Ix acꞌjiem vin̈aj Jeremías dꞌa yol jun jul yedꞌtal aꞌ
38
A vin̈aj Sefatías yuninal vin̈aj Matán, vin̈aj Gedalías yuninal vin̈aj Pasur, vin̈aj Jucal yuninal vin̈aj Selemías yedꞌ vin̈aj Pasur yuninal vin̈aj Malquías, a ebꞌ vin̈ tic, ix yabꞌ ebꞌ vin̈ tas ix val dꞌa yichan̈ ebꞌ anima ayic ix valani: 2 A Jehová tzꞌalan icha tic: A mach ol can dꞌa yol chon̈abꞌ tic, ol cham yuj oval, yuj vejel, ma yuj ilya. Axo mach ol yacꞌoch sbꞌa dꞌa yol scꞌabꞌ ebꞌ aj Babilonia, a ebꞌ chiꞌ ol colchaj ebꞌ, man̈ ol chamlaj ebꞌ. 3 Ol vacꞌoch jun chon̈abꞌ tic dꞌa yol scꞌabꞌ ebꞌ soldado vin̈ sreyal Babilonia. Ol acꞌjoc ganar jun chon̈abꞌ tic yuj ebꞌ, xchi Jehová, xin chi.4 Yuj chiꞌ ix yal ebꞌ vin̈ yajal chiꞌ dꞌa vin̈ rey chiꞌ icha tic:
—Chec miljoccham jun vinac tic, yujto schabꞌaxqꞌue scꞌol ebꞌ soldado aytoecꞌ dꞌa yol chon̈abꞌ tic yuj tas syal vin̈, syacꞌan somchaj spensar ebꞌ anima vin̈. A jun vinac tic, man̈oc svachꞌil ebꞌ quetchon̈abꞌ tic say vin̈, palta a co yaelal say vin̈, xchi ebꞌ vin̈.
5 Ix tacꞌvi vin̈aj rey Sedequías chiꞌ dꞌa ebꞌ vin̈ icha tic:
—Ichocabꞌtaꞌ, syaln̈ej e cꞌulan tas e gana dꞌa vin̈, malaj jabꞌoc tas syal valan dꞌayex, xchi vin̈.
6 Yuj chiꞌ ix in syaman ebꞌ vin̈, ix in yacꞌanem ebꞌ vin̈ yedꞌ jun lasu dꞌa yol jun yedꞌtal bꞌaj smolbꞌej sbꞌa a aꞌ. A jun chiꞌ, yic vin̈aj Malquías yuninal vin̈ rey chiꞌ. A dꞌa yamaqꞌuil bꞌaj ayecꞌ ebꞌ stan̈van palacio, ataꞌ ay. A dꞌa yol jun chiꞌ man̈xalaj a aꞌ chiꞌ, axon̈ej lum socꞌom ay. Yuj chiꞌ ayic ix in emcꞌoch chiꞌ, ix in bꞌatcan dꞌa scal lum socꞌom chiꞌ.
7 Ayic cꞌojan em vin̈ rey chiꞌ dꞌa spuertail bꞌaj sbꞌat bꞌe dꞌa yol yic Benjamín, ix yabꞌan vin̈aj Ebed-melec to toxo ix in acꞌjiem dꞌa yol jun yedꞌtal aꞌ chiꞌ. A jun vin̈ vinac chiꞌ aj Etiopía vin̈, ay yopisio vin̈ dꞌa spalacio vin̈ rey chiꞌ. 8 Ix elta vin̈ dꞌa yol palacio chiꞌ, ix yalan vin̈ dꞌa vin̈ rey chiꞌ icha tic:
9 —Mamin rey, te chuc tas ix scꞌulej juntzan̈ vinac tic dꞌa vin̈aj Jeremías schecabꞌ Dios. Ix yaqꞌuem vin̈ ebꞌ vin̈ dꞌa yol jun yedꞌtal aꞌ jul yich. Ataꞌ ol cham vin̈ yuj vejel, yujto man̈xalaj tas svaji dꞌa yol chon̈abꞌ tic, xchi vin̈.
10 Ix lajvi chiꞌ ix yalan vin̈ rey chiꞌ dꞌa vin̈aj Ebed-melec chiꞌ icha tic:
—Icꞌbꞌat junoc 30 ebꞌ vin̈ vinac tic, bꞌat eyicꞌanqꞌueta vin̈aj Jeremías chiꞌ dꞌa jun jul chiꞌ, yacbꞌan manto cham vin̈, xchi vin̈. 11 Ix lajvi chiꞌ ix bꞌat vin̈aj Ebed-melec chiꞌ yedꞌ ebꞌ vin̈ dꞌa jun cuarto ay dꞌa yalan̈ bꞌaj sicꞌchaj tastac yic palacio, ix bꞌat yicꞌancot juntzan̈ cꞌatac cꞌapac ebꞌ vin̈. Ix yacꞌanem cꞌapac ebꞌ vin̈ yedꞌ jun lasu dꞌayin. 12 Ix yalan vin̈ dꞌayin icha tic:
—Acꞌoch juntzan̈ cꞌapac chiꞌ dꞌa yalan̈ a cꞌabꞌ yic vachꞌ max ach lajvi yuj chꞌan̈ lasu tic, xchi vin̈.
Icha chiꞌ ix vutej. 13 Ix yacꞌanem chꞌan̈ lasu chiꞌ ebꞌ vin̈, ix in yicꞌanqꞌueta ebꞌ vin̈. Axo dꞌa yamaqꞌuil bꞌaj ayecꞌ ebꞌ stan̈van palacio ix in yactejcan ebꞌ vin̈.
Avtabꞌil vin̈aj Jeremías yuj vin̈aj Sedequías
14 Ix yalan vin̈aj rey Sedequías chiꞌ to tzin icꞌjibꞌat a in Jeremías in tic dꞌa yichan̈ vin̈, masanto dꞌa yoxil spuertail templo. Ataꞌ ix yal vin̈ dꞌayin icha tic:
—Ay jun tas tzin cꞌanbꞌej dꞌayach, in gana to tzꞌacan ol aj a pacan dꞌayin, xchi vin̈.
15 Ix valan icha tic:
—Tato tzin pac dꞌayach mamin rey, tzam in a chec miljocchamoc, tato svacꞌ junoc razón dꞌayach, tom ol a cha abꞌi, xin chi.
16 Palta cꞌubꞌeltac ix yacꞌ stiꞌ vin̈ dꞌayin icha tic:
—Dꞌa yichan̈ Jehová tzꞌacꞌan co qꞌuinal svacꞌ in tiꞌ dꞌayach to man̈ ol ach in chec miljocchamoc, man̈ ol ach vacꞌpaxoch dꞌa yol scꞌabꞌ ebꞌ sgana ach smilanchamoc, xchi vin̈.
17 Ix valanxi dꞌa vin̈ icha tic:
—A Jehová Yajal dꞌa Smasanil, aton co Diosal a on̈ israel on̈ tic, a tzꞌalan dꞌayach icha tic: Tato tzacꞌoch a bꞌa dꞌa yol scꞌabꞌ ebꞌ yajal yaj dꞌa ebꞌ soldado vin̈ sreyal Babilonia, ol ach colchaj yedꞌ masanil ebꞌ cajan edꞌ dꞌa a pat, axo jun chon̈abꞌ tic man̈ ol n̈usjoctzꞌaoc. 18 Tato man̈ ol acꞌoch a bꞌa dꞌa yol scꞌabꞌ ebꞌ jun, ol yacꞌ ganar jun chon̈abꞌ tic ebꞌ, ol sn̈usantzꞌa ebꞌ. A achxo tic man̈ ol yal-laj a colan a bꞌa, xchi Jehová, xin chi dꞌa vin̈.
19 Ix tacꞌvi vin̈ icha tic:
—Tzin xiv dꞌa ebꞌ quetchon̈abꞌ toxo ix och yedꞌ ebꞌ aj Babilonia chiꞌ, talaj tzin acꞌchajoch dꞌa yol scꞌabꞌ ebꞌ, obꞌiltac am tzin yutej ebꞌ, xchi vin̈.
20 Ix in tacꞌvixi, ix valan icha tic:
—Maay mamin rey, man̈ ol ach acꞌchajoch dꞌa yol scꞌabꞌ ebꞌ. Cꞌanabꞌajej val slolonel Jehová sval tic dꞌayach, yic vachꞌ ol ach elcꞌochoc, man̈ ol ach chamoc. 21 Yujto toxo ix schꞌox Jehová dꞌayin mamin rey tas ol ujoc tato man̈ ol acꞌoch a bꞌa dꞌa yol scꞌabꞌ ebꞌ chiꞌ. 22 Masanil ebꞌ ix ix ol can dꞌa a palacio, yovalil ol icꞌjoquelta ebꞌ ix, ol acꞌchajoch ebꞌ ix dꞌa yol scꞌabꞌ ebꞌ yajal soldado yic vin̈ sreyal Babilonia chiꞌ. Ol bꞌuchvaj ebꞌ ix dꞌayach icha tic:
A ebꞌ amigo, ton̈ej ix ach yacꞌ musansatil ebꞌ, yuj chiꞌ ix ach acꞌji ganar. Ix ach actajcan yuj ebꞌ dꞌa cal socꞌom, ix el ebꞌ dꞌayach, xcham ebꞌ ix.
23 —Mamin rey, masanil ebꞌ ix etbꞌeyum yedꞌ ebꞌ uninal, ol acꞌjococh ebꞌ dꞌa yol scꞌabꞌ ebꞌ aj Babilonia chiꞌ. A achxo jun, man̈xo ol yal el dꞌa yol scꞌabꞌ ebꞌ. Palta to ol ach acꞌjococh dꞌa yol scꞌabꞌ vin̈ sreyal Babilonia chiꞌ, ol yacꞌanoch scꞌacꞌal jun chon̈abꞌ tic ebꞌ, xin chi dꞌa vin̈ rey chiꞌ.
24 Ix tacꞌvixi vin̈ dꞌayin icha tic:
—Tato tza nibꞌej max ach chami, malaj junoc mach bꞌaj tzal jun tic. 25 Tato syojtaquejel juntzan̈xo ebꞌ yajal to ix ach lolon vedꞌoc, ol javoc ebꞌ, ol scꞌanbꞌan ebꞌ tas ix al dꞌayin yedꞌ tas ix val dꞌayach. Ol yal ebꞌ dꞌayach to man̈ ol ach smilcham ebꞌ tato tzꞌacan ol al dꞌa ebꞌ. 26 Palta ol al dꞌa ebꞌ to ton̈ej tzach tevi dꞌayin yic maxtzac ach bꞌat preso dꞌa spat vin̈aj Jonatán yic max ach cham taꞌ, xchi vin̈ rey chiꞌ dꞌayin.
27 Ichaton chiꞌ ix aji. Masanil ebꞌ vin̈ yajal chiꞌ ix bꞌat in ilani, ix scꞌanbꞌan ebꞌ vin̈ dꞌayin. Icha val ix aj yalan vin̈ rey chiꞌ dꞌayin, icha chiꞌ ix vutej valan dꞌa ebꞌ vin̈. Yuj chiꞌ ix yactej ebꞌ vin̈ scꞌanbꞌan dꞌayin, yujto malaj junoc mach ix abꞌan tas ix val yedꞌ vin̈ rey chiꞌ. 28 Yuj chiꞌ ix in cann̈ej dꞌa yamaqꞌuil bꞌaj ayecꞌ ebꞌ stan̈vumal palacio masanto ix acꞌji ganar Jerusalén.