A tas ix alchaj dꞌa vin̈aj rey Sedequías
34
Ayic van yacꞌan oval vin̈aj Nabucodonosor sreyal Babilonia dꞌa Jerusalén yedꞌ dꞌa juntzan̈xo chon̈abꞌ ay dꞌa slacꞌanil, yedꞌnac masanil ebꞌ soldado vin̈ yedꞌ masanil juntzan̈ nación aycan dꞌa yalan̈ smandar vin̈, ataꞌ ix lolon Jehová dꞌayin Jeremías in tic, ix yalan icha tic: 2 A in Jehová e Diosal in sval dꞌayach, bꞌat al dꞌa vin̈aj Sedequías sreyal Judá: Icha tic yalan Jehová: Ol vacꞌoch jun chon̈abꞌ tic dꞌa yol scꞌabꞌ vin̈ sreyal Babilonia, ol yacꞌoch scꞌacꞌal vin̈. 3 A ach tic man̈xo ol yal-laj el lemnajoc, ol ach yamchaj yuj ebꞌ, ol ach yacꞌanoch ebꞌ dꞌa yol scꞌabꞌ vin̈aj Nabucodonosor chiꞌ, ol il-laj och a sat yedꞌ vin̈, ol ach lolon yedꞌ vin̈, ol ach yicꞌanbꞌat vin̈ dꞌa Babilonia chiꞌ. 4 Yuj chiꞌ ach Sedequías, abꞌ val tas ol val a in Jehová in tic: Man̈ ol ach miljoccham dꞌa qꞌuen espada. 5 Juncꞌolal ol aj a chami. A in Jehová in svacꞌ in tiꞌ to icha yutejnac ebꞌ anima sn̈usan incienso ayic smucchajnac ebꞌ a mam icham, aton ebꞌ ochnac reyal ayic manto ach och a ach tic, icha chiꞌ ol aj sn̈uschaj incienso chiꞌ ayic ol ach mucchajoc. Ol ocꞌ ebꞌ uuj, ol yalan ebꞌ icha tic: Ay, ix cham vin̈ co reyal, xcham ebꞌ, xchi Jehová, xa chi, xchi dꞌayin.6 Ix valan masanil juntzan̈ tic dꞌa vin̈aj rey Sedequías dꞌa Jerusalén, 7 yacbꞌan a ebꞌ soldado yic Babilonia ayxo och ebꞌ yacꞌan oval dꞌa chon̈abꞌ Jerusalén tic, dꞌa Laquis yedꞌ dꞌa Azeca. A dꞌa yol yic Judá axon̈ej juntzan̈ chon̈abꞌ chiꞌ vachꞌ yajoch smuroal manto acꞌji ganar yuj ebꞌ soldado yic Babilonia chiꞌ.
A ebꞌ israel ayoch checabꞌoc ix acꞌjiel ebꞌ dꞌa libre
8 Ix lajvi chiꞌ ix lolonxi Jehová dꞌayin Jeremías in tic, ayic toxo ix yacꞌ jun strato vin̈aj Sedequías yedꞌ ebꞌ cajan dꞌa Jerusalén, yic tzꞌacꞌjiel ebꞌ ayoch checabꞌoc dꞌa libre. 9 Icha tic ix aj jun trato chiꞌ: Masanil ebꞌ israel ayoch checabꞌoc dꞌa ebꞌ yetchon̈abꞌ, tzꞌacꞌjiel ebꞌ dꞌa libre, vachꞌchom vinac, vachꞌchom ix, yic man̈xa junoc yetchon̈abꞌ ebꞌ tzꞌochcan schecabꞌoc. 10 Masanil ebꞌ yajal yedꞌ masanil ebꞌ anima, ix scha scꞌol jun trato chiꞌ ebꞌ. Icha chiꞌ ix aj yacꞌanel ebꞌ schecabꞌvum ebꞌ chiꞌ dꞌa libre. Man̈xa junoc ebꞌ tzꞌacꞌji pural yacꞌan servil junocxo yetchon̈abꞌ. 11 Ix lajvi chiꞌ ix sqꞌuexanxi spensar ebꞌ ix actanel ebꞌ schecabꞌ chiꞌ, yuj chiꞌ ix yacꞌxi pural ebꞌ yochxi ebꞌ schecabꞌoc.
12 Yuj chiꞌ ix yalan Jehová dꞌayin icha tic: 13 A in Jehová e Diosal in, vacꞌnaccan jun in trato yedꞌ ebꞌ e mam eyicham ayic vicꞌannaquelta ebꞌ dꞌa Egipto, bꞌaj ayoch ebꞌ checabꞌoc. Valnac dꞌa ebꞌ dꞌa yictax chiꞌ 14 to dꞌa junjun yuctaquil abꞌil syaqꞌuel ebꞌ schecabꞌ ebꞌ dꞌa libre, aton ebꞌ eyetisraelal schon̈nacoch sbꞌa dꞌa ebꞌ, yacꞌannac servil ebꞌ vaqueoc abꞌil. Palta a ebꞌ e mam eyicham chiꞌ, maj scha yabꞌ ebꞌ tas valnac, maj scꞌanabꞌajej ebꞌ. 15 Icha pax chiꞌ ix eyutej e bꞌa a ex tic. Palta ix e qꞌuex e bꞌeybꞌal, yujto van e cꞌulan tas scha in cꞌool, yujto ix eyaqꞌuel ebꞌ eyetchon̈abꞌ ayoch e checabꞌoc dꞌa libre. Ix eyacꞌan e tiꞌ dꞌa jun trato ix e bꞌo dꞌa vichan̈, aton dꞌa yol in templo vicn̈ej yaji. 16 Ix lajvi chiꞌ, ix e qꞌuexanxi e bꞌeybꞌal, ix in e patiquejcaneli. Ix eyacꞌanxi pural ebꞌ e checabꞌ chiꞌ ex yacꞌanxi servil, vachꞌchom toxo ix eyaqꞌuel ebꞌ dꞌa libre. 17 Yuj chiꞌ, a in Jehová in svalaꞌ: Maj e cꞌanabꞌajej tas ix valaꞌ, maj eyaqꞌuel ebꞌ eyetchon̈abꞌ dꞌa libre. Yuj chiꞌ, a in Jehová in svalaꞌ to ol vacꞌbꞌat oval, vejel yedꞌ ilya dꞌa eyibꞌan̈. Ol xiv masanil nación ayic ol yabꞌan ebꞌ tas ol ex vutej.
18-19 A ebꞌ yajal dꞌa Judá yedꞌ dꞌa Jerusalén, ebꞌ tzꞌacꞌan servil dꞌa palacio, ebꞌ sacerdote yedꞌ masanil ebꞌ anima cajan taꞌ, ix sbꞌo jun strato ebꞌ dꞌa vichan̈. Chapoj ix yutej jun nocꞌ quelem vacax ebꞌ, ix lajvi chiꞌ ix bꞌeyecꞌ ebꞌ dꞌa scal nocꞌ. Palta elan̈chamel ix spatiquejel jun trato bꞌaj ix yacꞌ stiꞌ ebꞌ chiꞌ.
Icha ix yutej nocꞌ vacax chiꞌ ebꞌ, icha chiꞌ ol vutej ebꞌ. 20 Ol vacꞌoch ebꞌ dꞌa yol scꞌabꞌ ebꞌ yajcꞌool, ol miljoccham ebꞌ yuj ebꞌ. A nocꞌ ostoc yedꞌ nocꞌ chium nocꞌ ol chianbꞌat snivanil ebꞌ. 21 Ol vacꞌoch vin̈aj Sedequías sreyal Judá yedꞌ ebꞌ ayoch yajalil yedꞌ vin̈ dꞌa yol scꞌabꞌ ebꞌ ajcꞌool, ebꞌ snibꞌejtaxon smilancham ebꞌ. Ol acꞌjoc ganar ebꞌ yuj ebꞌ vin̈ soldado aj Babilonia, vachꞌchom toxo ix actajcan ebꞌ yuj ebꞌ. 22 Palta a in Jehová in svalaꞌ: Ol vicꞌxicot ebꞌ dꞌa jun chon̈abꞌ tic, ol yacꞌan oval ebꞌ dꞌay. Ol acꞌjoc ganar yuj ebꞌ, ol sn̈usancantzꞌa ebꞌ. Axo juntzan̈xo chon̈abꞌ dꞌa yol yic Judá, ol vacꞌcan tzꞌinan, man̈xa junoc anima ol can cajan dꞌay, xchi Jehová.