Ol satjoquel Babilonia
51
Ix yalan Jehová icha tic: Ol vacꞌbꞌat jun nivan icꞌ dꞌa Babilonia yedꞌ dꞌa ebꞌ cajan dꞌay, ol satjoquel ebꞌ yuuj.2 Icha tzꞌaj yel smatzꞌil ixim trigo yuj icꞌ, icha chiꞌ ol utaj yuj ebꞌ ajcꞌool. Man̈xalaj ebꞌ cajan dꞌay ol canoc. Ayic ol cꞌoch jun cꞌual yic ol satjoquel ebꞌ chiꞌ, yalxon̈ej bꞌaj ol cot ebꞌ ajcꞌol yacꞌ oval yedꞌ ebꞌ.
3 Sbꞌoꞌocabꞌ sjul-labꞌ ebꞌ julvajvum. Yacꞌocabꞌoch smacul sn̈iꞌ scꞌol ebꞌ. Mocabꞌ ocꞌ scꞌol ebꞌ dꞌa ebꞌ quelemtac aj Babilonia. Satocabꞌel ebꞌ soldado dꞌa juneln̈ej.
4 Dꞌa masanil schon̈abꞌ ebꞌ caldeo, ol laj can teljabꞌ ebꞌ anima scham dꞌa yoltac calle. 5 Vachꞌchom a ebꞌ aj Israel yedꞌ ebꞌ aj Judá, ix och smul ebꞌ dꞌayin, palta maxto vactejcanlaj ebꞌ a in Jehová Yajal in dꞌa Smasanil, sDiosal in ebꞌ, a inxon̈ej Ochi.
6 Elan̈ec lemnaj dꞌa Babilonia chiꞌ, mach ex e gana tze col e bꞌa yic vachꞌ max ex cham yuj smul. Yujto ix cꞌoch scꞌual vacꞌan in pac dꞌay icha val smojalil.
7 Ix vacꞌlabꞌej Babilonia ayic ix vacꞌanem yoval in cꞌol dꞌa yibꞌan̈ masanil nación. Ix in yam icha junoc copa nabꞌa oro bꞌaj ix yucꞌ an̈ masanil yolyibꞌan̈qꞌuinal tic. Ayic ix yucꞌan ebꞌ chiꞌ, ix qꞌue dꞌa sjolom ebꞌ.
8 Palta elan̈chamel ix em lan̈naj Babilonia chiꞌ, chocꞌ ix aji. Ocꞌan̈ec yuuj. Iqꞌueccot yan̈al, ol quilaꞌ tato olto an̈tajoc, xchi Jehová.
9 A ebꞌ chꞌoc nacional cajan taꞌ, syal ebꞌ icha tic: Toxo ix can̈tej Babilonia tic, palta maxtzac bꞌolaj. Canocabꞌi. Con̈ paxec junjun on̈ bꞌajtac ay co chon̈abꞌ, yujto a smul jun chon̈abꞌ tic, toxo ix qꞌuecꞌoch dꞌa satchaan̈, ix ecꞌbꞌat dꞌa yibꞌan̈ asun, xchi ebꞌ.
10 Syal ebꞌ aj Israel yedꞌ ebꞌ aj Judá: Van spactzitan Jehová yuj tas ix on̈ utaji. Coyec, calequel dꞌa Sion tas toxo ix scꞌulej co Diosal, xchi ebꞌ.
11 A Jehová nabꞌilxo yuuj to ol satel Babilonia, yuj chiꞌ aꞌ ix checancot ebꞌ sreyal Media yic tzul satanel ebꞌ. Icha val chiꞌ ix aj spacan sbꞌa Jehová chiꞌ yuj tas ix utaj stemplo yuj ebꞌ. Tzꞌalchaj dꞌa ebꞌ soldado: Lista tzeyutej e jul-labꞌ. Aqꞌuecoch e maclabꞌ jul-labꞌ.
12 Iqꞌuecchaan̈ junoc yechel yic tze chꞌoxani to sbꞌat eyacꞌ oval dꞌa smuroal Babilonia, xchi. Vachꞌocabꞌ tzꞌaj yoch oyan ebꞌ soldado dꞌa spatic. Ayocabꞌ ebꞌ stan̈vani. Ayocabꞌ ebꞌ scꞌubꞌejel sbꞌa yic smaclan ebꞌ soldado ebꞌ tzꞌelta yacꞌ oval dꞌayex. Yujto van yelcꞌoch tas nabꞌil yuj Jehová scꞌulan dꞌa ebꞌ cajan dꞌa Babilonia chiꞌ.
13 A ex val tic ex aj Babilonia, dꞌa stitac aꞌ nivac aꞌ cajan ex, yuj chiꞌ te bꞌeyum ex. Toxo ix javi scꞌual e satel dꞌa juneln̈ej.
14 A Jehová Yajal dꞌa Smasanil, toxo ix yacꞌ stiꞌ, ix yalani: Ol te bꞌudꞌjoquel yol e nación tic yuj ebꞌ ajcꞌool icha val nocꞌ cꞌulubꞌ man̈xo bꞌischajbꞌenoc. Ol el yav ebꞌ ayic ol ex yacꞌan ganar ebꞌ, xchi.
Bꞌit yic aloj vachꞌ lolonel dꞌa Dios
15 A Jehová bꞌoannac lum luum tic yedꞌ spoder yedꞌ sjelanil. Sbꞌoannacpax yolyibꞌan̈qꞌuinal tic. Yedꞌ pax sjelanil chiꞌ, sjen̈bꞌannacbꞌat satchaan̈.
16 A tzꞌalani, n̈ilili scꞌan̈ cꞌu syacꞌan n̈abꞌ. A tzꞌicꞌanchaan̈ asun bꞌaj slajvicꞌoch lum luum tic. A tzꞌacꞌanecꞌ copnaj lebꞌlon dꞌa scal yaxn̈abꞌ. A tzꞌicꞌanelta icꞌ bꞌaj molbꞌabꞌil yuuj.
17 A ebꞌ anima, yelxo val malaj jabꞌoc spensar ebꞌ. Max qꞌuixvi jabꞌoc ebꞌ yuj juntzan̈ yechel comon dios sbꞌoꞌo. A juntzan̈ yechel chiꞌ, malaj spixan, ton̈ej syacꞌ sbꞌa ebꞌ anima chiꞌ musansatil yuuj.
18 A juntzan̈ yechel chiꞌ, malaj jabꞌoc yelcꞌochi, yic bꞌuchval yaji. Ayic ol javoc jun cꞌual, ol satel juntzan̈ chiꞌ yuj Jehová.
19 A sDiosal vin̈aj Jacob te chꞌoc yeli, a ix bꞌoan masanil tastac. A ix sicꞌanel Israel yic tzꞌochcan schon̈abꞌoc. A sbꞌi, Jehová Yajal dꞌa Smasanil.
A Babilonia syamcꞌabꞌ Jehová yaji
20 Ix yalan Jehová icha tic: A Babilonia icha in nivan macꞌlabꞌ qꞌueen yaji, icha pax in yamcꞌabꞌ yic oval yaji. A yedꞌoc ix vacꞌ acꞌjoc ganar juntzan̈ nación yedꞌ sreyal.
21 A yedꞌoc ix in milcham nocꞌ chej yedꞌ ebꞌ ayqꞌue dꞌa yibꞌan̈ nocꞌ. Ix vacꞌanpax lajvoquel carruaje yedꞌ ebꞌ ayqꞌue dꞌa yool.
22 A yedꞌoc ix vacꞌ miljoccham ebꞌ vin̈ vinac, ebꞌ ix ix, ebꞌ ichamtac, ebꞌ quelemtac yedꞌ ebꞌ ix cobꞌestac.
23 A yedꞌoc ix vacꞌ miljoccham ebꞌ tan̈vum calnel yedꞌ nocꞌ calnel chiꞌ. Ix vacꞌanpax miljoccham ebꞌ smunlaj yedꞌ nocꞌ vacax, ix champax nocꞌ vacax chiꞌ. Ix vacꞌan miljoccham ebꞌ gobernador yedꞌ ebꞌ yajal.
Yaelal dꞌa yibꞌan̈ Babilonia
24 A in val Jehová in sval dꞌayex in chon̈abꞌ ex tic: Dꞌa eyichan̈ ol vacꞌ val spac dꞌa Babilonia yedꞌ dꞌa ebꞌ cajan dꞌay icha val smojal chucal ix scꞌulej ebꞌ dꞌa Sion.
25 A Babilonia chiꞌ, lajan icha junoc nivan vitz satanel masanil sat lum luum. Yuj chiꞌ ajcꞌol in dꞌay, ol vacꞌan syaelal. A yedꞌ vip ol vequem juynajoc. Ol bꞌatcan bꞌulnaj dꞌa sattac pacꞌan. Lajan ol ajcan icha junoc vitz tzꞌanacbꞌati.
26 Man̈xa junoc qꞌuen qꞌueen ol elta dꞌa scal juntzan̈ ol em lan̈naj chiꞌ olto cꞌanchajoc ayic ol bꞌo junocxo pat. Tzꞌininixon̈ej ol ajcan Babilonia chiꞌ dꞌa juneln̈ej.
27 Iqꞌuecqꞌue schꞌoxnabꞌil yic oval dꞌa Babilonia. Puec qꞌuen trompeta yic syacꞌ lista sbꞌa juntzan̈xo nación scot yacꞌ oval yedꞌoc. Qꞌueocabꞌ van ebꞌ aj Ararat, ebꞌ aj Mini yedꞌ pax ebꞌ aj Askenaz yacꞌ oval yedꞌoc. Sicꞌjocabꞌoch junoc yajal yic scuchbꞌan ebꞌ soldado dꞌa oval. Bꞌatocabꞌ nocꞌ chej dꞌa oval icha nocꞌ cꞌulubꞌ man̈xo bꞌischajbꞌenoc.
28 Yacꞌocabꞌ lista sbꞌa juntzan̈xo nación sbꞌat yacꞌ oval dꞌay. Cotocabꞌ ebꞌ sreyal Media, ebꞌ gobernador, ebꞌ nivac yopisio yedꞌ masanil ebꞌ anima ay dꞌa yol smacbꞌen, xchi Jehová.
29 A lum luum tic, ol ibꞌxocqꞌue luum. Ol tzicubꞌtan̈aj luum, yujto ol yaqꞌuelcꞌoch Jehová tas nabꞌil yuuj. A Babilonia ol can tzꞌinan icha tzꞌinan luum, man̈xalaj mach ol cajnaj dꞌay.
30 A ebꞌ soldado yic Babilonia chiꞌ, man̈xo ol yal scolan sbꞌa ebꞌ. Toxon̈ej ol ochcan ebꞌ dꞌa yoltac bꞌaj scol sbꞌa. Man̈xalaj yip ebꞌ, lajan ol ajcan ebꞌ icha ebꞌ ix ix. Ol laj macꞌjoquem lan̈naj schon̈abꞌ ebꞌ, ol laj n̈usjoctzꞌa spat ebꞌ.
31 Bꞌelbꞌonxon̈ej ol aj scꞌoch ebꞌ checabꞌ yal dꞌa vin̈ sreyal Babilonia to toxo ix acꞌji ganar schon̈abꞌ vin̈ chiꞌ smasanil.
32 A bꞌaj jay a aꞌ bꞌaj tzꞌecꞌ ebꞌ anima, ol laj macjoc yuj ebꞌ ajcꞌol chiꞌ. A bꞌaj scol sbꞌa ebꞌ soldado, ol n̈usjoctzꞌaoc, yuj chiꞌ ol te xiv ebꞌ soldado chiꞌ.
33 A Jehová Yajal dꞌa Smasanil, sDiosal Israel, syal icha tic: A ebꞌ aj Babilonia, lajan ebꞌ icha ixim trigo vachꞌxo yajem dꞌa yol junoc tecꞌlabꞌ, toxo val scꞌoch stiempo stecꞌchaji, xchi Jehová.
34-35 A ebꞌ aj chon̈abꞌ Sion, syal ebꞌ icha tic: A vin̈aj Nabucodonosor sreyal Babilonia, chocꞌ ix on̈ yutej vin̈. Mesesi ix yutejcan co chon̈abꞌ vin̈ icha junoc ucꞌabꞌ man̈xa tas dꞌa yool. Ichato ix on̈ sturbꞌat vin̈ icha junoc nocꞌ nivaquil nocꞌ ay dꞌa yol aꞌ mar. Ix bꞌudꞌji val scꞌol vin̈ yuj masanil tastac ay dꞌayon̈, axo ixto cani ix syumcanel vin̈. Stupocabꞌ Babilonia icha val ix on̈ yutej. Stupocabꞌ ebꞌ caldeo, yuj ebꞌ anima ix smilcham ebꞌ dꞌa co cal, xchi ebꞌ aj Jerusalén chiꞌ.
A tas albꞌilcan dꞌa ebꞌ aj Jerusalén
36 Syal Jehová dꞌa ebꞌ aj Jerusalén icha tic: A in ol in chꞌolbꞌitej dꞌa stojolal tas ix ex utaji. Ol vaqꞌuecꞌ e pac dꞌa ebꞌ eyajcꞌool. Ol laj vacꞌ tup masanil aꞌ n̈ajabꞌ yedꞌ sjajtac a aꞌ ay dꞌa Babilonia.
37 Toxon̈ej ol qꞌuecan bꞌulan scꞌajil. Axon̈ej nocꞌ oques ol cajnaj taꞌ, man̈xalaj mach olto cajnaj dꞌay. Ol te xiv ebꞌ anima yilani, ol bꞌuchvaj pax ebꞌ dꞌay.
38 Ol el yav ebꞌ aj Babilonia chiꞌ icha nocꞌ choj, ol el pax yav ebꞌ icha nocꞌ yunetac choj chiꞌ.
39 Yacbꞌan ste cꞌacꞌbꞌi ebꞌ stzalaji, ichato ol in bꞌo junoc nivan vael dꞌa ebꞌ, ol vacꞌan an̈ yucꞌ ebꞌ, yic stzalaj ebꞌ. Slajvi chiꞌ ol satel scꞌol ebꞌ svay dꞌa juneln̈ej, man̈xa bꞌaqꞌuin̈ ol el svayan̈ ebꞌ chiꞌ.
40 Ol vicꞌbꞌat ebꞌ bꞌaj ol miljocchamoc, icha tzꞌaj yicꞌjibꞌat nocꞌ yunetac calnel, nocꞌ chiva yedꞌ nocꞌ chꞌac calnel bꞌaj smilji.
Ol acꞌjoc ganar Babilonia
41 A Babilonia te bꞌinajnac dꞌa yolyibꞌan̈qꞌuinal tic, palta ol acꞌjoc ganar. Toxon̈ej ol xivcanqꞌue juntzan̈ nación ayic ol yilan ebꞌ.
42 Icha val to a aꞌ mar ol bꞌat secnaj dꞌa yibꞌan̈, ol mucchajcan yuj aꞌ.
43 A val schon̈abꞌil, ol laj can tzꞌinan, icha tzꞌinan luum ol ajcanoc. Man̈xa mach ol cajnajxoc dꞌay, man̈xa pax mach ol ecꞌ taꞌ.
44 Ix yalanxi Jehová icha tic: Ol vacꞌ val och yaelal dꞌa yibꞌan̈ Bel sdiosal Babilonia. Ol vacꞌ xejejqꞌueta tas toxo ix sbꞌucꞌbꞌati, man̈xo ol javoc juntzan̈ nación yaqꞌuem sbꞌa dꞌay. Ol empax lan̈naj smuroal Babilonia chiꞌ.
45 Ex in chon̈abꞌ, elan̈ec taꞌ, colec e bꞌa dꞌa yoval in cꞌol sjavi dꞌa yibꞌan̈.
46 Man̈ eyacꞌ pensar, man̈ ex xiv yuj tas tzꞌalji dꞌa yol jun nación chiꞌ. Chꞌoc chꞌocn̈ej tas sbꞌinaj dꞌa junjun abꞌil, axon̈ej xivcꞌolal sbꞌinaji, ayn̈ej oval dꞌa scal ebꞌ yajal.
47 Icha chiꞌ ol aj sja scꞌual vacꞌanoch yaelal dꞌa yibꞌan̈ juntzan̈ sdiosal Babilonia chiꞌ. Masanil jun nación chiꞌ ol acꞌjoc qꞌuixvelal, toxon̈ej ol bꞌudꞌjoccanel yuj ebꞌ chamnac.
48 A in val Jehová in svalaꞌ: A satchaan̈ yedꞌ yolyibꞌan̈qꞌuinal tic yedꞌ masanil tas ay dꞌay, ol te tzalajoc ayic ol acꞌjoc ganar Babilonia chiꞌ, yujto a dꞌa norte ol cot ebꞌ ol sataneloc.
49 Ol satjoqueloc yujto te nivan anima ix smilcham dꞌa Israel, te nivan pax ebꞌ anima ix satjiel dꞌa yolyibꞌan̈qꞌuinal tic yuuj, xchi Jehová.
A tas ix alchaj dꞌa ebꞌ aj Israel ayecꞌ dꞌa Babilonia
50 Syal Jehová dꞌa ebꞌ aj Israel ayecꞌ dꞌa Babilonia icha tic: A ex mach ex ol ex el dꞌa scal chamel ol ujoc chiꞌ, elan̈ec lemnajoc, man̈ ex och vaan. Vachꞌchom najat ayex, palta aqꞌuec val och e pensar dꞌayin Jehová in tic, naecpaxcot Jerusalén.
51 Palta a ex tic, tzeyal icha tic: Tzon̈ te qꞌuixvi ayic scabꞌan tas syal ebꞌ dꞌayon̈. Qꞌuixavtacon̈xon̈ej scabꞌi, yujto a ebꞌ chꞌoc chon̈abꞌil toxo ix och ebꞌ dꞌa yoltac cuarto Yicn̈ej Dios Yaji, xe chi.
52 Palta a in Jehová in svalaꞌ: Ol ja jun cꞌual ol vacꞌan val och yaelal dꞌa yibꞌan̈ sdiosal ebꞌ aj Babilonia yedꞌ dꞌa masanil yol smacbꞌen, toxon̈ej ol el yav ebꞌ anima ol lajvoc.
53 Vachꞌchom sqꞌuecꞌoch Babilonia dꞌa satchaan̈ yalani, chaan̈ syutej sbꞌoanqꞌue smuroal, palta ol vacꞌbꞌat ebꞌ ajcꞌol bꞌat sataneloc, xchi Jehová.
Ol satjoquel Babilonia
54 Ol abꞌchaj yel yav ebꞌ aj Babilonia, ol abꞌchaj satjiel masanil schon̈abꞌ ebꞌ caldeo.
55 Aton Jehová ol sataneloc, ol cꞌoch scꞌual slajvi jantac av tzꞌel dꞌay. A ebꞌ ajcꞌol ol javoc xumnaj ebꞌ dꞌay icha aꞌ mar, ol cꞌan̈ val yem ebꞌ dꞌa yibꞌan̈ jun chon̈abꞌ chiꞌ.
56 Ol javoc ebꞌ satel Babilonia chiꞌ, ol syaman masanil ebꞌ soldado ebꞌ, ol macꞌjoc can̈chaj sjul-labꞌ ebꞌ. Yujto a Jehová, Dios toni, syacꞌ spac dꞌa junjun icha val dꞌa smojal.
57 A in Rey in, a in bꞌi, Jehová Yajal dꞌa Smasanil, a in sval icha tic: Ichato ol vacꞌ an̈ an̈ yucꞌ ebꞌ yajal dꞌa Babilonia, ebꞌ aj pensar, ebꞌ gobernador, ebꞌ nivac yopisio yedꞌ ebꞌ soldado, ol cot svayan̈ ebꞌ dꞌa juneln̈ej. Man̈xo ol el-laj svayan̈ ebꞌ chiꞌ.
58 A smuroal Babilonia te levan sat, palta ol em lan̈naj dꞌa juneln̈ej. A spuertail nivac, ol tzꞌabꞌatoc. Nabꞌan̈ej ix munlaj juntzan̈ nación dꞌay. A jantac munlajel bꞌaj ix cꞌunbꞌi ebꞌ, ton̈ej ol tzꞌabꞌatoc, xchi Jehová.
Icꞌbꞌilbꞌat slolonel vin̈aj Jeremías dꞌa Babilonia
59 Ayic schan̈il abꞌil yoch vin̈aj Sedequías reyal dꞌa Judá, ix bꞌat vin̈ dꞌa Babilonia, ajun vin̈aj Seraías yuninal vin̈aj Nerías yixchiquin vin̈aj Maaseías ix bꞌat yedꞌ vin̈. A vin̈ ay yalan yic yilan tas tzꞌaj vin̈ rey chiꞌ. Ayic manto bꞌat ebꞌ vin̈ dꞌa Babilonia chiꞌ, a in Jeremías in tic schecabꞌ in Dios, ix vacꞌ jun checnabꞌil dꞌa vin̈aj Seraías chiꞌ. 60 Junxon̈ej ix vacꞌ tzꞌibꞌchajcan masanil tas toxo ix alchaji to dꞌin̈an sja dꞌa yibꞌan̈ Babilonia chiꞌ. 61 Ix valan dꞌa vin̈aj Seraías chiꞌ icha tic: Ayic tzach cꞌoch dꞌa Babilonia chiꞌ, tzil val tas tzutej avtan masanil juntzan̈ lolonel tic. 62 Tzalan icha tic: Mamin Jehová a ach ix alaꞌ to ol a satel jun nación tic. Man̈xa anima ol cajnajxoc dꞌay, man̈xa pax nocꞌ nocꞌ. Ol can tzꞌinan uj dꞌa juneln̈ej, xa chi. 63 Ayic slajvi val avtan juntzan̈ lolonel tic, tza tzecꞌanoch junoc qꞌuen qꞌueen bꞌaj tzꞌibꞌabꞌil tic, tza julancanbꞌat dꞌa yol aꞌ Éufrates, 64 tzalani: Icha val tic ol aj satcanem Babilonia, man̈xa bꞌaqꞌuin̈ ol qꞌuex vaan yuj jantac yaelal ol javoc dꞌa yibꞌan̈ yuj Jehová, xa chi, xin chi dꞌa vin̈.