A smul Jerusalén
5
Ix yalanxi Jehová dꞌayin icha tic: Ecꞌan̈ dꞌa scalleal Jerusalén tic, tzilan masanil anima, tzilan dꞌa mercado tato ay junoc anima sbꞌeybꞌalan tojolal, vachꞌn̈ej syutej sbꞌa. Vachꞌchom junoc pitan̈ tzꞌilchaj uuj, ol vacꞌ nivancꞌolal Jerusalén tic.2 Ay ebꞌ stzꞌacan sloc in bꞌi ayic syacꞌan stiꞌ ebꞌ, palta dꞌa es sloc in bꞌi chiꞌ ebꞌ, xchi Jehová.
3 Mamin Jehová, a ebꞌ tza nibꞌej, aton ebꞌ yeln̈ej syalaꞌ. Yuj chiꞌ ix acꞌoch syaelal ebꞌ a chon̈abꞌ tic, palta malaj yelcꞌoch dꞌa ebꞌ. Ix acꞌ lajvoquem ebꞌ, palta maj nachajpaxel yuj ebꞌ. Te pit spensar ebꞌ, icha stzatzil junoc qꞌuen qꞌueen. Malaj sgana ebꞌ syactejcan schuc bꞌeybꞌal.
4 Ix in naꞌ icha tic: Tecan a ebꞌ mebꞌaꞌ malaj val jabꞌoc spensar, a ebꞌ icha chiꞌ scꞌulani, yujto man̈ yojtacoc ebꞌ tas sgana Jehová Dios dꞌa ebꞌ yedꞌ tas syal dꞌa ebꞌ.
5 Ol bꞌat in lolon yedꞌ ebꞌ anima nivac yelcꞌochi, xin chi. A valani to yojtac ebꞌ tas sgana Jehová Dios dꞌa ebꞌ yedꞌ tas syal dꞌa ebꞌ. Palta masanil juntzan̈ ebꞌ chiꞌ, ix spitejpax sbꞌa ebꞌ dꞌa Dios. Maj yal scꞌol ebꞌ ix scꞌanabꞌajej Jehová chiꞌ.
6 Yuj val chiꞌ ol elta nocꞌ choj dꞌa caltac yax luum, ol miljoccham ebꞌ yuj nocꞌ. A nocꞌ oques ay dꞌa tzꞌinan luum ol tzilchitanbꞌat ebꞌ. Axo nocꞌ leopardo, ol laj cꞌoch nocꞌ dꞌa stitac schon̈abꞌ ebꞌ. Tato tzꞌelta ebꞌ, chocꞌ tzꞌajcan ebꞌ yuj nocꞌ, yujto te nivan smul ebꞌ ix ochi, man̈xo bꞌischajbꞌenoc spitalil ebꞌ.
7 Yuj chiꞌ syal Jehová icha tic: ¿Tasto val ol aj ex vacꞌan nivancꞌolal? A ebꞌ eyuninal, ix in yactejcan ebꞌ, syacꞌan stiꞌ ebꞌ dꞌa sbꞌi juntzan̈ comon dios to man̈ diosoc. Jantac vael ix vacꞌ dꞌa ebꞌ, palta maj in scꞌanabꞌajej ebꞌ, an̈ej ajmulal scꞌulej ebꞌ, molann̈ejecꞌ ebꞌ bꞌaj ay ebꞌ ix ajmul ix.
8 Icha nocꞌ mam chej n̈epepi yuj bꞌaqꞌuech, toxon̈ej tzꞌel yav jin̈in̈i yeqꞌui, icha chiꞌ ebꞌ, comonxon̈ej stzuntzejbꞌat ebꞌ ix ix ebꞌ ay dꞌa slacꞌanil, ebꞌ ix ayxo yetbꞌeyum.
9 ¿Tom man̈ ol vacꞌoch syaelal ebꞌ yuj juntzan̈ sbꞌeybꞌal chiꞌ? ¿Tom man̈ ol vacꞌ spac dꞌa junoc chon̈abꞌ dꞌa smojal icha tas scꞌulej?
10 Ochocabꞌ ebꞌ ajcꞌol satanel teꞌ uva, palta man̈ masaniloc teꞌ ol lajvoqueloc. Sjecocabꞌel teꞌ scꞌabꞌ ebꞌ, yujto man̈xo vicoc teꞌ.
11 A in val Jehová in svalaꞌ to icha chiꞌ ol ajoc, yujto maj scꞌanabꞌajej ebꞌ aj Israel yedꞌ ebꞌ aj Judá in trato ix in bꞌo yedꞌoc, xchi Jehová dꞌayin.
A yaelal ol javoc
12 A ebꞌ aj Israel yedꞌ ebꞌ aj Judá, man̈ yeloc tas syal ebꞌ dꞌa spatic Jehová. Syalan ebꞌ icha tic: A Dios malaj tas sna dꞌa quibꞌan̈. Man̈ ol cabꞌlaj syail yuj oval, ma yuj vejel.
13-14 A ebꞌ schecabꞌ Dios malaj yelcꞌoch tas syal ebꞌ, man̈oc slolonel Dios syal ebꞌ, xchi ebꞌ.
Palta a val Jehová Dios Yajal dꞌa Smasanil, aꞌ ix alan juntzan̈ tic dꞌayin: Yujto syal ebꞌ icha chiꞌ, yuj chiꞌ a val tic ol javoc dꞌa yibꞌan̈ ebꞌ. A in lolonel ol elta dꞌa a tiꞌ, lajan val ol vutej icha teꞌ cꞌacꞌ. Axo ebꞌ anima tic, lajan ol aj ebꞌ icha teꞌ cꞌatzitz. Axo jun cꞌacꞌ chiꞌ ol satanel ebꞌ smasanil, xchi Jehová.
15 A val Jehová tzꞌalan icha tic: Ex yin̈tilal Israel, a jun chon̈abꞌ te najat ay, te tecꞌan, aytaxon dꞌa pecaꞌ, ol vicꞌcot dꞌayex, aton jun chon̈abꞌ to man̈ eyojtacoc stiꞌ, man̈ ol eyabꞌlaj tas ol yal ebꞌ.
16 Masanil juntzan̈ anima chiꞌ, te jelan ebꞌ yacꞌan oval, a syamcꞌabꞌ ebꞌ yic oval yedꞌnac chamel.
17 Ol slajel sat eyavbꞌen ebꞌ yedꞌ e vael. Ol smilcham eyuninal ebꞌ yedꞌ eyisil. Ol schianbꞌat nocꞌ e calnel ebꞌ yedꞌ nocꞌ e vacax, ol sloanpaxbꞌat sat teꞌ uva ebꞌ yedꞌ sat teꞌ higo avabꞌil eyuuj. A ebꞌ soldado ebꞌ ol macꞌanem lan̈naj e chon̈abꞌ vachꞌ yajoch smuroal ayoch yipoc e cꞌool, xchi Jehová.
18 A val Jehová ix alan dꞌayin: Vachꞌchom tzijtum yaelal ol ja dꞌa jun tiempoal chiꞌ, palta man̈ ol ex in satel-laj dꞌa juneln̈ej. 19 Tato ay mach ol cꞌanbꞌan dꞌayach: ¿Tas yuj syacꞌcot juntzan̈ tic Jehová co Diosal dꞌa quibꞌan̈? tato xchi ebꞌ, tzal dꞌa ebꞌ icha tic: Icha chiꞌ ex yutej yujto ix e patiquejcaneli, axo juntzan̈ chꞌoc diosal ix eyacꞌ servil dꞌa yol e macbꞌen tic. Yuj chiꞌ yovalil ol eyacꞌ servil ebꞌ chꞌoc animail dꞌa junocxo macbꞌen man̈ eyicoc, xa chi, xchi Jehová dꞌayin.
Cachnabꞌil dꞌa chon̈abꞌ Israel
20 Ix yalanxi Jehová icha tic: Alec dꞌa ebꞌ yin̈tilalcan Jacob cajan dꞌa smacbꞌen Judá:
21 Ex anima malaj e pensar, abꞌec juntzan̈ tic: Ay yol e sat, palta max yal-laj eyilani. Ay e chiquin, palta max eyabꞌlaj.
22 A ex tic, malaj velcꞌoch dꞌayex. A in tic ix in bꞌocanem qꞌuen arena dꞌa stitac aꞌ mar dꞌa juneln̈ej. Vachꞌchom sqꞌue vaan aꞌ scꞌan̈ yem pon̈naj aꞌ, palta max ecꞌlaj aꞌ dꞌa qꞌuen arena aycanem chiꞌ vuuj. Tato icha chiꞌ in poder tzeyilaꞌ, ¿tom man̈ smojoc e xiv dꞌayin?
23 A ex tic te pit ex, ix in e patiquejcaneli.
24 Max e na jabꞌoc eyal icha tic: Ayocabꞌ yelcꞌoch Jehová co Diosal dꞌayon̈, yujto a tzꞌacꞌancot n̈abꞌ dꞌa stiempoal, syacꞌanpax elul sat cavbꞌen dꞌa stiempoal, man̈ xe chioc.
25 Palta yuj e mul tzꞌoch vaan juntzan̈ tic, yuj chiꞌ max yal eyacꞌan tzalajbꞌoc e cꞌool yedꞌ juntzan̈ in vachꞌcꞌolal tic, xchi Jehová, xa chi.
26 A dꞌa in chon̈abꞌ tic, ay val ebꞌ anima te chuc, say modo ebꞌ tas tzꞌaj yixtan ebꞌ anima ebꞌ, icha ebꞌ tzꞌacꞌanem syaalil nocꞌ much.
27 Sbꞌudꞌ spat ebꞌ yedꞌ masanil tastac sutel ebꞌ dꞌa ebꞌ anima, icha tzꞌaj yacꞌjioch nocꞌ much dꞌa yol steꞌ, sbꞌudꞌji yuj nocꞌ, yuj chiꞌ nivan tzꞌaj yelcꞌoch ebꞌ yuj sbꞌeyumal syelqꞌuej chiꞌ.
28 Naynay yaj ebꞌ yuj bꞌaqꞌuech. Man̈xa yalnabꞌil schucal ebꞌ. Max sbꞌolaj yaj ebꞌ dꞌa stojolal tas tzꞌutaj ebꞌ unin chamnac smam yedꞌ ebꞌ mebꞌaꞌ.
29 ¿Tom man̈ ol vacꞌcot yaelal dꞌa eyibꞌan̈ yuj juntzan̈ tic? A in val Jehová in svalaꞌ to ol vacꞌ spac dꞌayex in chon̈abꞌ ex tic icha val dꞌa smojal.
30 Xivubꞌtac, satcꞌolaltac yuj tas tzuji dꞌa jun chon̈abꞌ tic.
31 A ebꞌ syaloch sbꞌa in checabꞌoc, an̈ej es syal ebꞌ. Axo ebꞌ sacerdote syacꞌ yajalil ebꞌ icha sgana. Axo in chon̈abꞌ tic, vachꞌ syabꞌi. Palta, ¿tas val ol aj ebꞌ ayic ol ja slajvubꞌ?