Ochnac vin̈aj Manasés reyal
33
A vin̈aj Manasés chiꞌ, lajchaveꞌ abꞌil sqꞌuinal vin̈ ayic ix och vin̈ reyal. 55 abꞌil ix yacꞌ reyal vin̈ dꞌa Jerusalén. 2 Te chuc tas ix scꞌulej vin̈ dꞌa yichan̈ Jehová, yujto a juntzan̈ tastac yajbꞌentac sbꞌeybꞌalej juntzan̈ chon̈abꞌ yicꞌnaquel Jehová dꞌa yichan̈ ebꞌ israel dꞌa sat sluum tic, a chiꞌ ix sbꞌeybꞌalej vin̈. 3 Ix schec vin̈ bꞌochajxiqꞌue juntzan̈ lugar yic ejmelal bꞌajtac chaan̈, aton juntzan̈ yicꞌnaquel vin̈ smam vin̈. Ix schecan vin̈ bꞌochajxiqꞌue altar yic comon dios Baal yedꞌ yechel comon dios Asera. Ix yalan sbꞌa vin̈ dꞌa masanil tas syacꞌ scꞌacꞌal dꞌa satchaan̈, ix yacꞌanpaxem sbꞌa vin̈ dꞌay. 4 Ix schecan vin̈ bꞌochajqꞌue juntzan̈ altar dꞌa stemplo Jehová dꞌa Jerusalén, aton jun templo chiꞌ bꞌaj yalnac Jehová to ol bꞌinajn̈ej sbꞌi dꞌa masanil tiempo. 5 Ix schecanpax vin̈ bꞌochajqꞌue juntzan̈xo altar dꞌa chabꞌxo yamaqꞌuil stemplo Jehová chiꞌ, yic syal sbꞌa vin̈ dꞌa masanil tas syacꞌ scꞌacꞌal dꞌa satchaan̈.6 Ix sn̈usantzꞌa ebꞌ yuninal vin̈ silabꞌil dꞌa schꞌolanil yic Ben-hinom. Ix scꞌanbꞌan sbꞌa vin̈ dꞌa ebꞌ ajbꞌaal, dꞌa ebꞌ ajchum, dꞌa ebꞌ naumel lolonel. Ix scuchbꞌan ebꞌ anima vin̈ yic scꞌuman spixan chamnac. Te chuc tas ix scꞌulej vin̈, yuj chiꞌ ix stzuntzejcot yoval scꞌol Jehová vin̈ dꞌa yibꞌan̈. 7 Ix schecan vin̈ acꞌchajoch yechel comon dios dꞌa yol scajnubꞌ Jehová Dios. Aton yuj jun cajnubꞌ chiꞌ yalnac Jehová dꞌa vin̈aj David yedꞌ dꞌa vin̈aj Salomón icha tic: A jun pat dꞌa Jerusalén tic, ix in sicꞌcanel dꞌa yol smacbꞌen ebꞌ yin̈tilal Israel, in cajnubꞌ tzꞌajcan dꞌa juneln̈ej. 8 Man̈xo ol ex viqꞌuel a ex israel ex tic dꞌa jun lum luum vacꞌnac dꞌa ebꞌ e mam eyicham, tato tze cꞌanabꞌajej masanil in cꞌaybꞌubꞌal, in checnabꞌil yedꞌ in cachnabꞌil in chec yacꞌnaccan vin̈aj Moisés dꞌayex, xchi Jehová.
9 Palta axo vin̈aj Manasés chiꞌ ix cuchbꞌan val ebꞌ aj Jerusalén dꞌa chucal yedꞌ juntzan̈xo ebꞌ ay dꞌa yol yic Judá chiꞌ. Yelxo val te chuc ix aj sbꞌeybꞌal ebꞌ dꞌa yichan̈ schuc bꞌeybꞌal juntzan̈ chon̈abꞌ satbꞌilel yuj Jehová dꞌa yichan̈ ebꞌ smam yicham ebꞌ dꞌa pecaꞌ. 10 Ix cachji vin̈aj Manasés yedꞌ masanil ebꞌ anima chiꞌ yuj Jehová, palta maj scꞌanabꞌajej ebꞌ. 11 Yuj chiꞌ a Jehová ix acꞌancot ebꞌ yajalil ebꞌ soldado vin̈ sreyal Asiria dꞌa ebꞌ, ix yamchaj vin̈aj Manasés chiꞌ yuj ebꞌ. Ix yacꞌanoch gancho ebꞌ dꞌa sn̈iꞌ vin̈, ix tzecꞌchaj vin̈ dꞌa qꞌuen cadena nabꞌa bronce, ix yicꞌanbꞌat vin̈ ebꞌ dꞌa Babilonia.
12 Ayic ix yabꞌan val syail vin̈ chiꞌ, ix lesalvi vin̈ dꞌa Jehová Dios. Yelcꞌolal val ix yiqꞌuem sbꞌa vin̈ dꞌa yichan̈ sDiosal smam yicham. 13 Ayic ix lesalvi vin̈ chiꞌ, ix yabꞌan Dios tas ix scꞌan vin̈ chiꞌ, yuj chiꞌ ix meltzajxi vin̈ yuj Jehová dꞌa Jerusalén chiꞌ yic tzꞌochxi vin̈ dꞌa yopisio. Icha chiꞌ ix aj snachajel yuj vin̈ to an̈ej Jehová Dios toni.
14 Ix lajvi chiꞌ, ix schecan vin̈ bꞌochajxiqꞌue smuroal schon̈abꞌ vin̈aj David dꞌa stojolal bꞌaj tzꞌem cꞌu dꞌa aꞌ Gihón dꞌa pan̈an bꞌaj ay sjaj a aꞌ chiꞌ, masanto scꞌoch dꞌa spuertail yic nocꞌ chay. Ix vachꞌ bꞌoji pax bꞌaj scumlaj muro chiꞌ. Chaan̈ ix ajqꞌue muro chiꞌ. Ix yacꞌanpaxoch ebꞌ yajalil ebꞌ soldado vin̈ dꞌa masanil chon̈abꞌ ayoch smuroal dꞌa yol yic Judá chiꞌ. 15 Ix schecan vin̈ icꞌchajel sdiosal ebꞌ chꞌoc chon̈abꞌil yedꞌ juntzan̈ yechel ix yacꞌoch vin̈ dꞌa yol scajnubꞌ Jehová yedꞌ juntzan̈ altar ix schec vin̈ bꞌojoc dꞌa jun tzalan yic templo chiꞌ yedꞌ juntzan̈xo dꞌa Jerusalén chiꞌ. A juntzan̈ chiꞌ ix schec vin̈ julchajcanel dꞌa stitaquel chon̈abꞌ chiꞌ. 16 Ix lajvi chiꞌ ix schecan vin̈ vachꞌ bꞌochajxi altar dꞌa Jehová, ix yacꞌan silabꞌ vin̈ yic schꞌoxan sjuncꞌolal yedꞌ Dios yedꞌ silabꞌ yic acꞌoj yuj diosal. Ix yalan vin̈ dꞌa masanil ebꞌ aj Judá to tzꞌoch ebꞌ ejmelal dꞌa Jehová Dios. 17 Palta a ebꞌ anima chiꞌ, an̈ejaꞌ ix yacꞌn̈ej silabꞌ ebꞌ dꞌa juntzan̈ lugar yic ejmelal bꞌajtac chaan̈, vachꞌchom a dꞌa Jehová sDiosal ebꞌ syacꞌ yalani.
18 A jantacto yabꞌixal vin̈aj Manasés chiꞌ yedꞌ slesal vin̈ dꞌa Dios yedꞌ tas ix schec Jehová yal ebꞌ schecabꞌ, aycan bꞌaj tzꞌibꞌabꞌilcan yabꞌixal ebꞌ vin̈ sreyal Israel. 19 Tzꞌibꞌabꞌil pax slesal vin̈ yedꞌ tas ix aj spacan Dios. An̈ejtonaꞌ pax tas ix aj yoch spitalil vin̈ yedꞌ yic ejmelal ix sbꞌoqꞌue vin̈ bꞌajtac chaan̈ yedꞌ bꞌajtac ix bꞌochaj yechel Asera yedꞌ juntzan̈xo yechel comon dios ayic manto sna sbꞌa vin̈ dꞌa yichan̈ Jehová, aycan dꞌa yumal ix stzꞌibꞌejcan ebꞌ schecabꞌ Dios. 20 Ayic ix cham vin̈, ix mucji vin̈ bꞌaj ay juntzan̈ tas avabꞌil dꞌa spalacio. Axo vin̈aj Amón yuninal vin̈ ix ochcan reyal sqꞌuexuloc.
Ochnac vin̈aj Amón reyal
21 A vin̈aj Amón chiꞌ, 22 abꞌil sqꞌuinal vin̈ ayic ix schaanel yich vin̈ yacꞌan reyal, chabꞌ abꞌil ix yacꞌ reyal vin̈ dꞌa Jerusalén. 22 Ix stzuntzejcot yoval scꞌol Jehová vin̈ dꞌa yibꞌan̈ icha ix scꞌulej vin̈ smam vin̈. Ix sn̈us silabꞌ vin̈ dꞌa juntzan̈ comon dios bꞌobꞌilcan yuj vin̈ smam vin̈ chiꞌ, ix ochpax vin̈ ejmelal dꞌay. 23 Maj yiqꞌuemlaj sbꞌa vin̈ dꞌa Jehová icha scꞌulejnac vin̈ smam vin̈ chiꞌ, palta a val chucal ix ste cꞌulej vin̈.