A tas albꞌilcan dꞌa yibꞌan̈ ebꞌ filisteo
47
Ix lolon Jehová dꞌayin Jeremías in tic yuj ebꞌ filisteo, ayic manto cꞌoch vin̈ sreyal Egipto yacꞌ oval dꞌa chon̈abꞌ Gaza:2 Ix yalan Jehová chiꞌ icha tic: A dꞌa stojolal norte ol cot val n̈ililoc ebꞌ soldado, icha val yel pon̈oljoc aꞌ elumaꞌ tzꞌel dꞌa stitac smelemal. Pilan ol satel jun nación chiꞌ ebꞌ yedꞌ masanil tastac ay dꞌay yedꞌ juntzan̈xo chon̈abꞌ. Masanil ebꞌ cajan dꞌa schon̈abꞌ ebꞌ filisteo chiꞌ, ol el yav ebꞌ yabꞌan syail.
3 A val yic ol yabꞌan ebꞌ scꞌan̈ yem yoc nocꞌ chej yedꞌ scꞌan̈ scot carruaje, a ebꞌ vin̈ mamabꞌil yedꞌ ebꞌ ix nunabꞌil ol te el yip ebꞌ, ol yactejcan yal yuninal ebꞌ.
4 Toxo ix cꞌoch scꞌual satel ebꞌ filisteo yedꞌ ebꞌ scolvaj yedꞌ ebꞌ, aton ebꞌ aj Tiro yedꞌ ebꞌ aj Sidón, xchi Jehová.
A Jehová ol satanel ebꞌ filisteo chiꞌ, aton masanil ebꞌ cotnac dꞌa Creta dꞌa snan̈al aꞌ mar.
5 Masanil ebꞌ aj Gaza ol sjoxel xil sjolom ebꞌ yuj cuscꞌolal. Axo ebꞌ ay dꞌa Ascalón man̈xo ol yal-laj slolon ebꞌ yuj satcanqꞌue scꞌool. A exxo cajan ex dꞌa yacꞌlical stiꞌ aꞌ mar, ¿bꞌaqꞌuin̈ ol eyactej eyacꞌan echnaj e nivanil yuj e chꞌoxanel e cuscꞌolal?
6 Ay, a yespada Jehová. ¿Bꞌaqꞌuin̈ val ol och vaan? Comonoc tzꞌacꞌjixiem dꞌa yol yatut yic tzꞌoch vaan, man̈xa tas scꞌulej.
7 Palta ¿tas val ol aj yoch vaan? A Jehová ix alani to icha chiꞌ tzuji. An̈ejaꞌ ix alani to tzꞌoch oval dꞌa chon̈abꞌ Ascalón yedꞌ dꞌa masanil ebꞌ cajan dꞌa stitac aꞌ mar.