3 Ayic 18 abꞌilxo yoch vin̈aj Josías chiꞌ reyal, ix schecanbꞌat vin̈ stzꞌibꞌum vin̈ dꞌa stemplo Jehová, aton vin̈aj Safán yuninal vin̈aj Azalías yixchiquin vin̈aj Mesulam. Ix yalan vin̈ rey chiꞌ dꞌa vin̈ icha tic:

4 —Ixic dꞌa vin̈aj Hilcías vin̈ sat sacerdote, tzalan dꞌa vin̈ to smolbꞌej qꞌuen tumin vin̈ tzꞌacꞌji dꞌa stemplo Jehová, qꞌuen scha ebꞌ stan̈van puerta bꞌaj tzꞌoch ebꞌ anima, 5 syacꞌan qꞌuen vin̈ dꞌa ebꞌ vin̈ yajal yaj yilan sbꞌochajxi templo chiꞌ yic stupchaj ebꞌ vin̈ smunlaj dꞌay, 6 aton ebꞌ vin̈ n̈icum teꞌ yedꞌ ebꞌ vin̈ tzꞌilan tas tzꞌaj sbꞌo munlajel chiꞌ yedꞌ ebꞌ vin̈ albañil. Smanchajpax te teꞌ yedꞌ qꞌuen qꞌueen tzeybꞌil, yic sbꞌochajxi templo chiꞌ. 7 Man̈ yovaliloc scꞌanchaj yumal qꞌuen tumin chiꞌ dꞌa ebꞌ vin̈ tzꞌilan munlajel chiꞌ, yujto tzꞌacan syutej ebꞌ vin̈ sbꞌoani, xchi vin̈.

8 Ix lajvi chiꞌ, ix yalan vin̈aj Hilcías chiꞌ dꞌa vin̈aj Safán to ix checlaj bꞌaj tzꞌibꞌabꞌilcan ley dꞌa yol stemplo Jehová. Ix yacꞌan chꞌan̈ vin̈ dꞌa vin̈aj Safán chiꞌ, ix yavtan chꞌan̈ vin̈. 9 Ix lajvi chiꞌ, ix bꞌat vin̈aj Safán chiꞌ yal dꞌa vin̈ rey chiꞌ icha tic:

—Toxo ix smol qꞌuen tumin ay dꞌa yol templo ebꞌ vin̈ a checabꞌ, ix yacꞌan qꞌuen ebꞌ vin̈ dꞌa ebꞌ vin̈ ayoch yajalil yilan sbꞌochajxi stemplo Jehová chiꞌ, xchi vin̈.

10 An̈ejtonaꞌ ix yalanxi vin̈ to ix acꞌji jun chꞌan̈ uum dꞌa vin̈ yuj vin̈aj sacerdote Hilcías, yuj chiꞌ ix yavtej chꞌan̈ vin̈ yabꞌ vin̈ rey chiꞌ. 11 Ayic ix yabꞌan vin̈ rey chiꞌ tas syal dꞌa yol chꞌan̈, ix sn̈icꞌchitan spichul vin̈, 12 ix schecan vin̈ avtaj vin̈aj Hilcías chiꞌ, vin̈aj Safán tzꞌibꞌum yedꞌ vin̈aj Ahicam yuninal vin̈aj Safán chiꞌ, vin̈aj Acbor yuninal vin̈aj Micaías yedꞌ vin̈aj Asaías schecabꞌ vin̈ rey chiꞌ. Ix yalan vin̈ rey chiꞌ dꞌa ebꞌ vin̈ icha tic:

13 —Ixiquec e cꞌanbꞌej dꞌa Jehová vuuj, yuj ebꞌ chon̈abꞌ, yuj pax masanil ebꞌ aj Judá, tas syalelcꞌoch chꞌan̈ ley tic. Ay am cot yoval scꞌol Jehová chiꞌ dꞌa quibꞌan̈, yujto maj scꞌanabꞌajej ebꞌ co mam quicham tas syal chꞌan̈, xchi vin̈.

14 Yuj chiꞌ ix bꞌat vin̈aj sacerdote Hilcías, vin̈aj Ahicam, vin̈aj Acbor, vin̈aj Safán yedꞌ vin̈aj Asaías yil ix schecabꞌ Dios, ix scuchan Hulda yetbꞌeyum vin̈aj Salum yuninal vin̈aj Ticva, yixchiquin vin̈aj Harhas. A vin̈aj Salum chiꞌ, a vin̈ stan̈van bꞌaj sicꞌchaj cꞌapac pichul dꞌa templo. A ix Hulda chiꞌ, a dꞌa junxo macan̈ yic Jerusalén toto bꞌonac, ataꞌ cajan ix. Ayic ix lolonbꞌat ebꞌ vin̈ dꞌa ix, 15 ix tacꞌvi ix dꞌa ebꞌ vin̈ icha tic:

—A Jehová co Diosal a on̈ israel on̈ tic, a tzꞌalan icha tic: Alec dꞌa vin̈ ix ex checancot e cꞌanbꞌej tic dꞌayin 16 to a in ol vacꞌcot junoc yaelal dꞌa yibꞌan̈ jun chon̈abꞌ tic yedꞌ dꞌa yibꞌan̈ ebꞌ cajan dꞌa tic, icha yalan chꞌan̈ ley ix yavtej vin̈ sreyal Judá chiꞌ. 17 Yujto ix in yactejcan ebꞌ anima tic, ix sn̈usan incienso ebꞌ dꞌa juntzan̈ comon dios, ix stzuntzancot yoval in cꞌol ebꞌ yuj juntzan̈ sdiosal ebꞌ ix sbꞌo chiꞌ. Yuj val chiꞌ ix cot voval dꞌa jun lugar tic. Man̈xo ol sicbꞌilaj voval chiꞌ, xchi Jehová. 18 Alec dꞌa vin̈ rey chiꞌ, vin̈ ix ex checancot e cꞌanbꞌej dꞌa Jehová: A Jehová co Diosal a on̈ israel on̈ tic tzꞌalan icha tic: Yujto ix avtej tas ayem dꞌa yol chꞌan̈ uum chiꞌ, 19 ix acꞌanoch dꞌa a cꞌool, yuj chiꞌ ix al a bꞌa dꞌayin, ix a n̈icꞌchitanbꞌat a pichul, ix ach ocꞌqꞌue dꞌa vichan̈. Yujto ix abꞌpax tas ix valaꞌ to ol satjoquel a chon̈abꞌ tic, ol in catabꞌan ebꞌ cajan dꞌay, yuj chiꞌ toxo ix vabꞌ tas ix alaꞌ. Sval dꞌayach 20 to ix ach vacꞌ nivancꞌolal, ol ach mucjoc dꞌa juncꞌolal. Man̈xo ol il-laj jun yaelal ol vacꞌcot dꞌa yibꞌan̈ jun chon̈abꞌ tic, xchi Jehová, xchi ix Hulda chiꞌ. Ix paxta ebꞌ vin̈ schecabꞌ vin̈ rey chiꞌ yic tzul yalan ebꞌ vin̈ dꞌa vin̈ tas ix bꞌat yabꞌ ebꞌ vin̈ chiꞌ.