6 An̈ejtonaꞌ ix sn̈usanpaxtzꞌa yuninal vin̈ silabꞌil dꞌa junoc sdiosal chiꞌ. Ix scꞌanbꞌan sbꞌa vin̈ dꞌa ebꞌ ajbꞌaal, dꞌa ebꞌ ajchum, dꞌa ebꞌ naumel lolonel. Ix scꞌanbꞌanpax sbꞌa vin̈ dꞌa ebꞌ tzꞌavtan spixan ebꞌ chamnac. Te chuc tas ix scꞌulej vin̈, yuj chiꞌ ix stzuntzejcot yoval scꞌool Jehová vin̈ dꞌa yibꞌan̈. 7 Ix yacꞌpaxoch jun teꞌ yechel Asera vin̈ dꞌa yol stemplo Jehová, aton jun templo chiꞌ yalnaccan Jehová dꞌa vin̈aj David yedꞌ dꞌa vin̈ yuninal aton vin̈aj Salomón icha tic: A dꞌa in templo dꞌa Jerusalén, jun chon̈abꞌ ix in sicꞌcanel dꞌa scal masanil chon̈abꞌ dꞌa yol smacbꞌen Israel tic, a dꞌay ol in cajnaj dꞌa juneln̈ej. 8 Tato ol scꞌanabꞌajej masanil in checnabꞌil ebꞌ eyetchon̈abꞌ yedꞌ in cachnabꞌil yedꞌ pax in cꞌaybꞌubꞌal in checnac yal vin̈ in checabꞌ aj Moisés dꞌa ebꞌ, man̈xo ol viqꞌuel ebꞌ dꞌa sat jun lum luum vacꞌnac dꞌa e mam eyicham, xchi Jehová.

9 Palta maj scha yabꞌ juntzan̈ chiꞌ ebꞌ. A val vin̈ rey chiꞌ ix cuchbꞌan ebꞌ dꞌa chucal chiꞌ. Ecꞌbꞌal chucal ix scꞌulej ebꞌ dꞌa yichan̈ juntzan̈ nación satbꞌilel yuj Jehová dꞌa yichan̈ ebꞌ smam yicham ebꞌ dꞌa pecaꞌ. 10 Yuj chiꞌ ix yal Jehová dꞌa ebꞌ schecabꞌ: 11 A vin̈aj Manasés chiꞌ, a tas te yajbꞌentac scꞌulej vin̈ dꞌa vichan̈, yelxo val ecꞌbꞌal chucal scꞌulej vin̈ dꞌa yichan̈ ebꞌ amorreo, ebꞌ ecꞌnac dꞌa yalan̈taxo. Scuchbꞌan ebꞌ yetchon̈abꞌ vin̈ dꞌa chucal yic tzꞌoch ebꞌ ejmelal dꞌa juntzan̈ yechel. 12 Yuj chiꞌ a in Jehová sDiosal Israel sval icha tic: Ol vicꞌcot yaelal dꞌa yibꞌan̈ Jerusalén yedꞌ dꞌa yibꞌan̈ Judá tic, ol te sat scꞌol ebꞌ ol abꞌanoc. 13 Ol vacꞌoch yaelal dꞌa yibꞌan̈ Jerusalén tic icha ix vutej Samaria yedꞌ ebꞌ yin̈tilal vin̈aj Acab. Ol viqꞌuel masanil ebꞌ anima cajan dꞌay, lajan ol ajcan icha junoc ucꞌabꞌ ayic slajvi sbꞌicchaji n̈ojan tzꞌajcani. 14 Axo jayvan̈ocxo ebꞌ in chon̈abꞌ tic, ol vactejcan ebꞌ, ol vacꞌcanoch ebꞌ dꞌa yol scꞌabꞌ ebꞌ ajcꞌool, yic vachꞌ ol icꞌchajecꞌ masanil tastac ay dꞌa ebꞌ. 15 Yictax vicꞌannaquelta ebꞌ smam yicham ebꞌ dꞌa Egipto, stzuntzejn̈ejcot yoval in cꞌool ebꞌ yuj chucal scꞌulej ebꞌ dꞌa vichan̈, xchi dꞌa ebꞌ schecabꞌ.

16 Ix te cuchbꞌaj val ebꞌ aj Judá yuj vin̈aj Manasés chiꞌ dꞌa chucal dꞌa yichan̈ Jehová. Tzijtum pax ebꞌ anima malaj smul ix smilcham vin̈, ix laj bꞌey schiqꞌuil ebꞌ smasanil dꞌa smacbꞌen Jerusalén. 17 A jantacto yabꞌixal vin̈aj Manasés chiꞌ yedꞌ tastac ix scꞌulej vin̈ yedꞌ jantac smul vin̈ ix ochi, tzꞌibꞌabꞌilcan bꞌaj aycan yabꞌixal ebꞌ vin̈ sreyal Judá. 18 Ayic ix cham vin̈, a dꞌa scaltac teꞌ avbꞌen teꞌ yic vin̈aj Uza dꞌa stiꞌ spalacio vin̈ ix mucchaji. Axo vin̈aj Amón yuninal vin̈ ix ochcan reyal sqꞌuexuloc.

19 A vin̈aj Amón chiꞌ, 22 abꞌil sqꞌuinal vin̈ ayic ix och vin̈ reyal dꞌa Judá. Chabꞌ abꞌil ix yacꞌ reyal vin̈ dꞌa Jerusalén. Mesulemet sbꞌi ix snun vin̈, yisil ix vin̈aj Haruz aj Jotba. 20 Te chuc tas ix scꞌulej vin̈ dꞌa yichan̈ Jehová icha scꞌulejnac vin̈aj Manasés smam vin̈. 21 A sbꞌeybꞌal vin̈ smam vin̈ chiꞌ ix sbꞌeybꞌalej, ix och vin̈ ejmelal dꞌa juntzan̈ yechel bꞌaj ochnac vin̈ smam vin̈ chiꞌ ejmelal. 22 Icha chiꞌ ix aj spaticanel Jehová Dios vin̈, aton sDiosal ebꞌ smam yicham vin̈. Maj scꞌanabꞌajejlaj schecnabꞌil Jehová vin̈.

23 A ebꞌ vin̈ ayoch yajalil yedꞌ vin̈, ix meltzajoch ebꞌ vin̈ ajcꞌolal dꞌa vin̈, ix miljicham vin̈ yuj ebꞌ vin̈ dꞌa yol spalacio. 24-26 Yuj chiꞌ, axo ebꞌ aj Judá ix milancham ebꞌ vin̈ ix milancham vin̈ rey chiꞌ, axo vin̈aj Josías yuninal vin̈ ix yacꞌoch ebꞌ reyal sqꞌuexuloc. A jantacto yabꞌixal vin̈aj Amón yedꞌ tastac ix scꞌulej, tzꞌibꞌabꞌilcan bꞌaj aycan yabꞌixal ebꞌ vin̈ sreyal Judá. Ayic ix cham vin̈, a dꞌa scaltac teꞌ avbꞌen teꞌ yic vin̈aj Uza ix mucji vin̈.