A stiꞌ Jehová ix yacꞌ dꞌa Israel
30
Aton slolonel Jehová tic ix yal dꞌayin Jeremías in tic: 2 A in Jehová e Diosal in a ex israel ex tic, sval icha tic: Tzꞌibꞌejcan masanil tas ix val dꞌayach, 3 yujto ol cꞌoch scꞌual, ol vacꞌ meltzaj ebꞌ in chon̈abꞌ Israel yedꞌ ebꞌ aj Judá icꞌbꞌilbꞌat dꞌa Babilonia. A in Jehová in svalaꞌ to ol vicꞌxi meltzaj ebꞌ dꞌa lum luum vacꞌnac smacbꞌenej ebꞌ e mam eyicham, xchi Jehová.Tzꞌabꞌchaj val yel av yuj xivcꞌolal, man̈xalaj tzalajcꞌolal.
6 Cꞌanbꞌejec val eyabꞌi, tocval ay junoc vin̈ vinac tzꞌaj yuneꞌ. ¿Tas yuj svilaꞌ, a ebꞌ vin̈ vinac te tecꞌan, toxon̈ej vetzꞌvetzꞌoch ebꞌ vin̈ dꞌa scꞌol icha ebꞌ ix ix aycot syail unevel dꞌay? ¿Tas yuj sacxon̈ej yilji sat ebꞌ vin̈ smasanil?
7 Ay jun cꞌual to man̈xa yalnabꞌil yaelal ol ujoc, malaj junocxo cꞌu lajan yedꞌ jun cꞌu ol javoc chiꞌ. Aton dꞌa jun tiempoal chiꞌ ol och val yaelal dꞌa yibꞌan̈ ebꞌ yin̈tilal Jacob, palta ol colchajel ebꞌ dꞌa scal.
8 A in Jehová Yajal in dꞌa Smasanil sval icha tic: Ol viqꞌuel teꞌ yugo ayoch dꞌa sjaj ebꞌ in chon̈abꞌ, aton bꞌaj ayoch ebꞌ checabꞌvumal. Man̈xa bꞌaqꞌuin̈ ol och ebꞌ checabꞌvumal dꞌa ebꞌ chꞌoc chon̈abꞌil.
9 A in Jehová sDiosal in ebꞌ tic ol in yacꞌ servil, ol yacꞌanpax servil vin̈ yin̈til vin̈aj David ebꞌ, aton vin̈ ol vacꞌoch sreyaloc ebꞌ.
10 Ex israel yin̈tilal Jacob, in checabꞌ eyaji, man̈ ex xivoc, yujto ol ex in colel yedꞌ ebꞌ eyuninal dꞌa jun nación najat bꞌaj ix ex icꞌjibꞌati. A in Jehová in svalaꞌ to ol ex cajnajxi dꞌa juncꞌolal, man̈xa tas ol e naꞌa, man̈xa mach ol ex xibꞌtanoc.
11 Ex yin̈tilal Jacob, in checabꞌ eyaji, man̈ ex xivoc. Ayinn̈ejoch eyedꞌoc, ol in satel masanil juntzan̈ nación bꞌaj ix ex in saclemejbꞌati. Palta a ex tic man̈ ol ex in satel-laj, an̈ej to ol vacꞌoch eyaelal icha dꞌa smojal. Man̈ ol ecꞌbꞌatlaj in chꞌolbꞌitan tas eyaji.
12 A bꞌaj ix ex lajvi chiꞌ, max yal yan̈taji, a eyaelal man̈xalaj sbꞌonabꞌil.
13 Malaj mach tzꞌalan eyaelal, malaj mach tzꞌan̈tan eyechen chiꞌ. Man̈xa yan̈al eyaelal chiꞌ.
14 Masanil ebꞌ tzex xajanani, toxo ix ex bꞌat satcꞌolal yuj ebꞌ. ¿Toc tzato sna ebꞌ tas tzex aji? A in ix ex vacꞌ echnajoc, icha ajcꞌol vajoch dꞌayex. Te nivan eyaelal ix vacꞌochi, yujto man̈ jantacoc e chucal, man̈xo bꞌischajbꞌenoc.
15 ¿Tas yuj tzꞌel val eyav yuj eyechen chiꞌ? Man̈xa yan̈al eyaelal chiꞌ, yujto man̈xo bꞌischajbꞌenoc e mul, yuj chiꞌ icha chiꞌ tzex vutej.
16 Palta masanil ebꞌ snibꞌej ex sataneli, ol satel ebꞌ. Masanil ebꞌ ayoch ajcꞌolal dꞌayex, ol icꞌjoccanbꞌat ebꞌ dꞌa chꞌoc chon̈abꞌil. A ebꞌ ix icꞌanbꞌat tastac ay dꞌayex, ol icꞌjocpaxbꞌat yic ebꞌ. A ebꞌ ix elcꞌanbꞌat e cꞌael, ol elcꞌajpaxbꞌat yic ebꞌ.
17 Vachꞌchom a ebꞌ eyajcꞌool chiꞌ syal ebꞌ dꞌa e patictac icha tic: A Sion toxo ix actajcani, man̈xalaj mach tzꞌocꞌ scꞌol yuuj, xchi ebꞌ. Palta a in Jehová in svalaꞌ to ol vacꞌ bꞌoxoc e cꞌool, ol van̈tej eyechen chiꞌ.
18 Yujto ol cꞌoch scꞌual, ol ex vicꞌxi meltzaj a ex yin̈tilal ex Jacob tic bꞌaj icꞌbꞌil ex bꞌati. Ol ocꞌ in cꞌol dꞌayex. A e chon̈abꞌ ol bꞌoxocqꞌue bꞌaj jubꞌilem dꞌa sbꞌabꞌelal yedꞌ pax e palacio ol bꞌoxoc dꞌa yedꞌtal.
19 Ataꞌ ol qꞌue e jaj e bꞌitan yuj eyacꞌan yuj diosal, ol ex tzevaj dꞌa tzalajcꞌolal. Ol vacꞌ qꞌuibꞌ e bꞌisul, man̈ jayvan̈ocn̈ej ol ex ajoc. Man̈ ol ex paticajeloc, a in ol vacꞌ snivanil eyelcꞌochi.
20 A ex israel ex tic, icha eyaj dꞌa pecaꞌ, icha chiꞌ ol ex ajxoc. Tecꞌan ol ex ajxoc dꞌa vichan̈. Ol vacꞌoch syaelal ebꞌ ix ex ixtani.
21 A in Jehová in svalaꞌ to a dꞌa e cal ol elta jun mach ol och eyajaliloc, a ol ex cuchbꞌanoc. A jun eyajalil chiꞌ ol vacꞌ javoc dꞌa in tzꞌey. Yujto malaj junoc mach scomon tecꞌbꞌej sbꞌa sjavi dꞌa in tzꞌey.
22 Ol ex och in chon̈abꞌoc, a inxo ol in och e Diosaloc, xchi Jehová.
23 A yoval scꞌol Jehová ol ja dꞌa yibꞌan̈ ebꞌ chuc, icha val junoc oval icꞌ n̈abꞌ sjavi xumnajoc.
24 A yoval scꞌol chiꞌ, man̈ ol ecꞌbꞌatlaj masanto ol elcꞌoch tas nabꞌil yuuj. Masanil juntzan̈ tic ol nachajel eyuuj dꞌa slajvubꞌ cꞌual.