Oymajnac ebꞌ ajcꞌol dꞌa Jerusalén
6
Ex yin̈tilal Benjamín, sayec bꞌaj tze col e bꞌa. Elan̈ec dꞌa Jerusalén. Puec qꞌuen trompeta dꞌa Tecoa, aqꞌuecqꞌue teꞌ tabꞌ chꞌoxnabꞌilal dꞌa Bet-haquerem, yujto dꞌa norte scot jun nivan yaelal, nivan tas ol lajvoquel yuuj.2 Toxo val ol in satel ebꞌ anima ay dꞌa Sion, ebꞌ te nibꞌabꞌil.
3 A ebꞌ rey yedꞌ ebꞌ soldado ol javoc ebꞌ dꞌa jun chon̈abꞌ tic, ol sbꞌoan scampamento ebꞌ dꞌa spatictac. A bꞌaj ol can junjun ebꞌ, ol satn̈ejel yuj ebꞌ.
4 A ebꞌ eyajcꞌol chiꞌ, syal ebꞌ icha tic: Caqꞌuec lista co bꞌa cacꞌan oval yedꞌoc. Cotan̈ec, caqꞌuec oval yedꞌ dꞌa chimcꞌualil. Palta an̈ej to van yem cꞌu, vanxo yoch veven,
5 yuj chiꞌ dꞌacꞌvalil ol on̈ ochec cacꞌ oval yedꞌoc. Ol co macꞌanem lan̈naj yedꞌtal ebꞌ soldado stan̈van chon̈abꞌ, xchi ebꞌ.
6 A Jehová Yajal dꞌa Smasanil tzꞌalan icha tic: Chꞌaquequel te teꞌ, tze bꞌoanqꞌue e tecꞌnubꞌ yic tzex och eyacꞌ oval dꞌa Jerusalén. Ol vacꞌoch yaelal dꞌa yibꞌan̈ jun chon̈abꞌil anima chiꞌ, yujto axon̈ej ixtoj anima syacꞌ ebꞌ.
7 A dꞌa Jerusalén chiꞌ spacꞌchaan̈ chucal, icha val sqꞌueul sjaj junoc a aꞌ. An̈ej ixtoj anima yedꞌ chucal sbꞌinaj dꞌay. Yuj chiꞌ ol jan̈ej yaelal dꞌa yibꞌan̈ jun chon̈abꞌ chiꞌ.
8 Bꞌoec e bꞌeybꞌal ex aj Jerusalén, yic vachꞌ max viqꞌuel in pensar dꞌayex. Tato maay, ol vacꞌcan tzꞌinan e luum tic, man̈xalaj mach ol cajnajcan dꞌay, xchi Jehová.
Ix alchaj yuj yaelal
9 Ix yalan Jehová Yajal dꞌa Smasanil dꞌayin icha tic: A ebꞌ israel tic man̈xa junoc ebꞌ ol canoc, icha tzꞌaj smolchaj sat teꞌ uva man̈xa bꞌaj scan junoc pitan̈ sat, icha chiꞌ ol aj ebꞌ. Yuj chiꞌ yacbꞌan manto uji jun chiꞌ, colcanel jantac ebꞌ syal yelcani, icha val tzꞌaj yecꞌ ebꞌ svachꞌ molan teꞌ sat uva dꞌa scꞌabꞌ, xchi dꞌayin.
10 Ix in tacꞌvi: ¿Mamin, mach ol abꞌanoc tato sval jun abꞌix tic? Icha val to macan schiquin ebꞌ, max yabꞌlaj ebꞌ. Ton̈ej sbꞌuchvaj ebꞌ, max schalaj scꞌol a lolonel ebꞌ.
11 Mamin, scot pax yoval in cꞌol edꞌoc dꞌa jun chon̈abꞌ tic. Maxtzac techaj vuj in yamanoch vaan, xin chi.
Ix yalan Jehová dꞌayin icha tic: Aqꞌuem yoval in cꞌol chiꞌ dꞌa yibꞌan̈ ebꞌ unin tzꞌecꞌ dꞌa yoltac calle yedꞌ dꞌa yibꞌan̈ ebꞌ vin̈ quelemtac umaneqꞌui. Ol yamchaj ebꞌ vin̈ vinac yedꞌ ix yetbꞌeyum yedꞌ ebꞌ te icham animaxo.
12 Masanil spat ebꞌ, smunlajel ebꞌ, ebꞌ ix yetbꞌeyum ebꞌ, chꞌocxo mach ol icꞌancanoc. Yujto a in val Jehová in svalaꞌ, ol vicꞌqꞌue in cꞌabꞌ vacꞌan syaelal ebꞌ cajan dꞌa jun chon̈abꞌ tic.
13 Masanil ebꞌ nivac yelcꞌochi yedꞌ ebꞌ malaj yelcꞌochi, an̈ej tas syutej ebꞌ yacꞌan ganar dꞌa spatic chucal snaꞌa. An̈ejaꞌ ebꞌ syaloch sbꞌa in checabꞌoc yedꞌ ebꞌ sacerdote, axon̈ej elcꞌal syacꞌ ebꞌ.
14 Snibꞌej ebꞌ scꞌubꞌejel jantac yaelal syabꞌ in chon̈abꞌ, syalan ebꞌ to ay juncꞌolal, palta man̈ yeloclaj.
15 Max qꞌuixvi jabꞌoc ebꞌ scꞌulan juntzan̈ tas max techaj vilani. Malaj jabꞌoc sqꞌuixvelal ebꞌ, man̈ yojtacoc ebꞌ tas jun qꞌuixvelal chiꞌ. Yuj chiꞌ a in val Jehová in svalaꞌ, a val yic ol vacꞌan syaelal ebꞌ, ol satcanel ebꞌ, xchi Jehová.
A spitalil chon̈abꞌ Israel
16 Ix yalan Jehová dꞌa ebꞌ schon̈abꞌ icha tic: Ayic ex och tecꞌtecꞌ bꞌaj sculusej sbꞌa bꞌe, ix valan dꞌayex: Scham val eyilan bꞌaj tzex bꞌati. Tze cꞌanbꞌej eyabꞌi tas bꞌeal yicꞌnac ebꞌ e mam eyicham. Aton dꞌa bꞌe vachꞌ chiꞌ tzex bꞌati, ataꞌ ol eyicꞌ eyip, xin chi dꞌayex. Palta ix eyalani: Maay, malaj co gana tzon̈ bꞌat taꞌ, xe chi.
17 Icha spuchaj qꞌuen trompeta yic syacꞌan abꞌix to van sjavi oval dꞌa scal ebꞌ anima, icha chiꞌ ix vutej in checanbꞌat ebꞌ in checabꞌ ex scachaꞌ, ix in checan yal ebꞌ icha tic: Actejeccan e chuc bꞌeybꞌal tic, yic man̈ ol ja yaelal dꞌa eyibꞌan̈, xin chi. Palta ix eyalan icha tic: Malaj co gana scactejcani, xe chi.
18 Yuj chiꞌ svalan icha tic: Abꞌec ex chꞌoc chon̈abꞌil, ojtaquejequel tas ol ujoc dꞌa in chon̈abꞌ tic.
19 Abꞌec e masanil ex cajan ex dꞌa sat luum tic: Ol vicꞌcot junoc yaelal te chuc dꞌa yibꞌan̈ jun chon̈abꞌ tic, yuj chucal sna ebꞌ scꞌulej, yujto maj scha yabꞌ in lolonel ebꞌ, ix spatiquejel in cꞌaybꞌubꞌal ebꞌ.
20 Ex in chon̈abꞌ, ¿tasto yuj tzeyicꞌcot incienso yic chon̈abꞌ Sabá dꞌayin yedꞌ te teꞌ sucꞌuqꞌui sjabꞌ scot dꞌa juntzan̈ chon̈abꞌ najat? Maxtzac schalaj in cꞌol juntzan̈ e silabꞌ tze n̈ustzꞌaoc, ma juntzan̈xo e silabꞌ tzeyacꞌaꞌ, xchi Jehová.
21 Yuj juntzan̈ tic ix yalan Jehová dꞌayin icha tic: Ol vaqꞌuem junoc tas bꞌaj ol sloc sbꞌa eyoc dꞌa yichan̈ ebꞌ eyajcꞌool. Ebꞌ mamabꞌil, ebꞌ uninabꞌil, ebꞌ cajan dꞌa slacꞌanil ebꞌ yedꞌ ebꞌ yamigo ebꞌ, lajann̈ej ol aj scham ebꞌ smasanil, xchi Jehová.
Jun oval scot dꞌa norte
22 Ix yalan Jehová icha tic: Ato dꞌa snajatil lum luum ay dꞌa stojolal norte, ataꞌ ay jun chon̈abꞌ te ay yip van yacꞌan lista sbꞌa scoti.
23 Yedꞌnac sjul-labꞌ ebꞌ yedꞌ slanza. Te chuc ebꞌ, malaj yoqꞌuelcꞌolal ebꞌ. Icha val scꞌan̈ sqꞌue vaan aꞌ mar, icha val chiꞌ yel yav ebꞌ scoti, ayqꞌue ebꞌ dꞌa yibꞌan̈ chej. Listaxo yaj ebꞌ scot yacꞌ oval eyedꞌoc a ex cajan ex dꞌa Jerusalén tic, xchi Jehová.
24 A ebꞌ anima dꞌa Jerusalén tic, ol yal ebꞌ icha tic: Toxo ix cabꞌ jun abꞌix chiꞌ, ix el quip yuj xivelal. Te ya scabꞌi, icha val yabꞌan syail junoc ix ix ayic tzꞌalji yuneꞌ.
25 Man̈xo ex bꞌat munlajel, man̈xo ex bꞌeyecꞌ dꞌa yoltac bꞌe, yujto te ay xivcꞌolal. Yalxon̈ej bꞌaj ayecꞌ ebꞌ ajcꞌool yedꞌ syamcꞌabꞌ yic oval, xcham ebꞌ anima chiꞌ.
26 Ix yalan Jehová dꞌa schon̈abꞌ icha tic:
Ex in chon̈abꞌ, aqꞌuecoch pichul ya svaꞌi yic tze chꞌoxanel e cuscꞌolal. Ecꞌan̈ec bꞌalbꞌon dꞌa scal qꞌuen ticꞌaqꞌuil taan̈. Ochan̈ec val dꞌa cuscꞌolal, ocꞌan̈ec val sicꞌlabꞌil, icha val yic scham junoc cꞌotan̈ eyuninal, yujto a jun mach ol ex sataneloc, van sja tzacꞌnajoc, xchi.
27 Ix yalan Jehová dꞌayin icha tic: Tzach vacꞌochi yic tzacꞌan proval in chon̈abꞌ tic. Tza chꞌolbꞌitej val ebꞌ sicꞌlabꞌil, tzilan val tas yaj sbꞌeybꞌal ebꞌ.
28 Te pit ebꞌ smasanil, alum pecal ebꞌ. Ix pitbꞌiel spixan ebꞌ icha stzatzil qꞌuen bronce, ma qꞌuen hierro.
29 Ayic slavaj teꞌ cꞌacꞌ yedꞌ junoc lavlabꞌ, schacbꞌi teꞌ, tzꞌulaxel qꞌuen plomo dꞌa scal qꞌuen plata. Palta axo in chon̈abꞌ tic, vachꞌchom ix vacꞌlej in bꞌoan sbꞌeybꞌal ebꞌ, palta malaj jabꞌoc yelcꞌochi, yujto malaj jabꞌoc svachꞌil sbꞌeybꞌal ebꞌ, max satel chucal dꞌa scal ebꞌ. 30 Yuj chiꞌ ol aljoc yuj ebꞌ to lajan ebꞌ icha schucal qꞌuen plata sjulchajeli, yujto a in Jehová in tic, ix in spatiquejel ebꞌ, xchi Jehová.