4 Ix vavtancot vin̈aj Baruc yuninal vin̈aj Nerías. Ix valan dꞌa vin̈ masanil tas ix yal Jehová dꞌayin, ix stzꞌibꞌancan vin̈. 5 Ix lajvi chiꞌ ix valan dꞌa vin̈ icha tic: Ilnabꞌ val tas vaji, tzin cachjioch vaan in bꞌat dꞌa stemplo Jehová. 6 Yuj chiꞌ, ayic ol javoc scꞌual tzecꞌojcꞌolal junelxo, tzach bꞌat dꞌa yamaqꞌuil stemplo Jehová. Ataꞌ ol avtej tas ix in chec a tzꞌibꞌej tic, yic vachꞌ a masanil ebꞌ aj Jerusalén yedꞌ masanil ebꞌ cajan dꞌa yol yic Judá ol javoc dꞌa tic, ol yabꞌ slolonel Jehová ebꞌ. 7 Talaj syalxi sbꞌa ebꞌ anima tic dꞌa Jehová chiꞌ, syactancan schucal bꞌeybꞌal ebꞌ. Yujto nabꞌilxo yuj Jehová to te nivan yoval scꞌool ol yacꞌcot dꞌa yibꞌan̈ juntzan̈ anima tic, xin chi dꞌa vin̈aj Baruc chiꞌ. 8 Ix scꞌulan vin̈aj Baruc chiꞌ masanil tas ix val chiꞌ dꞌay. Ix bꞌat vin̈ dꞌa stemplo Jehová, ix yavtan slolonel Jehová chiꞌ vin̈, aton tas ix stzꞌibꞌej vin̈ chiꞌ.

9 A dꞌa sbꞌalun̈il uj dꞌa yoil abꞌil yoch vin̈aj Joacim yuninal vin̈aj Josías reyal dꞌa Judá, ataꞌ ix sna vin̈aj Joacim chiꞌ to a ebꞌ anima cajan dꞌa Jerusalén yedꞌ juntzan̈xo ebꞌ ix cot dꞌa juntzan̈xo chon̈abꞌ dꞌa yol yic Judá, yovalil tzꞌoch ebꞌ dꞌa tzecꞌojcꞌolal dꞌa yichan̈ Jehová. 10 Axo vin̈aj Baruc ix avtan tas ix in chec stzꞌibꞌej, yic syabꞌ masanil anima. A dꞌa jun amacꞌ chaan̈ yajqꞌue dꞌa stemplo Jehová dꞌa stzꞌey jun acꞌ puerta bꞌaj ay scuarto vin̈aj Gemarías vin̈ tzꞌibꞌum, vin̈ yuninal vin̈aj Safán, ataꞌ ix yavtej vin̈.

11 A vin̈aj Micaías yuninal vin̈aj Gemarías, yixchiquin vin̈aj Safán, ix yabꞌ vin̈ masanil slolonel Jehová ix yavtej vin̈aj Baruc chiꞌ. 12 Yuj chiꞌ ix bꞌat vin̈ dꞌa spalacio vin̈ rey, dꞌa scuarto vin̈ tzꞌibꞌum, bꞌaj molanecꞌ ebꞌ vin̈ nivac yopisio: Aton vin̈aj Elisama tzꞌibꞌum, vin̈aj Delaía yuninal vin̈aj Semaías, vin̈aj Elnatán yuninal vin̈aj Acbor, vin̈aj Gemarías yuninal vin̈aj Safán, vin̈aj Sedequías yuninal vin̈aj Ananías yedꞌ masanil ebꞌ ayoch dꞌa yopisio chiꞌ. 13 Ix yalan vin̈aj Micaías chiꞌ masanil tas ix yabꞌ yuj tas tzꞌibꞌabꞌil yuj vin̈aj Baruc chiꞌ, ayic ix yavtan vin̈ dꞌa yichan̈ ebꞌ anima. 14 Axo ebꞌ vin̈ nivac yopisio chiꞌ ix checanbꞌat vin̈aj Jehudí yuninal vin̈aj Netanías, yixchiquin vin̈aj Selemías yin̈tilal vin̈aj Cusi, yic bꞌat yalan vin̈ dꞌa vin̈aj Baruc chiꞌ, yic syicꞌcot tas tzꞌibꞌabꞌil chiꞌ yuj vin̈, aton jun ix yavtej vin̈ dꞌa yichan̈ ebꞌ anima. Yuj chiꞌ ix yicꞌcot jun bꞌaj tzꞌibꞌabꞌil chiꞌ vin̈aj Baruc chiꞌ dꞌa yichan̈ ebꞌ vin̈. 15 Ix yalan ebꞌ vin̈ icha tic:

—Eman̈ cꞌojan, tzavtan cabꞌi tas ix a tzꞌibꞌej chiꞌ, xchi ebꞌ vin̈.

Ix yavtan vin̈. 16 A val yic ix yabꞌan juntzan̈ chiꞌ ebꞌ vin̈, ix xiv ebꞌ vin̈, ix och qꞌueljabꞌ ebꞌ vin̈ dꞌay junjun, ix yalan ebꞌ vin̈ icha tic dꞌa vin̈:

—Yovalil ol cal juntzan̈ tic dꞌa vin̈ rey, xchi ebꞌ vin̈.

17 Ix scꞌanbꞌan ebꞌ vin̈ dꞌa vin̈ icha tic:

—Al dꞌayon̈, ¿tas ix utej a tzꞌibꞌan juntzan̈ tic? ¿Am vin̈aj Jeremías ix alan dꞌayach? xchi ebꞌ vin̈.

18 Ix tacꞌvi vin̈ dꞌa ebꞌ vin̈ icha tic:

—Aton vin̈aj Jeremías ix alan dꞌayin, ix in tzꞌibꞌancan yedꞌ tinta, xchi vin̈.

19 Ix yalan ebꞌ vin̈ icha tic:

—Bꞌat cꞌubꞌejel a bꞌa yedꞌ vin̈aj Jeremías chiꞌ, malajocabꞌ mach tzꞌojtacaneli bꞌaj tzex cꞌochi, xchi ebꞌ vin̈.

20 Ix yacꞌancan tas tzꞌibꞌabꞌil ebꞌ vin̈ ay yopisio chiꞌ dꞌa scuarto vin̈aj Elisama vin̈ tzꞌibꞌum, ix bꞌat yalan masanil juntzan̈ chiꞌ ebꞌ vin̈ dꞌa vin̈ rey dꞌa yamaqꞌuil spalacio. 21 Ix lajvi chiꞌ ix checjibꞌat vin̈aj Jehudí yuj vin̈ rey chiꞌ yic bꞌat yicꞌancot vin̈ tas tzꞌibꞌabꞌil yuj vin̈aj Baruc chiꞌ, jun ix can dꞌa scuarto vin̈aj Elisama. Ayic ix javi vin̈ yedꞌoc, ix yavtan vin̈ dꞌa yichan̈ vin̈ rey chiꞌ yedꞌ dꞌa yichan̈ masanil ebꞌ ay yopisio chiꞌ, oyanecꞌ ebꞌ smaclan yabꞌi. 22 Yujto sbꞌalun̈il uj yoch jun abꞌil chiꞌ, yuj chiꞌ ayecꞌ vin̈ rey dꞌa scuarto bꞌaj tzꞌaj dꞌa stiempoal siic. Axo dꞌa yichan̈ vin̈ ayoch jun yedꞌtal tzacꞌacꞌ, chac xeinac yaj teꞌ dꞌa yool. 23 Ayic ix lajvi yavtan vin̈aj Jehudí oxeꞌ, ma chan̈eꞌ macan̈ tzꞌibꞌabꞌil chiꞌ, ix scotac polanbꞌat vin̈ rey juntzan̈ toxo ix avtaj chiꞌ yedꞌ jun pol-labꞌ scꞌan ebꞌ tzꞌibꞌum. Ix yacꞌanoch vin̈ dꞌa yol cꞌacꞌ chiꞌ. Icha chiꞌ ix aj sn̈usantzꞌa masanil tas tzꞌibꞌabꞌil chiꞌ vin̈. 24 Vachꞌchom ix yabꞌ vin̈ rey yedꞌ ebꞌ ayecꞌ chiꞌ yedꞌ vin̈ tas ix yal jun tzꞌibꞌabꞌil chiꞌ, palta maj xiv jabꞌoc ebꞌ, maj schꞌoxel scuscꞌolal ebꞌ yuuj. 25 A vin̈aj Elnatán, vin̈aj Delaía yedꞌ vin̈aj Gemarías ix tevi ebꞌ vin̈ dꞌa vin̈ rey chiꞌ yic max sn̈ustzꞌa vin̈, palta maj schalaj yabꞌ vin̈ tas ix yal ebꞌ vin̈. 26 Ton̈ej ix yal vin̈ rey chiꞌ dꞌa vin̈aj Jerameel yin̈tilal ebꞌ rey, dꞌa vin̈aj Seraías yuninal vin̈aj Azriel yedꞌ dꞌa vin̈aj Selemías yuninal vin̈aj Abdeel, yic tzin icꞌjicot a in Jeremías in tic yedꞌ vin̈ in tzꞌibꞌum aj Baruc chiꞌ. Palta a Jehová on̈ cꞌubꞌaneli.

27 Ayic toxo ix sn̈ustzꞌa tas tzꞌibꞌabꞌil vin̈ rey chiꞌ, aton juntzan̈ lolonel ix in chec stzꞌibꞌej vin̈aj Baruc, ix lolonxi Jehová dꞌayin, ix yalan icha tic: 28 Icꞌcot junocxo bꞌaj ol a tzꞌibꞌejxi juntzan̈ lolonel ix acꞌ tzꞌibꞌchaj dꞌa sbꞌabꞌelal chiꞌ, aton ix sn̈ustzꞌa vin̈aj Joacim sreyal Judá. 29 Tzalan pax juntzan̈ lolonel tic dꞌa vin̈ rey chiꞌ icha tic: Icha val tic yalan Jehová: A ach tic, ix a n̈ustzꞌa tas tzꞌibꞌabꞌil, ix a tuman pax vin̈aj Jeremías, yujto ix stzꞌibꞌej vin̈ to ol javoc vin̈ sreyal Babilonia ul satel jun nación tic, man̈xa junoc anima, ma junoc nocꞌ nocꞌ ol canoc. 30 Yuj chiꞌ a in val Jehová in sval dꞌayach ach Joacim sreyal Judá, malaj junoc in̈tilal ol cann̈ej dꞌa sdespacho vin̈aj David. A a nivanil ol can telan dꞌa yoc cꞌu yedꞌ dꞌa scal sical dꞌacꞌvalil. 31 A ach tic yedꞌ in̈tilal yedꞌ pax ebꞌ ayoch yajalil edꞌoc, ol vacꞌoch yaelal dꞌa eyibꞌan̈ yuj e mul. Ol ja dꞌa yibꞌan̈ ebꞌ aj Jerusalén yedꞌ dꞌa yibꞌan̈ ebꞌ cajan dꞌa Judá juntzan̈ yaelal toxo ix valcan tic, aton juntzan̈ maj e cha eyabꞌi, xchi Jehová, xa chi, xchi dꞌayin.

32 Ix lajvi chiꞌ, ix vicꞌanxicot junxo bꞌaj stzꞌibꞌchaj tastac, ix vacꞌan dꞌa vin̈aj Baruc vin̈ in tzꞌibꞌum, ix stzꞌibꞌan vin̈ tastac ix valaꞌ, aton tastac tzꞌibꞌabꞌil dꞌa juntzan̈ ix sn̈ustzꞌa vin̈aj rey Joacim chiꞌ. Ayto pax stzꞌacubꞌ tas valnac chiꞌ ix tzꞌibꞌaji.