9
Comonoc lajan in sat tic icha sjaj a aꞌ tzꞌel yoc, yic cꞌual dꞌacꞌval tzin ocꞌ yuj jantac ebꞌ vetchon̈abꞌ ix chami.2 Comonoc ay junoc bꞌaj syal vaj dꞌa tzꞌinan luum, yic vachꞌ najat tzin bꞌatcan dꞌa in chon̈abꞌ tic. Yujto ix spatiquejel Dios ebꞌ, ixtum anima ebꞌ.
3 Te jelan yesan ebꞌ. Sqꞌue val chaan̈ ebꞌ yedꞌ es chiꞌ, icha val junoc mach sqꞌuechaan̈ ste julanel sjul-labꞌ. Man̈xa jabꞌoc tas yel tzꞌalji. Yuj chiꞌ syal Jehová icha tic: Masn̈ej ste chucbꞌiel ebꞌ. Maxtzac yal scꞌol ebꞌ tzin yaloch sDiosaloc.
4 Ach Jeremías, man̈xo acꞌoch ebꞌ amigo yedꞌ ebꞌ a cꞌabꞌ oc yipoc a cꞌool, yujto chuclaj tas van snaan ebꞌ dꞌa a patic. A tas sna masanil ebꞌ amigo chiꞌ, syicꞌlajcot ebꞌ dꞌa yibꞌan̈ junjun.
5 Syacꞌlaj musansatil sbꞌa ebꞌ. Man̈xa mach slolon dꞌa yel. Toxo ix te cꞌay ebꞌ yesani. Maxtzac yal sqꞌuexan spensar ebꞌ.
6 A val tas ay dꞌa scal ebꞌ, an̈ej acꞌoj musansatil, ixtoj anima, yuj chiꞌ maxtzac yal scꞌol ebꞌ tzin yal sDiosaloc.
7 Yuj chiꞌ a in Jehová Yajal in dꞌa Smasanil svalaꞌ: ¿Tasto val junocxo syal in cꞌulan yedꞌ in chon̈abꞌ tic? An̈ej to ol vacꞌoch ebꞌ dꞌa syaelal, icha tzꞌaj yacꞌjioch qꞌuen plata dꞌa cal cꞌacꞌ, yic tzꞌel schucal qꞌueen.
8 A tas tzꞌelta dꞌa stiꞌ ebꞌ lajan icha jul-labꞌ jay ye scham anima yuuj. Axon̈ej es tzecꞌ yal ebꞌ. Vachꞌ scꞌumlan sbꞌa ebꞌ yedꞌ ebꞌ yamigo yalani, palta axo dꞌa spensar ebꞌ van snaani tas ol yutej ebꞌ yacꞌan chucal dꞌa ebꞌ yamigo chiꞌ.
9 A in val Jehová in svalaꞌ: ¿Tom man̈ smojoc vacꞌanoch syaelal ebꞌ yuj tas scꞌulej chiꞌ? ¿Tom man̈ smojoc vacꞌan spac dꞌa in chon̈abꞌ tic?
10 Ix valanxi a in Jeremías in tic: Tzin te ocꞌ val yuj lum tzalquixtac, tzin cus val yuj lum taquin̈tac sat bꞌaj sva nocꞌ nocꞌ, yujto toxo ix te tacji sat luum. Man̈xa mach tzꞌecꞌ taꞌ. Man̈xa junoc nocꞌ vacax tzꞌabꞌchaj yoqꞌui. A nocꞌ caltacteꞌal nocꞌ yedꞌ nocꞌ much toxo ix bꞌat nocꞌ elelal.
11 Ix vabꞌ yalan Jehová icha tic: A jun chon̈abꞌ Jerusalén tic, icha junoc bꞌulan̈ qꞌueen bꞌaj cajan nocꞌ nivac oques, icha chiꞌ ol vutejcani. A juntzan̈ chon̈abꞌ dꞌa yol yic Judá, ol can tzꞌinan. Man̈xa junoc anima ol cajnajcan dꞌay, xchi Jehová.
12 Ix valan dꞌa Jehová icha tic: Malaj junoc on̈ snachajel cuuj tas yuj a jun co chon̈abꞌ tic tzꞌinan luum ix ajcani. Al dꞌayon̈ tas yuj icha chiꞌ ix ajcani, xin chi dꞌay.
13 Ix tacꞌvi Jehová chiꞌ dꞌayin icha tic: Icha tic ix aji yujto ix spatiquejel in cꞌaybꞌubꞌal ebꞌ. Maj scꞌanabꞌajej ebꞌ, maj sbꞌeybꞌalej ebꞌ. 14 Ix yacꞌan val pitbꞌoquel spensar ebꞌ, ix yacꞌanem sbꞌa ebꞌ dꞌa juntzan̈ comon dios, icha ix aj scꞌaybꞌajcan ebꞌ yuj smam yicham. 15 Yuj chiꞌ a in Jehová Yajal in dꞌa Smasanil, sDiosal in Israel svalaꞌ: Ol vacꞌ yabꞌ syail ebꞌ dꞌa junjun cꞌu, ol qꞌue val chiꞌan sat ebꞌ yabꞌan syail icha scꞌaꞌil junoc tas cꞌaꞌ sva ebꞌ, ma syucꞌ ebꞌ. 16 Ol in saclemancanbꞌat ebꞌ dꞌa juntzan̈ chon̈abꞌ man̈ yojtacoc yedꞌ pax ebꞌ smam yicham ebꞌ man̈ yojtacoc ebꞌ. Ol in checbꞌat ebꞌ soldado yacꞌ oval yedꞌ ebꞌ, masanto ol satel ebꞌ smasanil, xchi Jehová.
Cuscꞌolal dꞌa Jerusalén
17 A Jehová Yajal dꞌa Smasanil tzꞌalan icha tic: Abꞌec, bꞌat chequec icꞌchajcot ebꞌ ix ix aytaxonoch dꞌa yibꞌan̈ yoqꞌui.
18 Yalocabꞌ ebꞌ aj Jerusalén: Cotocabꞌ ebꞌ ix dꞌa elan̈chamel, cusocabꞌ ebꞌ ix cuuj. Bꞌudꞌjocabꞌel yol co sat yuj yaal, elocabꞌ bꞌulnaj xil co sat yuj jantac yal co sat coqꞌui, xchiocabꞌ ebꞌ.
19 A dꞌa chon̈abꞌ Sion, tzꞌabꞌchaj val yoch oqꞌuel yuj cuscꞌolal. Syalan ebꞌ icha tic: Te obꞌiltac on̈, van co sateli, scabꞌ val syail yuj qꞌuixvelal. A ticnaic, yovalil scactejcan co chon̈abꞌ tic, yujto toxo ix laj em lan̈naj co pat, xchi ebꞌ tzꞌocꞌ chiꞌ, xchi Jehová.
20 Ex ix, maclejec eyabꞌ slolonel Jehová, aqꞌuec val och e chiquin dꞌa tas syalaꞌ. Cꞌaybꞌejec ebꞌ eyuneꞌ yedꞌ ebꞌ ix vachꞌ eyacꞌan yedꞌoc yic tzꞌocꞌ ebꞌ yuj scuscꞌolalil chamel.
21 A chamel toxo ix och dꞌa yoltac co pat, toxo ix cꞌoch dꞌa yoltac co palacio. Slaj cham ebꞌ unin dꞌa yoltac calle, schampax ebꞌ quelemtac dꞌa yoltac chon̈abꞌ.
22 Ix yal Jehová dꞌayin icha tic: Al dꞌa ebꞌ to a in sval icha tic: Toxon̈ej sactzipinac ol ajcan snivanil ebꞌ anima, icha tzꞌajcan tzipan stzaꞌ nocꞌ nocꞌ dꞌa acꞌlictac. Icha val tzꞌajcan ixim trigo manojail dꞌa spatic ebꞌ sjochani tato malaj mach smolanqꞌue vaan ixim, icha chiꞌ ol ajcan ebꞌ, xa chi, xchi Jehová dꞌayin.
23 Ix yalanpax Jehová icha tic: A ebꞌ jelan, mocabꞌ yacꞌoch sjelanil ebꞌ chiꞌ yipoc scꞌool, ebꞌ ay yip, mocabꞌ yacꞌoch yip ebꞌ chiꞌ yipoc scꞌool, an̈ejtonaꞌ ebꞌ bꞌeyum, mocabꞌ yacꞌoch sbꞌeyumal ebꞌ chiꞌ yipoc scꞌool.
24 A in Jehová in svalaꞌ, tato ay mach ay tas syacꞌoch yipoc scꞌool, a in ocabꞌ tzin yacꞌoch yipoc scꞌool, tzin yojtacaneli to a in Jehová in. Svaqꞌuelcꞌoch svachꞌil in cꞌool, tzin chꞌolbꞌitan tas yaj anima dꞌa stojolal. Aton juntzan̈ tic snibꞌej in cꞌool sbꞌeybꞌalej ebꞌ anima, xchi Jehová.
25-26 Ix yalanxi Jehová icha tic: Van sja stiempoal vacꞌan syaelal ebꞌ aj Egipto, ebꞌ aj Judá, ebꞌ aj Edom, ebꞌ aj Amón, ebꞌ aj Moab yedꞌ ebꞌ cajan dꞌa tzꞌinan luum, aton ebꞌ sjoxel xil spacꞌul stiꞌ. Masanil juntzan̈ anima chiꞌ acꞌbꞌil circuncidar ebꞌ, palta max scꞌanabꞌajej jun trato schꞌoxan jun yechel chiꞌ ebꞌ, an̈ejtonaꞌ pax ebꞌ israel max scꞌanabꞌajej ebꞌ, xchi Jehová.