24
A dꞌa stiempoal vin̈aj Joacim chiꞌ, ix cot vin̈aj Nabucodonosor sreyal Babilonia yedꞌ ebꞌ soldado yacꞌ oval yedꞌ vin̈. Icha chiꞌ ix aj yochcan vin̈aj rey Joacim oxeꞌ abꞌil dꞌa yalan̈ smandar vin̈aj Nabucodonosor chiꞌ. Ix lajvi chiꞌ ix meltzajoch vin̈aj Joacim chiꞌ ajcꞌolal dꞌa vin̈ sreyal Babilonia chiꞌ. 2 Palta ix acꞌjicot ebꞌ soldado caldeo yuj Jehová, ebꞌ soldado sirio, ebꞌ soldado moabita yedꞌ ebꞌ soldado amonita yic sjavi ebꞌ elcꞌal dꞌa Judá yic syixtanbꞌat ebꞌ, icha ix aj yalan ebꞌ schecabꞌ Jehová. 3 Val yel ix javi jun tic dꞌa yibꞌan̈ Judá, yujto a Jehová ix alani yic syicꞌanel Judá dꞌa yichan̈, yuj smul vin̈aj Manasés, 4 yuj pax schamel ebꞌ anima malaj smul dꞌa Jerusalén ix cham yuj vin̈. Yuj chiꞌ majxo yacꞌlaj nivancꞌolal Jehová.5 A jantacto yabꞌixal vin̈aj Joacim chiꞌ yedꞌ tastac ix scꞌulej vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Judá. 6 Axo yic ix cham vin̈, a vin̈aj Joaquín yuninal vin̈ ix ochcan reyal sqꞌuexuloc.
7 Majxo eltalaj vin̈ sreyal Egipto yedꞌ ebꞌ soldado dꞌa yol smacbꞌen, yujto a vin̈ sreyal Babilonia ix icꞌanxiecꞌ tas icꞌbꞌilecꞌ yuj vin̈, scot dꞌa aꞌ elumaꞌ yic Egipto masanto dꞌa aꞌ Éufrates.
Ix icꞌjibꞌat vin̈aj rey Joaquín dꞌa Babilonia
8 A vin̈aj Joaquín chiꞌ, 18 abꞌilxo sqꞌuinal vin̈ ayic ix och vin̈ reyal, oxen̈ej ujal ix yacꞌ reyal vin̈ dꞌa Jerusalén. Nehusta sbꞌi ix snun vin̈, yisil ix vin̈aj Elnatán aj Jerusalén. 9 Te chuc tas ix scꞌulej vin̈ dꞌa yichan̈ Jehová, icha val ix scꞌulej vin̈ smam vin̈.
10 A dꞌa jun tiempoal chiꞌ, ix cot ebꞌ soldado vin̈aj Nabucodonosor sreyal Babilonia yacꞌ oval dꞌa Jerusalén, ix oymaj ebꞌ dꞌa spatic. 11 Van yacꞌan oval ebꞌ, ix cꞌoch vin̈aj Nabucodonosor chiꞌ. 12 Yuj chiꞌ ix yacꞌoch sbꞌa vin̈aj Joaquín sreyal Judá yedꞌ ix snun, ebꞌ vin̈ yetyajalil vin̈ yedꞌ pax ebꞌ vin̈ schecabꞌ vin̈ dꞌa yol scꞌabꞌ vin̈aj Nabucodonosor chiꞌ. Ix icꞌjibꞌat ebꞌ dꞌa Babilonia ayic svajxaquilxo abꞌil yoch vin̈aj Nabucodonosor chiꞌ reyal.
13 Ix lajvi chiꞌ, ix schecan vin̈aj Nabucodonosor chiꞌ icꞌchajelta masanil qꞌuen tumin ay dꞌa yol stemplo Jehová yedꞌ dꞌa yol spalacio vin̈ sreyal Judá chiꞌ. Ix smacꞌanpoj masanil yamcꞌabꞌ vin̈ nabꞌa oro yic templo chiꞌ bꞌobꞌilcan yuj vin̈aj Salomón sreyal Israel. Ix elcꞌoch jun tic icha ajnac yalancan Jehová. 14 Ix schecan vin̈ icꞌchajbꞌat masanil anima cajan dꞌa Jerusalén chiꞌ yedꞌ ebꞌ yajal, ebꞌ soldado te jelan, ebꞌ vin̈ jelan sbꞌoan tastac yedꞌ ebꞌ vin̈ tenum qꞌueen. 10 mil ebꞌ ix icꞌjibꞌat dꞌa Babilonia chiꞌ dꞌa smasanil. Man̈xa mach ix cani, axon̈ej ebꞌ mebꞌaꞌ ixto cani.
15 A vin̈aj rey Joaquín chiꞌ, ix snun vin̈, ebꞌ ix yetbꞌeyum vin̈, ebꞌ ayoch yajalil yedꞌ vin̈ yedꞌ ebꞌ anima nivac yelcꞌoch dꞌa yol smacbꞌen vin̈ chiꞌ, ix icꞌjibꞌat ebꞌ yuj vin̈aj Nabucodonosor chiꞌ dꞌa Babilonia. 16 A dꞌa scal masanil anima ix icꞌchajbꞌat chiꞌ, ay 7 mil ebꞌ vin̈ soldado, ay pax mil ebꞌ vin̈ syal sbꞌoan tastac yedꞌ ebꞌ vin̈ tenum qꞌueen. Masanil ebꞌ vin̈ tic te tecꞌan ebꞌ vin̈, te jelan pax ebꞌ vin̈ dꞌa oval. 17 Axo vin̈aj rey Nabucodonosor chiꞌ ix acꞌanoch vin̈aj Matanías yucꞌtac smam vin̈aj Joaquín chiꞌ reyal sqꞌuexuloc vin̈. Ix qꞌuexji sbꞌi vin̈ yuj vin̈, Sedequías ix sbꞌiejcan vin̈.
Ix och vin̈aj Sedequías reyal
18 A vin̈aj Sedequías chiꞌ, 21 abꞌil sqꞌuinal vin̈ ayic ix och vin̈ reyal, 11 abꞌil ix yacꞌ reyal vin̈ dꞌa Jerusalén. Hamutal sbꞌi ix snun vin̈, yisil ix vin̈aj Jeremías aj Libna. 19 Te chuc tas ix scꞌulej vin̈ dꞌa yichan̈ Jehová, icha ix scꞌulej vin̈aj Joacim. 20 Yuj chiꞌ ix cot yoval scꞌol Jehová dꞌa Jerusalén yedꞌ dꞌa Judá, ix yicꞌancanel ebꞌ dꞌa yichan̈.
Ix acꞌji ganar Jerusalén
Ix meltzajoch vin̈aj Sedequías ajcꞌolal dꞌa vin̈ sreyal Babilonia.