Ix acꞌji ganar Jerusalén
39
Ayic slajun̈il uj yic sbꞌalun̈il abꞌil yoch vin̈aj Sedequías reyal dꞌa Judá, ataꞌ ix javi vin̈aj Nabucodonosor sreyal Babilonia yedꞌ ebꞌ soldado, ix yoymitan Jerusalén ebꞌ. 2 Ayic sbꞌalun̈il cꞌual yoch schan̈il uj yic 11 abꞌil yoch vin̈aj Sedequías chiꞌ reyal, ataꞌ ix smaqꞌuel amnaj smuroal chon̈abꞌ chiꞌ ebꞌ soldado chiꞌ. 3 Ataꞌ ix och masanil ebꞌ yajal soldado yic vin̈ sreyal Babilonia chiꞌ. A dꞌa jun puerta ay dꞌa snan̈al chon̈abꞌ chiꞌ, ataꞌ ix ajecꞌ ebꞌ. A ebꞌ vin̈ nivac yajal chiꞌ, aton ebꞌ vin̈ tic: Vin̈aj Nergal-sarezer, vin̈aj Samgar-nebo, vin̈aj Sarsequim yedꞌ pax junxo vin̈ scuchan Nergal-sarezer.4 Ayic ix yilan vin̈aj rey Sedequías yedꞌ ebꞌ soldado tas van yuji, ix bꞌat ebꞌ elelal dꞌacꞌvalil. A dꞌa scal teꞌ yavbꞌen teꞌ ebꞌ rey, ataꞌ ix el ebꞌ, ix elcꞌoch ebꞌ dꞌa jun puerta ay dꞌa scal chabꞌ muro. Icha chiꞌ ix aj scꞌoch ebꞌ dꞌa yol bꞌe scꞌoch dꞌa span̈anil stiꞌ aꞌ Jordán. 5-6 Palta ix och ebꞌ soldado yic Babilonia chiꞌ dꞌa spatic ebꞌ, ix yamchaj vin̈aj Sedequías chiꞌ yuj ebꞌ dꞌa span̈anil Jericó. Ix yicꞌanbꞌat vin̈ ebꞌ dꞌa vin̈aj rey Nabucodonosor dꞌa chon̈abꞌ Ribla dꞌa yol smacbꞌen Hamat. Ataꞌ ix yal vin̈ tas ol utaj vin̈aj Sedequías chiꞌ. Ix schecan vin̈ miljoccham ebꞌ yuninal vin̈aj Sedequías chiꞌ dꞌa yichan̈ yedꞌ masanil ebꞌ nivac vinac yaj dꞌa Judá. 7 Ix schecanpax vin̈ icꞌjiqꞌueta yol sat vin̈aj Sedequías chiꞌ, stzecꞌchaj pax vin̈ dꞌa qꞌuen cadena yic tzꞌicꞌjibꞌat vin̈ dꞌa Babilonia.
8 Axo ebꞌ soldado Babilonia chiꞌ ix acꞌanoch scꞌacꞌal spalacio vin̈ yedꞌ masanil pat ay dꞌa Jerusalén chiꞌ. Ix smacꞌanem lan̈naj smuroal jun chon̈abꞌ chiꞌ ebꞌ. 9 Axo vin̈aj Nabuzaradán yajal dꞌa ebꞌ stan̈vumal vin̈ sreyal Babilonia chiꞌ, ix yicꞌbꞌat masanil ebꞌ aj Judá vin̈ dꞌa Babilonia chiꞌ, aton ebꞌ ixto can dꞌa yol chon̈abꞌ chiꞌ yedꞌ ebꞌ ix yacꞌoch sbꞌa yedꞌ ebꞌ aj Babilonia chiꞌ yedꞌ masanil ebꞌ anima. 10 Axon̈ej juntzan̈ ebꞌ mebꞌaꞌ ix yactejcan vin̈ dꞌa yol yic Judá chiꞌ, aton ebꞌ malaj jabꞌoc tas ay dꞌay. Ix acꞌchaj lum luum bꞌaj avabꞌil teꞌ uva dꞌa ebꞌ yedꞌ juntzan̈xo teꞌ avbꞌen teꞌ.
Ix acꞌjiel vin̈aj Jeremías dꞌa libre
11 A vin̈aj Nabucodonosor sreyal Babilonia, ix yal vin̈ dꞌa vin̈aj Nabuzaradán yajal dꞌa ebꞌ stan̈vumal vin̈ rey chiꞌ yuj tas tzin aj a in Jeremías in tic, ix yalan vin̈ icha tic: 12 Icꞌbꞌat vin̈ tic, tza tan̈van vin̈, man̈ ixtej vin̈, masanil tas scꞌan vin̈, tzacꞌ dꞌa vin̈, xchi vin̈ rey chiꞌ. 13 Yuj chiꞌ a vin̈aj Nabuzaradán yedꞌ vin̈aj Nabusazbán yedꞌ pax vin̈aj Nergal-sarezer yedꞌ juntzan̈xo ebꞌ vin̈ ay yopisio yedꞌ vin̈ sreyal Babilonia chiꞌ, 14 ix in schec icꞌjielta ebꞌ vin̈ dꞌa yamaqꞌuil bꞌaj ayin och preso chiꞌ. Ix in yacꞌancanoch ebꞌ vin̈ dꞌa yol scꞌabꞌ vin̈aj Gedalías yuninal vin̈aj Ahicam, yixchiquin vin̈aj Safán, yic tzin yacꞌan meltzaj vin̈ dꞌa in pat. Icha chiꞌ ix aj in can cajan dꞌa scal ebꞌ vetchon̈abꞌ.
Slolonel Jehová dꞌa vin̈aj Ebed-melec
15 Ayic ayintoecꞌ dꞌa yamaqꞌuil bꞌaj ayecꞌ ebꞌ stan̈vumal palacio chiꞌ, ix lolon Jehová dꞌayin, ix yalan icha tic: 16 Ixic dꞌa vin̈aj Ebed-melec aj Etiopía, tzalan dꞌa vin̈ icha tic: A Jehová Yajal dꞌa Smasanil, sDiosal Israel, a tzꞌalan icha tic: Ol vaqꞌuelcꞌoch tas valnaccan dꞌa spatic jun chon̈abꞌ tic. Ol javoc yaelal, man̈oc vachꞌilal. Ayic ol elcꞌoch juntzan̈ chiꞌ ol il val yedꞌ a sat. 17 A in Jehová in svalaꞌ to ol ach in tan̈vej yic vachꞌ man̈ ol ach och dꞌa yol scꞌabꞌ juntzan̈ anima bꞌaj tzach xiv chiꞌ. 18 A in val svalaꞌ to ol ach in colel dꞌa yol scꞌabꞌ ebꞌ, yuj chiꞌ man̈ ol ach miljocchamoc, yujto ayoch a pensar dꞌayin, xchi Jehová, xin chi dꞌa vin̈.