Juntzan̈ yechel comon dios yedꞌ ejmelal dꞌa Dios pitzan
10
A in Jeremías in tic, ix val icha tic: E masanil ex vetchon̈abꞌ israel, maclejec eyabꞌ tas syal Jehová. 2 A tzꞌalan dꞌayex icha tic:Man̈ e bꞌeybꞌalej sbꞌeybꞌal juntzan̈xo nación, man̈ ex xiv yuj juntzan̈ tas schꞌox sbꞌa dꞌa satchaan̈, icha syutej sbꞌa juntzan̈ chꞌoc chon̈abꞌil chiꞌ.
3 A sbꞌeybꞌal juntzan̈ nación chiꞌ, malaj jabꞌoc yelcꞌochi. Sbꞌat suycot junoc te yibꞌ teꞌ ebꞌ dꞌa caltac teꞌ, axo junoc vin̈ n̈icum teꞌ sn̈ican teꞌ yedꞌ syamcꞌabꞌ.
4 Slajvi chiꞌ syacꞌanoch qꞌuen plata yedꞌ qꞌuen oro vin̈ yelvanubꞌoc. Smacꞌanbꞌat slavuxal teꞌ vin̈ yedꞌ qꞌuen martillo yic stzatzbꞌi teꞌ, yic max el cꞌotnaj teꞌ.
5 A juntzan̈ yechel chiꞌ, lajan icha xibꞌtanubꞌal nocꞌ much dꞌa scal junoc avbꞌen. Max yal-laj sloloni. Yovalil scuchji bꞌeyecꞌoc, yujto max yal-laj sbꞌeyi. Man̈ ex xiv dꞌa juntzan̈ chiꞌ, yujto malaj chucal, ma vachꞌil syacꞌ dꞌa ebꞌ anima, xchi Jehová.
6 Mamin Jehová, malaj junocxo mach lajan edꞌoc, yujto te nivan elcꞌochi, te bꞌinajnac ach, syal uj smasanil.
7 Ach sReyal masanil nación, ¿tom ay junoc mach man̈ smojoc xiv dꞌayach? Smoj val te nivan elcꞌoch dꞌa masanil anima. A dꞌa scal ebꞌ jelan yedꞌ dꞌa scal ebꞌ rey dꞌa yolyibꞌan̈qꞌuinal tic, malaj junocxo mach lajan edꞌoc.
8 Masanil ebꞌ anima chiꞌ malaj spensar ebꞌ, malaj sjelanil ebꞌ, max yal scꞌaybꞌaj jabꞌoc ebꞌ yuj juntzan̈ yechel bꞌobꞌil dꞌa te teꞌ chiꞌ.
9 A juntzan̈ yechel comon dios chiꞌ, bꞌobꞌil yuj ebꞌ tenum qꞌueen, nabꞌa plata, aton qꞌuen icꞌbꞌilcot dꞌa Tarsis yedꞌ qꞌuen oro icꞌbꞌilcot dꞌa Ufaz. A cꞌapac cꞌapac qꞌuicꞌmutzꞌinac yilji yedꞌ cꞌapac chacchac cꞌapac ayoch spichuloc. Masanil juntzan̈ chiꞌ, bꞌobꞌil yuj ebꞌ anima jelan spensar sbꞌoan tastac.
10 Axo Jehová, aton Dios pitzan, Dios dꞌa val yel, Rey dꞌa juneln̈ej. Ayic scot yoval, tzꞌibꞌxi val lum luum tic yuuj. Maxtzac yal-laj stecꞌbꞌan sbꞌa juntzan̈ nivac chon̈abꞌ dꞌa yichan̈ yoval scꞌol Jehová chiꞌ.
11 Ex vetisraelal, alec dꞌa ebꞌ chꞌoc chon̈abꞌil icha tic: A juntzan̈ comon dios, man̈oc bꞌoannac satchaan̈ yedꞌ lum luum tic, ol satel dꞌa yolyibꞌan̈qꞌuinal tic, man̈xa junoc ol canoc, xe chi.
Bꞌit yic aloj vachꞌ lolonel dꞌa Dios
12 A Jehová bꞌoannac lum luum tic yedꞌ spoder, a yedꞌ sjelanil sbꞌonac yolyibꞌan̈qꞌuinal tic. An̈ejaꞌ yedꞌ sjelanil chiꞌ sbꞌonac pax satchaan̈.
13 Ayic tzꞌavaj Jehová chiꞌ, tzꞌibꞌxiqꞌue a aꞌ dꞌa satchaan̈, sqꞌue vaan asun dꞌa chaan̈ yuuj masanto bꞌaj slajvicꞌoch lum luum tic. Tzꞌecꞌ copoljoc lebꞌlon dꞌa scal nivac yaxn̈abꞌ yuuj, sjacanelta icꞌ bꞌaj molan yuuj.
14 Masanil ebꞌ anima tzꞌacꞌanoch comon dios yipoc scꞌool, malaj spensar ebꞌ, malaj tas yojtac ebꞌ. Masanil ebꞌ tenum qꞌueen, tzꞌacꞌji qꞌuixvelal ebꞌ yuj juntzan̈ yechel sbꞌo chiꞌ. A juntzan̈ yechel sbꞌo ebꞌ chiꞌ, malaj yelcꞌochi, malaj spixan.
15 A juntzan̈ yechel chiꞌ, malaj jabꞌoc yopisio, smoj val stzetzaji. Ayic ol javoc yaelal yuj Jehová, ol sateloc.
16 Te chꞌoc yel co Diosal a on̈ yin̈tilal on̈ vin̈aj Jacob tic. A bꞌoannac masanil tasi, ix on̈ sicꞌanpaxel a on̈ israel on̈ tic yic tzon̈ ochcan yicoc. A sbꞌi, aton Jehová Yajal dꞌa Smasanil.
A yaelal dꞌin̈an sjavi
17 Ex aj Jerusalén, oybꞌilxoqꞌue co chon̈abꞌ yuj ebꞌ ajcꞌool, molbꞌejec masanil e cꞌael.
18 Yujto syal Jehová icha tic: A ticnaic ol in molcot yaelal dꞌa e patic masanto ol yal eyamchaji. Masanil ex cajan ex dꞌa jun chon̈abꞌ tic, ol ex in pechbꞌat dꞌa najat, icha tzꞌaj sjuljibꞌat junoc qꞌuen qꞌueen yedꞌ chꞌan̈ mejmeech, xchi.
19 Ix valan a in Jeremías in tic: Obꞌiltac in, van vabꞌan syail. A vechen tic malaj yan̈al. A jun yaelal tic vic yaji yuj chiꞌ ol vacꞌ techajoc.
20 Toxo ix em lan̈naj co pat, icha mantiado sdꞌin̈chaj schꞌan̈al. Toxo ix cham ebꞌ cuninal, ix on̈ yactejcan ebꞌ, yuj chiꞌ man̈xa mach scolvaj quedꞌoc yic slichꞌanqꞌue jabꞌoc quen̈ul.
21 A ebꞌ yilumal co chon̈abꞌ, malaj spensar ebꞌ. Max scꞌan sjelanil ebꞌ dꞌa Jehová. Yuj chiꞌ on̈ saclembꞌat icha nocꞌ calnel.
22 Abꞌec val sjavi jun abꞌix tic. Ay jun chon̈abꞌ scot dꞌa stojolal norte n̈ilili scꞌan̈ scoti. A jun chiꞌ ol acꞌancanoch juntzan̈ co chon̈abꞌ tic tzꞌinan lumal. Axon̈ej nocꞌ nivac oques ol cajnajcan dꞌay.
23 Mamin Jehová, vojtac sicꞌlabꞌil to a on̈ anima on̈ tic man̈ cojtacoc tas ol aj quelcꞌochi. Max nachaj cuj tastac sjavi dꞌa quichan̈.
24 Acꞌ co yaelal icha val dꞌa stojolal, palta man̈ocabꞌ yedꞌ yoval a cꞌool yic max on̈ a sateli.
25 Aqꞌuem yoval a cꞌol dꞌa yibꞌan̈ juntzan̈ chꞌoc chon̈abꞌil, juntzan̈ chon̈abꞌ to man̈ ach ojtannacoc, juntzan̈ chon̈abꞌ max yal sbꞌa dꞌayach, yujto ix satel co chon̈abꞌ ebꞌ a on̈ yin̈tilal on̈ vin̈aj Jacob tic. Juneln̈ej ix on̈ satel ebꞌ. Ix laj yacꞌcan tzꞌinan co chon̈abꞌ tic ebꞌ, xin chi.