A Slolonel Dios Dꞌa Vin̈aj
JEREMÍAS
1
A in Jeremías in tic, yuninal in vin̈aj Hilcías, yin̈tilal in ebꞌ sacerdote cajan dꞌa chon̈abꞌ Anatot dꞌa yol smacbꞌen lum Benjamín. Aton dꞌa jun tic tzꞌibꞌabꞌilcan tas ix yal Jehová dꞌayin yic svaleli. 2 Ix el yich slolon Jehová dꞌayin ayic 13 abꞌil yoch vin̈aj Josías yuninal vin̈aj Amón reyal dꞌa Judá. 3 Ix lolonn̈ej dꞌayin ayic ayoch vin̈aj Joacim yuninal vin̈aj Josías chiꞌ reyal dꞌa Judá. Ix lolonn̈ej pax dꞌayin masanto ayic yoil ujal yoch yuxluchil abꞌil yoch vin̈aj Sedequías reyal, yuninal pax vin̈aj Josías chiꞌ. Ataꞌ ix icꞌjibꞌat ebꞌ cajan dꞌa Jerusalén icha preso dꞌa Babilonia.Ix avtaj vin̈aj Jeremías yuj Jehová
4 Ayic ix el yich slolon Jehová dꞌayin, ix yalan icha tic:
5 Ach Jeremías, yictax manto ach vacꞌ pitzvoc dꞌa a nun, sicꞌbꞌilachxoel vuuj. Ayic manto ach alji, sicꞌbꞌilachxoel vuuj yic tzach och in checabꞌoc dꞌa juntzan̈ chon̈abꞌ, xchi dꞌayin.
6 Ix in tacꞌvi icha tic:
Mamin Jehová, ach Vajalil, unin into. Maxto nachaj tas svutej in loloni, xin chi.
7 Ix yalanxi Jehová chiꞌ dꞌayin: Man̈ alaꞌ to unin ach. An̈ej to ol ach bꞌat bꞌaj ol ach in checbꞌati, ol alan tas ol in chec alaꞌ.
8 Malaj mach bꞌaj tzach xivi. A in Jehová in svalaꞌ to ayinn̈ejoch edꞌoc yic tzach in colani, xchi dꞌayin.
9 Ix lajvi chiꞌ, ix yacꞌancot scꞌabꞌ, ix yacꞌanoch dꞌa in tiꞌ, ix yalan dꞌayin:
10 Aton val ticnaic svacꞌoch in lolonel dꞌa a tiꞌ. Tzach in checbꞌat dꞌa juntzan̈ chon̈abꞌ yic tzalan yabꞌ ebꞌ to ol javoc yaelal dꞌa yibꞌan̈ ebꞌ, ol satel ebꞌ, ol lajvoquem ebꞌ. Ay chon̈abꞌ chiꞌ ol satel dꞌa juneln̈ej, ay pax ol bꞌochajxiqꞌueoc, xchi Jehová.
A chabꞌ tas ix chꞌoxji yil vin̈aj Jeremías
11 Ix lolonxi Jehová dꞌayin, ix yalani: ¿Tas tzil chiꞌ ach Jeremías? xchi. A jun teꞌ cꞌabꞌ almendro svilaꞌ, xin chi.
12 Yel tzalaꞌ. Ol viln̈ej to a tas sval tic dꞌayach ol elcꞌoch dꞌa elan̈chamel, xchi Jehová chiꞌ.*
13 Ix yalanxi Jehová chiꞌ dꞌayin dꞌa schaelal: ¿Tas tzil chiꞌ? xchi dꞌayin. Svil jun lum chen van xeji, van stobꞌcot dꞌa stojolal norte, xin chi dꞌay.
14 Ix yalanxi dꞌayin: A dꞌa norte chiꞌ, ataꞌ ol cot yaelal ol javoc dꞌa yibꞌan̈ masanil ebꞌ anima cajan dꞌa tic.
15 A in Jehová in tic sval dꞌayach to ol laj vavtejcot jantac soldado scot dꞌa juntzan̈ chon̈abꞌ ay dꞌa norte. Ol oymaj ebꞌ dꞌa spatictac chon̈abꞌ Jerusalén tic yedꞌ dꞌa spatictac juntzan̈xo chon̈abꞌ dꞌa smacbꞌen Judá. Ol javoc sreyal ebꞌ, ol sbꞌoanem sdespacho ebꞌ dꞌa spuertail Jerusalén tic.
16 Aton jun yaelal tic ol vacꞌcot dꞌa yibꞌan̈ ebꞌ anima ix och smul dꞌayin. Ix in yactejcan ebꞌ, axo dꞌa juntzan̈ comon dios ix sbꞌo ebꞌ, ataꞌ ix och ebꞌ ejmelal. Ix sn̈usanpaxtzꞌa incienso ebꞌ dꞌay.
17 A ticnaic acꞌ ip, tecꞌbꞌej a bꞌa, bꞌat alan masanil tas ol in chec alaꞌ. Man̈ ach xiv dꞌa ebꞌ etanimail chiꞌ. Tato ol ach xivoc, ol ach vacꞌ ibꞌxocqꞌue dꞌa yichan̈ ebꞌ.
18 A ticnaic tzach vacꞌoch icha junoc chon̈abꞌ te tecꞌan, icha val junoc oy nabꞌa hierro, ma icha muro nabꞌa bronce. Yuj chiꞌ ol yal a tecꞌbꞌan a bꞌa dꞌa yichan̈ chon̈abꞌ Judá, dꞌa yichan̈ ebꞌ rey, ebꞌ yajal, ebꞌ sacerdote yedꞌ dꞌa yichan̈ masanil anima.
19 Ol yacꞌ oval ebꞌ chiꞌ edꞌoc, palta a in val Jehová in svalaꞌ to man̈ ol ach telvoc yuj ebꞌ, yujto ayinn̈ejoch edꞌoc ach in colani, xchi Jehová.