Vachꞌ ol ajxoc Jerusalén
33
A in Jeremías in tic ayinto och dꞌa preso dꞌa yamaqꞌuil bꞌaj ayecꞌ ebꞌ stan̈vumal palacio, ix lolonxi Jehová dꞌayin, ix yalani: 2 A in Jehová in in bꞌonaquem yolyibꞌan̈qꞌuinal tic. Vachꞌ vutejnaccan luum dꞌa yedꞌtal, a in sval dꞌayach icha tic: 3 Avajan̈ dꞌayin, ol in tacꞌvoc dꞌayach. Ol in chꞌox dꞌayach tas nivac yelcꞌochi yedꞌ tas satubꞌtac yalji to man̈ ojtacoc. 4 A in Jehová e Diosal in, ay val jun in lolonel svalcan dꞌa yibꞌan̈ spat ebꞌ aj Jerusalén yedꞌ dꞌa yibꞌan̈ spalacio ebꞌ vin̈ sreyal Judá. A juntzan̈ pat chiꞌ van sjuchajemi yic scꞌanchaj sqꞌuenal dꞌa juntzan̈ olan dꞌa smuroal chon̈abꞌ, yic vachꞌ max och ebꞌ caldeo yacꞌ oval yedꞌoc. 5 A dꞌa yol juntzan̈ pat chiꞌ, toxon̈ej ol bꞌudꞌjoquel yuj snivanil ebꞌ anima ol miljoccham yuj ebꞌ caldeo yuj yoval in cꞌol te ay smay. Ol in bꞌat mican dꞌa jun chon̈abꞌ tic, yujto te nivan smul ebꞌ ix och dꞌayin. 6 Palta ol van̈tej ebꞌ, ol vacꞌanxi sqꞌuinal ebꞌ, ol vacꞌan cajnaj ebꞌ dꞌa juncꞌolal, man̈xa tas ol icꞌan ebꞌ. 7 Ol vicꞌxi meltzaj ebꞌ aj Judá yedꞌ ebꞌ aj Israel bꞌaj icꞌbꞌilbꞌat dꞌa chꞌoc chon̈abꞌil. Ol laj in bꞌoanxiqꞌue schon̈abꞌ ebꞌ icha dꞌa sbꞌabꞌelal. 8 Ol viqꞌuel schucal ebꞌ ix yacꞌoch dꞌayin. Ol vacꞌan nivancꞌolal smul ebꞌ yedꞌ spitalil dꞌayin. 9 Ol te tzalajbꞌoc in cꞌol yuj Jerusalén tic. A val yic ol yabꞌan masanil nación yuj tas nivan yelcꞌoch ol in cꞌulej dꞌa in chon̈abꞌ tic, ol yal vachꞌ lolonel ebꞌ dꞌayin, ol in yacꞌan bꞌinaj ebꞌ. Palta ol sat val scꞌol ebꞌ, ol ibꞌxocqꞌue ebꞌ yuj xivelal ayic ol yilan ebꞌ jantac vachꞌil yedꞌ juncꞌolal ol vacꞌ dꞌa in chon̈abꞌ tic.10-11 A ex tic tzeyalaꞌ to a jun lum tic cuseltac yajcani, man̈xa anima, ma nocꞌ nocꞌ tzꞌilchaj dꞌay. Vachꞌchom icha chiꞌ yajcani, a dꞌa yoltac scalleal Jerusalén, dꞌa juntzan̈ chon̈abꞌ dꞌa Judá tzꞌinan yajcani, bꞌaj man̈xa junoc anima, ma junoc nocꞌ nocꞌ ayecꞌ dꞌay, ataꞌ ol abꞌchajxoc yoch bꞌit yic qꞌuin̈, bꞌit yic tzalajcꞌolal, sbꞌit ebꞌ quelemtac yedꞌ ebꞌ ix cobꞌestac ayic snupnaj ebꞌ. Ol icꞌchajcot ofrenda yic acꞌoj yuj diosal dꞌa in templo, ol abꞌchaj yalji icha tic: Calec vachꞌ lolonel dꞌa Jehová Yajal dꞌa Smasanil, yujto te vachꞌ, xajan on̈ yuuj dꞌa masanil qꞌuinal, xcham ebꞌ. A in Jehová in svalaꞌ to ol vicꞌxichaan̈ jun chon̈abꞌ tic icha dꞌa sbꞌabꞌelal, xchi Jehová.
12 A Jehová Yajal dꞌa Smasanil tzꞌalan icha tic: A dꞌa jun lum cannac tzꞌinan tic, man̈xa anima, man̈xa nocꞌ nocꞌ ay dꞌay, palta a dꞌa spatic yichan̈ juntzan̈ chon̈abꞌ tic, man̈ jantacoc ol ajxoc an̈ an̈cꞌultac bꞌaj ol tan̈vajxoc nocꞌ calnel yuj ebꞌ stan̈vumal. 13 A dꞌa juntzan̈ chon̈abꞌ dꞌa tzalquixtac, dꞌa lum acꞌlictac, dꞌa lum Neguev, dꞌa lum yic Benjamín, dꞌa juntzan̈ ay dꞌa spatic yichan̈ Jerusalén yedꞌ pax dꞌa juntzan̈xo chon̈abꞌ dꞌa yol yic Judá, ol iljocxi ebꞌ tan̈vum calnel, ol abꞌchaj sbꞌisan nocꞌ scalnel ebꞌ chiꞌ.
14 Ol cꞌoch scꞌual, ol elcꞌoch bꞌaj ix vacꞌ in tiꞌ vacꞌan in vachꞌcꞌolal dꞌa chon̈abꞌ Israel yedꞌ dꞌa Judá. 15 Ayic ol javoc jun tiempo chiꞌ, ol vacꞌoch jun yin̈tilal vin̈aj David reyal. A ol icꞌanchaan̈ tojolal yedꞌ vachꞌilal dꞌa jun nación tic. 16 A dꞌa jun tiempoal chiꞌ, a ebꞌ aj Judá ol colchajcanel ebꞌ, axo ebꞌ aj Jerusalén, man̈xa tas ol icꞌan ebꞌ. A jun bꞌi tic ol acꞌjoc dꞌa ebꞌ: “A Jehová tzon̈ acꞌanoch vachꞌil”, xchama. 17 A in Jehová in svalaꞌ: Malaj bꞌaqꞌuin̈ ol satel yin̈tilal vin̈aj David, ol ochn̈ej ebꞌ reyal dꞌa Israel. 18 An̈ejtonaꞌ malaj bꞌaqꞌuin̈ ol satpaxel ebꞌ sacerdote yin̈tilal Leví, ol sn̈usn̈ej silabꞌ ebꞌ dꞌayin. Dꞌa junjun cꞌu ol sn̈usan ixim trigo ebꞌ silabꞌil yedꞌ juntzan̈xo silabꞌ ol yacꞌ ebꞌ dꞌayin, xchi Jehová.
19 Ix yalanxi Jehová dꞌayin icha tic: 20 A in Jehová in tic svalaꞌ to ay jun in trato vacꞌnaccani to ay cꞌualil yedꞌ dꞌacꞌvalil dꞌa stiempoal. Max yal-laj sqꞌuexmaj jun in trato chiꞌ. 21 An̈ejtonaꞌ max yal-laj satel in trato vacꞌnac yedꞌ vin̈ in checabꞌ aj David to tzꞌochn̈ej ebꞌ yin̈tilal vin̈ reyal dꞌa sdespacho. Man̈ ol satelpax in trato in bꞌonac yedꞌ ebꞌ yin̈tilal Leví yic tzin yacꞌan servil ebꞌ dꞌa sacerdoteal. 22 A ebꞌ yin̈tilal vin̈ in checabꞌ aj David chiꞌ yedꞌ ebꞌ yin̈tilal Leví tzin acꞌan servil, ol vacꞌ qꞌuibꞌ sbꞌisul ebꞌ icha qꞌuen cꞌanal, ma icha qꞌuen yarenail stiꞌ aꞌ mar malaj mach syal sbꞌisani, xchi Jehová.
23 Ix yalanxi Jehová dꞌayin icha tic: 24 ¿Tom max nachajel uuj tas syal ebꞌ anima, syal ebꞌ to ix in patiquejel cha macan̈ in̈tilal sicꞌbꞌilel vuuj, aton Israel yedꞌ Judá? Yuj chiꞌ man̈xa yelcꞌoch ebꞌ in chon̈abꞌ chiꞌ dꞌa ebꞌ, man̈xo naciónoclaj yaj dꞌa yol sat ebꞌ. 25 A in Jehová in in bꞌonac jun in trato yedꞌ cꞌualil yedꞌ dꞌacꞌvalil. Svalani chajtil tzꞌaj sbꞌey satchaan̈ yedꞌ sat lum tic, max qꞌuexmajlaj. 26 An̈ejtonaꞌ malaj pax bꞌaqꞌuin̈ ol qꞌuexmaj in trato yedꞌ ebꞌ yin̈tilal Jacob yedꞌ pax ebꞌ yic vin̈ in checabꞌ aj David. Yovalil ol in siqꞌuelta junoc yin̈tilal vin̈, ol yacꞌan reyal dꞌa yibꞌan̈ ebꞌ yin̈tilal Abraham, Isaac yedꞌ Jacob. Ol vicꞌxichaan̈ ebꞌ, yujto te ay voqꞌuelcꞌolal dꞌa ebꞌ, xchi Jehová.