A tas albꞌilcan dꞌa yibꞌan̈ Babilonia
50
A tas ix alchaj dꞌa yibꞌan̈ Babilonia schon̈abꞌ ebꞌ caldeo. A Jehová ix alan dꞌayin Jeremías schecabꞌ in tic icha tic:2 Alequel jun abꞌix tic, aqꞌuec yojtaquejel masanil nación. Iqꞌuecchaan̈ yechel to tzeyalel jun abꞌix tic, man̈ e cꞌubꞌejel jabꞌoc. Alec icha tic: A Babilonia ol acꞌjoc ganar. A comon dios scuchan Bel ol acꞌjoc qꞌuixvelal. A yechel comon dios Merodac ol pojbꞌatoc. A juntzan̈ sdiosal ebꞌ aj Babilonia chiꞌ, qꞌuixvelal ol ajcanoc, chocꞌ ol ajcan juntzan̈ yechel chiꞌ.
3 A dꞌa norte, ataꞌ ol cot jun nación ol ul acꞌan oval yedꞌoc. A ol acꞌancan tzꞌinan jun chon̈abꞌ chiꞌ icha tzꞌinan luum. Man̈xa anima ol cajnaj dꞌay, man̈xa pax nocꞌ nocꞌ, masanil ol bꞌat elelal, xchi Jehová.
Ol meltzajxoc ebꞌ israel
4 Ix yalan Jehová icha tic: Ay jun cꞌual, a ebꞌ aj Israel yedꞌ ebꞌ aj Judá, ol ocꞌ ebꞌ, ol yacꞌanoch sbꞌa ebꞌ dꞌa yol in cꞌabꞌ. 5 Ol scꞌanbꞌejecꞌ jun bꞌe ebꞌ scꞌoch dꞌa Sion, ataꞌ ol bꞌat ebꞌ, ol yalan ebꞌ icha tic: Con̈ meltzajec dꞌa Jehová. Junxon̈ej tzon̈ ajec yedꞌoc. Sco bꞌoan junoc co trato yedꞌoc dꞌa juneln̈ej, man̈xa bꞌaqꞌuin̈ sbꞌat satcꞌolal cuuj, xcham ebꞌ.
6 A in chon̈abꞌ tic, lajan icha nocꞌ calnel satnacbꞌati, max tan̈vaj yuj stan̈vumal, yuj chiꞌ satcanbꞌat nocꞌ dꞌa jolomtac vitz. Axon̈ej dꞌa jolomtac vitz chiꞌ tzꞌecꞌ nocꞌ, axo tzꞌaji, sat scꞌol nocꞌ dꞌa smacteꞌ. 7 Axo yic schalan sbꞌa nocꞌ yedꞌ junoc ajcꞌol yajoch dꞌay, smiljicham nocꞌ yuuj. Icha chiꞌ yaj in chon̈abꞌ tic, syal ebꞌ ajcꞌol chiꞌ dꞌa ebꞌ icha tic: A jun tic man̈ co muloc, yujto a ebꞌ ix och smul dꞌa Jehová, aton jun tzꞌacꞌan svael ebꞌ, aton jun ayoch yipoc scꞌol ebꞌ smam yicham ebꞌ, xchi ebꞌ.
8 Ex in chon̈abꞌ, elan̈ec dꞌa Babilonia schon̈abꞌ ebꞌ caldeo. Bꞌabꞌlajan̈ec icha nocꞌ mam chiva scuchbꞌan nocꞌ calnel.
9 Yujto ol vicꞌcot jantac soldado dꞌa juntzan̈ chon̈abꞌ dꞌa norte, yic ol ul yacꞌan oval ebꞌ dꞌa Babilonia chiꞌ. Ol stzolan sbꞌa ebꞌ sjavi dꞌay, ol yacꞌan ganar ebꞌ yujto te jelan ebꞌ dꞌa oval chiꞌ. Ayic sjulvaj ebꞌ, malaj junoc sjul-labꞌ ebꞌ chiꞌ bꞌen̈ej tzꞌeqꞌui.
10 A in val Jehová in svalaꞌ, masanil tastac ay dꞌa ebꞌ aj Babilonia chiꞌ, ol yicꞌbꞌat ebꞌ. Ol yicꞌbꞌat masanil tastac snibꞌej ebꞌ.
Ol acꞌjoc ganar Babilonia
11 A ex val tic ex aj Babilonia, ix ex tzalaj val ayic ix eyicꞌanbꞌat tastac ay dꞌa ebꞌ in chon̈abꞌ. Ix ex qꞌue val cheneljoc icha junoc nocꞌ cobꞌes vacax stecꞌvi trigo. Ix el pax eyav icha nocꞌ chej.
12 Yuj chiꞌ a e chon̈abꞌ bꞌaj aljinac ex, qꞌuixvelal ol ajcanoc. Slajvubꞌ ol ajcan dꞌa scal juntzan̈xo nación. Taquin̈ luum ol ajcanoc, ol can tzꞌinan.
13 Yujto ol cot val voval dꞌay, man̈xa junoc mach ol cajnajcan dꞌay, cuseltac ol ajcanoc. Masanil mach ol ecꞌ taꞌ, ol xiv ebꞌ yilan jantac yaelal ol javoc dꞌa yibꞌan̈ jun chon̈abꞌ chiꞌ.
14 Masanil ex eyedꞌnac e jul-labꞌ, oymajan̈ec dꞌa spatic Babilonia, julvajan̈ec dꞌay. Man̈xoocabꞌ ex och vaan e julvaj dꞌay yujto toxo ix och smul dꞌayin Jehová in tic.
15 Aqꞌuequel eyav yic oval dꞌa masanil spatictac chon̈abꞌ chiꞌ: Vanxo yacꞌji ganar Babilonia. Van yem lan̈naj yoyal, van yem vecnaj smuroal, xe chi. A in Jehová in tic, stiempoalxo in pacan in bꞌa dꞌa Babilonia chiꞌ. Paquecpax e bꞌa a ex tic, icha val ix yutej juntzan̈xo nación, ichocabꞌ val taꞌ tzeyutej paxi.
16 Man̈xaocabꞌ junoc mach tzeyactejcan dꞌa Babilonia chiꞌ, man̈ eyactejcan ebꞌ tzꞌavvi, ma ebꞌ smolan sat avbꞌen chiꞌ. A val yic ol yilan ebꞌ yoch jun oval chiꞌ, a ebꞌ chꞌoc chon̈abꞌil ayecꞌ taꞌ, ol meltzaj ebꞌ dꞌa schon̈abꞌ. Junjun ebꞌ ol meltzajxi dꞌa slugar, xchi Jehová.
Meltzajnac ebꞌ aj Israel
17 Ix yalanxi Jehová icha tic: Icha nocꞌ calnel satnacbꞌati, pechbꞌil yuj nocꞌ choj, icha chiꞌ yaj ebꞌ aj Israel. Bꞌabꞌel acꞌbꞌil ganar ebꞌ yuj vin̈ sreyal Asiria. Ix lajvi chiꞌ, axo vin̈aj Nabucodonosor sreyal Babilonia ix vachꞌ satanel ebꞌ. 18 Yuj chiꞌ a in Jehová Yajal in dꞌa Smasanil, sDiosal in Israel sval icha tic: Ol vacꞌoch syaelal vin̈ sreyal Babilonia yedꞌ masanil schon̈abꞌil, icha val vutejnac vin̈ sreyal Asiria. 19 Ol vicꞌxi meltzaj ebꞌ aj Israel dꞌa sluum. Ol yabꞌlej ebꞌ masanil tas vachꞌ tzꞌel dꞌa lum Carmelo yedꞌ dꞌa lum Basán. Ol yabꞌlej ebꞌ jantac tas snibꞌej, aton tastac sqꞌuibꞌ dꞌa lum tzalquixtac dꞌa yol yic Efraín yedꞌ dꞌa Galaad. 20 A in val Jehová in svalaꞌ: A dꞌa jun cꞌual chiꞌ, ol in colel ebꞌ aj Israel yedꞌ ebꞌ aj Judá dꞌa chucal scꞌulej, ol vacꞌ lajvoc smul ebꞌ, man̈xa bꞌaj ol ilchajoc, ol vacꞌ sat dꞌa juneln̈ej, xchi Jehová.
Yaelal dꞌa yibꞌan̈ Babilonia
21 Ix yalan Jehová icha tic: A in val Jehová in tzex in checaꞌ: Aqꞌuec oval dꞌa smacbꞌen Merataim yedꞌ masanil ebꞌ cajan dꞌa Pecod. Pechec ebꞌ, mileccham ebꞌ, masanto syal satel ebꞌ smasanil. Cꞌanabꞌajejec masanil in checnabꞌil.
22 Tzꞌabꞌchaj val yoch oval dꞌa nación chiꞌ, te nivan ix aj satel ebꞌ.
23 A Babilonia icha junoc martillo, ix smacꞌpoj masanil yolyibꞌan̈qꞌuinal. Axo ticnaic, aꞌ ol macꞌjocpojoc, chocꞌ ol ajcanoc. Ol te xivbꞌat masanil nación ayic ol yilan ebꞌ tas ol ajcan Babilonia chiꞌ.
24 A in Jehová in ix vaqꞌuem syaalil Babilonia. Majxo yil-laj ebꞌ scan dꞌay, yujto ix och ebꞌ ajcꞌolal dꞌayin.
25 Ix in jaquelta masanil yamcꞌabꞌ yic oval molan vuuj, ix viqꞌuelta yic tzin chꞌoxan yoval in cꞌool, yujto ay jun in munlajel yovalil ol yicꞌ sbꞌa dꞌa schon̈abꞌ ebꞌ caldeo chiꞌ.
26 Yalxon̈ej bꞌaj tzex och eyacꞌ oval dꞌa ebꞌ. Jaquec bꞌaj molanecꞌ svael ebꞌ. Molbꞌejec scꞌael ebꞌ, tze sataneli. Man̈xaocabꞌ jabꞌoc scani.
27 Mileccham masanil soldado ebꞌ. Obꞌiltac ebꞌ, toxo ix javi scꞌual syaelal ebꞌ, xchi Jehová.
28 Ay ebꞌ quetisrael tzꞌel lemnaj dꞌa Babilonia, sjavi ebꞌ dꞌa Sion, syalan ebꞌ chajtil val tzꞌaj spacan sbꞌa Jehová co Diosal dꞌa ebꞌ aj Babilonia chiꞌ yuj tas ix scꞌulej ebꞌ dꞌa stemplo.
29 Syalanxi Jehová: Avtejec masanil ebꞌ julvajvum yic tzꞌoch ebꞌ yacꞌ oval dꞌa Babilonia. Ochan̈ec oyan dꞌa spatic yic malaj mach tzꞌeli. Pactzitejec val icha smojal. Utejec val icha ix yutej sbꞌa dꞌa juntzan̈xo, yujto te acꞌumtac ix yutej sbꞌa dꞌayin Jehová sDiosal in Israel.
30 Yuj chiꞌ a ebꞌ quelemtac aj Babilonia, ol laj can teljabꞌ ebꞌ scham dꞌa yoltac calle. A ebꞌ soldado ol miljoccham ebꞌ smasanil dꞌa jun cꞌual chiꞌ.
31 A in Jehová Yajal in dꞌa Smasanil svalaꞌ: Ayinoch ajcꞌolal dꞌayex ticnaic ex aj Babilonia, yujto te acꞌumtac tzeyutej e bꞌa. Toxo ix javi scꞌual yic sja yaelal dꞌa eyibꞌan̈.
32 Ex anima tzeyicꞌchan̈ e bꞌa, ol ex acꞌjoc ganar. Man̈xa mach ol ex icꞌanchaan̈. Ol vacꞌoch scꞌacꞌal masanil e chon̈abꞌ chiꞌ. Ol lajvoquel masanil spatictac yuj jun cꞌacꞌ chiꞌ, xchi Jehová.
33 A Jehová Yajal dꞌa Smasanil tzꞌalan icha tic: A ebꞌ aj Israel yedꞌ ebꞌ aj Judá, van yabꞌan syail ebꞌ bꞌaj tzꞌixtaj ticnaic. Ayoch ebꞌ dꞌa yol scꞌabꞌ ebꞌ ajcꞌool, man̈ val jabꞌoc tzꞌactajel ebꞌ yuj ebꞌ. 34 Palta a in scolumal in ebꞌ, a in bꞌi, Jehová Yajal dꞌa Smasanil. Ol in chꞌolbꞌitej tas tzꞌutaj ebꞌ chiꞌ dꞌa stojolal. Ol vacꞌan juncꞌolal dꞌa in chon̈abꞌ tic, axo chon̈abꞌ Babilonia, axon̈ej xivcꞌolal ol vacꞌbꞌat dꞌa yibꞌan̈, xchi Jehová.
35 Syalanpax Jehová: Ochocabꞌ oval dꞌa Babilonia yedꞌ dꞌa masanil ebꞌ cajan dꞌay yedꞌ pax dꞌa ebꞌ yajal dꞌa scal ebꞌ yedꞌ ebꞌ aj pensar.
36 Ochocabꞌ oval dꞌa ebꞌ naumel lolonel yalani, quistalaxocabꞌ ebꞌ.
37 Mileccham ebꞌ soldado sluclon yuj xivelal. Mileccham nocꞌ chej tocꞌjinac carruaje. Mileccham ebꞌ soldado manbꞌilcot ayecꞌ dꞌa scal ebꞌ, lajanocabꞌ tzꞌajcan ebꞌ icha ebꞌ ix ix. Ochan̈ec bꞌaj ay sbꞌeyumal ebꞌ, tzeyelcꞌanbꞌati.
38 Tupocabꞌ masanil a aꞌ, yujto a Babilonia chiꞌ schon̈abꞌil juntzan̈ comon dios yajbꞌentac. A yuj juntzan̈ chiꞌ, ste satel spensar ebꞌ anima chiꞌ.
39 Yuj chiꞌ a dꞌa jun chon̈abꞌ chiꞌ, axon̈ej nocꞌ caltacteꞌal nocꞌ ol cajnajoc, nocꞌ oques yedꞌ nocꞌ avestruz. Man̈xa bꞌaqꞌuin̈ ol cajnajxi anima taꞌ. 40 Lajan ol vutejcan icha Sodoma, Gomorra yedꞌ juntzan̈xo chon̈abꞌ ay dꞌa slacꞌanil ayic in satannaqueli. Malaj mach ol cajnajxoc taꞌ.
41 Ilec val juntzan̈ soldado scot dꞌa stojolal norte. Tzijtum ebꞌ rey scot yedꞌ jun nación te ay yip. Lista yaj ebꞌ scot yacꞌ oval.
42 Yedꞌnac sjul-labꞌ ebꞌ yedꞌ slanza. Yelxo val te ov ebꞌ, man̈xa jabꞌoc yoqꞌuelcꞌolal ebꞌ. Lajan val yel yav ebꞌ icha scꞌan̈ aꞌ mar, ayqꞌue ebꞌ dꞌa yibꞌan̈ chej. Listaxo yaj ebꞌ yic sjavi ebꞌ yacꞌ oval dꞌa Babilonia chiꞌ.
43 Ayic ol yabꞌan jun abꞌix tic vin̈ sreyal Babilonia chiꞌ, ol sicbꞌoquel vin̈ yuj xivelal. Ol te ochcan vin̈ dꞌa ilcꞌolal yedꞌ dꞌa yaelal, icha junoc ix ix van yalji yuneꞌ.
44 Ol in cꞌoch icha junoc nocꞌ choj tzꞌelta lemnaj dꞌa caltac vayumtac dꞌa stitac aꞌ Jordán sqꞌuecꞌoch bꞌaj sva nocꞌ calnel, saclembꞌat nocꞌ yuj nocꞌ. Icha chiꞌ ol aj vacꞌan saclem ebꞌ aj Babilonia chiꞌ, ol vacꞌanoch jun yajal taꞌ to sicꞌbꞌilel vuuj. ¿Mach val syal slajbꞌan sbꞌa vedꞌoc? ¿Mach val syal stelan sbꞌa vedꞌoc? ¿Mach yajalil syal stecꞌbꞌan sbꞌa dꞌa vichan̈? 45 Abꞌec val tas ix aj in naan Jehová in tic dꞌa yibꞌan̈ Babilonia schon̈abꞌ ebꞌ caldeo: A yuninal ebꞌ, ol icꞌchajbꞌatoc, ol em lan̈naj spat ebꞌ dꞌa yibꞌan̈. 46 Ol ibꞌxocqꞌue lum luum ayic ol acꞌjoc ganar ebꞌ, ol abꞌchaj yel yav ebꞌ dꞌa juntzan̈xo nación, xchi Jehová.