Ol meltzaj ebꞌ israel dꞌa schon̈abꞌ
31
A Jehová tzꞌalan icha tic: A val dꞌa jun tiempoal ol javoc chiꞌ, a in ol in och sDiosaloc junjun macan̈il ebꞌ yin̈tilal Israel, axo ebꞌ ol och in chon̈abꞌoc.2 A ebꞌ israel ix elcan dꞌa yol scꞌabꞌ chamel, ix scha in vachꞌcꞌolal ebꞌ dꞌa tzꞌinan luum, ayic van sayanecꞌ ebꞌ bꞌaj syicꞌ yip.
3 A dꞌa pecataxo in chꞌoxnac in bꞌa dꞌayex valannac icha tic: Ex israel xajan ex vuj dꞌa masanil qꞌuinal, yuj chiꞌ tzꞌocꞌn̈ej in cꞌool dꞌayex.
4 Ol ex vicꞌxiqꞌuechaan̈. Eyedꞌnac e pandereta ol ex qꞌuex cheneljoc yuj tzalajcꞌolal.
5 Ol eyavejxi teꞌ eyuva dꞌa lum tzalquixtac dꞌa yol yic Samaria. A mach ol yavej yuva chiꞌ, ol yacꞌ tzalajbꞌoc scꞌol yedꞌ sat.
6 Yujto ol javoc jun cꞌual to a ebꞌ stan̈vumal chon̈abꞌ dꞌa tzalquixtac dꞌa yol smacbꞌen Efraín, chaan̈ ol el yav ebꞌ icha tic: Cotan̈ec, coyec dꞌa Sion dꞌa Jehová co Diosal, xcham ebꞌ, xchi Jehová.
7 Ix yalanxi Jehová icha tic: Bꞌitanan̈ec dꞌa tzalajcꞌolal yuj jun chon̈abꞌil ebꞌ yin̈tilal Jacob, aton jun te nivan yelcꞌoch dꞌa yichan̈ masanil nación. Abꞌchajocabꞌ e bꞌitani, tzeyalan icha tic: Mamin Jehová, col on̈ a chon̈abꞌ on̈ tic, a on̈ ayon̈ to can tic, xe chi.
8 Ol vicꞌ meltzaj ebꞌ dꞌa jun nación ay dꞌa norte. Ol in molbꞌejcot ebꞌ bꞌaj slajvicꞌoch yolyibꞌan̈qꞌuinal. A dꞌa scal ebꞌ chiꞌ, ataꞌ ol javoc ebꞌ max yal-laj yilani yedꞌ ebꞌ tzꞌem sbꞌeyi, ebꞌ ix yabꞌix yedꞌ ebꞌ ix ato val yalji yuneꞌ. Te nivan ol aj sbꞌisul ebꞌ smeltzajxi.
9 Axon̈ej lesal yedꞌ oqꞌuel ol yacꞌ ebꞌ ayic ol meltzajxoc ebꞌ. A inxo ol vicꞌbꞌat ebꞌ dꞌa a aꞌ tzꞌel yoc yedꞌ dꞌa yol jun bꞌe te acꞌlic, man̈xa bꞌaj ol telvoc ebꞌ. Yujto mamabꞌil vaj dꞌa chon̈abꞌ Israel tic. Axo chon̈abꞌ Efraín, ichato in bꞌabꞌel unin yaji, xchi Jehová.
10 Syalanxi Jehová chiꞌ icha tic: Ex junjun nación, abꞌec val in loloni. Alequel dꞌa juntzan̈ chon̈abꞌ lacꞌan yedꞌ dꞌa juntzan̈ chon̈abꞌ dꞌa scꞌaxepal aꞌ mar te najat ay, tzeyalan icha tic: A Jehová ix acꞌan saclem ebꞌ israel, an̈ejtonaꞌ pax ol molbꞌanxicot ebꞌ. Ol tan̈vajxoc ebꞌ yuuj icha tzꞌaj stan̈vaj nocꞌ calnel yuj stan̈vumal, xe chi.
11 Yujto ol in colcanel ebꞌ yin̈tilal Jacob, ol in colancan ebꞌ dꞌa yol scꞌabꞌ juntzan̈ nación te ay yip.
12 Ol ja ebꞌ, ol sbꞌitan bꞌit ebꞌ dꞌa tzalajcꞌolal dꞌa tzalan Sion, axo yacꞌan tzalajbꞌoc scꞌol ebꞌ yedꞌ jantac tas vachꞌ ol vacꞌ dꞌay, aton ixim trigo, vino, aceite, nocꞌ calnel yedꞌ nocꞌ vacax. Lajan ol aj ebꞌ icha teꞌ avbꞌen teꞌ ayn̈ejoch yalil, man̈xo ol el-laj yip ebꞌ junelxo. 13 Ol qꞌue cheneljoc ebꞌ ix cobꞌestac yuj tzalajcꞌolal. Ol tzalaj pax ebꞌ vin̈ quelemtac yedꞌ ebꞌ vin̈ ichamtac vinac. A in ol vacꞌ snivanil scꞌol ebꞌ, ol meltzajoch scuscꞌolal ebꞌ dꞌa tzalajcꞌolal, yelxo nivan stzalajcꞌolal ebꞌ ol vacꞌ dꞌa yichan̈ yaelal ix yil ebꞌ.
14 A ebꞌ sacerdote a val vael te vachꞌ ol vacꞌ sva ebꞌ, axo ebꞌ in chon̈abꞌ ol yacꞌ tzalajbꞌoc scꞌol yedꞌ masanil tas ol vacꞌ dꞌay, xchi Jehová.
15 Syalanxi Jehová chiꞌ icha tic: Tzꞌabꞌchaj val yoch av dꞌa chon̈abꞌ Ramá, ay mach sicꞌsicꞌan val yocꞌ yuj yaelal. A ix Raquel tzꞌocꞌ val ix yuj ebꞌ yuneꞌ. Man̈xa sgana ix snivanaj scꞌool, yujto man̈xalaj ebꞌ yuneꞌ ix ix cani.
16 Ach Raquel, man̈xo ach ocꞌoc, mocxobꞌ el yal a sat yujto a in Jehová in svalaꞌ, a tas ix a cꞌulej yuj svachꞌiloc ebꞌ uneꞌ chiꞌ, ol a cha spac. A ebꞌ uneꞌ chiꞌ, ol elta ebꞌ dꞌa schon̈abꞌ ebꞌ ajcꞌool, ol jaxcan cajan ebꞌ dꞌa tic.
17 A in Jehová in svalaꞌ to syal acꞌanoch yipoc a cꞌol tas ol ujoc dꞌa bꞌaqꞌuin̈. A ebꞌ uneꞌ, ol meltzajxoc ebꞌ dꞌa schon̈abꞌ tic.
18 Ix vabꞌ val scꞌacvi ebꞌ aj Efraín yuj cuscꞌolal, syalan ebꞌ icha tic: Ix on̈ a cꞌaybꞌej icha tzꞌaj scꞌaybꞌaj junoc nocꞌ quelem vacax man̈ yojtacoc smunlaji, palta ix quileli. Icꞌon̈ meltzaj edꞌoc, bꞌecan co cꞌol co meltzaji, yujto a ach tic Jehová, co Diosal ach.
19 Ix quiqꞌuel co bꞌa dꞌayach, palta ix co na co bꞌa ticnaic. Ayic ix nachajel co chucal cuuj, toxon̈ej ix on̈ em n̈ojan yuj qꞌuixvelal. Emnaquilxon̈ej scutej co bꞌa yuj jantac co mul ix och dꞌa yictax co quelem uninal, xchi ebꞌ aj Efraín chiꞌ dꞌayin.
20 A in Jehová in svalaꞌ to a ebꞌ aj Efraín tic, ichato vuninal yaj ebꞌ, xajan ebꞌ vuuj. Vachꞌchom svacꞌ syaelal ebꞌ, palta max vactej in naan ebꞌ, ya svabꞌ yuj ebꞌ, yujto tzꞌocꞌ val in cꞌol dꞌa ebꞌ.
21 Ex aj Israel, sicꞌlabꞌil tzeyilcan jun bꞌe bꞌaj tzex bꞌati, yujto an̈ejaꞌ dꞌa jun bꞌe chiꞌ ol ex meltzajxoc yic tzex jax dꞌa e chon̈abꞌ ol eyactejcan tic.
Meltzajan̈ec ex chon̈abꞌ Israel. Meltzajan̈ec dꞌa juntzan̈ e chon̈abꞌ.
22 ¿Bꞌaqꞌuin̈ ol eyactejcan e bꞌeyecꞌ icha junoc ix ix te pit? A in Jehová in ol vacꞌ ujoc junoc tas to manta bꞌaj tzuji dꞌa yolyibꞌan̈qꞌuinal tic: A junoc ix ix ol tzuntzanbꞌat junoc vin̈ vinac, xchi Jehová.
Vachꞌ ol ajxoc Israel
23 A Jehová Yajal dꞌa Smasanil, aton co Diosal a on̈ israel on̈ tic, a tzꞌalan icha tic: Ayic ol vicꞌanxicot ebꞌ israel tic dꞌa sluum bꞌaj cajantaxoni, ol laj yal ebꞌ anima cajan dꞌa yol yic Judá icha tic: Yacꞌocabꞌ svachꞌcꞌolal Jehová dꞌa yibꞌan̈ jun tzalan sicꞌbꞌilel yuuj, bꞌaj sbꞌeybꞌalaj tojolal, xcham ebꞌ. 24 Ol laj cajnajxoc ebꞌ anima dꞌa juntzan̈ chon̈abꞌ dꞌa yol yic Judá yedꞌ ebꞌ munlajvum tzꞌavan tastac, yedꞌ pax ebꞌ tan̈vum calnel ol cajnaj ebꞌ taꞌ. 25 A in ol vacꞌxi yip ebꞌ cꞌunbꞌinac. A ebꞌ tzꞌel yip yuj vejel, ol vacꞌ bꞌudꞌjoc scꞌol ebꞌ, xchi Jehová.
26 Ayic ix lajvi vilan juntzan̈ tic ix el in vayan̈, ix in ecꞌ qꞌueleloc, te vachꞌ jun ix chꞌoxji vil tic.
27 A val Jehová tzꞌalan icha tic: Ol cꞌoch scꞌual, ol vacꞌanxi qꞌuibꞌ sbꞌisul ebꞌ anima yedꞌ nocꞌ nocꞌ dꞌa Israel yedꞌ dꞌa Judá. 28 A in val Jehová in svalaꞌ to icha val ix aj vacꞌan vip in tocꞌaneli, in juanemi, vacꞌan icꞌjoquemi, in sataneli yedꞌ vacꞌan ixtajoc, an̈ejtonaꞌ icha chiꞌ ol aj vacꞌanxi vip vacꞌanxiem yich, yic tzin bꞌoanxiqꞌuei.
29 A dꞌa jun tiempoal chiꞌ man̈xo ol yal ebꞌ anima icha tic: A ebꞌ mamabꞌil ix slo teꞌ uva ebꞌ te paj, axo ebꞌ uninabꞌil, jululixon̈ej sbꞌat spajil teꞌ dꞌa yichtac ye ebꞌ, man̈ xchioc ebꞌ. 30 Yujto junjun mach ol cham yuj smul. A mach ol loan teꞌ paj uva chiꞌ, munil a ol abꞌan spajil teꞌ, xchi Jehová.
31 Ix yalanxi Jehová icha tic: Ol javoc scꞌual, ol in bꞌoan junocxo in trato yedꞌ ebꞌ yin̈tilal Israel yedꞌ ebꞌ yin̈tilal Judá. 32 A in Jehová in svalaꞌ to a jun trato chiꞌ, man̈ lajanoc yedꞌ jun in bꞌonac yedꞌ ebꞌ e mam eyicham ayic vicꞌannaquelta ebꞌ dꞌa Egipto. Ichato ochnac in quetzquetz dꞌa scꞌabꞌ ebꞌ ayic vicꞌannaquelta ebꞌ chiꞌ, palta maj scꞌanabꞌajej in trato ebꞌ in bꞌo yedꞌoc, vachꞌchom ichato vetbꞌeyum vutejnac ebꞌ. 33 Aton in trato tic ol in bꞌo eyedꞌoc a ex yin̈tilal ex israel tic dꞌa jun tiempoal chiꞌ: A in val Jehová in svalaꞌ to ol vacꞌoch juntzan̈ in checnabꞌil dꞌa e pixan, ichato ol in tzꞌibꞌejcanoch dꞌa e pensar, ol in och e Diosaloc, a exxo ol ex och in chon̈abꞌoc. 34 Man̈xo yovaliloc ay junoc ex ol eyal dꞌa ebꞌ eyetchon̈abꞌ icha tic: Ojtaquejel Jehová, man̈xo xe chioc. Yujto a in Jehová in svalaꞌ to e masanil ol in eyojtaquejeli, vachꞌchom ebꞌ unin, ma ebꞌ icham anima. Ol vacꞌ nivancꞌolal schucal ebꞌ, man̈xa bꞌaqꞌuin̈ ol in nacot smul ebꞌ, xchi Jehová.
35 A Jehová ix acꞌancanoch cꞌu yic syacꞌan saquilqꞌuinal dꞌa cꞌualil, qꞌuen uj yedꞌ qꞌuen cꞌanal yic syacꞌ saquilqꞌuinal dꞌacꞌvalil. Aꞌ tzꞌacꞌanqꞌue pon̈naj aꞌ mar ayic scꞌan̈ aꞌ. A Jehová Yajal dꞌa Smasanil tzꞌalan icha tic:
36 Yacbꞌan manto satel juntzan̈ tzꞌacꞌan saquilqꞌuinal chiꞌ, a ex israel ex tic man̈ ol ex satel-laj dꞌa nacional dꞌa vichan̈.
37 A in Jehová in svalaꞌ: Icha satchaan̈ malaj bꞌaqꞌuin̈ syal yechtaji, mato icha sjulal yich lum luum malaj bꞌaqꞌuin̈ tzꞌojtacajeli, icha chiꞌ vaj eyedꞌ in chon̈abꞌ israel ex tic, malaj bꞌaqꞌuin̈ ol ex in patiquejel yuj tas tze cꞌulej, xchi Jehová.
38 A in Jehová in svalxi icha tic: Ol ja scꞌual to ol bꞌochajxiqꞌue in chon̈abꞌ, schael yich dꞌa torre Hananel, masanto ol cꞌoch dꞌa jun puerta ay dꞌa jun schiquin. 39 Tojoln̈ej ol bꞌat dꞌa smojonal, masanto dꞌa lum tzalan yic Gareb, scumlajbꞌat dꞌa stojolal Goa. 40 Masanil lum schꞌolanil bꞌaj smucchaj ebꞌ chamnac, bꞌaj sbꞌat yumchajcanel qꞌuen ticꞌaqꞌuil taan̈ yedꞌ dꞌa yibꞌan̈ stiꞌ a aꞌ scuch Cedrón, masanto dꞌa junxo schiquin bꞌaj ay puerta yic nocꞌ chej, dꞌa stojolal bꞌaj sjavi cꞌu, vic ol ajcanoc. Masanil juntzan̈ chiꞌ, man̈xa bꞌaqꞌuin̈ ol juchajemoc, man̈xa bꞌaqꞌuin̈ ol sateloc, xchi Jehová.