A tas albꞌilcan dꞌa yibꞌan̈ Moab
48
A Jehová Yajal dꞌa Smasanil, aton sDiosal Israel, aꞌ ix alan icha tic yuj chon̈abꞌ Moab:Obꞌiltac chon̈abꞌ Nebo, yujto ix juchajemi. An̈ejtonaꞌ chon̈abꞌ Quiriataim, toxo ix acꞌji ganar, qꞌuixvelal ix ajcani. Toxo ix juchajem lan̈naj smuroal dꞌa sat luum.
2 Toxo ix satel sbꞌinajnaquil Moab. A dꞌa chon̈abꞌ Hesbón, ataꞌ sna ebꞌ ajcꞌol syalan ebꞌ tas ol yutoc ebꞌ satanel Moab dꞌa juneln̈ej. An̈ejtonaꞌ chon̈abꞌ Madmena, ol sateloc, man̈ ol och vaan oval sataneli.
3 A ebꞌ aj Horonaim ol el yav ebꞌ: Tzon̈ chami, tzon̈ lajvieli, xcham ebꞌ.
4 A Moab toxo ix sateli, tzꞌabꞌchaj yel yav ebꞌ scotac unin ebꞌ cajan dꞌay.
5 Tzꞌocꞌ ebꞌ, tzꞌel yal sat ebꞌ, sqꞌue ebꞌ dꞌa lum svitzal Luhit. Axo ebꞌ tzꞌem dꞌa Horonaim, tzꞌabꞌchaj yel yav ebꞌ yuj syail tas tzuji chiꞌ.
6 A mach tzato yal yeli, elocabꞌ lemnajoc, scolocabꞌ sbꞌa. Lajanocabꞌ syutej sbꞌa icha nocꞌ caltacteꞌal bꞌuru dꞌa tzꞌinan luum.
7 A ebꞌ aj Moab, a smunlajel ebꞌ yedꞌ sbꞌeyumal ayoch yipoc scꞌool, palta ol icꞌjocbꞌat ebꞌ dꞌa chꞌoc nacional. A jun sdiosal ebꞌ scuchan Quemos ol icꞌjocbꞌatoc yedꞌ ebꞌ ayoch sacerdoteal dꞌay yedꞌ ebꞌ nivac yelcꞌochi.
8 A in Jehová in svalaꞌ: A jun oval chiꞌ, ol laj cꞌoch dꞌa masanil chon̈abꞌ dꞌa yol smacbꞌen Moab, man̈xa junoc mach ol elcanoc. A juntzan̈ chon̈abꞌ ay dꞌa chꞌolquixtac yedꞌ dꞌa pan̈quiltac ol juvoccanbꞌat smasanil.
9 Ichato ol och scꞌaxil ebꞌ aj Moab yic sbꞌat ebꞌ elelal. Masanil chon̈abꞌ ay dꞌa yol smacbꞌen, ol sateloc. Man̈xa mach ol can cajan dꞌay, xchi Jehová.
10 (Catabꞌajocabꞌ mach max cꞌulan dꞌa smasanil scꞌol tas snibꞌej Jehová. Catabꞌajocabꞌ mach max yacꞌlabꞌej yespada smilvaji.)
11 A ebꞌ aj Moab juncꞌolaln̈ej yaj ebꞌ, malaj bꞌaj tzꞌicꞌjibꞌat ebꞌ dꞌa chꞌoc nacional. Icha vino ton̈ej tan̈anemi, max qꞌuexchaj yedꞌtal, yuj chiꞌ max qꞌuexvi sjabꞌ, max satel svachꞌil yucꞌji, icha chiꞌ yaj ebꞌ.
12 A in Jehová in svalaꞌ: Ol ja scꞌual, ol in checanbꞌat juntzan̈ soldado, ol yicꞌanbꞌat ebꞌ aj Moab ebꞌ dꞌa juntzan̈xo chꞌoc nacional, icha tzꞌaj sqꞌuexji vino dꞌa yol yedꞌtal. Ol macꞌchajem lan̈naj schon̈abꞌ ebꞌ, icha tzꞌaj smacꞌjipoj yedꞌtal vino man̈xa tas ayem dꞌa yool. Cuseltacxon̈ej ol ajcan schon̈abꞌ ebꞌ chiꞌ. 13 Yuj chiꞌ a ebꞌ aj Moab chiꞌ ol qꞌuixvoc ebꞌ yuj jun sdiosal scuch Quemos, icha ajnac sqꞌuixvi scꞌol ebꞌ israel yuj sdiosal dꞌa Betel, aton jun yacꞌnacoch ebꞌ yipoc scꞌool.
14 Man̈xaocabꞌ yal ebꞌ aj Moab icha tic: A on̈ tic te jelan on̈, nivan quelcꞌochi, acꞌum on̈ oval, man̈xoocabꞌ xchi ebꞌ.
15 Toxo ix cꞌoch jun rey ol satanel juntzan̈ chon̈abꞌ dꞌa yol smacbꞌen Moab chiꞌ, ol cham ebꞌ quelemtac te tecꞌan cajan dꞌay. A in ton Rey in sval jun tic, Jehová Yajal dꞌa Smasanil in bꞌi.
16 Toxo ix cꞌoch scꞌual sjavi yaelal dꞌa yibꞌan̈ chon̈abꞌ Moab, ix ja scꞌual sateli.
17 Jantac ex cajan ex dꞌa slacꞌanil Moab yedꞌ ex eyojtac jantac snivanil yelcꞌochi, ocꞌan̈ec yuuj, tzeyalan icha tic: A snivanil yelcꞌoch Moab yedꞌ svachꞌil yilji toxo ix sateli, xe chiocabꞌi.
18 Actejeccan snivanil eyelcꞌoch ex aj Dibón, emnaquil tzeyutej e bꞌa, yujto a mach van satanel Moab, van scꞌoch dꞌayex, vanxo spojanem smuroal e chon̈abꞌ.
19 Ex aj Aroer, ochan̈ec lin̈an dꞌa titac bꞌe, tzeyilani. Cꞌanbꞌejec dꞌa ebꞌ aj Dibón ixto yal yeli tas ix uji.
20 A Moab qꞌuixvelal ix ajcani, yujto ix acꞌji syaelal. Ocꞌan̈ec yuj syaelal chiꞌ. Alequel dꞌa stitac aꞌ Arnón to a Moab toxo ix sateli, xchi Jehová.
21-24 Toxo ix javi yaelal albꞌilcan dꞌa yibꞌan̈ juntzan̈ chon̈abꞌ ay dꞌa lum acꞌlictac: Aton Holón, Jahaza, Mefaat, Dibón, Nebo, Bet-diblataim, Quiriataim, Bet-gamul, Bet-meón, Queriot, Bosra yedꞌ dꞌa yibꞌan̈ masanil juntzan̈xo chon̈abꞌ ay dꞌa yol yic Moab, aton juntzan̈ ay dꞌa slacꞌanil yedꞌ juntzan̈ najat ay.
25 A Jehová tzꞌalan icha tic: A yipalil Moab toxo ix lajvi. A snivanil yelcꞌochi toxo ix sateli.
26 Aqꞌuec somchaj spensar ebꞌ aj Moab, yujto ix spitej sbꞌa ebꞌ dꞌayin. Bꞌuchjocabꞌ ebꞌ yuj ebꞌ anima, icha tzꞌaj sbꞌuchji junoc ucꞌum an̈ tzꞌecꞌ bꞌalbꞌon dꞌa scal xej.
27 Naeccot ex aj Moab ayic e bꞌuchvajnac dꞌa ebꞌ aj Israel, icha tzꞌaj sbꞌuchji junoc elcꞌum, icha chiꞌ eyutejnac e bꞌuchvaj dꞌa ebꞌ.
28 Ex aj Moab, actejeccan e chon̈abꞌ, ixiquec, cajnajan̈ec dꞌa sattac qꞌuen tenam icha nocꞌ cuvajteꞌ sbꞌo soꞌ dꞌa yoltac sjatelal qꞌueen.
29 Cojtac jantac val syicꞌchaan̈ sbꞌa ebꞌ aj Moab. Te acꞌumtac ebꞌ, an̈ej ebꞌ nivan yelcꞌoch snaani. Te nivac vinac syutej sbꞌa ebꞌ.
30 A in Jehová in, vojtac to syicꞌ val chaan̈ sbꞌa ebꞌ, palta malaj syacꞌ yal ebꞌ yujto malaj yalan jun bꞌaj syicꞌchaan̈ sbꞌa ebꞌ chiꞌ.
31 Yuj chiꞌ tzin oqꞌui, scus in cꞌol yuj ebꞌ aj Moab, yuj pax ebꞌ aj Kir-hares.
32 Ol in ocꞌ val yuj chon̈abꞌ Sibma, ecꞌto ol aj vocꞌ yuuj dꞌa yichan̈ ayic ix och oqꞌuel yuj Jazer. Yujto ix qꞌuibꞌbꞌat icha teꞌ uva, ix ecꞌcꞌoch dꞌa scꞌaxepal aꞌ mar, ix cꞌoch pax dꞌa aꞌ n̈ajabꞌ yic Jazer chiꞌ. Axo ticnaic ix cꞌoch scꞌual sjavi ebꞌ ol sataneloc, icha tzꞌaj scꞌoch scꞌual smolji sat teꞌ uva yedꞌ sat juntzan̈xo teꞌ avbꞌen teꞌ.
33 Man̈xa av yic tzalajcꞌolal ol abꞌchaj dꞌa scaltac teꞌ avbꞌen teꞌ bꞌaj te yax sat dꞌa Moab. Man̈xalaj vino bꞌaj smolbꞌaji, yujto man̈xa mach stecꞌanel yal sat teꞌ uva chiꞌ, man̈xa bꞌit yic tzalajcꞌolal.
34 A ebꞌ anima dꞌa Hesbón, tzꞌel yav ebꞌ yuj yaelal. Chequelto yel yav ebꞌ chiꞌ dꞌa Eleale, dꞌa Jahaza. Scꞌoch yav ebꞌ chiꞌ dꞌa Zoar masanto dꞌa Horonaim yedꞌ dꞌa Eglat-selisiya. Yujto toxo ix laj tup sjaj a aꞌ dꞌa Nimrim.
35 A in Jehová in svalaꞌ: Ol satel ebꞌ aj Moab tzꞌoch ejmelal, sn̈usan silabꞌ yedꞌ incienso ebꞌ dꞌa juntzan̈ comon dios dꞌa jolomtac vitz.
36 Icha yocꞌ flauta spuji yuj cuscꞌolal, icha chiꞌ tzꞌaj vocꞌ yuj ebꞌ aj Moab chiꞌ, yuj pax ebꞌ aj Kir-hares, yujto a sbꞌeyumal ebꞌ ix smolbꞌej, toxo ix lajvieli.
37 Yuj yaelal yedꞌ cuscꞌolal, masanil ebꞌ toxo ix sjoxel xil sjolom, toxo ix sjoxpaxel xil stiꞌ ebꞌ. Masanil ebꞌ toxo ix spol lajvoc scꞌabꞌ, axon̈ej pichul ya sva yic cuscꞌolal ayoch yuj ebꞌ.
38 Masanil span̈anil yibꞌan̈tac pat dꞌa Moab yedꞌ dꞌa yoltac calle, axon̈ej oqꞌuel yuj cuscꞌolal tzꞌabꞌchaji, yujto a in Jehová in ix in macꞌ vecchaj Moab icha tzꞌaj smacꞌjipoj junoc lum chen malaj vachꞌ yochi.
39 A Moab chocꞌ ix ajcani. Ocꞌan̈ec yuuj, yujto qꞌuixvelal ix ajcani, toxo ix juchajbꞌati. Masanil anima dꞌa juntzan̈ nación dꞌa slacꞌanil sbꞌuchvaj ebꞌ dꞌay, xivpax ebꞌ yilani, xchi Jehová.
40 Syalanxi Jehová icha tic: A jun ajcꞌol dꞌa Moab, ol cꞌoch jucnaj icha junoc nocꞌ chꞌacbꞌa jen̈aneli scꞌochi.
41 Ol och juntzan̈ chon̈abꞌ vachꞌ yajoch smuroal dꞌa yol scꞌabꞌ ebꞌ ajcꞌol chiꞌ. A dꞌa jun cꞌual chiꞌ, a ebꞌ soldado yic Moab ol ibꞌxocqꞌue ebꞌ icha junoc ix ix van yalji yuneꞌ.
42 A Moab chiꞌ, man̈xo nacionoc ol ajcanoc, yujto ix yicꞌchaan̈ sbꞌa dꞌa vichan̈, ix och smul dꞌayin a in Jehová in tic.
43 Yuj chiꞌ sval icha tic: A ebꞌ cajan dꞌa Moab, lajan ol aj ebꞌ icha nocꞌ nocꞌ spechji yuj ebꞌ pechum nocꞌ. Ay smay sbꞌat sutnaj ebꞌ dꞌa junoc olan, ma scan ebꞌ dꞌa junoc yaal.
44 A ebꞌ ol el lemnaj dꞌa ebꞌ pechjinac chiꞌ, ol bꞌat sutnaj ebꞌ dꞌa junoc olan. A ebꞌ ol qꞌuexta dꞌa jun olan chiꞌ, axo dꞌa junoc yaal ol can ebꞌ. Yujto a in ol vacꞌbꞌat yaelal nabꞌil vuuj dꞌa yibꞌan̈ Moab chiꞌ.
45 Ay ebꞌ ol el lemnajoc, man̈xalaj yip ebꞌ, ol bꞌat ebꞌ say bꞌaj ol scol sbꞌa dꞌa Hesbón. Palta a dꞌa Hesbón chiꞌ, aton schon̈abꞌcan vin̈aj rey Sehón, van stzꞌabꞌati, ol bꞌeyn̈ejbꞌat teꞌ cꞌacꞌ chiꞌ. Ol tzꞌabꞌat masanil jolomtac vitz dꞌa yol yic Moab yedꞌ jun chon̈abꞌ Hesbón chiꞌ, aton jun syicꞌchaan̈ sbꞌa.
46 Ex aj Moab obꞌiltac ex. Ex schon̈abꞌ ex jun dios scuch Quemos, toxo ix ex sateli. A ebꞌ eyuninal yedꞌ ebꞌ ix eyisil, ix icꞌchajbꞌat ebꞌ dꞌa chꞌoc nacional.
47 A in Jehová in svalaꞌ: Ay jun cꞌual ol vicꞌxi meltzaj ebꞌ aj Moab chiꞌ bꞌajtac icꞌbꞌilbꞌati, xchi Jehová.
Aton juntzan̈ yaelal tic ix yalcan Jehová dꞌa yibꞌan̈ Moab.