Cachnabꞌil yic tzꞌoch naojbꞌail
4
A val Jehová tzꞌalani:Ex israel, tato dꞌa val yel tze nibꞌej tzex meltzajxi dꞌayin, actejeccan juntzan̈ e diosal yajbꞌentac chiꞌ.
2 Aqꞌuec e tiꞌ dꞌa vichan̈, tzeyacꞌan elcꞌoch tas tzeyalaꞌ. Ichato chiꞌ bꞌian, ol in yicꞌanchaan̈ masanil nación, ol vacꞌan in vachꞌcꞌolal dꞌa ebꞌ, xchi.
3 Syalanxi Jehová dꞌayex, ex aj Judá yedꞌ ex aj Jerusalén:
Ix pitbꞌiel e pensar icha lum luum malaj mach smunlaj dꞌa sat, an̈ej teꞌ qꞌuix sqꞌuibꞌ dꞌay. Comonoc cꞌun tzeyutej jabꞌoc e pensar yic tzꞌoch in lolonel dꞌay.
4 Ex aj Judá yedꞌ ex aj Jerusalén, cꞌanabꞌajejec in trato ix in bꞌo eyedꞌoc. Chꞌoxequel in trato dꞌa e bꞌeybꞌal, aton in trato chabꞌil eyuuj. Ojtaquejec eli to a in ton Jehová e Diosal in. Tato maay, a yuj e chuc bꞌeybꞌal chiꞌ scot yoval in cꞌol dꞌa eyibꞌan̈ icha teꞌ cꞌacꞌ man̈xa mach syal smacꞌan tupoc.
Ol satjoquel Judá
5 Alec juntzan̈ tic dꞌa ebꞌ aj Judá yedꞌ dꞌa ebꞌ aj Jerusalén: Aqꞌuec ocꞌ qꞌuen trompeta dꞌa masanil chon̈abꞌ, xe chi. Te chaan̈ tzex avaji tzeyalan icha tic: Co molbꞌejec co bꞌa dꞌa yol juntzan̈ chon̈abꞌ vachꞌ yaj smuroal, xe chi.
6 Iqꞌuecchaan̈ e bandera schꞌoxani to sbꞌat e cꞌubꞌejel e bꞌa dꞌa Sion. Sayec ecꞌ bꞌaj tze col e bꞌa, man̈ ex och vaan. Yujto a dꞌa norte ol vicꞌcot jun nivan yaelal ol satanel smasanil.
7 Icha yelta nocꞌ choj bꞌaj ay, icha chiꞌ ol aj scot ebꞌ ol ul satanel juntzan̈ chon̈abꞌ tic. Toxo ix elta ebꞌ dꞌa yol schon̈abꞌ yic tzul satanel e chon̈abꞌ tic ebꞌ, ol smacꞌanem lan̈naj ebꞌ, man̈xa mach ol can dꞌay.
8 Yuj chiꞌ aqꞌuecoch pichul ya svaꞌi, ocꞌan̈ec, elocabꞌ eyav yuj yaelal, yujto a val yoval in cꞌol a in Jehová in tic manto el-laj dꞌa eyibꞌan̈, xchi Jehová.
9 A val Jehová tzꞌalanxi icha tic: A dꞌa jun tiempoal chiꞌ, a vin̈ rey yedꞌ ebꞌ yajal, ol el yip ebꞌ yuj xivelal. A ebꞌ sacerdote yedꞌ ebꞌ syaloch sbꞌa in checabꞌoc, toxon̈ej ol satcan scꞌol ebꞌ, xchi.
10 Ix valan Jeremías in tic: Ay Mamin ¿tas yuj ix a qꞌuexan̈ tiej ebꞌ aj Jerusalén tic? Ix acꞌ a tiꞌ acꞌan juncꞌolal dꞌa ebꞌ, axo ticnaic, a qꞌuen cuchilubꞌ ijanoch dꞌa sjaj ebꞌ uuj, xin chi.
11 Ix yalanxi Jehová dꞌayin icha tic: A dꞌa jun tiempoal chiꞌ, ol val dꞌa ebꞌ aj Jerusalén: Ay jun taquin̈ icꞌ scot dꞌa lum tzalquixtac ay dꞌa taquin̈ luum. Sjavi xumnaj dꞌa stojolal in chon̈abꞌ, man̈ ichoc icꞌ tzꞌicꞌanel smatzꞌil ixim trigo.
12 A jun icꞌ svacꞌcot chiꞌ, te ov dꞌa yichan̈ junxo icꞌ chiꞌ. A jun icꞌ sbꞌinaj tic, aton yaelal ol vacꞌcot dꞌa yibꞌan̈ in chon̈abꞌ, xchi Jehová.
Ol oymaj ebꞌ ajcꞌol dꞌa Israel
13 Ix yalanxi Jehová icha tic: Ilec val scot ebꞌ soldado ajcꞌool, icha val scot junoc asun scot ebꞌ. A val scarruaje ebꞌ lajan sbꞌey icha chacxuxum icꞌ. Axo nocꞌ schej ebꞌ ecꞌbꞌal sbꞌey nocꞌ dꞌa yichan̈ nocꞌ chꞌacbꞌa. Yuj chiꞌ ol eyal icha tic: Obꞌiltac on̈ val, ol on̈ sateloc, xe chama.
14 Ex aj Jerusalén, iqꞌuequel masanil chucal ay dꞌa e pensar yic vachꞌ ol ex colchajoc. ¿Bꞌaqꞌuin̈to val ol eyactej e naan chucal?
15 Ato dꞌa Dan yedꞌ dꞌa lum tzalquixtac yic Efraín, ataꞌ scot yabꞌixal oval.
16 Alec dꞌa juntzan̈ chꞌoc chon̈abꞌil yedꞌ dꞌa Jerusalén to a dꞌa jun chon̈abꞌ te najat ay, ataꞌ scot ebꞌ ajcꞌool. Tzꞌel yav ebꞌ scot yacꞌ oval yedꞌ juntzan̈ chon̈abꞌ dꞌa yol yic Judá.
17 Ol oymaj ebꞌ dꞌa chon̈abꞌ Jerusalén, icha ebꞌ stan̈van junoc munlajel. A in val Jehová in svalaꞌ to icha chiꞌ ol ujoc, yujto ix ste pitej sbꞌa ebꞌ dꞌayin.
18 Yuj e bꞌeybꞌal yedꞌ tas tze cꞌulej sjavi juntzan̈ tic dꞌa eyibꞌan̈. A yuj e chucal, te chuc tzꞌaj eyelcꞌochi, syabꞌ val syail e pixan yuuj, xchi Jehová.
Scus scꞌool vin̈aj Jeremías yuj schon̈abꞌ
19 Ay..., ste cus in cꞌool, tzꞌoch val pitzꞌan dꞌa in pixan. Stin̈tin̈an in pixan yuj tas sjavi chiꞌ. Maxtzac in em numan. Toxo ix vabꞌ yocꞌ qꞌuen trompeta yedꞌ yel yav ebꞌ soldado yic tzꞌoch oval.
20 Tzoltzon sja abꞌix yic juntzan̈ yaelal sjavi. Masanil chon̈abꞌ tic toxo ix laj juvibꞌati. Elan̈chamel ix lajviem co campamento, ix ixtaxbꞌat bꞌaj cajan on̈.
21 ¿Jantacto val tiempo ol vil sbandera ebꞌ soldado yedꞌ vabꞌan spuchaj qꞌuen trompeta? xin chi.
22 Ix yalanxi Jehová icha tic: A ebꞌ in chon̈abꞌ, te malaj spensar ebꞌ, max in yojtaquejel ebꞌ. Lajan ebꞌ icha ebꞌ unin malaj jabꞌoc spensar, man̈ jabꞌoc snachajel yuj ebꞌ. Te jelan ebꞌ dꞌa chucal. Man̈ yojtacoc ebꞌ scꞌulan vachꞌil, xchi.
A tas ol aj slajviem chon̈abꞌ
23 A in Jeremías in tic, ix chꞌoxji vil sat luum tic, tzꞌinanxon̈ej ix ajcani. Ix vilpaxqꞌue satchaan̈, man̈xalaj saquilqꞌuinal dꞌay.
24 Ix laj vil lum nivac vitz, ix ibꞌxiqꞌue luum yedꞌ pax lum tzalquixtac, ix laj tzicubꞌtan̈aj luum.
25 Ix vilani man̈xalaj anima, axo masanil nocꞌ sjen̈vi toxo ix bꞌat nocꞌ elelal.
26 Ix vilanpaxi, a lum luum bꞌaj ay avbꞌen, toxo ix can tzꞌinan luum. Masanil chon̈abꞌ toxo ix juviemi. Yuj yoval scꞌol Jehová icha chiꞌ ix aj masanil juntzan̈ chiꞌ.
27 Ix yalanxi Jehová icha tic: Masanil lum luum ol juvocbꞌatoc, palta man̈ ol in satel lum dꞌa juneln̈ej.
28 Cuseltac ol ajcan lum luum tic, axo satchaan̈ ol qꞌuicꞌbꞌoccanoc. Icha chiꞌ ol ajoc yujto icha chiꞌ ix aj in naani, ix valan paxi. Man̈ ol in qꞌuexlaj tas ix in naꞌ chiꞌ, man̈ ol ecꞌbꞌatlaj tas ix val chiꞌ, xchi Jehová.
29 Ayic syabꞌan ebꞌ anima yel yav ebꞌ soldado ayqꞌue dꞌa yibꞌan̈ chej yedꞌ ebꞌ yedꞌnac sjul-labꞌ, sbꞌat ebꞌ elelal, bꞌat scꞌubꞌejel sbꞌa ebꞌ dꞌa caltac teꞌ, sqꞌuecan lotzlon ebꞌ dꞌa sattac qꞌuen tenam. Yuj chiꞌ ix laj can tzꞌinan schon̈abꞌ ebꞌ. Man̈xalaj mach scajnajcan dꞌay.
30 A Jerusalén van slajviemi, lajan icha junoc ix ix nabꞌaxon̈ej syacꞌoch scꞌapac púrpura, syacꞌanoch qꞌuen oro ix vachꞌ yilji, qꞌuicꞌ syutej stitac sat ix yacꞌan ucꞌoc. Man̈xa yelcꞌoch bꞌaj sbꞌo sbꞌa ix chiꞌ, yujto a ebꞌ vin̈ vinac nibꞌabꞌil yuj ix, yajbꞌilxoel ix yuj ebꞌ vin̈. Toxon̈ej sna ebꞌ vin̈ tas ol aj smilan ix ebꞌ vin̈. Icha chiꞌ van scꞌulan Jerusalén yedꞌ juntzan̈xo chꞌoc nacional.
31 A ebꞌ aj Sion tzꞌel yav chiꞌ. Svabꞌ val yel yav ebꞌ icha yel yav junoc ix ix bꞌabꞌelto tzꞌalji yuneꞌ. Scꞌacvi ebꞌ, syacꞌanel lian scꞌabꞌ ebꞌ, syalan ebꞌ: Ay, obꞌiltac on̈. Ol on̈ miljoccham yuj ebꞌ milum anima, xchi ebꞌ.