Acꞌbꞌil ganar ebꞌ aj Egipto dꞌa Carquemis
46
Ix lolonxi Jehová dꞌayin Jeremías in tic yuj juntzan̈ nación. 2 Ix yal yuj Egipto, yuj vin̈aj Necao sreyal Egipto yedꞌ pax ebꞌ soldado vin̈, aton vin̈ ix acꞌji ganar dꞌa Carquemis dꞌa slacꞌanil aꞌ Éufrates yuj vin̈aj Nabucodonosor sreyal Babilonia. Aton yic schan̈il abꞌil yoch vin̈aj Joacim yuninal vin̈aj Josías reyal dꞌa Judá, aton taꞌ ix uji jun chiꞌ.3 Tzꞌavaj ebꞌ yajalil ebꞌ soldado, syalan ebꞌ icha tic: Bꞌoec e maclabꞌ jul-labꞌ. Ixiquec oval.
4 Aqꞌuecoch stzꞌum nocꞌ e chej, tzex qꞌue dꞌa yibꞌan̈ nocꞌ. Aqꞌuecqꞌue e qꞌuen xumpil tze tzolan e bꞌa. N̈iquecqꞌue ye sn̈iꞌ e lanza. Aqꞌuecoch smacul sn̈iꞌ e cꞌool, xchi ebꞌ.
5 Palta, ¿tas jun van yuji tic? A svilani to a ebꞌ soldado vin̈aj Necao van smeltzaj ebꞌ dꞌa spatic yuj xivelal, sacleminac sbꞌatcan ebꞌ elelal. Maxtzac meltzajbꞌat qꞌuelan ebꞌ dꞌa spatic.
6 A ebꞌ jelan sbꞌeyi maxtzac yal-laj yel lemnaj ebꞌ. Yedꞌ pax ebꞌ te tecꞌan, maxtzac yal-laj scolan sbꞌa ebꞌ. A dꞌa stojolal norte dꞌa stiꞌ aꞌ Éufrates, ataꞌ tzꞌacꞌji ganar ebꞌ, schampaxcan ebꞌ.
7 ¿Mach jun nación syicꞌchaan̈ sbꞌa chiꞌ icha aꞌ Nilo, ma icha junoc a aꞌ tzꞌel dꞌa smelemal?
8 Aton Egipto van yicꞌanchaan̈ sbꞌa, icha tzꞌaj sqꞌue aꞌ Nilo, ma icha junoc a aꞌ tzꞌel dꞌa smelemal. Ix yalan ebꞌ aj Egipto chiꞌ icha tic: Ol on̈ qꞌuibꞌchaan̈, ol co mac sat lum luum tic, ol laj co satel chon̈abꞌ yedꞌ masanil ebꞌ cajan dꞌay, xchi ebꞌ.
9 Pilec eyip yedꞌ nocꞌ e chej. Iqꞌuecbꞌat e carruaje. Bꞌatocabꞌ ebꞌ soldado aj Etiopía yedꞌ ebꞌ aj Libia, yedꞌnacocabꞌ smaclabꞌ jul-labꞌ ebꞌ. Bꞌatocabꞌ pax ebꞌ soldado aj Lidia te jelan sjulvaji.
10 Aton jun scꞌual yoval in cꞌol a in Jehová Yajal in dꞌa smasanil, jun cꞌual yic ol in pacan in bꞌa dꞌa ebꞌ ayoch ajcꞌolal dꞌayin. Yuj qꞌuen espada ol cham ebꞌ smasanil, masanto ol pimbꞌoc qꞌuen yuj chicꞌ, yujto tzijtum ebꞌ soldado ol vacꞌ miljoccham dꞌa norte, dꞌa slacꞌanil aꞌ Éufrates. Icha nocꞌ silabꞌ ol aj scham ebꞌ.
11 Ex aj Egipto, ixiquec dꞌa Galaad e say yan̈al tas tzex icꞌan chiꞌ. Vachꞌchom te nivan yan̈al chiꞌ tze cꞌanaꞌ, palta malaj ol ochoc, yujto man̈xalaj yan̈al tas tzex icꞌan chiꞌ.
12 Yojtacxo masanil nación to van yel e qꞌuixvelal. Masanil bꞌaj tzꞌabꞌchaj yel eyav. Toxon̈ej stenlaj sbꞌa ebꞌ soldado, junn̈ej bꞌaj stelvican ebꞌ dꞌa sat luum, xchi Jehová.
Ol javoc vin̈aj Nabucodonosor dꞌa Egipto
13 Ix yalanxi Jehová dꞌayin Jeremías in tic yuj tas ol aj sja vin̈aj Nabucodonosor sreyal Babilonia yacꞌ oval dꞌa Egipto tic:
14 Alel dꞌa yol smacbꞌen Egipto, aton dꞌa Migdol, dꞌa Menfis yedꞌ dꞌa Tafnes icha tic: Aqꞌuec lista e bꞌa. Macvajan̈ec, yujto van scham ebꞌ anima dꞌa e lacꞌanil yuj qꞌuen espada.
15 ¿Tas yuj toxon̈ej teltumbꞌa ebꞌ soldado? ¿Tas yuj maj yal stecꞌbꞌan sbꞌa ebꞌ? Icha chiꞌ ix aji yujto a in Jehová in ix vacꞌ acꞌjoc ganar ebꞌ.
16 A ebꞌ soldado sloc sbꞌa yoc ebꞌ, stelvi ebꞌ, syal-lan ebꞌ dꞌay junjun: On̈ elec dꞌa tic, paxocon̈ec dꞌa co chon̈abꞌ, dꞌa co nación bꞌaj ix on̈ alji. On̈ elec lemnajoc yacbꞌan manto on̈ miljoccham dꞌa oval tic.
17 A vin̈ sreyal Egipto tic ton̈ej ste lolon vin̈, palta malaj vachꞌ yoch vin̈, xchi ebꞌ.
18 A in Rey in, a in bꞌi aton Jehová Yajal dꞌa Smasanil, a in svacꞌ in tiꞌ: Icha lum vitzal Tabor ecꞌal schaan̈il dꞌa juntzan̈xo lum vitz, ma icha lum vitzal Carmelo te chaan̈ yajqꞌue dꞌa yibꞌan̈ aꞌ mar, icha chiꞌ yip jun ajcꞌol van sjavi dꞌayex.
19 Yuj chiꞌ, a ex cajan ex dꞌa Egipto tic, aqꞌuec lista e bꞌa yujto ol ex icꞌjocbꞌat dꞌa chꞌoc nacional. A chon̈abꞌ Menfis ol can tzꞌinan, ol-laj juchajcanemoc, man̈xalaj mach ol cajnaj dꞌay.
20 A Egipto tic lajan icha junoc cobꞌes vacax vachꞌ yilji, palta dꞌa stojolal norte van scot jun ajcꞌol icha nocꞌ cach ol ul sataneloc.
21 A juntzan̈ soldado majnabꞌilcoti, te bꞌaqꞌuech ebꞌ, icha nocꞌ quelem vacax bꞌaqꞌuech, palta ipan ebꞌ ol bꞌat elelal. Man̈xo ol yal-laj stecꞌbꞌan sbꞌa ebꞌ, yujto sjavi scꞌual yacꞌji ganar ebꞌ, sjavi yorail yacꞌji syaelal ebꞌ.
22 A in Jehová in svalaꞌ, ayic ol javoc ebꞌ soldado ul yacꞌ oval dꞌa Egipto tic, ol el lemnaj ebꞌ aj Egipto tic icha sbꞌat junoc nocꞌ chan ayic xiv nocꞌ. Icha sbꞌat ebꞌ vin̈ vinac yedꞌ schꞌacabꞌ chꞌacoj teꞌ, icha chiꞌ ol aj sjavi ebꞌ ajcꞌol chiꞌ dꞌa ebꞌ.
23 A in Jehová in svalaꞌ, vachꞌchom malaj mach schaxoch dꞌa ebꞌ icha te teꞌ cꞌayum, palta ol chꞌacjoquel ebꞌ icha tzꞌaj schꞌacjiel teꞌ nivac chꞌacteꞌ. Yujto ecꞌto sbꞌisul ebꞌ ajcꞌol chiꞌ dꞌa nocꞌ cꞌulubꞌ, man̈xo bꞌischajbꞌenoc ebꞌ.
24 A ebꞌ aj Egipto tic ol acꞌjoc qꞌuixvelal ebꞌ, ol acꞌjococh ebꞌ dꞌa yol scꞌabꞌ juntzan̈ nación ol cot dꞌa stojolal norte, xchi Jehová.
25 A Jehová Yajal dꞌa Smasanil, sDiosal Israel a tzꞌalan icha tic: Ol in satel Amón, aton sdiosal ebꞌ aj Tebas. Ol vacꞌpax syaelal ebꞌ aj Egipto, sdiosal ebꞌ yedꞌ sreyal ebꞌ. Ol vacꞌ syaelal vin̈ sreyal Egipto chiꞌ yedꞌ ebꞌ tzꞌacꞌanoch vin̈ yipoc scꞌool. 26 Ol vacꞌoch ebꞌ dꞌa yol scꞌabꞌ ebꞌ ajcꞌol ol milanchamoc, aton vin̈aj Nabucodonosor sreyal Babilonia yedꞌ ebꞌ soldado. Palta a in Jehová in svalaꞌ to a dꞌa bꞌaqꞌuin̈, ol cajnajxoc anima dꞌa Egipto tic, ichataxon yaji, xchi Jehová.
A Jehová ol colan schon̈abꞌ
27 Ix yalanpax Jehová icha tic: Ex aj Israel yin̈tilal Jacob, in checabꞌ eyaji, man̈ ex xivoc, yujto ol ex in colel yedꞌ ebꞌ eyuninal dꞌa jun nación najat bꞌaj ix ex icꞌjibꞌati. A in Jehová in svalaꞌ to ol ex cajnajxoc dꞌa juncꞌolal, man̈xa tas ol e naꞌa, man̈xa mach ol ex xibꞌtanoc.
28 Ex yin̈tilal Jacob in checabꞌ eyaji, man̈ ex xivoc. Ayinn̈ejoch eyedꞌoc, ol in satel masanil juntzan̈ nación bꞌaj ix ex in saclemejbꞌati. Palta a ex tic man̈ ol ex in satel-laj, man̈ ol ex canpaxlaj dꞌa ichn̈ejtaꞌ, an̈ej to ol vacꞌoch eyaelal icha dꞌa smojal, xchi Jehová.