A spitalil ebꞌ chon̈abꞌ israel
2
Ix yalanxi Jehová dꞌayin icha tic:2 Ixic, bꞌat alan yabꞌ ebꞌ aj Jerusalén to a in Jehová in sval dꞌa ebꞌ icha tic: Tzin navalcoti ayic ex vacꞌanoch in chon̈abꞌoc. Ix in e cꞌanabꞌajej val, ix in e xajanej val, icha junoc ix cobꞌes toto snupnaji xajanan vin̈ yetbꞌeyum. Ix ex ochval tzacꞌan vuj dꞌa tzꞌinan luum, dꞌa lum malaj bꞌaj tzꞌavchaj tas dꞌay.
3 Ayic chiꞌ vicn̈ej eyaj a ex israel ex tic, icha val bꞌabꞌel sat avbꞌen. A in Jehová in svalaꞌ to yaln̈ej mach ebꞌ ex ixtani, ix och smul ebꞌ, ix vacꞌcot yaelal dꞌa yibꞌan̈ ebꞌ, xchi dꞌayin.
4 E masanil ex yin̈tilalcan vin̈aj Jacob, aton vin̈aj Israel, maclejec eyabꞌ tas syal Jehová.
5 Syalan dꞌayex icha tic:
¿Tas in paltail ix yil ebꞌ e mam eyicham? ¿Tas yuj ix in spatiquejcanel ebꞌ, axo dꞌa comon dios malaj yelcꞌoch bꞌaj ix yal sbꞌa ebꞌ? Yuj chiꞌ man̈xalaj jabꞌoc ix ajcan yelcꞌoch ebꞌ.
6 Majxo in snacot ebꞌ, vachꞌchom a in ix viqꞌuelta ebꞌ dꞌa Egipto, ix vicꞌan bꞌey ebꞌ dꞌa lum tzꞌinan luum, lum taquin̈ sat, lum pacꞌquiltac, lum malaj mach cajan dꞌay, lum malaj mach tzꞌecꞌ dꞌa sat.
7 A in ix vacꞌoch ebꞌ dꞌa lum te yax sat tic, bꞌaj te ay tas vachꞌ syabꞌlej ebꞌ. Palta a exxo yin̈tilal ex ebꞌ tic, ex cajan ex dꞌa sat in luum tic, ix eyixtejbꞌat luum yuj e chucal, yuj chiꞌ maxtzac scha in cꞌol jun in luum tic.
8 A ebꞌ sacerdote maxtzac in snacot ebꞌ. A ebꞌ tzex cꞌaybꞌani, maxtzac in yojtaquejel ebꞌ. A ebꞌ yajal yaj dꞌa e chon̈abꞌ, smeltzajoch ebꞌ ajcꞌolal dꞌayin, axo ebꞌ syaloch sbꞌa in checabꞌoc, a sbꞌi Baal syalel ebꞌ. Axo dꞌa comon dios syal sbꞌa ebꞌ, aton juntzan̈ malaj jabꞌoc tas vachꞌ syicꞌ ebꞌ dꞌay, xchi Jehová.
A tas albꞌilcan yuj Jehová dꞌa yibꞌan̈ Israel
9 Ix yalanpax Jehová icha tic: A in Jehová in svalaꞌ to ol vacꞌ oval eyedꞌoc yedꞌ pax ebꞌ eyin̈tilal.
10 Ixiquec dꞌa chon̈abꞌ Chipre ay dꞌa snan̈al aꞌ mar, dꞌa stojolal bꞌaj tzꞌem cꞌu, tzeyilan val. Tze checanbꞌat ebꞌ e checabꞌ dꞌa chon̈abꞌ Cedar dꞌa stojolal bꞌaj sjavi cꞌu, sbꞌat yilan val ebꞌ tato ayxo bꞌaj tzuji icha val jun tic.
11 ¿Tom ay junoc chon̈abꞌ scomon actancan sdiosal, vachꞌchom a sdiosal ebꞌ chiꞌ man̈ Diosoc? A exxo ex in chon̈abꞌ ex tic, ix in eyactejcani. Vachꞌchom a in ix ex vacꞌ val bꞌinajoc, palta axo dꞌa comon dios malaj yelcꞌochi, ataꞌ tzeyal e bꞌa.
12 Yuj chiꞌ a in Jehová in svalaꞌ: Ex cajan ex dꞌa satchaan̈, satocabꞌ e cꞌool, checlajocabꞌ xivelal dꞌa e sat yuj tas van yuji tic.
13 A in chon̈abꞌ tic, cha macan̈ smul ix och dꞌayin: A in tic lajan in icha sjaj a aꞌ sqꞌueuli, palta ix in spatiquejeli. Ix sbꞌoanpax sdiosal lajan icha yedꞌtal a aꞌ jateltacxo, maxtzac yal-laj scan vaan aꞌ dꞌa yool, xchi Jehová.
A tas ix aj yelcꞌoch spitalil ebꞌ israel
14 Ix yalanpax Jehová chiꞌ icha tic: A ex in chon̈abꞌ Israel ex tic, man̈ checabꞌoc eyajcaneli, palta ¿tas yuj tzex ixtaj icha tzꞌutaj ebꞌ checabꞌ?
15 ¿Tas yuj ix och ebꞌ anima ajcꞌolal dꞌayex? Icha yel yav nocꞌ choj icha chiꞌ yel yav ebꞌ dꞌayex. Ix can tzꞌinan e luum, ix tzꞌabꞌat e chon̈abꞌ. Man̈xa mach syal scajnaj dꞌay.
16 A ebꞌ soldado aj Menfis yedꞌ ebꞌ aj Tafnes yic Egipto, ix smacꞌpoj e jolom ebꞌ.*
17 Aton val juntzan̈ tic ix eyicꞌcot dꞌa eyibꞌan̈, yujto ix in e patiquejel a in Jehová e Diosal in tic, yacbꞌan ix ex in cuchbꞌej bꞌeyoc.
18 Axo ticnaic ¿tas tzeyacꞌ yalaꞌ, yuj chiꞌ tzex bꞌat e cꞌan scolval ebꞌ aj Egipto ay dꞌa stiꞌ aꞌ Nilo? ¿Tas pax tzeyacꞌ yalaꞌ yuj chiꞌ tzex bꞌat e cꞌan scolval ebꞌ aj Asiria ay dꞌa stiꞌ aꞌ Éufrates?
19 A in Jehová Yajal in dꞌa Smasanil, a in svalaꞌ: A val e mul chiꞌ ol icꞌancot eyaelal dꞌa eyibꞌan̈. A e pitalil ol acꞌanbꞌat dꞌa eyibꞌan̈. Nachajocabꞌel eyuuj to te chuc ix e cꞌulej yujto ix in e patiquejeli, a in Jehová e Diosal in. Ol vacꞌoch yaelal dꞌa eyibꞌan̈ yujto malaj velcꞌoch dꞌayex, xchi Jehová.
A spitalil chon̈abꞌ Israel
20 Atax dꞌa pecaꞌ ix ex och ijan e pitan e bꞌa dꞌayin. Maj yal e cꞌol ix in e cꞌanabꞌajej. Ix eyalani: Malaj co gana tzach cacꞌ servil, xe chi. Axon̈ej ajmulal ix e cꞌulej dꞌa tzalquixtac yedꞌ dꞌa yichtac te teꞌ cꞌayum xiil.
21 Icha val tzꞌaj yavchaj teꞌ uva te vachꞌ, icha chiꞌ ix aj ex vavani, lajan ex icha yin̈atil teꞌ uva te vachꞌ. ¿Tas yuj lajanxon̈ej tzex ajcan icha teꞌ caltacteꞌal uva?
22 A in val Jehová in svalaꞌ: Vachꞌchom tze comon bꞌiquejel e bꞌa yedꞌ qꞌuen yal taan̈, mato nivan xapon tzeyaqꞌuecꞌ dꞌayex, palta a e mul chiꞌ, chequel yajecꞌ dꞌa in sat. Malaj bꞌaqꞌuin̈ syal e sacbꞌicani.
23 Tze comon alan icha tic: A on̈ tic maj co juel co bꞌa calan co bꞌa dꞌa comon dios, xe chi. Naeccoti, tas ix eyutej e bꞌa dꞌa lum chꞌolquixtac. Ton̈ej tzex comon ecꞌ jechechoc icha junoc nocꞌ nun camello sayanecꞌ nocꞌ smam.
24 Lajan ex val icha junoc nocꞌ caltacteꞌal nun bꞌuru cꞌajan sbꞌeyecꞌ bꞌaj malaj anima, sucꞌlan nocꞌ tzꞌecꞌ nocꞌ ayic van stajni nocꞌ. Malaj mach syal syaman vanaj nocꞌ. Ayic stajni nocꞌ chiꞌ, secojtac tzꞌaj schax nocꞌ yuj nocꞌ mam bꞌuru chiꞌ.
25 Ex israel, actejec e bꞌeyecꞌ e sayanecꞌ e comon diosal. Nabꞌan̈ej slajvi eyoc yedꞌ stacji e tiꞌ e bꞌeyeqꞌui. Palta a ex tic tzeyalaꞌ: Maay, ayoch co pensar dꞌa juntzan̈ comon dios, yuj chiꞌ ol caln̈ej co bꞌa dꞌay, xe chi.
Smoj sjavi syaelal ebꞌ israel
26 Icha val sqꞌuixvi junoc elcꞌum ayic syamchajelta, icha val chiꞌ ol aj e qꞌuixvi a ex israel ex tic yedꞌ ebꞌ e reyal, ebꞌ eyajal, ebꞌ sacerdote yedꞌ pax ebꞌ syaloch sbꞌa in checabꞌoc.
27 Tzeyal dꞌa junoc te teꞌ icha tic: Mamin, xe chi dꞌa teꞌ. Tzeyalanpax dꞌa junoc qꞌuen qꞌueen: Nunin, xe chi. Axo pax dꞌayin jun, a yich e patic tze meltzitejcoti. Maxtzac ex cot qꞌuelan dꞌayin. Axo val yic tzeyilani to ay tas tzex icꞌani: Cotan̈, colvajan̈, xe chi dꞌayin.
28 Ex aj Judá, icha val sbꞌisul e chon̈abꞌ, icha chiꞌ sbꞌisul e diosal. ¿Bꞌajtil ay juntzan̈ e comon diosal ix e bꞌo chiꞌ? Cotocabꞌ ebꞌ, ol quilani tato ol yal ex scolan ebꞌ ayic ol javoc yaelal dꞌa eyibꞌan̈.
29 A in val Jehová in svalaꞌ: ¿Tas in mul dꞌayex yuj chiꞌ tzeyalubꞌtan̈ej to max ex in coloꞌ? Ina e masanil tze pitej e bꞌa dꞌayin.
30 Nabꞌan̈ej svacꞌoch eyaelal, maxtzac yal pax e cꞌol tze cꞌanabꞌajej in cꞌaybꞌubꞌal. Lajan ex val icha junoc nocꞌ choj te ov, tze milcham ebꞌ in checabꞌ svacꞌbꞌat dꞌa e cal.
31 ¿Tas animail eyaj a ex yin̈tilal ex can Israel? Maclejec eyabꞌ tas svalaꞌ. ¿Tom malaj jabꞌoc tas svacꞌ dꞌayex? ¿Tom icha taquin̈ luum vaj dꞌayex, mato icha junoc lum luum te ay smay? Ex in chon̈abꞌ, ¿tas val yuj tzeyal dꞌayin icha tic: Munil quic co bꞌa, malaj tzach och cuuj? xe chi.
32 ¿Tom ol sat scꞌol junoc ix cobꞌes dꞌa ston̈, ma dꞌa spichul ayic sbꞌat ix dꞌa nupnajel? Palta a exxo pax in chon̈abꞌ ex tic, junjun cꞌu tzin bꞌatn̈ej satcꞌolal eyuuj.
33 Lajan ex icha ebꞌ ix ajmul ix yojtac bꞌe bꞌaj sbꞌati, ayic sayanecꞌ ebꞌ vin̈ vinac ebꞌ ix. Sat cꞌaybꞌum eyaj dꞌa chucal.
34 Te chicꞌtac e pichul yuj schiqꞌuil ebꞌ mebꞌaꞌ yedꞌ ebꞌ malaj smul. Tze milcham ebꞌ, vachꞌchom malaj bꞌaj tzꞌoch ebꞌ elcꞌal dꞌayex.
35 Vachꞌchom tze cꞌulej icha chiꞌ, palta tzeyalan icha tic: A on̈ tic, te vachꞌ on̈, malaj co mul, man̈xalaj yoval scꞌol Jehová dꞌayon̈, xe chi. Palta a in Jehová in tic ol vacꞌcot yaelal dꞌa eyibꞌan̈, yujto tzeyalaꞌ to malaj e mul.
36 ¿Tas yuj tze pech e bꞌa yic tze qꞌuexan ebꞌ tze nibꞌej scolvaj eyedꞌoc? Icha val ajnac yel e qꞌuixvelal yuj ebꞌ aj Asiria, yujto maj ex scol ebꞌ, icha pax chiꞌ ol aj yel e qꞌuixvelal yuj ebꞌ aj Egipto.
37 Toxon̈ej n̈ojan ex em yuj qꞌuixvelal ayic ol ex meltzajcot dꞌa Egipto chiꞌ, yujto toxo ix in patiquejel ebꞌ tzeyacꞌoch yipoc e cꞌool chiꞌ. Malaj tas ol eyacꞌ yal yedꞌ ebꞌ, xchi Jehová.