Isaías sbꞌi jun libro tic, yujto a slolonel Dios yalnac dꞌa vin̈aj Isaías tzꞌibꞌabꞌilcan dꞌay. A vin̈aj Isaías chiꞌ, ecꞌnac cajan vin̈ dꞌa Jerusalén dꞌa abꞌil 700 ayic manto javi Jesucristo. A jun libro tic, cha macan̈ yaji: A dꞌa capítulo 1 masanto dꞌa 39, syalcot yuj chon̈abꞌ Judá ayic ayecꞌ dꞌa jun tiempoal te ay smay, ayic toxo val tzꞌacꞌji ganar yuj ebꞌ aj Asiria. A dꞌa jun tiempoal chiꞌ, syal vin̈ schecabꞌ Dios tic to man̈oc yuj yipalil ebꞌ aj Asiria chiꞌ ol acꞌjoc ganar ebꞌ aj Judá chiꞌ, palta yuj smul ebꞌ, yuj spitalil ebꞌ, yuj pax to max yacꞌoch Dios ebꞌ yipoc scꞌool.

A juntzan̈ cꞌaybꞌubꞌal te ov yalani, aꞌ ix yal vin̈aj Isaías dꞌa ebꞌ anima chiꞌ. Ay pax juntzan̈ chꞌoxnabꞌil ix schꞌox vin̈ dꞌa scal ebꞌ. A yedꞌ juntzan̈ tic ix yacꞌlej vin̈ yicꞌan meltzaj ebꞌ anima chiꞌ, yic tzꞌochxi ebꞌ ejmelal dꞌa Dios. Ix yalan vin̈ dꞌa ebꞌ tato max scha yabꞌ ebꞌ tas syal Dios, ol javoc yaelal dꞌa yibꞌan̈ ebꞌ. Ix yalanpax vin̈ to ol javoc jun yin̈tilal vin̈aj rey David yacꞌ juncꞌolal yedꞌ tzalajcꞌolal dꞌa yolyibꞌan̈qꞌuinal tic.

Axo dꞌa capítulo 40 masanto dꞌa 66, ataꞌ syal vin̈aj Isaías to ol paxta ebꞌ israel icꞌbꞌilcanbꞌat dꞌa Babilonia. Ayic ol elcꞌoch jun tic, ol checlajeloc to a Jehová man̈ lajanoc icha sdiosal juntzan̈xo nación. A dꞌa juntzan̈ capítulo tic, syalpaxi to a chon̈abꞌ Israel schecabꞌ Jehová yaj dꞌa smasanil nación yic syalanel vachꞌ abꞌix. Te tzijtum juntzan̈ versículo tzꞌalan yuj jun schecabꞌ Jehová ol yabꞌ syail yuj co mul co masanil anima on̈ tic. Tzijtum pax juntzan̈ cꞌaybꞌubꞌal tzꞌalani to a ebꞌ schon̈abꞌ Dios, yovalil tojol syutej spensar ebꞌ, scꞌanabꞌajan scꞌual icꞌoj ip ebꞌ yedꞌ pax juntzan̈xo strato Dios yacꞌnac yedꞌ ebꞌ.