Slolonel vin̈aj Jeremías dꞌa templo
7
Ix yalanxi Jehová dꞌayin a in Jeremías in tic: 2-3 Ochan̈ tecꞌtecꞌ dꞌa spuertail in templo a in Jehová in tic, tzalan juntzan̈ lolonel tic dꞌa ebꞌ anima: Masanil ex cajan ex dꞌa Judá, mach ex tzex och dꞌa jun puerta tic yic tzex och ejmelal dꞌa Jehová, scham val eyabꞌan jun lolonel yic Jehová Yajal dꞌa Smasanil, aton co Diosal: Tato ol e bꞌo e bꞌeybꞌal yedꞌ tas tze cꞌulej, ol ex vacꞌ cajnaj dꞌa sat lum tic. 4 Man̈ eyacꞌoch e pensar dꞌa ebꞌ tzꞌesani, ebꞌ tzꞌalan icha tic: Cojtac val to malaj tas ol on̈ icꞌanoc, yujto ayecꞌ scajnubꞌ Jehová dꞌa tic, aton val stemplo tic, scomon chiej ebꞌ.5 Tato tze bꞌo e bꞌeybꞌal yedꞌ tas tze cꞌulej, tato vachꞌn̈ej tzeyutej e bꞌa dꞌayex junjun ex, 6 tato max eyixtej ebꞌ chꞌoc chon̈abꞌil, ebꞌ unin man̈xa smam yedꞌ ebꞌ ix chamnacxo yetbꞌeyum ayecꞌ dꞌa e cal, tato max e milcham ebꞌ anima malaj smul, tato max ex och ejmelal dꞌa juntzan̈ comon dios, juntzan̈ tzꞌicꞌan e juvieli, 7 tato icha chiꞌ tze cꞌulej, ol ex vacꞌcan cajan dꞌa jun lum tic, aton lum vacꞌnaccan dꞌa ebꞌ e mam eyicham dꞌa juneln̈ej.
8 Palta a ex tic, tzeyacꞌoch juntzan̈ esal lolonel malaj yelcꞌoch dꞌa e cꞌool. 9 Tzex elcꞌani, tzex macꞌvicham anima, tze cꞌulej ajmulal, tze loc in bꞌi dꞌa es, tze n̈usan incienso dꞌa Baal, tzex och ejmelal dꞌa comon dios to malaj eyalan eyic dꞌay. 10 Slajvi chiꞌ tzex ja pax dꞌa vichan̈ dꞌa in templo tic, tzeyalani: Malaj tas ol on̈ icꞌanoc, xe chi. An̈ej yic tzex elbꞌati tze bꞌeybꞌalanxi juntzan̈ tas yajbꞌentac dꞌa yol in sat. 11 ¿Tom tze naꞌ to a in templo tic lajan yedꞌ qꞌuen n̈aqꞌueen bꞌaj scꞌubꞌej sbꞌa ebꞌ elcꞌum? A in val Jehová in svalaꞌ to sviln̈ej masanil juntzan̈ tze cꞌulej tic.
12 Ixiquec bꞌaj ecꞌnac chon̈abꞌ Silo bꞌaj ecꞌnac in cajnubꞌ, aton jun chiꞌ in sicꞌnaquel dꞌa sbꞌabꞌelal bꞌaj in chꞌoxnac in bꞌa. Ataꞌ ol eyilaꞌ tas vutejnac in satanel yuj smul ebꞌ e mam eyicham. 13 A in Jehová in svalaꞌ to ix e cꞌulej juntzan̈ chucal tic, tzijtum el ix val dꞌayex to tzeyactejcani, palta maj e cꞌanabꞌajej. Ix ex vavtej, palta maj ex tacꞌvoclaj dꞌayin. 14 Yuj chiꞌ icha val vutejnac in cajnubꞌ dꞌa Silo chiꞌ, icha chiꞌ ol vutejcan in templo tic, aton jun vacꞌnac dꞌa ebꞌ e mam eyicham yedꞌ dꞌayex tic, aton jun tzeyacꞌoch yipoc e cꞌol ticnaic. 15 Ol ex vicꞌcanel dꞌa vichan̈, icha val ix aj vicꞌanel ebꞌ eyetchon̈abꞌ dꞌa vichan̈ dꞌa yalan̈taxo, aton ebꞌ yin̈tilal Efraín, xchi Jehová, xa chi dꞌa ebꞌ.
A schucalil ebꞌ israel
16 Ix yalanxi Jehová dꞌayin icha tic: Ach Jeremías, man̈ ach lesalvoc yuj jun chon̈abꞌ tic. Man̈ al dꞌayin, man̈ ach tevoc dꞌayin yuj ebꞌ, yujto man̈ ol in tacꞌvoc dꞌayach. 17 ¿Tom max il tastac scꞌulej ebꞌ dꞌa juntzan̈ chon̈abꞌ dꞌa yol yic Judá yedꞌ dꞌa yoltac calle dꞌa Jerusalén? 18 A ebꞌ yuninal ebꞌ sayancot teꞌ cꞌatzitz, axo ebꞌ mamabꞌil tzꞌacꞌanoch teꞌ cꞌacꞌ, axo ebꞌ ix nunabꞌil sbꞌoan ixim cꞌoxox pan yic syacꞌan ebꞌ silabꞌil dꞌa sdiosalil, jun scuchan ix yajalil satchaan̈.* Stzuntzej val cot yoval in cꞌol ebꞌ ayic syacꞌan vino ebꞌ silabꞌil dꞌa comon dios. 19 A in val Jehová in svalaꞌ to man̈oc inn̈ej tzin yixtej ebꞌ, palta munil syixtej pax sbꞌa ebꞌ yacꞌan qꞌuixvelal sbꞌa. 20 Yuj chiꞌ, a in Jehová Yajal in svalaꞌ to ol vacꞌcot yoval in cꞌol dꞌa yibꞌan̈ jun lugar tic: Aton dꞌa yibꞌan̈ ebꞌ anima, dꞌa nocꞌ nocꞌ yedꞌ te teꞌ yedꞌ dꞌa yibꞌan̈ masanil avbꞌen. Lajan val voval chiꞌ icha junoc teꞌ cꞌacꞌ tzꞌeli, maxtzac yal-laj stupi, xchi Jehová.
21 A Jehová Yajal dꞌa Smasanil, aton sDiosal Israel, a tzꞌalan dꞌa schon̈abꞌ icha tic: Aqꞌuec e gana eyacꞌan e silabꞌ, nocꞌ sn̈usjitzꞌaoc, tze chiꞌan schibꞌejal juntzan̈xo nocꞌ silabꞌ chiꞌ. 22 Palta ayic vicꞌannaquelta ebꞌ e mam eyicham dꞌa Egipto, malaj tas valnac dꞌa ebꞌ yuj nocꞌ silabꞌ sn̈usji yedꞌ ofrenda. 23 A tas in bꞌabꞌlaj alejnac dꞌa ebꞌ to tzin scꞌanabꞌajej ebꞌ. Tato icha chiꞌ, a in ton tzin och sDiosaloc ebꞌ, axo ebꞌ tzꞌochcan in chon̈abꞌoc. Valannac to scꞌanabꞌajej ebꞌ icha val tas ix valaꞌ, yic vachꞌn̈ej tzꞌelcꞌoch ebꞌ. 24 Palta maj schalaj yabꞌ ebꞌ, maj scꞌanabꞌajej ebꞌ. A tas scꞌulejnac ebꞌ to yacꞌnac pitbꞌoquel spensar ebꞌ, scꞌanabꞌajannac schucal spensar ebꞌ. Octom svachꞌ bꞌoejnac sbꞌeybꞌal ebꞌ, palta to svachꞌ juejnaquel sbꞌa ebꞌ. 25 Yictax yelnaccot ebꞌ e mam eyicham dꞌa Egipto masanto ticnaic, tzin checn̈ejbꞌat ebꞌ in checabꞌ yalaꞌ. 26 Palta a ex tic, max e cꞌanabꞌajej, max e cha eyabꞌ tas svalaꞌ. Te pit tzeyutej e bꞌa. Yelxo val te chuc tzeyutej e bꞌa dꞌa yichan̈ ebꞌ e mam eyicham chiꞌ.
27 A achxo tic ach Jeremías, al masanil juntzan̈ tic, vachꞌchom man̈ ol schalaj yabꞌ ebꞌ dꞌayach. Aln̈ej, vachꞌchom man̈ ol tacꞌvoc ebꞌ. 28 Al dꞌa ebꞌ icha tic: A ex val tic juneln̈ej te pit ex, malaj e gana tzex cachji yuj Jehová co Diosal. Man̈xa mach yel syal dꞌa e cal, xa chi dꞌa ebꞌ.
29 Ex aj Jerusalén, joxequel xil e jolom yuj cuscꞌolal, tzeyumaneli. Ixiquec dꞌa lum tzalquixtac cuseltac yilji, tze bꞌitan bꞌit yic cuscꞌolal, yujto toxo ix ex vactejcan yuj yoval in cꞌool, xchi Jehová.
Schꞌolanil yic ebꞌ macꞌbꞌilchamoc
30 Ix yalanxi Jehová icha tic: A ebꞌ aj Judá, te chuc scꞌulej ebꞌ dꞌa vichan̈. A juntzan̈ scomon diosal ebꞌ yajbꞌentac ix yacꞌ val och ebꞌ dꞌa yol in templo. Icha chiꞌ ix aj sjuviel in templo chiꞌ yuj ebꞌ. 31 A dꞌa schꞌolanil lum Ben-hinom, ataꞌ ix sbꞌoqꞌue jun altar ebꞌ yic Tofet bꞌaj sn̈ustzꞌa yuninal ebꞌ yedꞌ yisil. Man̈oc in ix in chec scꞌulej ebꞌ, maj ecꞌpaxlaj jabꞌoc dꞌa in pensar. 32 Yuj chiꞌ a in val Jehová in svalaꞌ, ay jun tiempoal to a jun chꞌolan chiꞌ, man̈xo ol scuch Tofet, ma schꞌolanil lum Ben-hinom, palta ol scuchcan icha tic: Lum Schꞌolanil yic ebꞌ macꞌbꞌilchamoc. Yujto man̈xa bꞌaj syal smucji ebꞌ chamnac, yuj chiꞌ a dꞌa lum Tofet chiꞌ ol bꞌat juljoccan ebꞌ. 33 A snivanil ebꞌ anima ayecꞌ ticnaic dꞌa jun chon̈abꞌ tic, ol och schibꞌejoc nocꞌ ostoc yedꞌ nocꞌ chium nocꞌ dꞌa caltac teꞌ. Man̈xa mach ol xibꞌtan nocꞌ dꞌa ebꞌ. 34 Ol vacꞌ satel ebꞌ anima dꞌa juntzan̈ chon̈abꞌ yic Judá. Axo dꞌa yoltac scalleal Jerusalén, man̈xa bꞌit yic qꞌuin̈ yedꞌ yic tzalajcꞌolal. Man̈xa pax bꞌit yic nupnajel ol ochoc. Ichaxon̈ej tzꞌinan luum ol ajcan jun chon̈abꞌ tic, xchi Jehová.