A vin̈aj Jeremías yedꞌ ebꞌ yin̈tilal vin̈aj Recab
35
Ayic ayoch vin̈aj Joacim yuninal vin̈aj Josías reyal dꞌa Judá, ataꞌ ix lolon Jehová dꞌayin, ix yalan icha tic: 2 Ixic bꞌaj ayecꞌ ebꞌ yin̈tilal vin̈aj Recab, tzach lolon yedꞌ ebꞌ. Tzicꞌanbꞌat ebꞌ dꞌa junoc cuarto dꞌa in templo, tzacꞌan vino yucꞌ ebꞌ, xchi dꞌayin. 3 Yuj chiꞌ ix bꞌat in sayecꞌ vin̈aj Jaazanías yuninal junxo vin̈aj Jeremías, yixchiquin vin̈aj Habasinías. Ix vicꞌbꞌat vin̈ yedꞌ ebꞌ yucꞌtac yedꞌ pax ebꞌ yuninal ebꞌ yedꞌ masanil ebꞌ yin̈tilal vin̈aj Recab cajan taꞌ. 4 Ix vicꞌbꞌat ebꞌ dꞌa stemplo Jehová, dꞌa jun cuarto yic ebꞌ yuninal vin̈aj Hanán yuninal vin̈aj Igdalías, aton vin̈ ay yelcꞌoch Dios dꞌay. A jun cuarto chiꞌ, junn̈ej yaj yedꞌ yic ebꞌ yajal yaj dꞌa templo chiꞌ. A dꞌa yibꞌan̈ scuarto vin̈aj Maasías yuninal vin̈aj Salum ataꞌ ay, aton vin̈ yajalil ebꞌ stan̈vumal templo. 5 Ix vacꞌan juntzan̈ xalu yedꞌ vaso bꞌudꞌan yedꞌ vino dꞌa ebꞌ, ix valan dꞌa ebꞌ: Uqꞌuec jabꞌoc vino tic, xin chi dꞌa ebꞌ.6 Ix tacꞌvi ebꞌ dꞌayin icha tic: A on̈ tic, max cucꞌlaj vino tic, yujto a vin̈aj Jonadab yuninal vin̈aj Recab, aton vin̈ co mam quicham a on̈ tic, a vin̈ acꞌannaccan yovalil to max cucꞌ vino. An̈ejtonaꞌ ebꞌ quin̈tilal max yal-laj yucꞌan ebꞌ. 7 Yacꞌannac pax yovalil vin̈ to max co bꞌo co pat, max cavej cavbꞌen, max cavej pax co uva. Yalannac pax vin̈ dꞌayon̈ to an̈ej dꞌa yoltac mantiado tzon̈ aji, ichan̈ej chiꞌ ol aj quecꞌ dꞌa masanil tiempo dꞌa sat lum bꞌaj eqꞌuelbꞌan̈ej quecꞌ tic. 8 A on̈ tic, van co cꞌanabꞌajan tas yalnaccan vin̈ co mam quicham aj Jonadab chiꞌ. Yuj chiꞌ malaj bꞌaj scucꞌ vino tic, ma ebꞌ ix quetbꞌeyum yedꞌ ebꞌ cuninal max yucꞌlaj ebꞌ. 9 Malaj co pat sco bꞌoꞌo, malaj teꞌ uva scavej, malaj co lum bꞌaj syal cavan cavbꞌen. 10 An̈ej dꞌa yoltac mantiado tzon̈ aji, van co cꞌanabꞌajan tas yalnaccan vin̈ co mam quicham chiꞌ. 11 Palta axo yic ix javi vin̈aj Nabucodonosor sreyal Babilonia yacꞌ oval dꞌa jun nación tic, ix on̈ el elelal. Ix co naani to vachꞌ tzon̈ jacan dꞌa Jerusalén tic, yujto on̈ el dꞌa ebꞌ soldado caldeo yedꞌ dꞌa ebꞌ soldado aj Siria. Yuj chiꞌ ayon̈ecꞌ cajan dꞌa Jerusalén tic, xchi ebꞌ yin̈tilal vin̈aj Recab.
12 Ix lajvi chiꞌ, ix yalan Jehová dꞌayin Jeremías in tic icha tic: 13 A in Jehová Yajal in dꞌa Smasanil, sDiosal in Israel, sval dꞌayach, ixic bꞌat al dꞌa masanil ebꞌ aj Judá yedꞌ dꞌa ebꞌ aj Jerusalén to scꞌaybꞌej val jun cꞌaybꞌubꞌal tic ebꞌ, yic scꞌanabꞌajan in checnabꞌil ebꞌ. 14 A ebꞌ yin̈tilal vin̈aj Jonadab yuninal vin̈aj Recab chiꞌ, scꞌanabꞌajej val ebꞌ tas yalnaccan smam yicham ebꞌ chiꞌ. Max yucꞌ vino ebꞌ masanto ticnaic. An̈ejaꞌ scꞌanabꞌajan ebꞌ, max yucꞌlaj ebꞌ. Ichin pax taꞌ, tzijtum el ix vacꞌ in checnabꞌil dꞌayex, palta max in e cꞌanabꞌajej. 15 Tzijtum ebꞌ in checabꞌ ix in checbꞌat dꞌayex yic syal ebꞌ to tzeyactejcan e chuc bꞌeybꞌal yedꞌ e chuc pensaril. Tzin chec yal ebꞌ to max eyaqꞌuem e bꞌa dꞌa juntzan̈ comon dios, ma eyoch ejmelal dꞌay, yic vachꞌ tzex cajnajn̈ej dꞌa lum luum vacꞌnac dꞌa ebꞌ e mam eyicham yedꞌ dꞌayex. Palta juneln̈ej max e cha eyabꞌi, max in e cꞌanabꞌajej. 16 A ebꞌ yin̈tilal vin̈aj Jonadab chiꞌ, scꞌanabꞌajej ebꞌ tas yalnac smam yicham chiꞌ, a exxo tic, juneln̈ej max in e cꞌanabꞌajej. 17 Yuj chiꞌ a in val Jehová Yajal in dꞌa Smasanil, e Diosal in, a in sval icha tic: Ol vacꞌbꞌat juntzan̈ yaelal albꞌilxo vuj dꞌa eyibꞌan̈ e masanil ex cajan ex dꞌa Judá yedꞌ dꞌa Jerusalén tic. Yujto ix ex in cachaꞌ, palta maj e cꞌanabꞌajej. Ix in avaj dꞌayex, palta maj ex tacꞌvoc dꞌayin, xchi Jehová, xa chi, xchi dꞌayin.
18 Ix valanxi dꞌa ebꞌ yin̈tilal vin̈aj Recab chiꞌ: A Jehová Yajal dꞌa Smasanil, co Diosal, a tzꞌalani: Yujto tze cꞌanabꞌajej tas yalnaccan vin̈ e mam eyicham chiꞌ, 19 yuj chiꞌ a in Jehová Yajal in dꞌa Smasanil, sDiosal in Israel, a in svalaꞌ: Malaj bꞌaqꞌuin̈ ol satel yin̈tilal vin̈aj Jonadab chiꞌ in yacꞌan servil, xchi Jehová, xin chi dꞌa ebꞌ.