4 Ix lajvi chiꞌ, ix yalan vin̈ rey chiꞌ dꞌa vin̈ sat sacerdote aj Hilcías yedꞌ dꞌa juntzan̈xo ebꞌ vin̈ sacerdote yedꞌ dꞌa ebꞌ vin̈ stan̈van spuertail templo to syiqꞌuelta ebꞌ vin̈ masanil tastac ay dꞌa yol stemplo Jehová, aton yamcꞌabꞌ scꞌan ebꞌ anima yic tzꞌoch ebꞌ ejmelal dꞌa Baal, dꞌa Asera yedꞌ dꞌa qꞌuen cꞌanal. Ix yiqꞌuel ebꞌ vin̈ dꞌa stiel chon̈abꞌ Jerusalén, ix sn̈usantzꞌa ebꞌ vin̈ dꞌa stiꞌ aꞌ Cedrón, ix lajvi chiꞌ ix icꞌjibꞌat staan̈il dꞌa Betel. 5 Ix yicꞌanel yopisio ebꞌ vin̈ sacerdote vin̈ rey chiꞌ, aton ebꞌ vin̈ sn̈usantzꞌa incienso bꞌaj chaan̈ dꞌa yol yic Judá yedꞌ dꞌa stitac chon̈abꞌ Jerusalén, aton ebꞌ vin̈ acꞌbꞌil yopisio yuj ebꞌ vin̈ rey ecꞌnac. Ix icꞌchajpaxel ebꞌ vin̈ sacerdote sn̈usantzꞌa incienso dꞌa Baal, dꞌa cꞌu, dꞌa qꞌuen uj, dꞌa qꞌuen cꞌanal yedꞌ dꞌa juntzan̈ nivac cꞌanal sbꞌeyecꞌ dꞌa satchaan̈. 6 Ix yicꞌanpaxel jun yechel Asera vin̈ rey chiꞌ, aton jun ayoch dꞌa yol stemplo Jehová. Ix bꞌat yacꞌancan ebꞌ dꞌa stiel chon̈abꞌ Jerusalén. Ix n̈uschajtzꞌa dꞌa stiꞌ aꞌ Cedrón, ix stenanchojoc stan̈il chiꞌ vin̈, ix stzicanbꞌat vin̈ dꞌa yibꞌan̈ bꞌaj mucan ebꞌ comon anima. 7 Ix pojjipaxem juntzan̈ yedꞌtal ebꞌ vin̈ ix-vinac yuj vin̈, aton bꞌobꞌil dꞌa yamaqꞌuil stemplo Jehová. Ataꞌ schꞌalvipax ebꞌ ix ix sbꞌoan cꞌapac mantiado yic Asera.

8 Ix lajvi chiꞌ, ix yavtancot masanil ebꞌ vin̈ sacerdote vin̈ rey chiꞌ, aton ebꞌ vin̈ ay dꞌa junjun chon̈abꞌ dꞌa yol yic Judá, ix yixtanbꞌat masanil altar vin̈ dꞌa masanil lugar chaan̈ dꞌa Geba masanto dꞌa Beerseba, aton bꞌaj sn̈ustzꞌa incienso juntzan̈ ebꞌ vin̈ sacerdote. Ix spojanpaxem juntzan̈ altar vin̈, juntzan̈ ay dꞌa spuertail chon̈abꞌ scan dꞌa stojolal sqꞌuexan mach tzꞌoch dꞌa yol chon̈abꞌ chiꞌ, aton jun puerta yic vin̈aj Josué yajal dꞌa Jerusalén. 9 A ebꞌ vin̈ sacerdote yin̈tilal Leví ix acꞌan silabꞌ dꞌa juntzan̈ lugar chaan̈, majxo cꞌochlaj ebꞌ vin̈ dꞌa altar yic Jehová dꞌa Jerusalén, axon̈ej svael ebꞌ vin̈ tzꞌacꞌji yuj ebꞌ vin̈ yetsacerdoteal chiꞌ.

10 Ix yixtanpaxbꞌat jun lugar vin̈ rey chiꞌ, jun scuchan Tofet dꞌa schꞌolanil Ben-hinom bꞌaj sn̈usjitzꞌa ebꞌ unin silabꞌil dꞌa jun comon dios scuchan Moloc, yic man̈xa junoc mach scꞌulan jun chucal chiꞌ. 11 Ix yicꞌanpaxel nocꞌ chej vin̈, nocꞌ ayoch yuj ebꞌ vin̈ sreyal Judá yic tzꞌoch ejmelal dꞌa cꞌu. Ix sn̈usantzꞌa scarruaje nocꞌ chej chiꞌ vin̈. A juntzan̈ chiꞌ, a dꞌa jun amacꞌ dꞌa slacꞌanil bꞌaj tzꞌoch anima dꞌa yol stemplo Jehová, ataꞌ ay, dꞌa stzꞌey scuarto jun vin̈ ay yopisio scuchan Natán-melec. 12 Ix spojanpaxem juntzan̈ altar vin̈ rey chiꞌ, juntzan̈ bꞌobꞌilcan yuj ebꞌ vin̈ sreyal Judá dꞌa span̈anil yibꞌan̈ scuartocan vin̈aj rey Acaz. Ay pax juntzan̈ altar bꞌobꞌilcan yuj vin̈aj rey Manasés dꞌa chabꞌ yamaqꞌuil stemplo Jehová, ix smacꞌpoj vin̈, ix syumancanbꞌat scꞌajil vin̈ dꞌa yol aꞌ Cedrón.

13 Ix yixtanpaxbꞌat juntzan̈ lugar vin̈, juntzan̈ chaan̈ dꞌa stojolal bꞌaj sjavi cꞌu dꞌa Jerusalén, dꞌa stojolal sur dꞌa tzalan Olivo, aton jun sbꞌonaccan vin̈aj Salomón sreyal Israel, aton Astarté sdiosal ebꞌ aj Sidón, Quemos sdiosal ebꞌ moabita yedꞌ Milcom sdiosal ebꞌ amonita. Masanil juntzan̈ chiꞌ yajbꞌilel yuj Jehová. 14 Ix smacꞌanpaxpoj qꞌuen qꞌueen vin̈, qꞌuen chajul yaj dꞌa ebꞌ anima, ix chꞌacchajpaxel teꞌ yechel Asera. Ix saclemajbꞌat sbꞌaquil chamnac taꞌ yuj vin̈. 15 Ix smacꞌpaxpoj jun altar vin̈ yedꞌ templo dꞌa Betel, aton sbꞌonaccan vin̈aj rey Jeroboam yuninal vin̈aj Nabat, vin̈ cuchbꞌannacbꞌat ebꞌ yetisraelal dꞌa chucal. Pococxon̈ej ix aji, ix sn̈usantzꞌa yechel dios Asera chiꞌ vin̈.

16 Ix ecꞌ qꞌueleloc vin̈aj Josías chiꞌ, ix yilanbꞌat juntzan̈ yedꞌtal chamnac vin̈ dꞌa jun tzalan, ix yalan vin̈ to tzꞌicꞌchajelta sbꞌaquil chamnac ayoch dꞌa yool chiꞌ, ix sn̈usantzꞌa vin̈ dꞌa yibꞌan̈ altar yic tzꞌixtaxbꞌati. Icha chiꞌ ix aj yelcꞌoch tas yalnaccan jun vin̈ schecabꞌ Jehová dꞌa pecaꞌ. 17 Ix scꞌanbꞌan vin̈aj rey Josías chiꞌ:

—¿Mach ay yic jun yedꞌtal chamnac svilbꞌat chiꞌ? xchi vin̈. Ix tacꞌvi ebꞌ cajan dꞌa Betel chiꞌ dꞌa vin̈ icha tic:

—Aton bꞌaj mucan jun vin̈ schecabꞌ Dios cotnac dꞌa Judá, a vin̈ aljinaccan yuj tas ix utej jun altar dꞌa Betel tic, xchi ebꞌ dꞌa vin̈.^*

18 Ix yalan vin̈:

—Actejeccani, malaj junoc mach syaman sbꞌaquil chiꞌ, xchi vin̈.

Yuj chiꞌ majxo yamjilaj sbꞌaquil jun vin̈ schecabꞌ Dios chiꞌ yedꞌ sbꞌaquil junxo vin̈ schecabꞌ Dios cotnac dꞌa Samaria.

19 Icha ix yutej vin̈aj Josías chiꞌ dꞌa Betel chiꞌ, icha pax chiꞌ ix yutej vin̈ satanel juntzan̈ lugar chaan̈, juntzan̈ bꞌobꞌil dꞌa Samaria chiꞌ yuj ebꞌ vin̈ sreyal Israel, juntzan̈ stzuntzancot yoval scꞌol Jehová. 20 Ix lajvi chiꞌ, axo dꞌa yibꞌan̈ juntzan̈ altar ix smilcham masanil ebꞌ vin̈ sacerdote vin̈, aton ebꞌ vin̈ yic juntzan̈ lugar chaan̈ dꞌa Samaria chiꞌ. Ix sn̈usantzꞌa sbꞌaquil juntzan̈ chamnac vin̈ dꞌa yibꞌan̈ juntzan̈ altar chiꞌ. Ix lajvi chiꞌ ix paxta vin̈ dꞌa Jerusalén.

21 Ix lajvi chiꞌ ix yalan vin̈aj Josías dꞌa masanil ebꞌ chon̈abꞌ icha tic: Caqꞌuecoch qꞌuin̈ yic sco naancot tas aj yelnaccot ebꞌ co mam quicham dꞌa Egipto yic squicꞌanchaan̈ sbꞌi Jehová co Diosal, icha syalcan dꞌa yumal trato, xchi vin̈. 22 Yuj chiꞌ ix och jun qꞌuin̈ chiꞌ. Yictax ix lajviecꞌ stiempoal ebꞌ juez, ebꞌ ix acꞌan yajalil dꞌa chon̈abꞌ Israel, malaj juneloc ix och jun qꞌuin̈ icha jun chiꞌ dꞌa stiempoal ebꞌ vin̈ ix acꞌan reyal dꞌa Judá yedꞌ dꞌa Israel. 23 Yic val 18 abꞌil yoch vin̈aj Josías chiꞌ reyal ix och jun qꞌuin̈ chiꞌ dꞌa Jerusalén, yuj yicꞌjichaan̈ Jehová.

24 Masanil ebꞌ tzꞌavtan spixan ebꞌ chamnac, ebꞌ ajbꞌaal yedꞌ juntzan̈ yechel dꞌa yoltac pat, ix satjiel yuj vin̈aj Josías chiꞌ. Masanil pax juntzan̈ comon dios yajbꞌentac ay dꞌa Jerusalén yedꞌ dꞌa yol smacbꞌen Judá ix satel vin̈. Icha chiꞌ ix scꞌulej vin̈ yic scꞌanabꞌajan vin̈ tas syalcan dꞌa yumal ley ix chax yuj vin̈aj sacerdote Hilcías dꞌa yol stemplo Jehová. 25 Malaj junocxo rey ecꞌnacxo ix sqꞌuex spensar yic syacꞌanoch sbꞌa dꞌa yol scꞌabꞌ Jehová dꞌa smasanil scꞌool, dꞌa smasanil spensar yedꞌ dꞌa smasanil yip, icha ix yutej sbꞌa vin̈aj Josías chiꞌ, yujto ix scꞌanabꞌajej vin̈ tas albꞌilcan dꞌa ley Moisés. Man̈xalaj pax junocxo rey icha chiꞌ ix yutej sbꞌa.

26 Vachꞌchom icha chiꞌ ix scꞌulej vin̈, palta yuj tas te chuc scꞌulejnac vin̈aj Manasés, yuj chiꞌ aycot yoval scꞌol Jehová dꞌa Judá chiꞌ. 27 Yuj chiꞌ ix yal Jehová icha tic: Ol viqꞌuel Judá dꞌa vichan̈, icha vutejnac Israel. Ol in patiquejcanel Jerusalén, jun chon̈abꞌ sicꞌbꞌilel vuuj yedꞌ jun templo tic, jun valnac yuuj to a dꞌay tzꞌoch ejmelal dꞌayin, xchi.

28-30 A dꞌa stiempoal chiꞌ ix cot vin̈aj Necao sreyal Egipto yedꞌ ebꞌ soldado yic sbꞌat ebꞌ dꞌa aꞌ nivan Éufrates, yic sbꞌat colvaj vin̈ yedꞌ vin̈ sreyal Asiria. Ix bꞌat vin̈aj rey Josías yedꞌ ebꞌ soldado yacꞌ oval yedꞌ vin̈aj Necao chiꞌ dꞌa Meguido. Ayic ix schalan sbꞌa ebꞌ vin̈ dꞌa oval chiꞌ, ix miljicham vin̈aj Josías chiꞌ yuj vin̈. Ix acꞌjiqꞌue snivanil vin̈ dꞌa yol carruaje yuj ebꞌ vin̈ ayoch yajalil yedꞌ vin̈. Ix cot ebꞌ vin̈ dꞌa Meguido chiꞌ masanto ix javi ebꞌ vin̈ dꞌa Jerusalén, ix acꞌjicanoch snivanil vin̈ chiꞌ dꞌa jun yedꞌtal bꞌobꞌilxo. Axo ebꞌ anima smasanil dꞌa yol chon̈abꞌ chiꞌ ix acꞌanoch vin̈aj Joacaz yuninal vin̈ reyal sqꞌuexuloc.

A jantacto yabꞌixal vin̈aj Josías chiꞌ yedꞌ tastac ix scꞌulej vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Judá.

31 A vin̈aj Joacaz chiꞌ, 23 abꞌil sqꞌuinal vin̈ ayic ix och vin̈ reyal dꞌa Jerusalén. Oxen̈ej ujal ix yacꞌ reyal chiꞌ vin̈. Hamutal sbꞌi ix snun vin̈, yisil ix vin̈aj Jeremías aj Libna. 32 Te chuc tas ix scꞌulej vin̈ dꞌa yichan̈ Jehová, icha ix scꞌulej ebꞌ smam yicham vin̈. 33 Ix acꞌjioch vin̈ dꞌa preso yuj vin̈aj rey Necao dꞌa Ribla dꞌa yol yic Hamat, yic vachꞌ maxtzac yacꞌ yajalil vin̈ dꞌa Jerusalén. Ix yacꞌanoch qꞌuen tumin vin̈aj Necao chiꞌ dꞌa yibꞌan̈ ebꞌ aj Judá chiꞌ, 75 quintal qꞌuen plata yedꞌ oxeꞌ arroba qꞌuen oro. 34 Axo vin̈aj Eliaquim yuninal vin̈aj Josías chiꞌ ix yacꞌoch vin̈aj rey Necao chiꞌ reyal sqꞌuexuloc vin̈ smam chiꞌ. Ix sqꞌuexan sbꞌi vin̈aj Eliaquim chiꞌ vin̈, Joacim ix sbꞌiej vin̈. Ix yicꞌanbꞌat vin̈aj Joacaz chiꞌ vin̈ dꞌa Egipto. Ataꞌ ix cham vin̈aj Joacaz chiꞌ.

35 Ix yacꞌan qꞌuen oro vin̈aj Joacim chiꞌ yedꞌ qꞌuen plata scꞌan vin̈ sreyal Egipto chiꞌ. Yuj chiꞌ ix yacꞌoch qꞌuen vin̈ dꞌa yibꞌan̈ ebꞌ anima dꞌa yol smacbꞌen chiꞌ, junjun anima ix yacꞌ qꞌuen oro yedꞌ qꞌuen plata, icha tastac ay dꞌa junjun ebꞌ. Icha chiꞌ ix aj smolan qꞌuen tumin vin̈ ix can dꞌa yibꞌan̈ chiꞌ.

36 A vin̈aj Joacim chiꞌ, 25 abꞌil sqꞌuinal vin̈ ayic ix och vin̈ reyal, 11 abꞌil ix yacꞌ reyal vin̈ dꞌa Jerusalén. Zebu sbꞌi ix snun vin̈, yisil ix vin̈aj Pedaías aj Ruma. 37 Te chuc tas ix scꞌulej vin̈ dꞌa yichan̈ Jehová, icha val ix scꞌulej ebꞌ smam yicham vin̈.