4 E masanil ex aj Jerusalén icꞌbꞌilbꞌat dꞌa Babilonia yuj co Diosal a on̈ israel on̈ tic, aton Jehová Yajal dꞌa Smasanil, a tzꞌalan dꞌayex icha tic: 5 Bꞌoec e pat, tzex cajnaj dꞌay, avejec eyavbꞌen teꞌ yic tze loan sat. 6 Aqꞌuecoch eyetbꞌeyum, aljocabꞌ eyuninal. Ochocabꞌ pax yetbꞌeyum ebꞌ eyuninal chiꞌ, aljocabꞌ pax yuninal ebꞌ, qꞌuibꞌocabꞌ e bꞌisul, mocabꞌ emta e bꞌisul chiꞌ. 7 Munlajan̈ec yuj svachꞌiloc jun chon̈abꞌ bꞌaj ix ex vacꞌbꞌat chiꞌ. Cꞌanec in colval dꞌa yibꞌan̈, tato vachꞌ tzꞌaj jun chon̈abꞌ chiꞌ, vachꞌ pax ol ex aj yedꞌoc. 8 Yujto a in Jehová Yajal in dꞌa Smasanil, e Diosal in, a in sval juntzan̈ tic: Man̈ eyacꞌ e bꞌa musansatil yuj juntzan̈ ebꞌ syesejoch sbꞌa in checabꞌoc yedꞌ ebꞌ naumel lolonel yalani. Man̈ e cha eyabꞌ svayich ebꞌ syalaꞌ. 9 A tas syal ebꞌ chiꞌ dꞌa in bꞌi, nabꞌa es. A in Jehová in svalaꞌ to man̈oc in tzin chec yal ebꞌ.

10 Svalanxi: Ayic ol tzꞌacvoc 70 abꞌil yacꞌan yajalil Babilonia chiꞌ, ol vacꞌ in vachꞌcꞌolal dꞌayex, ol vacꞌanpaxelcꞌoch bꞌaj ix vacꞌ in tiꞌ to ol ex vicꞌxi meltzaj dꞌa tic. 11 A in val Jehová in svalaꞌ, vojtac tas nabꞌil vuj dꞌa e patic. A tas nabꞌil chiꞌ vuuj, man̈ yujoc eyabꞌan syaelal, palta yuj e vachꞌiloc yic vachꞌ ay tas tzeyacꞌoch yipoc e cꞌol dꞌa bꞌaqꞌuin̈. 12 Ol lajvoc chiꞌ, ol eyal e bꞌa dꞌayin, ol ex lesalvoc dꞌayin, ol vabꞌan e lesal chiꞌ. 13 A in val Jehová in svalaꞌ to ol ex javoc dꞌayin, ol in chꞌox in bꞌa dꞌayex, yujto ol eyacꞌoch e bꞌa dꞌa yol in cꞌabꞌ dꞌa smasanil e cꞌool. 14 A in Jehová in svalaꞌ, ol in chꞌoxn̈ej in bꞌa dꞌayex. Ol in qꞌuex tas eyaji. Ol ex vicꞌcot dꞌa masanil nación yedꞌ dꞌa masanil bꞌaj ix ex in saclemejcanbꞌati. Ol ex in molbꞌej, ol ex vicꞌanpax meltzaj bꞌaj ayex ecꞌ cajan ayic ix ex icꞌjibꞌati, xchi Jehová.

15 A ex tic tzeyalaꞌ: Ayxo ebꞌ schecabꞌ Jehová dꞌayon̈ dꞌa Babilonia tic, xe chi. 16 Palta syal Jehová icha tic dꞌa yibꞌan̈ vin̈ rey ayoch dꞌa sdespachocan vin̈aj rey David yedꞌ dꞌa ebꞌ cajan dꞌa jun chon̈abꞌ tic, aton juntzan̈ ebꞌ ayto eyuj e bꞌa yedꞌoc, ebꞌ maj icꞌjibꞌat dꞌa Babilonia chiꞌ: 17 A in Jehová Yajal in dꞌa Smasanil sval icha tic: Ol vacꞌbꞌat oval, vejel yedꞌ ilya dꞌa scal ebꞌ. Lajan ol vutejcan ebꞌ icha juntzan̈ teꞌ higo cꞌaeltacxo, te chuclaj, maxtzac yal sloji. 18 Ol in pechbꞌeyecꞌ ebꞌ yuj oval, yuj vejel, yuj pax ilya. Ol vacꞌan yajjoc ebꞌ yuj masanil nación. Ol ja catabꞌ dꞌa yibꞌan̈ ebꞌ, ol xiv ebꞌ anima yuj ebꞌ ayic ol yilanoch ebꞌ. Ol bꞌuchvaj ebꞌ dꞌa ebꞌ, ol bꞌajjoc ebꞌ yuj juntzan̈ nación bꞌaj ol in saclemejcanbꞌati. 19 A in Jehová in svalaꞌ to tzijtum el ix alji dꞌa ebꞌ yuj ebꞌ in checabꞌ, palta maj scha yabꞌ ebꞌ tas ix yal ebꞌ in checabꞌ chiꞌ. An̈ejtonaꞌ ex pax tic maj e chapax eyabꞌi. 20 E masanil ex aj Jerusalén ix ex vacꞌ icꞌjocbꞌat dꞌa Babilonia, abꞌec val in lolonel svalaꞌ.

21 A in Jehová Yajal in dꞌa Smasanil, e Diosal in paxi, sval yuj vin̈aj Acab yuninal vin̈aj Colaías yedꞌ yuj vin̈aj Sedequías yuninal vin̈aj Maasías, aton ebꞌ vin̈ tzꞌalan juntzan̈ esal lolonel dꞌa in bꞌi: Ol vacꞌoch ebꞌ vin̈ dꞌa yol scꞌabꞌ vin̈aj Nabucodonosor sreyal Babilonia. A vin̈ ol checan miljoccham ebꞌ vin̈ dꞌa eyichan̈. 22 Yuj chiꞌ, ex aj Judá, ex icꞌbꞌil ex bꞌat dꞌa Babilonia, tato ayex ol e nibꞌej e catabꞌej junoc mach, ol eyal icha tic: Ach yutejocabꞌ Jehová icha utajnac vin̈aj Sedequías yedꞌ vin̈aj Acab, aton ebꞌ vin̈ schecnac vin̈aj Nabucodonosor n̈usjoctzꞌaoc, xe chama. 23 Icha chiꞌ ol aj sja dꞌa yibꞌan̈ ebꞌ vin̈, yujto te chuc tas scꞌulej ebꞌ vin̈ dꞌa yol e chon̈abꞌ. Tzꞌem ebꞌ vin̈ ajmulal yedꞌ ebꞌ ix yetbꞌeyum ebꞌ yetvinaquil. Syalan juntzan̈ esal lolonel ebꞌ vin̈ dꞌa in bꞌi, man̈oc in tzin chec yal ebꞌ vin̈. A in Jehová in svalaꞌ, vojtac tas yaji, xchi Jehová, xin chibꞌat dꞌa jun in carta chiꞌ.

24-32 Ay jun vin̈ scuchan Semaías aj Nehelam ayecꞌ dꞌa Babilonia chiꞌ. Dꞌa yol yic vin̈ ix yacꞌcot jun carta dꞌa masanil ebꞌ anima cajantocan dꞌa Jerusalén yedꞌ dꞌa vin̈aj sacerdote Sofonías yuninal vin̈aj Maasías yedꞌ dꞌa juntzan̈xo ebꞌ vin̈ sacerdote. A dꞌa jun carta chiꞌ ix yalcot vin̈ dꞌa vin̈aj Sofonías chiꞌ icha tic: A Jehová Dios ix ach acꞌanoch sacerdoteal sqꞌuexuloc vin̈aj Joiada, yic vachꞌ cuchbꞌum tzach aj dꞌa stemplo. Tato ay mach scꞌoch dꞌayach aycot dꞌa sjolom tzꞌoch ijan slolon icha ebꞌ schecabꞌ Dios. A jun chiꞌ elan̈chamel tzacꞌoch dꞌa yol teꞌ cepo, tza tzecꞌan yedꞌ qꞌuen cadena. ¿Tas yuj maj a cach vin̈aj Jeremías aj Anatot? Ix stecꞌbꞌej sbꞌa vin̈ slolon dꞌa ichan̈, icha schecabꞌ Dios syutej sbꞌa vin̈, yujto ix yacꞌcot jun carta vin̈ dꞌayon̈ dꞌa Babilonia tic. Syalan vin̈ icha tic: Najtilto ol ex cajnaj taꞌ. Bꞌoec e pat, tzex cajnaj dꞌay, avejec eyavbꞌen teꞌ yic tze loan sat, xchi jun scarta vin̈ chiꞌ dꞌayon̈, xchi scarta vin̈aj Semaías chiꞌ. Ix yavtan jun carta chiꞌ vin̈aj sacerdote Sofonías vabꞌ a in Jeremías in tic.

Ix lajvi chiꞌ, a Jehová Yajal dꞌa Smasanil, aton co Diosal a on̈ israel on̈ tic, ix lolon dꞌayin. Ix yalan icha tic: Albꞌat dꞌa ebꞌ icꞌbꞌilbꞌat dꞌa Babilonia to a in sval icha tic: A vin̈aj Semaías aj Nehelam, vin̈ ix alani to a in ix in chec yal vin̈ to toxo ol meltzaj vin̈ dꞌa Babilonia chiꞌ. Palta man̈oc in ix in chec yal jun esal lolonel vin̈ ix eyacꞌoch yipoc e cꞌol chiꞌ. Yuj chiꞌ, a in Jehová in svalaꞌ to ol vacꞌ syaelal vin̈aj Semaías chiꞌ yedꞌ pax ebꞌ yin̈tilal. Man̈xalaj junoc yin̈tilal vin̈ chiꞌ ol aj dꞌa scal ebꞌ in chon̈abꞌ, yic syacꞌan tzalajbꞌoc scꞌol dꞌa in vachꞌcꞌolal ol vacꞌ dꞌayex, yujto ix ex scuchbꞌej vin̈ yic tze pitej e bꞌa dꞌayin, xchi Jehová, xa chibꞌati, xchi dꞌayin.