Jeremías sbꞌi jun libro tic, yujto a slolonel Dios yalnac dꞌa vin̈aj Jeremías aꞌ tzꞌibꞌabꞌilcan dꞌay. A vin̈aj Jeremías chiꞌ, ecꞌnac cajan vin̈ dꞌa yol smacbꞌen Judá ayic toxoval tzꞌicꞌjibꞌat ebꞌ aj Judá chiꞌ dꞌa Babilonia. A jun tic ujinac dꞌa abꞌil 600 ayic manto javi Jesucristo. Tzijtum el ix yal vin̈aj Jeremías chiꞌ to ol javoc yaelal dꞌa yibꞌan̈ juntzan̈ nación yuj smul, yujto a ebꞌ anima cajan dꞌay, a dꞌa juntzan̈ comon dios tzꞌoch ebꞌ ejmelal. An̈ejaꞌ pitzanto vin̈aj Jeremías chiꞌ ayic ix acꞌji ganar Jerusalén yuj ebꞌ aj Babilonia, ix yilan vin̈ sbꞌat vin̈ rey yedꞌ juntzan̈xo ebꞌ cajan taꞌ icha presoal. Palta ix yalanpaxcan vin̈ to a ebꞌ aj Judá chiꞌ ol meltzajxoc ebꞌ dꞌa sluum chiꞌ, ol sbꞌoanxi schon̈abꞌ ebꞌ chiꞌ.

A jun libro tic chan̈ macan̈ yaji. A bꞌabꞌel macan̈, tzꞌel yich dꞌa capítulo 1 masanto dꞌa 25. Ataꞌ syal juntzan̈ lolonel vin̈aj Jeremías chiꞌ dꞌa ebꞌ anima yedꞌ dꞌa ebꞌ yajal yaj dꞌa chon̈abꞌ chiꞌ dꞌa stiempoal chan̈van̈ ebꞌ slajvubꞌ rey. A schabꞌil macan̈, tzꞌel yich dꞌa capítulo 26 masanto dꞌa 45. A dꞌa tic syalcot yuj tastac ix ecꞌ dꞌa yibꞌan̈ vin̈aj Jeremías. Syalanpaxcot yuj juntzan̈ abꞌix to ayocto ix yalancan Dios dꞌa vin̈, aton yuj tas ol yutej Dios chiꞌ yacꞌan snivanil scꞌol ebꞌ anima. A yoxil macan̈, tzꞌel yich dꞌa capítulo 46 masanto dꞌa 51. A dꞌa tic ix yalcan juntzan̈ lolonel Dios dꞌa yibꞌan̈ juntzan̈ nación ay dꞌa slacꞌanil Israel. A schan̈il macan̈, aton capítulo 52. A dꞌa tic syal yuj tas ix aj yacꞌji ganar Jerusalén yedꞌ tas ix aj yicꞌjibꞌat ebꞌ anima dꞌa Babilonia.

A vin̈aj Jeremías chiꞌ, te xajan val ebꞌ yetchon̈abꞌ vin̈ yuuj, ix cus val vin̈ ayic ix yalan vin̈ to ol javoc yaelal dꞌa yibꞌan̈ ebꞌ, ol satjoquel schon̈abꞌ ebꞌ. Man̈ jantac juntzan̈ versículo tzꞌalancoti to ix te cus vin̈ yujto schecabꞌ Dios yaj vin̈, palta a slolonel Dios, lajan val icha junoc cꞌacꞌ sqꞌue n̈iln̈onoc, max yal smacꞌji tupoc, icha chiꞌ yaj dꞌa vin̈.

A juntzan̈ versículo vachꞌ dꞌa jun libro tic, a tzꞌalancot yuj tastac ol ujoc ayic toxo ix ecꞌ juntzan̈ yaelal tic, ol sbꞌo junxo schabꞌil strato Dios yedꞌ schon̈abꞌ. A jun trato chiꞌ, ol scꞌanabꞌajej ebꞌ yujto ol tzꞌibꞌchajcanoch dꞌa spixan ebꞌ.