3 Ayic 16 abꞌilxo sqꞌuinal vin̈aj Josías chiꞌ, ayic quelem unin val vin̈, ix yacꞌan val och vin̈ dꞌa scꞌool scꞌanabꞌajan Jehová sDiosal vin̈aj David smam yicham vin̈. Axo yic 20 abꞌil vin̈, ix syamanoch vin̈ yicꞌanel tas man̈ vachꞌoc dꞌa Judá yedꞌ dꞌa Jerusalén chiꞌ. Ix schecan vin̈ satjiel masanil juntzan̈ bꞌaj tzꞌoch ejmelal bꞌajtac chaan̈, yechel comon dios Asera yedꞌ juntzan̈xo yechel comon dios tzeybꞌil yedꞌ masanil yechel bꞌobꞌil dꞌa qꞌuen qꞌueen. 4 A val dꞌa yichan̈ vin̈ ix macꞌjipoj juntzan̈ altar yic masanil yechel Baal. Ix schecanpax vin̈ macꞌjipoj altar bꞌaj sn̈uschajtzꞌa incienso bꞌajtac chaan̈. Ix schecanpax vin̈ macꞌjipoj yechel comon dios Asera yedꞌ masanil juntzan̈xo yechel comon dios. Chocꞌ ix ajcan smasanil. Ix lajvi chiꞌ ix stzicanbꞌat vin̈ dꞌa yibꞌan̈ bꞌajtac mucan ebꞌ ix acꞌan silabꞌ dꞌa juntzan̈ yechel chiꞌ. 5 Ix schecanpax vin̈ n̈usjoctzꞌa sbꞌaquil ebꞌ sacerdote dꞌa juntzan̈ comon dios chiꞌ dꞌa yibꞌan̈ juntzan̈ altar chiꞌ. Ichaton chiꞌ ix aj sacbꞌitan Judá yedꞌ Jerusalén chiꞌ vin̈. 6 Icha pax chiꞌ ix scꞌulej vin̈ dꞌa juntzan̈ chon̈abꞌ macꞌbꞌilem lan̈naj dꞌa yol yic Manasés, dꞌa yol yic Efraín yedꞌ dꞌa yol yic Simeón, masanto ix cꞌoch dꞌa yol yic Neftalí. 7 Ayic ix lajvi smacꞌjicanpoj masanil juntzan̈ altar, juntzan̈ yechel comon dios Asera yedꞌ juntzan̈xo yechel comon dios, chocꞌ ix ajcani, ix macꞌjipaxcanpoj masanil altar bꞌaj stzꞌa incienso dꞌa masanil yol yic Israel chiꞌ. Ichato chiꞌ ix meltzajxi vin̈ dꞌa Jerusalén.

8 Ayic 26 abꞌilxo sqꞌuinal vin̈aj Josías chiꞌ, ayic toxo ix sacbꞌitej masanil jun nación chiꞌ vin̈ yedꞌ scajnubꞌ Jehová Dios, ix schecan vin̈ vachꞌ bꞌochaj scajnubꞌ Dios chiꞌ. Ix ochcan jun munlajel chiꞌ dꞌa yibꞌan̈ vin̈aj Safán yuninal vin̈aj Azalías yedꞌ vin̈aj Amasías yajal dꞌa chon̈abꞌ Jerusalén yedꞌ vin̈ tzꞌibꞌum, aton vin̈aj Joa yuninal vin̈aj Joacaz. 9 Ix lajvi chiꞌ ix bꞌat ebꞌ vin̈ tic yil vin̈aj Hilcías sat sacerdote. Ix bꞌat yacꞌan qꞌuen tumin ebꞌ vin̈ dꞌa vin̈, aton qꞌuen ix scha ebꞌ vin̈ levita stan̈van spuertail stemplo Dios dꞌa ebꞌ yin̈tilal Manasés yedꞌ ebꞌ yin̈tilal Efraín, aton masanil ebꞌ cannac dꞌa yol yic Israel. Ay pax qꞌuen ix yacꞌ ebꞌ yin̈tilal Judá, ebꞌ yin̈tilal Benjamín yedꞌ ebꞌ cajan dꞌa Jerusalén chiꞌ. 10 Ix lajvi chiꞌ ix yacꞌancan qꞌuen tumin chiꞌ ebꞌ vin̈ dꞌa ebꞌ vin̈ ayoch yilan munlajel dꞌa stemplo Jehová chiꞌ, axo ebꞌ vin̈ stupan ebꞌ vin̈ smunlaj dꞌa templo chiꞌ. 11 Ix yacꞌanpax qꞌuen tumin chiꞌ ebꞌ vin̈ dꞌa ebꞌ vin̈ n̈icum teꞌ yedꞌ dꞌa ebꞌ vin̈ scuchbꞌan munlajel chiꞌ, yic smanchaj qꞌuen qꞌueen tzeybꞌil yedꞌ pax masanil te teꞌ tzꞌoch syamnubꞌaloc yedꞌ pax spatzabꞌil juntzan̈ pat emnaccan lan̈naj yuj ebꞌ vin̈ sreyal Judá.

12-13 A juntzan̈ ebꞌ vin̈ vinac chiꞌ, te vachꞌ ix yutej ebꞌ vin̈ yilan munlajel chiꞌ. A ebꞌ vin̈ scuchbꞌan munlajel chiꞌ, a ebꞌ vin̈ levita, aton sbꞌi ebꞌ vin̈ tic: Vin̈aj Jahat yedꞌ vin̈aj Abdías yin̈tilal vin̈aj Merari, vin̈aj Zacarías, vin̈aj Mesulam yin̈tilal vin̈aj Coat. A ebꞌ vin̈ tic yajal yaj ebꞌ vin̈. Ay juntzan̈xo ebꞌ vin̈ levita cuchbꞌum dꞌa bꞌit yedꞌ pax dꞌa yamcꞌabꞌ yic bꞌit chiꞌ, a ebꞌ vin̈ tzꞌilan ebꞌ cuchum icatz, ay pax ebꞌ vin̈ tzꞌilan ebꞌ smunlaji. Ay pax ebꞌ vin̈ tzꞌibꞌum, ay pax ebꞌ vin̈ stan̈van spuertail scajnubꞌ Dios chiꞌ.

14 Ayic van yicꞌchajelta qꞌuen tumin ix bꞌat acꞌchajcan dꞌa scajnubꞌ Jehová chiꞌ, axo vin̈aj sacerdote Hilcías ix ilanelta yumal bꞌaj aycan sley Jehová yuj vin̈aj Moisés. 15 Ix yalan vin̈ dꞌa vin̈aj Safán vin̈ tzꞌibꞌum to ix ilchaj yumal ley dꞌa scajnubꞌ Jehová. Ix yacꞌancan vin̈ dꞌa vin̈aj Safán chiꞌ. 16 Axo vin̈aj Safán chiꞌ ix icꞌanbꞌat dꞌa vin̈ rey chiꞌ, ix yalan vin̈ icha tic:

—Mamin rey, a on̈ a checabꞌ on̈ tic van co bꞌoan masanil munlajel aycan och dꞌa quibꞌan̈. 17 Ix molbꞌaj qꞌuen tumin ix ul acꞌchajcan dꞌa scajnubꞌ Jehová, ix acꞌchaj qꞌuen dꞌa ebꞌ vin̈ tzꞌilan munlajel chiꞌ yedꞌ pax dꞌa ebꞌ vin̈ smunlaji, xchi vin̈.

18 Ix yalanpax vin̈ dꞌa vin̈ rey chiꞌ icha tic: A vin̈aj Hilcías ix yacꞌ jun uum vin̈ dꞌayin, xchi vin̈. Ix lajvi chiꞌ ix yavtan jun uum chiꞌ vin̈ dꞌa yichan̈ vin̈ rey chiꞌ. 19 A val yic ix yabꞌan vin̈ rey tas syal jun uum chiꞌ, ix sn̈icꞌchitanbꞌat spichul vin̈. 20 Ix yavtancot vin̈aj Hilcías vin̈, vin̈aj Ahicam yuninal vin̈aj Safán, vin̈aj Abdón yuninal vin̈aj Micaía, vin̈aj Safán vin̈ tzꞌibꞌum yedꞌ vin̈aj Asaías ay yopisio scolvaj yedꞌ vin̈. Ix yalan vin̈ dꞌa ebꞌ vin̈ icha tic:

21 —Ixiquec, bꞌat cꞌanbꞌejec dꞌa Jehová vuuj, yuj pax masanil anima cannac dꞌa Israel tic yedꞌ dꞌa Judá yuj tas syal jun uum ix ilchaj tic. Tecan aycot yoval scꞌol Jehová dꞌa quibꞌan̈ ticnaic, yujto a ebꞌ co mam quicham maj scꞌanabꞌajej ebꞌ tas syal Jehová, maj sbꞌeybꞌalej pax ebꞌ tastac aycan dꞌa jun uum tic, xchi vin̈ rey chiꞌ.

22 Yuj chiꞌ ix bꞌat vin̈aj Hilcías yedꞌ juntzan̈xo ebꞌ vin̈ ix checjibꞌat yuj vin̈ rey chiꞌ, ix bꞌat ebꞌ vin̈ yil ix Hulda ix schecabꞌ Dios, ix yetbꞌeyum vin̈aj Salum yuninal vin̈aj Ticva, yixchiquin vin̈aj Harhas. A vin̈aj Salum chiꞌ sicꞌan masanil pichul dꞌa scajnubꞌ Dios. Cajan ix Hulda chiꞌ dꞌa jun scha macan̈il chon̈abꞌ dꞌa Jerusalén. Ayic ix yalan ebꞌ vin̈ dꞌa ix, 23 ix tacꞌvi ix dꞌa ebꞌ vin̈ icha tic:

—A Jehová co Diosal tzꞌalan icha tic: Alec dꞌa vin̈ ix ex checancot e cꞌanbꞌej chiꞌ dꞌayin 24 to a in Jehová in tic svalaꞌ: Ol vacꞌcot junoc yaelal dꞌa yibꞌan̈ jun chon̈abꞌ tic yedꞌ dꞌa yibꞌan̈ masanil anima cajan dꞌay, icha val yaj stzꞌibꞌchajcan dꞌa jun uum ix avtaj dꞌa ichan̈ chiꞌ. 25 Yujto ix in eyactejcani, axo dꞌa juntzan̈ comon dios tze n̈us incienso. Tze tzuntzancot yoval in cꞌol yuj masanil tas ix e cꞌulej chiꞌ. Yuj chiꞌ toxo ix cot yoval in cꞌool dꞌa yibꞌan̈ jun chon̈abꞌ tic, maxtzac tuplaj. 26 Yuj chiꞌ alec dꞌa vin̈ sreyal Judá, vin̈ ix ex checancot ul e cꞌanbꞌej dꞌayin Jehová sDiosal in Israel tic to a in sval icha tic: Yujto ix a cha abꞌ tas syal jun uum chiꞌ, 27 ix acꞌan val och dꞌa a cꞌool, ix acꞌanoch a bꞌa dꞌa yol in cꞌabꞌ ayic ix abꞌani to ay yoval in cꞌol dꞌa yibꞌan̈ jun chon̈abꞌ tic yedꞌ dꞌa yibꞌan̈ ebꞌ cajan dꞌay, yujto ix iqꞌuem a bꞌa dꞌa vichan̈, ix a n̈icꞌchitanbꞌat a pichul, ix ach oqꞌui, an̈ejtonaꞌ in ix vabꞌ pax tas ix alaꞌ. Yuj chiꞌ a in val Jehová in sval dꞌayach: 28 A in ol vaqꞌuelcꞌochi to juncꞌolal ol ach chamoc, ol ach mucchaj bꞌaj mucan ebꞌ a mam icham. Ichato chiꞌ ol javoc juntzan̈ yaelal ol vacꞌcot dꞌa yibꞌan̈ jun chon̈abꞌ tic yedꞌ dꞌa yibꞌan̈ masanil ebꞌ cajan dꞌay, xchi Jehová, xchi ix Hulda chiꞌ.

Yuj chiꞌ ix meltzaj ebꞌ vin̈ schecabꞌ vin̈ rey chiꞌ, ix ul yalan spac tas ix bꞌat scꞌanbꞌej ebꞌ vin̈ chiꞌ. 29 Ix lajvi chiꞌ ix schecan vin̈ rey chiꞌ avtajcot masanil ebꞌ vin̈ yichamtac vinaquil Judá yedꞌ ebꞌ yic Jerusalén chiꞌ to smolbꞌej sbꞌa ebꞌ vin̈ smasanil. 30 Ix lajvi chiꞌ, ix qꞌue vin̈ rey chiꞌ dꞌa scajnubꞌ Jehová yedꞌ masanil ebꞌ ix smolbꞌej sbꞌa chiꞌ yedꞌ pax ebꞌ vin̈ sacerdote, ebꞌ vin̈ levita yedꞌ masanil anima ay dꞌa yol smacbꞌen chiꞌ yedꞌ pax masanil ebꞌ unin yedꞌ masanil ebꞌ ichamtac anima. Ataꞌ ix schec vin̈ rey chiꞌ avtaj jun uum chiꞌ yabꞌ masanil anima chiꞌ, aton tastac aycan dꞌa yumal strato Jehová ix ilchajelta yuj ebꞌ dꞌa yol templo chiꞌ. 31 Ix och lin̈an vin̈ rey chiꞌ dꞌa stzꞌey jun nivan oy. Ataꞌ ix yacꞌ stiꞌ vin̈ dꞌa yichan̈ Jehová to dꞌa val smasanil scꞌool vin̈ ol scꞌanabꞌajej sbꞌeybꞌalan masanil checnabꞌil yedꞌ cꞌaybꞌubꞌal chiꞌ, icha val yaj stzꞌibꞌchajcan dꞌa yumal strato Jehová chiꞌ. 32 Ix lajvi chiꞌ ix yalan vin̈ dꞌa masanil anima molanecꞌ chiꞌ, ebꞌ aj Jerusalén yedꞌ ebꞌ yic Benjamín to syacꞌ stiꞌ ebꞌ scꞌanabꞌajani. Masanil ebꞌ cajan dꞌa Jerusalén chiꞌ, ix scꞌanabꞌajej ebꞌ icha val yajcan dꞌa yumal strato sDiosal ebꞌ yedꞌ ebꞌ smam yicham. 33 Ix schecan vin̈aj Josías chiꞌ icꞌjoquel masanil yechel yajbꞌentac ay dꞌa yol smacbꞌen Israel chiꞌ. Ix yalan vin̈ to tzꞌoch masanil ebꞌ ayecꞌ dꞌa Israel chiꞌ ejmelal dꞌa Jehová Dios. Yacbꞌan pitzanto vin̈, maj yiqꞌuel sbꞌa ebꞌ dꞌa Jehová sDiosal ebꞌ smam yicham ebꞌ.