A tas albꞌilcan dꞌa yibꞌan̈ Amón
49
A tas yalnaccan Jehová dꞌa yibꞌan̈ chon̈abꞌ Amón ayic yalannaccan icha tic: ¿Tom malaj yin̈tilal Israel syal smacbꞌenan lum luum tic? ¿Tas yuj a juntzan̈ anima tzꞌoch ejmelal dꞌa jun comon dios scuch Milcom scajnaj dꞌa lum sluum ebꞌ yin̈tilal Gad? ¿Tas yuj a ebꞌ amonita scajnaj dꞌa juntzan̈ schon̈abꞌ ebꞌ chiꞌ?2 Palta a in Jehová in svalaꞌ, ol cꞌoch scꞌual, ol abꞌchaj yel av yic oval dꞌa chon̈abꞌ Rabá, snivan chon̈abꞌ ebꞌ amonita. Junn̈ej bꞌulan̈ ol ajcan smacꞌjiem lan̈najoc, ol tzꞌabꞌat masanil yaldeail. A in Jehová in svalaꞌ to icha chiꞌ ol aj yicꞌanxiecꞌ slum ebꞌ aj Israel dꞌa ebꞌ tocꞌjinac eqꞌui.
3 Ocꞌan̈ec yuj cuscꞌolal ex aj Hesbón, yujto a chon̈abꞌ Hai toxo ix sateli. Ex ix aj Rabá, ochan̈ec dꞌa cuscꞌolal. Aqꞌuecoch pichul ya sva yuj cuscꞌolal, tzex oqꞌui. Xiquec lajvoc e nivanil, ecꞌan̈ec jin̈in̈oc dꞌa yol e chon̈abꞌ yuj e cuscꞌolal, yujto a e diosal scuch Milcom ol icꞌjocbꞌatoc yedꞌ ebꞌ ayoch sacerdoteal dꞌay yedꞌ pax ebꞌ anima nivac yopisio.
4 Ex anima pit, ¿tas yuj tzeyicꞌchaan̈ e bꞌa yuj lum e chꞌolquixtac yax sat? An̈ej e bꞌeyumal molbꞌil, aꞌ ayoch yipoc e cꞌool, yuj chiꞌ tzeyalaꞌ: ¿Mach val ol yal yacꞌan oval quedꞌoc? xe chinaji.
5 A in Jehová Yajal in dꞌa Smasanil sval icha tic: Ol vacꞌbꞌat xivcꞌolal dꞌa eyibꞌan̈, masanil chon̈abꞌ ayecꞌ dꞌa e lacꞌanil ol cꞌoch yacꞌ oval dꞌayex. Junjun ex, ol ex pechchajeloc, man̈xalaj mach ol yal ex smolbꞌanxi.
6 Palta ol vicꞌxi meltzaj ebꞌ aj Amón chiꞌ bꞌajtac ol icꞌjocbꞌatoc, xchi Jehová.
A tas albꞌilcan dꞌa yibꞌan̈ chon̈abꞌ Edom
7 A tas ix yal Jehová Yajal dꞌa Smasanil dꞌa yibꞌan̈ Edom:
¿Tom man̈xa jelanil dꞌa chon̈abꞌ Temán? ¿Tom maxtzac yal yacꞌvi razón ebꞌ jelan? ¿Tom ix satel masanil sjelanil ebꞌ chiꞌ?
8 Ex aj Dedán, elan̈ec lemnajoc, ixiquec e cꞌubꞌejel e bꞌa dꞌa yoltac qꞌuen n̈aqꞌueen. Yujto ol in satel schon̈abꞌ vin̈aj Esaú tic. Toxo ix cꞌoch scꞌual vacꞌanoch syaelal.
9 Ayic smolchaj sat teꞌ uva, ay bꞌaj scan junjunxo xucꞌyatil teꞌ. Ayic scꞌoch ebꞌ elcꞌum dꞌacꞌvalil, an̈ej tas yovalil tzꞌoch yuj ebꞌ syelqꞌuejbꞌati. 10 Palta a dꞌa schon̈abꞌ vin̈aj Esaú tic, man̈xalaj jabꞌoc tas olto vacꞌcani. Vojtac smasanil, malaj bꞌaj ol yal e cꞌubꞌanel e bꞌa. Masanil ebꞌ eyuninal, ebꞌ e cꞌabꞌ eyoc yedꞌ ebꞌ cajan dꞌa e lacꞌanil, ol satel ebꞌ. Man̈xa mach olto canoc.
11 Canocabꞌ ebꞌ eyuninal mebꞌail, ol in tan̈vej ebꞌ. Yedꞌ ebꞌ ix junixtac, syal in yacꞌanoch ebꞌ ix yipoc scꞌool, xchi Jehová.
12 Ix yalanxi Jehová icha tic: A ebꞌ man̈ smojoc yabꞌan syail, a ticnaic yovalil ol yabꞌ syail ebꞌ yuj yoval in cꞌool, ichato ol yucꞌ vino ebꞌ te ov. Oc exxom a ex tic, ¿tom man̈ ol eyabꞌ syail e naani? Yovalil ol eyabꞌ syail yuj yoval in cꞌool. 13 Yujto a in Jehová in svacꞌ in tiꞌ: A chon̈abꞌ Bosra ol can tzꞌinan, a ebꞌ anima ol ilanoc ol te xiv ebꞌ, ol bꞌuchjoc yuj ebꞌ, ol yacꞌ bꞌinaj ebꞌ ayic ol scatabꞌan junoc mach ebꞌ. Axo juntzan̈xo chon̈abꞌ dꞌa yol yic Edom chiꞌ, ol satpaxel dꞌa juneln̈ej, xchi Jehová.
14 Ix javi jun abꞌix dꞌayin yuj Jehová icha tic: Van schecjicot jun checabꞌ ul yalel dꞌa scaltac nación icha tic: Molbꞌejec e bꞌa, tzex bꞌat dꞌa Edom, aqꞌuec lista e bꞌa yic tzex bꞌat eyacꞌ oval yedꞌoc, xchi jun checabꞌ chiꞌ, xchi Jehová.
15 Ex aj Edom, emnaquil ol ex vutejcan dꞌa scal masanil nación. Man̈xalaj ol aj eyelcꞌoch dꞌa yol sat masanil anima.
16 Munil a ex ix eyacꞌ musansatil e bꞌa yuj eyacꞌumtaquil. A e naani to masanil mach xiv dꞌayex. Ichato dꞌa sjatelaltac qꞌuen tenam, ma dꞌa jolomtac vitz cajan ex. Palta a in Jehová in svalaꞌ, vachꞌchom te chaan̈ bꞌaj tzex cajnaj icha nocꞌ chꞌacbꞌa te chaan̈ bꞌaj sbꞌo soꞌ, palta yovalil ol ex viqꞌuemta taꞌ.
17 Masanil mach ol ecꞌ dꞌa Edom chiꞌ, ol te xiv ebꞌ yilani, ol satpax scꞌol ebꞌ yuj nivan yaelal ol ja dꞌa yibꞌan̈. 18 A in Jehová in svalaꞌ: A Edom chiꞌ lajan ol aj icha ajnac satjiel Sodoma, Gomorra yedꞌ juntzan̈xo chon̈abꞌ dꞌa slacꞌanil. Man̈xa mach ol cajnajxoc dꞌay, man̈xa pax mach ol bꞌeyecꞌ dꞌay. 19 Icha junoc nocꞌ choj tzꞌelta dꞌa svayumtaquil stiꞌ aꞌ Jordán, sqꞌuecꞌoch jucnaj nocꞌ bꞌaj sva nocꞌ calnel, saclemcanbꞌat nocꞌ calnel chiꞌ yuj nocꞌ, icha val chiꞌ ol aj in cꞌoch dꞌa chon̈abꞌ Edom. Ol el lemnaj ebꞌ anima cajan taꞌ. A jun mach sicꞌbꞌilel vuj ol vacꞌoch yajaliloc ebꞌ. ¿Mach syal slajbꞌan sbꞌa vedꞌoc? ¿Mach syal stelan sbꞌa vedꞌoc? ¿Mach ebꞌ yajal syal stecꞌbꞌan sbꞌa dꞌa vichan̈? 20 Abꞌec tas toxo ix in naꞌ a in Jehová in tic dꞌa yibꞌan̈ Edom yedꞌ dꞌa yibꞌan̈ ebꞌ cajan dꞌa Temán: A ebꞌ yuninal ebꞌ ol icꞌchajbꞌat ebꞌ, ol juchajem spat ebꞌ. 21 Ayic ol acꞌjoc ganar Edom chiꞌ, ol ibꞌxocqꞌue lum luum. Ol el yav ebꞌ scꞌanan colval, ol cꞌoch yav ebꞌ chiꞌ dꞌa aꞌ Chacchac Mar. 22 A ebꞌ ajcꞌol chiꞌ, ol cꞌoch lemnaj ebꞌ dꞌa Bosra icha scꞌoch jen̈en̈oc junoc nocꞌ chꞌacbꞌa. A dꞌa jun cꞌual chiꞌ, a ebꞌ soldado aj Edom, ol ibꞌxocqꞌue ebꞌ icha junoc ix ix van yalji yuneꞌ, xchi Jehová.
A tas albꞌilcan dꞌa yibꞌan̈ Damasco
23 Ix yalanpax Jehová dꞌa yibꞌan̈ Damasco icha tic:
A ebꞌ aj chon̈abꞌ Hamat yedꞌ ebꞌ aj Arfad, man̈xo animaoc ix aj spensar ebꞌ, yujto te chuclaj abꞌix ix cꞌoch dꞌa ebꞌ. Ix te qꞌuechaan̈ xivcꞌolal dꞌa ebꞌ, maxtzac yal-laj yajecꞌ ebꞌ dꞌa tzalajcꞌolal.
24 A ebꞌ aj Damasco chiꞌ, van snaanbꞌat sbꞌa ebꞌ elelal, palta man̈xalaj yip ebꞌ. Axon̈ej xivcꞌolal, ilcꞌolal yedꞌ yaelal ay dꞌa scal ebꞌ, icha junoc ix ix van yalji yuneꞌ.
25 A jun chon̈abꞌ te bꞌinajnac chiꞌ, jun chon̈abꞌ tzalajcꞌolaln̈ej yaji, toxo ix actajcani.
26 A in Jehová Yajal in dꞌa Smasanil svalaꞌ: A dꞌa jun cꞌual chiꞌ, a ebꞌ quelemtac teltumbꞌa ol ajcan ebꞌ dꞌa yoltac calle, masanil ebꞌ soldado ebꞌ ol chamoc.
27 Ol vacꞌoch scꞌacꞌal smuroal Damasco chiꞌ, axo jun cꞌacꞌ chiꞌ ol satanel spalacio vin̈aj Ben-adad, xchi Jehová.
A tas albꞌilcan dꞌa yibꞌan̈ Cedar yedꞌ Hazor
28 Icha tic ix yal Jehová dꞌa yibꞌan̈ ebꞌ ay dꞌa yol smacbꞌen Cedar yedꞌ dꞌa ebꞌ yajalil chon̈abꞌ Hazor, aton juntzan̈ ix yacꞌ ganar vin̈aj Nabucodonosor sreyal Babilonia, ix yalan icha tic:
Ex aj Babilonia, ixiquec eyacꞌ oval dꞌa Cedar. Bꞌat satequel ebꞌ anima cajan dꞌa stojolal bꞌaj sjavi cꞌu.
29 Iqꞌuequecꞌ nocꞌ scalnel ebꞌ, smantiado ebꞌ yedꞌ jantac syamcꞌabꞌ ebꞌ. Iqꞌuequecꞌ nocꞌ scamello ebꞌ, tzeyalan icha tic: Masanil bꞌaj ay xivcꞌolal, xe chi dꞌa ebꞌ.
30 A in Jehová in svalaꞌ: A ex cajan ex dꞌa chon̈abꞌ Hazor, elan̈ec lemnajoc. Ixiquec, cꞌubꞌejequel e bꞌa, yujto a vin̈aj Nabucodonosor sreyal Babilonia toxo ix snaꞌ vin̈ tas ol ex yutej.
31 A in Jehová in sval dꞌayex ex aj Babilonia: Ixiquec eyacꞌ oval dꞌa jun chon̈abꞌ malaj tas snaꞌa, tzalajcꞌolaln̈ej yajeqꞌui, malaj spuertail ayochi, man̈ listaoc yaji, schꞌocoj ayeqꞌui.
32 Ixiquec, tzeyelcꞌancot nocꞌ scamello ebꞌ yedꞌ pax nocꞌ svacax ebꞌ. Yalxon̈ej bꞌaj ol vacꞌbꞌat yaelal dꞌa yibꞌan̈ ebꞌ sjoxel xil spacꞌul stiꞌ, yuj chiꞌ ol saclemcanbꞌat ebꞌ.
33 A chon̈abꞌ Hazor ol can tzꞌinan dꞌa juneln̈ej, axon̈ej nocꞌ oques ol cajnaj taꞌ. Man̈xa mach ol cajnaj dꞌay, man̈xa junoc mach ol bꞌeyecꞌ taꞌ, xchi Jehová.
A tas albꞌilcan dꞌa yibꞌan̈ Elam
34 Ayic ix schaanel yich vin̈aj Sedequías yacꞌan reyal dꞌa Judá, ataꞌ ix lolon Jehová dꞌayin Jeremías in tic dꞌa yibꞌan̈ chon̈abꞌ Elam, ix yalan icha tic:
35 A in Jehová Yajal in dꞌa Smasanil sval icha tic: Ol in macꞌcan̈chaj sjul-labꞌ ebꞌ soldado aj Elam, aton syamcꞌabꞌ ebꞌ yic oval nivan yelcꞌochi.
36 Ol vacꞌbꞌat junoc oval dꞌa jun chon̈abꞌ chiꞌ, icha junoc oval icꞌ, yalxon̈ej bꞌaj scoti. Yalxon̈ej bꞌaj ol icꞌchajbꞌat ebꞌ. Man̈xa junoc nación bꞌaj man̈ ol cꞌoch ebꞌ scꞌubꞌej sbꞌa.
37 A in val Jehová in svalaꞌ to toxon̈ej ol ibꞌxocqꞌue ebꞌ aj Elam chiꞌ dꞌa yichan̈ ebꞌ yajcꞌol snibꞌej smilani. Ol vacꞌbꞌat yaelal yuj yoval in cꞌol dꞌa yibꞌan̈ ebꞌ. Ol cꞌoch oval chiꞌ dꞌa ebꞌ masanto ol satel ebꞌ.
38 A in val Jehová in svalaꞌ to ol vacꞌ Yajalil taꞌ. Ol vacꞌ miljoccham ebꞌ rey yedꞌ ebꞌ yajal yaj dꞌa Elam chiꞌ.
39 Palta ay jun cꞌual, ol vicꞌxi meltzaj ebꞌ aj Elam chiꞌ, xchi Jehová.