6 Ataꞌ ix yal Jehová dꞌayin icha tic: 7 Ilnabꞌi, a vin̈aj Hanamel yuninal vin̈aj Salum vin̈ a cꞌabꞌ oc, ol javoc vin̈ dꞌayach, ol ul yalan vin̈ icha tic: Man jun in lum ay dꞌa Anatot. Smoj ton val a ach tza manaꞌ, yujto ayto cuj co bꞌa, xcham vin̈, xchi Jehová dꞌayin. 8 Icha ix aj yalan chiꞌ dꞌayin, icha chiꞌ ix aji. Ix javi vin̈ in cꞌabꞌ voc chiꞌ dꞌayin ayic ayinecꞌ dꞌa yamaqꞌuil bꞌaj ayecꞌ ebꞌ stan̈vumal spalacio vin̈ rey chiꞌ. Ix ul yalan vin̈ dꞌayin icha tic: Man jun in luum ay dꞌa Anatot, dꞌa yol smacbꞌen Benjamín. A ach ay alan ic a manani, scan lum dꞌa yol a cꞌabꞌ, yujto te ayto cuj co bꞌa, xchi vin̈ dꞌayin. Yuj chiꞌ ix nachajel vuuj to slolonel Jehová jun chiꞌ. 9 Ix in manan lum dꞌa vin̈aj Hanamel chiꞌ, ix vacꞌan 17 qꞌuen plata stojoloc luum. 10 Ix in tzꞌibꞌancan jun trato chiꞌ, ix in macancan yedꞌ in sello dꞌa yichan̈ ebꞌ testigo. 11 Ix lajvi chiꞌ, ix vicꞌancot jun bꞌaj ix tzꞌibꞌchajcan jun trato bꞌaj ayoch sello chiꞌ, axo scopiail maj och selloal yic vachꞌ syal yilji. 12 Ix lajvi chiꞌ, a val dꞌa yichan̈ vin̈ in cꞌabꞌ voc aj Hanamel chiꞌ yedꞌ dꞌa yichan̈ pax ebꞌ testigo yedꞌ dꞌa yichan̈ masanil ebꞌ vetchon̈abꞌ cꞌojanem taꞌ ix vacꞌan in firma bꞌaj ix tzꞌibꞌchajcan jun trato chiꞌ, ix vacꞌancan schabꞌil dꞌa vin̈aj Baruc yuninal vin̈aj Nerías, yixchiquin vin̈aj Maaseías. 13 Dꞌa yichan̈ ebꞌ ix val dꞌa vin̈aj Baruc chiꞌ icha tic: 14 A Jehová Yajal dꞌa Smasanil, co Diosal a on̈ israel on̈ tic, a ix alani to scan juntzan̈ bꞌaj ix tzꞌibꞌchajcan jun trato tic, aton jun ayoch selloal yedꞌ jun malaj selloal, tza sicꞌcan dꞌa yol junoc lum chen yic vachꞌ najtil ol ecꞌoc. 15 A Jehová Yajal dꞌa Smasanil, co Diosal, a tzꞌalan icha tic: A bꞌaqꞌuin̈, ol laj smanxi spat ebꞌ anima, slum ebꞌ yedꞌ teꞌ uva avabꞌilxo dꞌa jun nación tic, xchi Jehová, xin chi.

16 Ix lajvi vacꞌancan jun bꞌaj ix tzꞌibꞌchaj jun trato yic jun lum luum chiꞌ dꞌa vin̈aj Baruc chiꞌ, ix in lesalvi dꞌa Jehová icha tic: 17 Mamin Jehová yedꞌ val a poder a bꞌonac satchaan̈ yedꞌ lum luum tic. Malaj tas ajaltac sbꞌo uuj. 18 A ach tic, tza xajanej jantac macan̈il anima tzꞌeqꞌui. Palta tzacꞌpaxoch yaelal dꞌa yibꞌan̈ ebꞌ uninabꞌil yuj smul smam yicham. Ach Dios te nivan elcꞌochi, masanil syal uuj. A a bꞌi, Jehová Yajal dꞌa Smasanil. 19 Te nivan elcꞌoch dꞌa tas tza naꞌ yedꞌ dꞌa tas tza cꞌulej. A ach tic, tzil masanil tastac scꞌulej ebꞌ anima, tza pacan dꞌa junjun ebꞌ icha val smojal tas scꞌulej chiꞌ. 20 A ach a bꞌonac juntzan̈ tas nivac satubꞌtac dꞌa Egipto yedꞌ juntzan̈ chꞌoxnabꞌil nivan yelcꞌochi. An̈ejtonaꞌ ticnaic jantac tas tza chꞌox pax dꞌa co cal a on̈ israel on̈ tic yedꞌ dꞌa scal masanil anima, yuj chiꞌ tzach bꞌinaj val. 21 Yedꞌ val jantac a poder chiꞌ icꞌnaquelta a chon̈abꞌ Israel tic dꞌa Egipto, a chꞌoxannac juntzan̈ tas satubꞌtac yedꞌ juntzan̈ chꞌoxnabꞌil nivac yelcꞌochi. Yuj chiꞌ xivnac val masanil anima. 22 Slajvi chiꞌ acꞌannac jun lum te yax sat tic dꞌayon̈ israel on̈ tic, icha ajnac acꞌannaccan a tiꞌ dꞌa ebꞌ co mam quicham. 23 Palta ayic scajnajnac ebꞌ dꞌa sat lum luum tic, yicannac lum ebꞌ, maj scha yabꞌ a checnabꞌil ebꞌ, maj scꞌanabꞌajej a cꞌaybꞌubꞌal ebꞌ, maj scꞌulej ebꞌ tas tza chec scꞌulej. Yuj chiꞌ ix acꞌcot masanil juntzan̈ yaelal tic dꞌa quibꞌan̈.

24 A ticnaic, a ebꞌ caldeo toxo ix sbꞌoqꞌue juntzan̈ stecꞌnubꞌ ebꞌ yic syacꞌan oval ebꞌ dꞌa co chon̈abꞌ tic. Yuj oval, vejel yedꞌ ilya, ol yacꞌ ganar co chon̈abꞌ tic ebꞌ acꞌum oval chiꞌ. Mamin, van yelcꞌoch tas alnaccani. 25 Palta Mamin Jehová, vachꞌchom ol acꞌjoc ganar jun co chon̈abꞌ tic yuj ebꞌ caldeo chiꞌ, palta a ach ix alaꞌ: Man jun lum chiꞌ, tza tupan dꞌa yichan̈ ebꞌ testigo, xa chi, xin chi dꞌa in lesal chiꞌ.

26 Ix lajvi chiꞌ, ix tacꞌvi Jehová dꞌayin icha tic: 27 A in Jehová in, sDiosal in smasanil anima. ¿Toc ay tas ajaltac sbꞌo vuuj? 28 Yuj chiꞌ sval dꞌayach, a in ol vacꞌoch jun chon̈abꞌ tic dꞌa yol scꞌabꞌ vin̈aj Nabucodonosor sreyal ebꞌ caldeo dꞌa Babilonia. 29 A ebꞌ caldeo van yacꞌan oval dꞌa jun chon̈abꞌ tic, ol ochta ebꞌ dꞌa yool, ol yacꞌanoch scꞌacꞌal ebꞌ. Ol tzꞌabꞌat masanil juntzan̈ pat bꞌaj ix laj yacꞌoch smul ebꞌ anima dꞌayin, aton dꞌa span̈anil yibꞌan̈ juntzan̈ pat chiꞌ bꞌaj ix sn̈us incienso ebꞌ dꞌa Baal. Ix yacꞌan vino ebꞌ dꞌa juntzan̈ comon dios, yuj chiꞌ ix stzuntzejcot yoval in cꞌol ebꞌ. 30 Atax yic ix el yich chon̈abꞌ Israel yedꞌ Judá, ix sbꞌeybꞌalej juntzan̈ tas max scha in cꞌol ebꞌ. A in val Jehová in svalaꞌ to max yactej ebꞌ stzuntzancot yoval in cꞌol yuj juntzan̈ yechel comon dios sbꞌoqꞌue ebꞌ. 31 A ebꞌ anima dꞌa jun chon̈abꞌ tic, yictax ix el yich scajnaj ebꞌ dꞌay, masanto ticnaic, malaj jabꞌoc vachꞌil scꞌulej ebꞌ, an̈ej yoval in cꞌol stzuntzejcot ebꞌ, yuj chiꞌ ol in satel ebꞌ yedꞌ schon̈abꞌ tic. 32 A ebꞌ Israel yedꞌ ebꞌ aj Judá, stzuntzej val cot yoval in cꞌol ebꞌ yuj jantac chucal scꞌulej, lajan ebꞌ yedꞌ sreyal, ebꞌ yajal, ebꞌ sacerdote, ebꞌ syaloch sbꞌa in checabꞌoc yedꞌ pax masanil anima cajan dꞌa Jerusalén yedꞌ dꞌa Judá tic. 33 Max cot qꞌuelan ebꞌ dꞌayin, palta to a yich spatic ebꞌ syacꞌcoti. Vachꞌchom max vactej in cꞌaybꞌan ebꞌ, palta man̈ val jabꞌoc scha yabꞌ ebꞌ, malaj yelcꞌoch dꞌa ebꞌ bꞌaj tzin cachaꞌ. 34 Ix yixtejbꞌat in templo ebꞌ to vicn̈ej yaji, ix yacꞌanoch juntzan̈ yechel yajbꞌentac ebꞌ dꞌa yool. 35 An̈ejtonaꞌ ix sbꞌopaxqꞌue altar yic Baal ebꞌ dꞌa schꞌolanil yic Ben-hinom, ataꞌ sn̈ustzꞌa yuninal ebꞌ yedꞌ yisil ebꞌ silabꞌil dꞌa comon dios Moloc. Icha val chiꞌ tzꞌaj yoch smul ebꞌ aj Judá scꞌulan tas man̈oc in svalaꞌ, max ecꞌ jabꞌoc dꞌa in pensar juntzan̈ tas sbꞌeybꞌalej ebꞌ chiꞌ.

36 Syal ebꞌ anima icha tic: A co chon̈abꞌ tic, ol acꞌjococh dꞌa yol scꞌabꞌ vin̈ sreyal Babilonia yuj oval, yuj vejel yedꞌ pax yuj ilya, xchi ebꞌ. Palta a in Jehová e Diosal in svalaꞌ: 37 Ol in molbꞌejxi ebꞌ bꞌaj ol in saclemejbꞌat dꞌa junjun nación yuj yoval in cꞌol te ay smay. Ol lajvoc chiꞌ, ol in vicꞌanxicot ebꞌ. A dꞌa tic ol aj ebꞌ, man̈xa tas ol icꞌan ebꞌ. 38 Ol och ebꞌ in chon̈abꞌoc, a inxo ol in och sDiosaloc ebꞌ. 39 Junxon̈ej ol vutej spensar ebꞌ, lajanxon̈ej ol yutej ebꞌ in yacꞌan servil dꞌa masanil tiempo, yic tzꞌoch svachꞌiloc ebꞌ yedꞌ yin̈tilal. 40 Ol in bꞌo junoc in trato yedꞌ ebꞌ dꞌa juneln̈ej, man̈ ol vactejcan vacꞌan in vachꞌcꞌolal dꞌa ebꞌ. Ol vacꞌ scꞌulej ebꞌ to ayn̈ej ol aj velcꞌoch dꞌa sat ebꞌ, yic man̈xa bꞌaqꞌuin̈ ol yicꞌcanel sbꞌa ebꞌ dꞌayin. 41 Yedꞌ val in tzalajcꞌolal ol vacꞌan vachꞌilal dꞌa ebꞌ. Dꞌa val yel ol vacꞌ cajnaj ebꞌ dꞌa jun luum tic dꞌa smasanil in cꞌool.

42 Icha val ix aj vacꞌanbꞌat jun nivan yaelal dꞌa yibꞌan̈ jun chon̈abꞌ tic, icha chiꞌ ol aj vacꞌanpaxbꞌat vachꞌilal dꞌa yibꞌan̈, icha ix aj vacꞌan in tiꞌ. 43 A ebꞌ anima tic syal ebꞌ to ol can tzꞌinan jun chon̈abꞌ tic. Man̈xa anima, ma nocꞌ nocꞌ ol can dꞌay. Ol acꞌjoc ganar yuj ebꞌ caldeo, xchi ebꞌ. Palta ol meltzajxoc ebꞌ anima sman lum luum tic. 44 Ol sman sluum ebꞌ, ol sbꞌoan yumal ebꞌ yedꞌ sello yedꞌ pax sfirma ebꞌ testigo. Icha chiꞌ ol ujoc dꞌa yol yic Benjamín yedꞌ dꞌa spatic yichan̈ Jerusalén yedꞌ dꞌa juntzan̈xo chon̈abꞌ dꞌa yol yic Judá, dꞌa tzalquixtac, dꞌa acꞌlictac yedꞌ dꞌa yol smacbꞌen Neguev. A in val Jehová in svalaꞌ to ol vicꞌxichaan̈ in chon̈abꞌ tic, xchi Jehová.