2 Ayic ix yilan vin̈aj Ezequías chiꞌ to toxo ix javi vin̈aj Senaquerib chiꞌ yacꞌ oval dꞌa Jerusalén, 3 ix smol alan vin̈ yedꞌ ebꞌ vin̈ yajal yedꞌ ebꞌ vin̈ yajalil ebꞌ soldado to smuc sjajtac a aꞌ ebꞌ vin̈ ay dꞌa spatictac chon̈abꞌ chiꞌ. Ix cha scꞌol ebꞌ vin̈ scꞌulan tas ix alchaj chiꞌ. 4 Yuj chiꞌ te nivan ebꞌ anima chiꞌ ix smolbꞌej sbꞌa, ix laj smucan sjajtac a aꞌ chiꞌ ebꞌ yedꞌ a aꞌ sbꞌey dꞌa slacꞌanil chiꞌ, yic vachꞌ ayic sjavi ebꞌ asirio chiꞌ, man̈xalaj aꞌ tzꞌilchaj yuj ebꞌ.

5 Ix yacꞌ val yip vin̈aj rey Ezequías chiꞌ sbꞌoanxiqꞌue smuroal chon̈abꞌ chiꞌ bꞌaj macꞌbꞌilem lan̈najoc. Ix bꞌochajxiqꞌue juntzan̈ bꞌaj stan̈vej ebꞌ soldado dꞌa yibꞌan̈tac muro yedꞌ junxo muro dꞌa spatiqueli. Te vachꞌ ix ajoch muro bꞌaj mucbꞌil jun chꞌolan dꞌa schon̈abꞌ vin̈aj David. Tzijtum qꞌuen lanza yedꞌ maclabꞌ jul-labꞌ ix schec vin̈ rey chiꞌ bꞌojoc. 6 Ix yacꞌanoch yopisio juntzan̈ ebꞌ vin̈ vinac vin̈ yic tzꞌoch ebꞌ vin̈ yajalil dꞌa masanil chon̈abꞌ. Ix smolbꞌan sbꞌa ebꞌ vin̈ bꞌaj smolbꞌej sbꞌa ebꞌ anima dꞌa stiel spuertail chon̈abꞌ chiꞌ, ix yalan vin̈ rey chiꞌ to stecꞌbꞌej sbꞌa ebꞌ, ix yalan vin̈ icha tic: 7 Tecꞌan tzeyutej e bꞌa, man̈ ex xivoc, mocabꞌ chabꞌaxqꞌue e cꞌool dꞌa yichan̈ vin̈ sreyal Asiria chiꞌ yedꞌ dꞌa jun nivan n̈ilan̈ ebꞌ vin̈ soldado yedꞌnac vin̈ chiꞌ, yujto ecꞌbꞌal quip dꞌa yichan̈ ebꞌ chiꞌ. 8 A vin̈ chiꞌ, a ebꞌ soldado ayoch yipoc scꞌol vin̈, palta a on̈xo tic, a Jehová co Diosal ayoch quedꞌoc, aꞌ ol colvaj quedꞌoc ayic ol cacꞌan oval chiꞌ, xchi vin̈. Ayic ix yabꞌan ebꞌ anima chiꞌ tas ix yal vin̈ rey chiꞌ, ix stecꞌbꞌan val sbꞌa ebꞌ.

9 Yacbꞌan van yacꞌan oval vin̈aj Senaquerib sreyal Asiria yedꞌ ebꞌ soldado dꞌa chon̈abꞌ Laquis, ix schecancot juntzan̈ ebꞌ schecabꞌ vin̈ dꞌa Jerusalén, yic tzul yal ebꞌ dꞌa vin̈aj Ezequías sreyal Judá yedꞌ dꞌa masanil ebꞌ aj Judá cajan taꞌ icha tic:

10 Icha tic ix yutej vin̈aj Senaquerib sreyal Asiria yalancoti: ¿Mach ayoch yipoc e cꞌol a ex tic, yuj chiꞌ ayex can dꞌa Jerusalén tic, ina to oybꞌil exxo qꞌuei? 11 Tato syal vin̈aj Ezequías dꞌayex to a Jehová e Diosal ol ex colanel dꞌa yol in cꞌabꞌ, ton̈ej tzex yixtej vin̈, ol ex cham yuj vejel yedꞌ taquin̈tial. 12 ¿Tom man̈oc vin̈aj Ezequías chiꞌ ix icꞌanel juntzan̈ lugar yic ejmelal bꞌajtac chaan̈ yedꞌ altar yic jun Dios chiꞌ? Ix yalan vin̈ dꞌa masanil anima dꞌa Judá yedꞌ dꞌa Jerusalén to junn̈ej jun altar bꞌaj sn̈usji incienso dꞌa jun Dios chiꞌ. 13 ¿Tom man̈ eyojtacoc tas in cꞌulejnac yedꞌ ebꞌ in mam vicham dꞌa juntzan̈xo chon̈abꞌ? ¿Tocval ix yal yuj sdiosal juntzan̈ chon̈abꞌ chiꞌ scolanel ebꞌ dꞌa yol in cꞌabꞌ? 14 ¿Tom ay junoc dꞌa juntzan̈ sdiosal juntzan̈ chon̈abꞌ ix satel ebꞌ in mam vicham chiꞌ ix yal scolanel schon̈abꞌ dꞌa yol scꞌabꞌ ebꞌ? ¿Tas yuj tze naꞌ to a e Diosal chiꞌ ol ex colan dꞌa yol in cꞌabꞌ? 15 Yuj chiꞌ, man̈ eyacꞌ e bꞌa musansatil yuj vin̈aj Ezequías chiꞌ. Man̈ e cha eyabꞌ tas syal vin̈. Yujto malaj junoc sdiosal juntzan̈ chon̈abꞌ chiꞌ ix yal scolan schon̈abꞌ dꞌa yol in cꞌabꞌ. An̈ejtonaꞌ malaj pax juntzan̈ dios chiꞌ ix yal scolan sbꞌa dꞌa yol scꞌabꞌ ebꞌ in mam vicham. Ocxo jun e Diosal chiꞌ. ¿Tom ato val ol yal ex scolan dꞌa yol in cꞌabꞌ? xchicot vin̈, xchi ebꞌ.

16 Ay juntzan̈xo tas ix yal ebꞌ schecabꞌ vin̈ sreyal Asiria chiꞌ yic sbꞌuchvaj ebꞌ dꞌa Jehová Dios yedꞌ dꞌa vin̈aj Ezequías aton schecabꞌ. 17 Ix stzꞌibꞌanpaxcot jun yumal vin̈aj Senaquerib chiꞌ yic sbꞌuchvajcot vin̈ dꞌa Jehová sDiosal Israel. A dꞌa jun yuum vin̈ chiꞌ, ix yalcot vin̈ icha tic: A juntzan̈ sdiosal juntzan̈xo chon̈abꞌ, maj yal-laj scolan schon̈abꞌ ebꞌ chiꞌ dꞌa yol in cꞌabꞌ, icha pax chiꞌ sDiosal vin̈aj Ezequías, man̈ ol yal-laj scolan schon̈abꞌ dꞌa yol in cꞌabꞌ, xchicot vin̈ dꞌa yuum chiꞌ.

18 A ebꞌ schecabꞌ vin̈aj Senaquerib chiꞌ, te chaan̈ ix yal ebꞌ dꞌa ebꞌ anima ay dꞌa Jerusalén chiꞌ, aton ebꞌ lin̈jabꞌqꞌue dꞌa yibꞌan̈ muro, te chaan̈ ix yal ebꞌ dꞌa hebreo, yic xibꞌtaj ebꞌ anima chiꞌ yuj ebꞌ, yic syacꞌan ganar Jerusalén chiꞌ ebꞌ yalani. 19 Ix slajbꞌej val sDiosal Jerusalén ebꞌ yedꞌ juntzan̈ comon dios bꞌobꞌil yuj anima, sdiosal juntzan̈xo chon̈abꞌ.

20 Yuj val jun lolonel chiꞌ, ix lesalvi vin̈aj rey Ezequías yedꞌ vin̈aj Isaías schecabꞌ Dios yuninal vin̈aj Amoz. Ix scꞌanan scolval Jehová ebꞌ vin̈. 21 Yuj chiꞌ a Jehová ix checancot jun ángel yic tzul satanel ebꞌ soldado te tecꞌan, ebꞌ yajalil ebꞌ yedꞌ ebꞌ sat yaj dꞌa scampamento vin̈ sreyal Asiria chiꞌ. Yuj chiꞌ te qꞌuixvelalxon̈ej ix aj smeltzajxi vin̈ rey chiꞌ dꞌa schon̈abꞌ. Axo yic ix och vin̈ dꞌa yol stemplo sdiosal, a ebꞌ yuninal vin̈ ix milanchamoc.

22 Icha chiꞌ ix yutej Jehová scolan vin̈aj Ezequías chiꞌ yedꞌ masanil ebꞌ cajan dꞌa Jerusalén chiꞌ dꞌa yol scꞌabꞌ vin̈aj Senaquerib sreyal Asiria chiꞌ, yedꞌ pax dꞌa yol scꞌabꞌ juntzan̈xo chon̈abꞌ. Juncꞌolal ix laj aj ebꞌ yedꞌ juntzan̈xo chon̈abꞌ ay dꞌa slacꞌanil chiꞌ. 23 Yuj chiꞌ, tzijtum ebꞌ ix yicꞌcot yofrenda dꞌa Jerusalén, ix yacꞌan ebꞌ dꞌa Jehová, ix yacꞌanpax silabꞌ ebꞌ te caro stojol dꞌa vin̈aj Ezequías chiꞌ. A dꞌa jun tiempoal chiꞌ nivan ix aj yelcꞌoch vin̈ dꞌa juntzan̈xo chon̈abꞌ.

24 A dꞌa jun tiempoal chiꞌ, te ov yacꞌan syaelal vin̈aj Ezequías chiꞌ, ijan ix cham vin̈. Yuj chiꞌ ix lesalvi vin̈ dꞌa Jehová. Ix tacꞌvi Jehová chiꞌ, ix schꞌoxan jun yechel dꞌa vin̈ te satubꞌtac yilji, yic schꞌoxani to ol bꞌoxoc scꞌool vin̈. 25 Vachꞌchom jantac vachꞌil ix scha vin̈aj Ezequías chiꞌ, palta maj yacꞌ yuj diosal vin̈ dꞌa Jehová, to ix yicꞌchaan̈ sbꞌa vin̈. Yuj chiꞌ ix cot yoval scꞌol Jehová dꞌa vin̈ yedꞌ dꞌa Judá yedꞌ dꞌa Jerusalén.

26 Yuj chiꞌ ix yicꞌxiem sbꞌa vin̈ yedꞌ ebꞌ cajan dꞌa Jerusalén chiꞌ dꞌa yichan̈ Dios. Yuj chiꞌ majxo yacꞌcot yoval scꞌol Jehová chiꞌ dꞌa yibꞌan̈ ebꞌ yacbꞌan pitzanto vin̈.

27 A vin̈aj Ezequías chiꞌ, ix te aj sbꞌeyumal vin̈, nivan ix aj yelcꞌoch vin̈. Te nivan qꞌuen plata, qꞌuen oro, qꞌuen qꞌueen te vachꞌ yilji, perfume, maclabꞌ jul-labꞌ yedꞌ pax masanil tas to ay stojol ix smolbꞌej vin̈. 28 Ix schecanpax vin̈ bꞌojoc spatil bꞌaj sicꞌchaj ixim trigo, vino yedꞌ aceite. Ix bꞌochaj pax smacteꞌ nocꞌ vacax, nocꞌ calnel yedꞌ nocꞌ chiva. 29 Ix schecanpax vin̈ bꞌojoc juntzan̈ chon̈abꞌ, yujto man̈ jantacoc nocꞌ svacax vin̈ yedꞌ nocꞌ scalnel. Te nivan sbꞌeyumal vin̈ ix yacꞌ Dios.

30 Aton vin̈ ix checan macchaj sjaj aꞌ Gihón dꞌa yibꞌan̈, yic vachꞌ axo dꞌa yalan̈ luum sbꞌey aꞌ. A dꞌa stojolal bꞌaj tzꞌem cꞌu dꞌa schon̈abꞌ vin̈aj David, ataꞌ ix cꞌoch aꞌ. Masanil tas ix scꞌulej vin̈, vachꞌn̈ej ix elcꞌochi.

31 A ebꞌ vin̈ yajal dꞌa Babilonia, ix scheccot ebꞌ vin̈ schecabꞌ ebꞌ vin̈ yic tzul scꞌanbꞌan ebꞌ vin̈ yuj jun tas satubꞌtac ix uji dꞌa Judá. Ix actajcan vin̈aj Ezequías chiꞌ yuj Dios schꞌocoj yic tzꞌacꞌji proval vin̈ yuuj, yic syilaꞌ tas yaj spensar vin̈.

32 A jantacto yabꞌixal vin̈aj Ezequías yedꞌ tastac ix scꞌulej vin̈ yedꞌ bꞌaj ix scꞌanabꞌajej Dios vin̈, aycan bꞌaj tzꞌibꞌabꞌilcan tas yilnac vin̈aj Isaías yuninal vin̈aj Amoz yedꞌ dꞌa yumal yabꞌixal ebꞌ vin̈ sreyal Judá yedꞌ Israel. 33 Axo yic ix cham vin̈, ix mucji vin̈ dꞌa yibꞌan̈qꞌue bꞌaj mucbꞌil ebꞌ yin̈tilal vin̈aj David. Masanil ebꞌ aj Judá yedꞌ ebꞌ cajan dꞌa Jerusalén, ix schꞌoxel ebꞌ to nivan yelcꞌoch vin̈ ayic ix smucan vin̈ chi ebꞌ, axo vin̈aj Manasés yuninal vin̈ ix ochcan reyal sqꞌuexuloc.