Ix spitej val sbꞌa ebꞌ israel dꞌa Jehová
3
Ix yalanxi Jehová icha tic:Ex israel, tato ay junoc ix ix spuc sbꞌa yedꞌ vin̈ yetbꞌeyum, syicꞌan junocxo vin̈ ix, tato spucxi sbꞌa ix yedꞌ vin̈ schabꞌil chiꞌ, a vin̈ yetbꞌeyum ix chiꞌ, maxtzac yal yicꞌlanxi sbꞌa vin̈ yedꞌ ix. Tato syicꞌlajxi sbꞌa ebꞌ jun, a lum luum tic sjuviel lum dꞌa yol in sat. Palta a in Jehová in tic svalaꞌ to lajan ix eyutej e bꞌa icha ebꞌ ix ajmul ix tzijtum svinac, axo ticnaic, tze nibꞌej tzex meltzajxicot dꞌayin.
2 Qꞌuean̈ec qꞌuelan dꞌa lum tzalquixtac man̈xalaj steꞌal, scham eyilan lum jolomtac tzalan chiꞌ. ¿Toc ayto lum tzalan chiꞌ bꞌaj maj e cꞌulej ajmulal? Tzex em cꞌojan dꞌa titac bꞌe tze maclan yecꞌ ebꞌ tzex mulan chiꞌ yedꞌoc, icha tzꞌaj smaclan ebꞌ árabe yecꞌ ebꞌ tzꞌecꞌ bꞌaj malaj anima. Yuj eyajmulal chiꞌ ix eyixtejbꞌat lum luum tic.
3 Yuj val e mul chiꞌ maxtzac yacꞌ n̈abꞌ dꞌa stiempoal. Icha ebꞌ ix ajmul ix maxtzac qꞌuixvi jabꞌoc, icha val chiꞌ eyaji.
4 Ina ato eyalan tic dꞌayin: Mamin, vachꞌ acꞌan quedꞌoc yictax yuneꞌ chon̈abꞌ on̈to.
5 ¿Tom ayn̈ejcot oval dꞌayon̈? ¿Tom ayn̈ejcot oval chiꞌ dꞌa juneln̈ej? xe chi. Yacbꞌan van eyalan icha chiꞌ, vann̈ej pax e cꞌulan jantac tas malaj svachꞌil stechaj e cꞌulani, xchi Jehová.
Scachnabꞌil Israel yedꞌ Judá yuj Jehová
6 A dꞌa yol stiempoal vin̈aj rey Josías, ix yal Jehová dꞌayin icha tic: ¿Ix am val il tas ix scꞌulej ebꞌ etchon̈abꞌ israel? Icha val ebꞌ ix ajmul ix ix yutej sbꞌa ebꞌ. Ix laj bꞌat ebꞌ scꞌulej ajmulal dꞌa tzalquixtac yedꞌ dꞌa yichtac te teꞌ cꞌayum xiil. 7 A in tic, a tzin naani to ayic toxo ix scꞌulej ebꞌ icha chiꞌ, ol meltzajpaxcot ebꞌ dꞌayin, palta maj meltzajxicot ebꞌ. A chon̈abꞌ Judá te pit, ix yil tas scꞌulej chon̈abꞌ Israel ayto yuj sbꞌa yedꞌoc. 8 Ix yilanpax ebꞌ to ix in puc in bꞌa yedꞌ ebꞌ israel yuj yajmulal, palta a ebꞌ aj Judá chiꞌ maj xiv jabꞌoc ebꞌ, ix empax ebꞌ ajmulal. 9 Yujto malaj yelcꞌoch ajmulal dꞌa ebꞌ, yuj chiꞌ ix yixtejbꞌat lum luum tic ebꞌ yuj smul chiꞌ, yuj pax to ix och ebꞌ ejmelal dꞌa comon dios nabꞌa qꞌueen, nabꞌa teꞌ. 10 Vachꞌchom ix yil ebꞌ tas ix aj ebꞌ israel chiꞌ, man̈ yujoc chiꞌ ix meltzajxicot ebꞌ dꞌayin dꞌa smasanil scꞌool, palta ton̈ej ix stzꞌac meltzajcot sbꞌa ebꞌ dꞌayin, xchi Jehová.
11 Ix yalanpax Jehová dꞌayin icha tic: A ebꞌ israel te pit ebꞌ, palta quenn̈ej val smul ebꞌ dꞌa yichan̈ ebꞌ aj Judá. A ebꞌ aj Judá chiꞌ maj yacꞌ elcꞌoch tas ix yal ebꞌ. 12 Ach Jeremías, ixic qꞌuelan dꞌa stojolal norte, tzalanbꞌat jun lolonel tic dꞌa ebꞌ etisraelal ay dꞌa norte chiꞌ.
A val Jehová tzꞌalan dꞌayex icha tic: Ex israel te pit, meltzajan̈ecxicot dꞌayin. Man̈ ovaloc ol vutej ex in chaani, man̈ masaniloc tiempo aycot voval dꞌayex, yujto tzꞌocꞌ in cꞌol dꞌayex.
13 An̈ej to tzeyojtaquejel e chucal, to te pit ix eyutej e bꞌa dꞌayin, a in Jehová e Diosal in tic. A in svalaꞌ to ix och e mul e cꞌulan ajmulal yedꞌ juntzan̈ comon dios dꞌa yichtac te teꞌ cꞌayum xiil. Maj e cꞌanabꞌajej jabꞌoc in checnabꞌil, xchi Jehová dꞌayex, xa chi, xchi dꞌayin.
14 Ix yalanxi Jehová icha tic: Ex in chon̈abꞌ te pit, meltzajan̈ecxi dꞌayin, yujto eyetbꞌeyum vaji. Junjun ex ol ex vicꞌcot dꞌa junjun chon̈abꞌ. Chatacvan̈ ol aj ex vicꞌancot dꞌa junjun macan̈ in̈tilal. Icha chiꞌ ol aj ex vicꞌanxicancot dꞌa Sion. 15 Ol vacꞌoch ebꞌ eyilumal icha val in gana, axo ebꞌ ol acꞌan yajalil dꞌa eyibꞌan̈ dꞌa jelanil yedꞌ dꞌa sjichanil. 16 A in val Jehová in svalaꞌ to ayic toxo ix qꞌuibꞌxi e bꞌisul dꞌa e chon̈abꞌ tic, man̈xa bꞌaj ol eyacꞌ bꞌinaj teꞌ scaxail in trato. Man̈xa bꞌaj ol e nacot teꞌ, man̈xo pax olto javoc teꞌ dꞌa e pensar. Man̈xo ol e bꞌo junocxo sqꞌuexul teꞌ. 17 A dꞌa jun tiempoal chiꞌ, a Jerusalén ol alchaj yuuj to in despacho yaj a in Jehová in tic. Masanil chon̈abꞌ ol smolbꞌej sbꞌa dꞌa tic yic tzꞌoch ebꞌ ejmelal dꞌayin. Man̈xo ol yacꞌ sbꞌa ebꞌ scuchbꞌajbꞌat yuj schuc pensaril.
18 A dꞌa jun tiempoal chiꞌ, junxon̈ej ol aj chon̈abꞌ Judá yedꞌ chon̈abꞌ Israel. Junxon̈ej ol aj e meltzajcot dꞌa jun nación dꞌa stojolal norte, axo e javican cajan dꞌa lum luum vacꞌnac smacbꞌenej ebꞌ e mam eyicham.
19 Ex israel, ix in naꞌ to tzex in chaoch vuninaloc, svacꞌan jun lum te nibꞌabꞌil tic dꞌayex. An̈ej val jun lum tic te vachꞌ yilji dꞌa yolyibꞌan̈qꞌuinal tic. Ix in naꞌ to ol in eyal e mamoc dꞌa juneln̈ej, man̈xo ol in eyactejcan valani.
20 Palta a in val Jehová in svalaꞌ to icha junoc ix ix te chuc dꞌa vin̈ yetbꞌeyum, icha chiꞌ ix eyutej e bꞌa dꞌayin.
21 Tzꞌabꞌchaj yoch jaj dꞌa lum tzalquixtac man̈xa steꞌal, aton ebꞌ israel tzꞌel yav yoqꞌui scꞌanan colval ebꞌ. Ix elcan ebꞌ dꞌa sbꞌeal tojolal. Ix in bꞌat satcꞌolal yuj ebꞌ, a in Jehová sDiosal in ebꞌ tic.
22 Ex anima te pit, cotan̈ecxi dꞌayin, ol vicꞌanel jun pitalil ayoch dꞌa e pensar chiꞌ, xchi Jehová chiꞌ.
Ix tacꞌvi ebꞌ israel chiꞌ icha tic: Ina cajecꞌ tic, scacꞌoch co bꞌa dꞌa yol a cꞌabꞌ, yujto a ach tic Jehová co Diosal ach.
23 Nabꞌan̈ej on̈ xidꞌecꞌ dꞌa tzalquixtac, on̈ avaj chaan̈ cacꞌan qꞌuin̈ dꞌa juntzan̈ comon dios. An̈ej val dꞌayach Jehová co Diosal tzꞌilchaj co colnabꞌil.
24 Yictax yuneꞌ chon̈abꞌ on̈to, on̈ och ejmelal dꞌa juntzan̈ yechel qꞌuixvubꞌtac chiꞌ, yuj chiꞌ ix acꞌ satel tastac ix aj dꞌa ebꞌ co mam quicham, aton nocꞌ calnel yedꞌ nocꞌ vacax. Ix champax yuninal ebꞌ yedꞌ yisil ebꞌ.
25 Quiqꞌuec em co bꞌa yuj qꞌuixvelal, yujto a on̈ tic yedꞌ ebꞌ co mam quicham, ix te och val co mul dꞌa Jehová co Diosal. Yictax yuneꞌ chon̈abꞌ on̈to masanto ticnaic, max co cꞌanabꞌajej tas syal dꞌayon̈, xchi ebꞌ.