, aton ebꞌ vin̈ tic: Vin̈aj Jehiel, vin̈aj Azazías, vin̈aj Nahat, vin̈aj Asael, vin̈aj Jerimot, vin̈aj Jozabad, vin̈aj Eliel, vin̈aj Ismaquías, vin̈aj Mahat yedꞌ vin̈aj Benaía. 14 Axo vin̈aj Coré yuninal vin̈aj Imna yin̈tilal Leví, yajal yaj vin̈ dꞌa ebꞌ vin̈ stan̈van spuertail templo dꞌa stojolal bꞌaj sjavi cꞌu. Aypaxoch dꞌa yibꞌan̈ vin̈ schaan ofrenda to tzꞌel val scꞌol ebꞌ yacꞌan dꞌa Jehová, spucanpaxecꞌ vin̈ tastac to yic Jehová yaj chiꞌ tzꞌacꞌchaj dꞌa ebꞌ vin̈ sacerdote yedꞌ dꞌa ebꞌ vin̈ levita. 15 A juntzan̈ ebꞌ vin̈ levita: Aton vin̈aj Edén, vin̈aj Miniamín, vin̈aj Jesúa, vin̈aj Semaías, vin̈aj Amarías yedꞌ vin̈aj Secanías. A ebꞌ vin̈ ix colvaj yedꞌ vin̈aj Coré chiꞌ spucanecꞌ ofrenda dꞌa schon̈abꞌ ebꞌ vin̈ sacerdote, icha syal macquiltac yaj ebꞌ, ebꞌ icham anima yedꞌ ebꞌ unin. 16 Syacꞌan ebꞌ vin̈ dꞌa ebꞌ vin̈ tzꞌibꞌabꞌil sbꞌi bꞌaj ay sbꞌi ebꞌ yin̈tilal Leví, aton ebꞌ vin̈ ayoch dꞌa yibꞌan̈ yilan yopisio dꞌa stzolal dꞌa templo dꞌa junjun cꞌu, ebꞌ oxeꞌ abꞌil sqꞌuinal sbꞌeyn̈ejbꞌati. 17 A ebꞌ vin̈ sacerdote chiꞌ, bꞌobꞌil slistail ebꞌ vin̈, icha syal stzolal smam yicham ebꞌ vin̈. Axo ebꞌ vin̈ levita 20 abꞌil sqꞌuinal sbꞌeyn̈ejbꞌati, ay pax sbꞌi ebꞌ vin̈ icha yajoch ebꞌ vin̈ dꞌa yopisio dꞌa stzolal. 18 A yedꞌ sbꞌi ebꞌ vin̈ chiꞌ, tzꞌibꞌabꞌil pax sbꞌi ebꞌ ix yetbꞌeyum ebꞌ vin̈, ebꞌ nenetac unin yedꞌ juntzan̈xo yuninal ebꞌ vin̈ yedꞌ yisil ebꞌ vin̈, aton masanil mach ay yalan yic ebꞌ vin̈ yilani. Val dꞌa stojolal ix aj spojanecꞌ ebꞌ vin̈ juntzan̈ tas acꞌbꞌil dꞌa Dios. 19 Ay pax ebꞌ vin̈ vinac ayoch dꞌa yibꞌan̈ spojanecꞌ tas sva ebꞌ vin̈ sacerdote yin̈tilal Aarón yedꞌ ebꞌ vin̈ levita, aton ebꞌ vin̈ tzꞌibꞌabꞌil sbꞌi bꞌaj ay sbꞌi ebꞌ smam yicham ebꞌ vin̈, aton ebꞌ vin̈ cajan dꞌa spatictaquel schon̈abꞌ ebꞌ vin̈ sacerdote yedꞌ dꞌa juntzan̈xo chon̈abꞌ.

20 Icha chiꞌ ix yutej vin̈aj Ezequías chiꞌ sbꞌoan juntzan̈ tic dꞌa masanil yol yic Judá. A masanil tas ix scꞌulej vin̈, te vachꞌ, te tojol dꞌa yichan̈ Jehová Dios. 21 Masanil tas ix scꞌulej vin̈ yic ix yacꞌan servil vin̈ dꞌa stemplo Dios, ix scꞌulej val vin̈ dꞌa smasanil scꞌool, icha yalan scꞌaybꞌubꞌal Dios yedꞌ schecnabꞌil. Yuj chiꞌ te vachꞌn̈ej ix elcꞌoch vin̈.