8
Ix yalanxi Jehová icha tic:A dꞌa jun tiempoal chiꞌ, ol joychajqꞌueta sbꞌaquil ebꞌ acꞌannac reyal dꞌa Judá bꞌaj mucan, sbꞌaquil ebꞌ acꞌannac yajalil, sbꞌaquil ebꞌ sacerdote, sbꞌaquil ebꞌ yalnacoch sbꞌa in checabꞌoc yedꞌ sbꞌaquil pax juntzan̈xo ebꞌ ecꞌnac cajan dꞌa Jerusalén. 2 Ol laj bꞌatcan lean sbꞌaquil ebꞌ chiꞌ dꞌa yoc cꞌu, dꞌa yoc qꞌuen uj yedꞌ dꞌa yoc qꞌuen cꞌanal. Ayic pitzanto ebꞌ, xajan juntzan̈ chiꞌ yuj ebꞌ, yacꞌnac servil ebꞌ, yalnac sbꞌa ebꞌ dꞌay. Yuj chiꞌ malaj mach ol molanqꞌue sbꞌaquil ebꞌ chiꞌ yic smucchaji. Ol cann̈ej taꞌ icha tzꞌajcan stzaꞌ nocꞌ nocꞌ. 3 A in Jehová Yajal in dꞌa Smasanil, a in svalaꞌ to a jantac ebꞌ anima pitzanto ol can dꞌa scal juntzan̈ anima te chuc tic, ol snibꞌej cham sbꞌa ebꞌ dꞌa yichan̈ to pitzan bꞌaj ol in saclemcanbꞌat ebꞌ dꞌa scal juntzan̈xo chon̈abꞌ.
Yaelal dꞌa yibꞌan̈ chon̈abꞌ Israel
4 A Jehová ix alan dꞌayin icha tic: Ach Jeremías icha tic tzutej alan dꞌa jun in chon̈abꞌ tic: Tato ay junoc mach stelvi, tocval maxtzac qꞌue vaan. Tato ay junoc mach satbꞌat dꞌa junoc bꞌe, tocval maxtzac sayxi sbꞌe chiꞌ.
5 Palta a exxo tic ex israel, ¿tas yuj tzeyiqꞌuel e bꞌa dꞌayin? Ex aj Jerusalén, ¿tas yuj maxtzac ex meltzajxi dꞌayin? ¿Tas yuj a dꞌa juntzan̈ comon dios tzeyacꞌoch e pensar, axo dꞌayin malaj e gana e meltzajxi?
6 Ix in maclej val vabꞌi, palta malaj mach slolon dꞌa stojolal. Malaj val junoc mach sna sbꞌa dꞌa schucal syalani: ¿Tas val ix in cꞌulej? man̈ xchioc. Sbꞌatcan ebꞌ smasanil dꞌa yol bꞌe, icha sbꞌat lemnaj nocꞌ chej dꞌa oval.
7 A nocꞌ cigüeña tzꞌecꞌ jen̈en̈oc dꞌa satchaan̈, yojtac nocꞌ bꞌaqꞌuin̈ ol meltzaj nocꞌ. Yedꞌ nocꞌ cuvajteꞌ, nocꞌ san̈capech yedꞌ nocꞌ grulla, yojtac nocꞌ bꞌaqꞌuin̈ ol bꞌat nocꞌ dꞌa junocxo lugar. A exxo pax tic ex in chon̈abꞌ, man̈ eyojtacoc jabꞌoc in cꞌaybꞌubꞌal.
8 ¿Tas yuj tzeyalaꞌ to ay e pensar, eyojtac in cꞌaybꞌubꞌal eyalani? Palta axo ebꞌ slaj tzꞌibꞌanelta in cꞌaybꞌubꞌal, slaj sqꞌuex ebꞌ tas syalaꞌ.
9 A juntzan̈ ebꞌ jelan yalan chiꞌ, ol qꞌuixvoccanel ebꞌ, ol somchajqꞌue scꞌol ebꞌ, ol cotcan dꞌa yibꞌan̈ ebꞌ. Ix spatiquejel in lolonel ebꞌ, yuj chiꞌ ¿bꞌajtil ol yicꞌ sjelanil ebꞌ?
10 Yuj val chiꞌ ol vacꞌcanoch ebꞌ ix yetbꞌeyum ebꞌ dꞌa yol scꞌabꞌ ebꞌ chꞌoc vinaquil, axo sluum ebꞌ chꞌoc mach ol icancanoc. Masanil ebꞌ nivac yelcꞌochi yedꞌ ebꞌ malaj yelcꞌochi, axon̈ej yacꞌan ganar ebꞌ dꞌa spatic chucal, a chiꞌ sna ebꞌ. Icha pax chiꞌ ebꞌ syaloch sbꞌa in checabꞌoc yedꞌ ebꞌ sacerdote, axon̈ej elcꞌal syacꞌ ebꞌ.
11 Snibꞌej ebꞌ scꞌubꞌejel jantac yaelal syabꞌ in chon̈abꞌ. Syalan ebꞌ to ay juncꞌolal, palta man̈ yeloclaj.
12 Max qꞌuixvi ebꞌ scꞌulan juntzan̈ tas max techaj vilani. Malaj jabꞌoc sqꞌuixvelal ebꞌ, man̈ yojtacoc ebꞌ tas jun qꞌuixvelal chiꞌ. Yuj chiꞌ, a in val Jehová in svalaꞌ, a val yic ol vacꞌan syaelal ebꞌ, ol satcanel ebꞌ, xchi Jehová, xa chi.
13 Syalanpax Jehová icha tic: Ol viqꞌuel ebꞌ in chon̈abꞌ dꞌa tic, yujto icha val junoc snunal teꞌ uva, ma junoc steꞌal teꞌ higo malaj sat, ton̈ej scꞌajbꞌanel xiil ayic van stacjieli, icha chiꞌ yaj ebꞌ. Yuj chiꞌ a tas ix vacꞌ dꞌa yol scꞌabꞌ ebꞌ, ol vicꞌxiecꞌ dꞌa ebꞌ, xchi.
14 Ol yal ebꞌ aj Judá icha tic:
¿Tas yuj tzon̈ can dꞌa tic? Co molbꞌejec co bꞌa, con̈ bꞌateccan dꞌa chon̈abꞌ vachꞌ yajoch smuroal. Ataꞌ ol co col co bꞌa, vachꞌchom dꞌa scal oval ol on̈ chamoc. A Jehová co Diosal tzon̈ sataneli, yujto ix och co mul dꞌay, ichato ix yacꞌ cucꞌ a aꞌ aybꞌat veneno dꞌa scal.
15 Ix co naꞌ to vachꞌ ol on̈ elcꞌochoc, palta malaj tas vachꞌ ix acꞌji dꞌayon̈. A co naani to tzalajcꞌolal ol on̈ ajoc, palta an̈ej xivcꞌolal ix javi dꞌayon̈.
16 Van sjavi ebꞌ ajcꞌol dꞌayon̈. Sjornaj sn̈iꞌ nocꞌ schej ebꞌ dꞌa Dan, scabꞌul ato dꞌa tic. Ayic tzꞌocꞌ nocꞌ, tzꞌibꞌxi val lum luum tic. Sjavi ebꞌ satel co chon̈abꞌ tic yedꞌ masanil tastac ay dꞌay yedꞌ masanil on̈ cajan on̈ dꞌa tic, xchi ebꞌ.
17 Ix yalanxi Jehová icha tic: Ol vacꞌcot chamel dꞌa e cal icha val schivaj nocꞌ chan te ov schivaji. Man̈xalaj mach syal yacꞌan nanamax nocꞌ, xchi Jehová chiꞌ.
A scuscꞌolal vin̈aj Jeremías yuj schon̈abꞌ
18 A in cuscꞌolal tic man̈xalaj yan̈al, slajvi val el in pixan yuuj svabꞌi.
19 Tzꞌabꞌchaj val yel yav ebꞌ vetchon̈abꞌ dꞌa smasanil yol co macbꞌen. Syalan ebꞌ, ¿tom man̈xo ayoquecꞌ Jehová dꞌa Sion? ¿Tom man̈xo ayoquecꞌ co reyal sicꞌbꞌil och yuj Jehová taꞌ? xchi ebꞌ. Ix tacꞌvi Jehová dꞌa ebꞌ icha tic: ¿Tas yuj ix e tzuntzejcot yoval in cꞌool ayic ix ex och ejmelal dꞌa comon dios, juntzan̈ yechel malaj yelcꞌochi, chꞌoc bꞌaj cotnac? xchi.
20 Syalan ebꞌ anima icha tic: Toxo ix ecꞌbꞌat stiempoal co colji, icha yecꞌbꞌat stiempoal jochoj trigo, ma icha yecꞌbꞌat stiempoal smolchaj sat avbꞌen, xchi ebꞌ.
21 Svabꞌ val syail yuj syaelal ebꞌ vetchon̈abꞌ. Toxo ix qꞌuechaan̈ cuscꞌolal yedꞌ xivcꞌolal dꞌayin.
22 Yacbꞌan ay yan̈al dꞌa Galaad, ay pax ebꞌ syal yan̈tan taꞌ, ¿tas yuj max an̈taj in chon̈abꞌ tic?