Ix och qꞌuin̈ yuj vin̈aj Josías
35
Ix och qꞌuin̈ yuj vin̈aj Josías chiꞌ yic syicꞌanchaan̈ Jehová vin̈ dꞌa Jerusalén chiꞌ, aton yic snaancot ebꞌ ayic yelnaccot ebꞌ smam yicham ebꞌ dꞌa Egipto. Ayic 14 yoch bꞌabꞌel uj ix smilcham nocꞌ calnel ebꞌ silabꞌil yuj qꞌuin̈ chiꞌ. 2 Ix yacꞌanoch ebꞌ vin̈ sacerdote vin̈ dꞌa yopisio, ix iptzitaj ebꞌ vin̈ yuj vin̈ yic syilan yopisio ebꞌ vin̈ chiꞌ dꞌa scajnubꞌ Jehová. 3 Ix schecan vin̈ smolbꞌej sbꞌa ebꞌ vin̈ levita tzꞌacꞌan servil Jehová, aton ebꞌ vin̈ scꞌaybꞌan ebꞌ yetisraelal. Ix yalan vin̈ dꞌa ebꞌ vin̈ icha tic: Naeccoti to a teꞌ scaxail strato Jehová, aycan teꞌ dꞌa yol scajnubꞌ Jehová sbꞌonac vin̈aj Salomón yuninal vin̈aj David sreyal Israel. Yuj chiꞌ a ex tic maxtzac e bꞌachlaj bꞌeyecꞌ teꞌ dꞌa sjolom e jen̈jabꞌ. A ticnaic aqꞌuec servil Jehová co Diosal yedꞌ pax ebꞌ quetisraelal schon̈abꞌ co Diosal chiꞌ. 4 Bꞌoecoch e bꞌa dꞌa stzolal, icha syal stzolal smacan̈il ebꞌ e mam eyicham, icha yaj stzꞌibꞌchajcan yuj vin̈aj David yedꞌ vin̈aj Salomón chiꞌ. 5 Tzex can nan̈aloc ex levita ex tic dꞌa scajnubꞌ Jehová chiꞌ, icha syal smacan̈il eyaji, yic vachꞌ tzex colvaj dꞌa junjun macan̈ ebꞌ quetisraelal scꞌabꞌyoc sbꞌa, 6 yic tze milancham nocꞌ quelemtac calnel silabꞌil yic qꞌuin̈ tic. Yuj chiꞌ sacbꞌitejec e bꞌa icha yalan ley yedꞌ pax tas yovalil sacbꞌitaji, yic vachꞌ syal scꞌanabꞌajan ebꞌ quetisraelal tic masanil tas yalnaccan vin̈aj Moisés yuj Jehová, xchi vin̈ rey chiꞌ.7 Ix lajvi chiꞌ, axo dꞌa scal nocꞌ smolbꞌetzal nocꞌ vin̈aj Josías chiꞌ ix yiqꞌuelta juntzan̈ nocꞌ ix yacꞌ vin̈ dꞌa ebꞌ anima molanecꞌ chiꞌ, yic vachꞌ ay nocꞌ syal yacꞌan ebꞌ silabꞌil dꞌa qꞌuin̈ chiꞌ. Aton sbꞌisul nocꞌ tic: 30 mil nocꞌ calnel yedꞌ nocꞌ chiva yedꞌ 3 mil nocꞌ quelemtac vacax. 8 An̈ejtonaꞌ ebꞌ vin̈ ayoch yajalil yedꞌ vin̈ rey chiꞌ, ix el val dꞌa scꞌool ebꞌ vin̈ yacꞌan silabꞌ dꞌa ebꞌ chon̈abꞌ chiꞌ, dꞌa ebꞌ vin̈ sacerdote yedꞌ dꞌa ebꞌ vin̈ levita. Axo pax vin̈aj Hilcías, vin̈aj Zacarías yedꞌ vin̈aj Jehiel, aton ebꞌ vin̈ tzꞌilan scajnubꞌ Jehová, 2 mil 600 nocꞌ calnel yedꞌ 300 nocꞌ quelemtac vacax ix yacꞌ ebꞌ vin̈ yic tzꞌoch qꞌuin̈ chiꞌ. 9 A vin̈aj Conanías yedꞌ ebꞌ vin̈ yucꞌtac, aton vin̈aj Semaías, vin̈aj Natanael, vin̈aj Hasabías, vin̈aj Jeiel yedꞌ vin̈aj Josabad, aton ebꞌ vin̈ yajalil ebꞌ vin̈ levita, 5 mil nocꞌ calnel yedꞌ nocꞌ chiva ix yacꞌ ebꞌ vin̈ yic tzꞌoch qꞌuin̈ chiꞌ. Ix yacꞌanpax 500 nocꞌ quelemtac vacax ebꞌ vin̈ yic syacꞌ nocꞌ ebꞌ vin̈ levita silabꞌil.
10 Ayic vachꞌxo yaj masanil yic tzꞌoch qꞌuin̈ chiꞌ, ix sbꞌoanoch sbꞌa ebꞌ vin̈ sacerdote dꞌa stzolal yedꞌ pax ebꞌ vin̈ levita, icha ix aj yalan vin̈ rey. 11 Ix smilancham nocꞌ nocꞌ chiꞌ ebꞌ vin̈ silabꞌil yic qꞌuin̈ chiꞌ. Ix yacꞌan schiqꞌuil nocꞌ ebꞌ vin̈ levita chiꞌ dꞌa ebꞌ vin̈ sacerdote. Axo ebꞌ vin̈ ix tzicanoch schiqꞌuil nocꞌ chiꞌ dꞌa altar. Ix lajvi chiꞌ ix spatzꞌanel nocꞌ ebꞌ vin̈ levita chiꞌ. 12 Ix spojanecꞌ xepual nocꞌ silabꞌ sn̈usjitzꞌa smasanil ebꞌ vin̈ sacerdote chiꞌ, ix yacꞌan ebꞌ vin̈ dꞌa junjun macan̈ ebꞌ ayto yuj sbꞌa, yic syacꞌan ebꞌ dꞌa Jehová, icha yaj stzꞌibꞌchajcan dꞌa yumal yuj vin̈aj Moisés. An̈ejaꞌ icha chiꞌ ix yutej pax nocꞌ vacax ebꞌ vin̈. 13 Ix sbꞌolan nocꞌ silabꞌ yic qꞌuin̈ chiꞌ ebꞌ vin̈, icha val yaj stzꞌibꞌchajcani. Axo juntzan̈xo nocꞌ silabꞌ chiꞌ, ix stzꞌan̈ nocꞌ ebꞌ vin̈ dꞌa yol chen yedꞌ dꞌa yoltac xalten. Elan̈chamel ix spuquecꞌ nocꞌ ebꞌ vin̈ dꞌa ebꞌ anima. 14 Ix lajvi chiꞌ, ix sbꞌoan yic ebꞌ vin̈ levita chiꞌ yedꞌ pax tas yic ebꞌ vin̈ sacerdote, yujto a ebꞌ vin̈ sacerdote yin̈tilal Aarón te ay tas scꞌulej ebꞌ vin̈ sqꞌue acꞌval yic sn̈usan nocꞌ silabꞌ ebꞌ vin̈ stzꞌa smasanil yedꞌ pax xepual nocꞌ. Yuj chiꞌ munil ix sbꞌo yic ebꞌ vin̈ levita chiꞌ, ix sbꞌoanpax yic ebꞌ vin̈ sacerdote chiꞌ ebꞌ vin̈.
15 Axo pax ebꞌ vin̈ sbꞌitani, aton ebꞌ vin̈ yin̈tilal vin̈aj Asaf, ayoch ebꞌ vin̈ dꞌa yopisio chiꞌ, icha yajcan yuj vin̈aj rey David, vin̈aj Asaf, vin̈aj Hemán yedꞌ vin̈aj Jedutún, schecabꞌ ebꞌ tic vin̈aj rey David chiꞌ. Axo ebꞌ vin̈ stan̈van puerta, aypaxoch ebꞌ vin̈ yilan yopisio chiꞌ. Malaj junoc ebꞌ vin̈ syactejcan yilan yopisio, yujto a ebꞌ vin̈ yetlevitail ebꞌ vin̈ sbꞌoan nocꞌ silabꞌ ebꞌ vin̈.
16 Icha chiꞌ ix aj yacꞌji servil Jehová dꞌa scꞌual qꞌuin̈ chiꞌ, yic tzꞌacꞌjipax silabꞌ dꞌay dꞌa altar, aton silabꞌ sn̈usjitzꞌa smasanil, icha ix aj yalan vin̈aj rey Josías chiꞌ. 17 Masanil ebꞌ israel van sbꞌoan qꞌuin̈ chiꞌ, uqueꞌ cꞌual pax ix sva ixim pan ebꞌ malaj yich. 18 Malaj bꞌaj ix och junoc qꞌuin̈ icha jun chiꞌ yictax dꞌa stiempoal vin̈aj Samuel schecabꞌ Dios. Malaj val junocxo sreyal Israel ix acꞌanoch jun qꞌuin̈ chiꞌ icha ix aj yoch yuj vin̈aj rey Josías yedꞌ ebꞌ vin̈ sacerdote, ebꞌ vin̈ levita yedꞌ masanil ebꞌ aj Judá yedꞌ ebꞌ aj Israel ayecꞌ chiꞌ yedꞌ pax ebꞌ cajan dꞌa Jerusalén chiꞌ. 19 Ayic 18 abꞌilxo yoch vin̈aj Josías chiꞌ reyal ix och jun qꞌuin̈ chiꞌ.
A schamel vin̈aj rey Josías
20 Ayic toxo ix laj uji juntzan̈ chiꞌ, ayic toxo ix bꞌochajxi scajnubꞌ Jehová yuj vin̈aj rey Josías chiꞌ, axo vin̈aj Necao sreyal Egipto, van sbꞌat vin̈ dꞌa aꞌ Éufrates yic syacꞌ oval vin̈ yedꞌ chon̈abꞌ Carquemis. Axo vin̈aj rey Josías chiꞌ ix bꞌat smac sat vin̈. 21 A vin̈aj Necao chiꞌ, ix scheccot ebꞌ schecabꞌ vin̈ yic tzul alchaj dꞌa vin̈aj Josías chiꞌ icha tic: Ach sreyal Judá, man̈ acꞌ oval vedꞌoc, yujto man̈oc edꞌoc tzin javi vacꞌ oval, palta a yedꞌ junxo nación aytaxon voval yedꞌoc, yujto a Dios ix alan dꞌayin to tzin pil vip vacꞌan oval tic. Actej a telan a bꞌa yedꞌ Dios yic vachꞌ max ach satel yuuj, yujto aꞌ ayoch vedꞌoc, xchicot vin̈.
22 Palta axo vin̈aj Josías chiꞌ maj meltzajlaj vin̈, to ix sqꞌuexel sbꞌa vin̈ yic syacꞌan oval vin̈. Maj schalaj yabꞌ vin̈ tas ix yal vin̈aj Necao chiꞌ, vachꞌchom a Dios ix alani. Yuj chiꞌ ix yacꞌ oval vin̈ yedꞌ vin̈aj Necao chiꞌ dꞌa jun pan̈an yic Meguido. 23 A ebꞌ sjulvajum vin̈aj Necao chiꞌ, ix sjulbꞌat sjul-labꞌ ebꞌ dꞌa vin̈aj Josías chiꞌ. Ix yamchaj vin̈ sjulan ebꞌ, yuj chiꞌ ix yal vin̈ dꞌa ebꞌ edꞌjinac scarruaje: Iqꞌuec in el dꞌa tic, yujto te nivan ix in aj in lajvi, xchi vin̈. 24 Ix yicꞌanelta vin̈ ebꞌ, ix yacꞌanoch vin̈ ebꞌ dꞌa yol junxo schabꞌil carruaje, ix yicꞌancot vin̈ ebꞌ dꞌa Jerusalén, ataꞌ ix cham vin̈. Ix smucan vin̈ ebꞌ bꞌaj mucbꞌil ebꞌ smam yicham. Masanil ebꞌ aj Judá yedꞌ ebꞌ aj Jerusalén ix ocꞌ ebꞌ yuj vin̈. 25 Axo vin̈aj Jeremías ix bꞌoan jun sbꞌital yic snachajcot schamel vin̈. Ix cann̈ej jun bꞌit chiꞌ, masanil ebꞌ vin̈ vinac yedꞌ ebꞌ ix ix sbꞌitani, ayic sbꞌitan jun bꞌit chiꞌ ebꞌ yuj schamel junoc anima, snacot vin̈aj Josías chiꞌ ebꞌ. A jun bꞌit chiꞌ ix ochcan dꞌa stzolal sbꞌitan ebꞌ israel yuj junoc chamel, aycan dꞌa yumal sbꞌital cuscꞌolal.