3 A vin̈aj rey Sedequías chiꞌ ix checancot vin̈aj Jucal yuninal vin̈aj Selemías yedꞌ vin̈aj sacerdote Sofonías yuninal vin̈aj Maasías, yic tzul in yilan ebꞌ vin̈, ix yalan ebꞌ vin̈ dꞌayin icha tic: Lesalvan̈ dꞌa Jehová co Diosal cuuj, xchi ebꞌ vin̈. 4 Ayic chiꞌ manto in acꞌjioch dꞌa preso, yuj chiꞌ libre to in bꞌeyecꞌ dꞌa scal ebꞌ anima. 5 A ebꞌ soldado aj Babilonia oyanoch ebꞌ dꞌa spatic Jerusalén tic, palta dꞌa jun tiempoal chiꞌ, ix yabꞌ ebꞌ to van scot ebꞌ soldado vin̈ sreyal Egipto dꞌa schon̈abꞌ, yuj chiꞌ ix el ebꞌ dꞌa Jerusalén.

6 Ix lolonxi Jehová dꞌayin, ix schecan val dꞌa ebꞌ vin̈ ix checjicot chiꞌ dꞌayin icha tic: 7 Alec dꞌa vin̈ sreyal Judá, vin̈ ix ex checancot ul e cꞌanbꞌej dꞌayin, a ebꞌ soldado vin̈ sreyal Egipto ix cot colval eyedꞌoc eyalani, palta ol meltzaj ebꞌ dꞌa Egipto. 8 Yuj chiꞌ, ol cotxoc ebꞌ aj Babilonia chiꞌ yic tzul yacꞌan oval ebꞌ yedꞌ Jerusalén tic, ol acꞌjoc ganar jun chon̈abꞌ tic yuj ebꞌ, ol yacꞌancanoch scꞌacꞌal ebꞌ. 9 Ix yalanxi Jehová icha tic: Man̈ eyacꞌ musansatil e bꞌa, tzeyalani to toxo ix el ebꞌ soldado aj Babilonia dꞌa e cal, yujto man̈ ichaoc taꞌ yaji. 10 Vachꞌchom ol eyacꞌ ganar ebꞌ soldado van yacꞌan oval eyedꞌ chiꞌ, yuj chiꞌ axon̈ej ebꞌ lajvinac ol can dꞌa scampamento ebꞌ, palta ol qꞌuex vaan ebꞌ, ol yacꞌanoch cꞌacꞌ ebꞌ dꞌa jun e chon̈abꞌ tic, xchi Jehová, xin chi dꞌa ebꞌ.

11 Ayic ix el ebꞌ soldado Babilonia dꞌa Jerusalén, yujto ix yabꞌ ebꞌ to vanxo sjavi ebꞌ soldado vin̈ sreyal Egipto, 12 vanxo velta a in Jeremías in tic dꞌa yol chon̈abꞌ chiꞌ, yic tzin bꞌatcan dꞌa yol yic Benjamín, yic sbꞌat in chaan in macbꞌen dꞌa ebꞌ ayto vuj in bꞌa yedꞌoc valani. 13 Ayic in cꞌoch dꞌa spuertail bꞌaj sbꞌat bꞌe dꞌa yol yic Benjamín chiꞌ, ataꞌ ay jun vin̈ scuchan Irías yuninal vin̈aj Selemías, yixchiquin vin̈aj Hananías, yajal yaj vin̈ dꞌa ebꞌ stan̈van puerta chiꞌ. A jun vin̈ chiꞌ in yamanoch vaan, yalan vin̈ dꞌayin icha tic:

—A ach tic, vanxo och yedꞌ ebꞌ aj Babilonia, xchi vin̈.

14 In tacꞌvi dꞌa vin̈ icha tic:

—Maay, malaj in tzin och yedꞌ ebꞌ aj Babilonia chiꞌ, xin chi dꞌa vin̈.

Palta maj scha yabꞌ vin̈, an̈ej to in yicꞌbꞌat vin̈ dꞌa yichan̈ ebꞌ vin̈ yajal. 15 Cot yoval ebꞌ vin̈ yajal chiꞌ dꞌayin, in schecan macꞌjoc ebꞌ vin̈, bꞌat in yacꞌanoch ebꞌ vin̈ dꞌa preso dꞌa spat vin̈aj Jonatán, vin̈ tzꞌibꞌum. A spat vin̈ chiꞌ och presoal yuj ebꞌ. 16 Yuj chiꞌ, in cann̈ej dꞌa preso dꞌa jun cuarto bꞌobꞌil dꞌa yol luum. Nivan tiempo in can taꞌ.

17 Axo vin̈aj rey Sedequías in acꞌan icꞌjoccot dꞌa spalacio. Ayic in cꞌoch dꞌa yichan̈ vin̈ rey chiꞌ, scꞌanbꞌan vin̈ dꞌayin dꞌa elcꞌaltac icha tic:

—¿Ay am junoc slolonel Jehová tzal dꞌayin? xchi vin̈.

In tacꞌvi dꞌa vin̈ icha tic:

—Ay toni. Icha val tic yalani: A ach tic mamin rey, ol ach acꞌjococh dꞌa yol scꞌabꞌ vin̈ sreyal Babilonia, xin chi. 18 An̈ejtonaꞌ in cꞌanbꞌej dꞌa vin̈aj Sedequías chiꞌ icha tic: ¿Tas in mul ix och dꞌayach mamin rey yedꞌ dꞌa ebꞌ ayoch yajalil edꞌoc yedꞌ pax dꞌa ebꞌ anima, yuj chiꞌ ix in a chec acꞌjococh dꞌa preso? 19 ¿Tas ix aj yelcꞌoch slolonel juntzan̈ ebꞌ syaloch sbꞌa schecabꞌoc Dios, ebꞌ ix alani to man̈ ol javoc vin̈ sreyal Babilonia yacꞌ oval yedꞌ jun chon̈abꞌ tic? 20 Axo ticnaic jun mamin rey, a tas ol in cꞌan dꞌayach, comonoc tzacꞌ dꞌayin: Man̈xo in a cha icꞌjocbꞌat dꞌa spat vin̈aj Jonatán, vin̈ tzꞌibꞌum, axo talaj tzꞌaji tzin cham taꞌ.

21 Yuj chiꞌ, yalan vin̈aj rey Sedequías chiꞌ to tzin can dꞌa jun yamaqꞌuil bꞌaj ayecꞌ ebꞌ stan̈van palacio chiꞌ, axo dꞌa junjun cꞌu tzꞌacꞌji junjun pan dꞌayin, smanji dꞌa ebꞌ bꞌoum pan. Ichan̈ej chiꞌ aji, yacbꞌan ayto ixim pan chiꞌ dꞌa yol chon̈abꞌ chiꞌ. Icha chiꞌ aj in cann̈ej dꞌa amacꞌ chiꞌ.