2 —A Jehová Yajal dꞌa Smasanil, co Diosal a on̈ israel on̈ tic, a tzꞌalan icha tic: Ol in macꞌ can̈chaj jun teꞌ syugo vin̈ sreyal Babilonia, aton spoder vin̈ ayem dꞌa eyibꞌan̈. 3 Yic val chabꞌ abꞌil tic, ol vacꞌ icꞌjoc meltzaj masanil yamcꞌabꞌ yic templo icꞌbꞌilbꞌat yuj vin̈aj Nabucodonosor dꞌa Babilonia. 4 A in Jehová in svalaꞌ to ol vacꞌ meltzaj vin̈aj Jeconías sreyal Judá, vin̈ yuninal vin̈aj Joacim yedꞌ masanil ebꞌ anima icꞌbꞌilbꞌat dꞌa Babilonia chiꞌ. Ol in can̈chitej syugo vin̈ rey chiꞌ ayem dꞌa eyibꞌan̈, xchi Jehová, xchi vin̈aj Hananías chiꞌ.

5 Ix in tacꞌvi dꞌa vin̈ dꞌa yichan̈ ebꞌ sacerdote yedꞌ dꞌa yichan̈ masanil anima ayecꞌ dꞌa templo chiꞌ. Ix valan icha tic:

6 —Ichocabꞌ chiꞌ. Comonoc icha chiꞌ scꞌulej Jehová. Comonoc syaqꞌuelcꞌoch juntzan̈ lolonel tzal chiꞌ, syacꞌan icꞌjoc meltzaj masanil yamcꞌabꞌ yic templo icꞌbꞌilbꞌat dꞌa Babilonia chiꞌ yedꞌ masanil anima. 7 Palta abꞌ val juntzan̈ tas ol val tic dꞌayach yedꞌ dꞌa ebꞌ anima tic: 8 A ebꞌ schecabꞌ Dios ecꞌnac dꞌa pecaꞌ, ayic manto on̈ alji edꞌoc, yalnac ebꞌ to ol ja oval, yaelal yedꞌ ilya dꞌa yibꞌan̈ juntzan̈ nación ay spoder. 9 Palta tato ay junoc checabꞌ tzꞌalani to ol ja vachꞌil dꞌa juntzan̈ nación, ato yic ol elcꞌochoc, ichato chiꞌ ol checlajeloc to a Jehová ix checan yalaꞌ, xin chi.

10 Ix lajvi chiꞌ ix yicꞌanel jun teꞌ yugo chiꞌ vin̈aj Hananías ayoch dꞌa in jaj, ix scan̈chitan teꞌ vin̈. 11 Ix yalan vin̈ dꞌa yichan̈ ebꞌ anima chiꞌ icha tic:

—Syal Jehová icha tic: Yic val chabꞌ abꞌil tic, ol viqꞌuel spoder vin̈aj Nabucodonosor ayoch dꞌa yibꞌan̈ juntzan̈ nación tic, xchi Jehová chiꞌ, xchi vin̈. Ix lajvi chiꞌ ix in bꞌatxi. 12 Ayic ix ecꞌbꞌat jun tiempoal ayic toxo ix smacꞌ can̈chaj teꞌ yugo vin̈aj Hananías ix yiqꞌuel dꞌa in jaj chiꞌ, ix lolon Jehová dꞌayin, ix yalan icha tic: 13 Ixic, bꞌat al dꞌa vin̈aj Hananías to a in Jehová in svalaꞌ: A ach ix a can̈chitej teꞌ yugo nabꞌa teꞌ, a inxo ol vacꞌoch jun yugo nabꞌa hierro sqꞌuexuloc te teꞌ chiꞌ. 14 A in Jehová Yajal in dꞌa Smasanil, sDiosal in Israel sval icha tic: Ix vacꞌoch jun yugo nabꞌa hierro dꞌa yibꞌan̈ juntzan̈ nación valnac, yic scan ebꞌ dꞌa yalan̈ smandar vin̈aj Nabucodonosor sreyal Babilonia. An̈ejtonaꞌ nocꞌ caltacteꞌal nocꞌ, ix vacꞌcanoch nocꞌ dꞌa yalan̈ smandar jun vin̈ rey chiꞌ, xchi Jehová.

15 Ix lajvi chiꞌ, ix valan dꞌa vin̈aj Hananías chiꞌ icha tic:

—Hananías, abꞌ val tas ol valaꞌ. Man̈oc Jehová ix checan alaꞌ. Palta a tas tzal syacꞌoch ebꞌ anima yipoc scꞌool chiꞌ man̈ yeloclaj. 16 Yuj chiꞌ syal Jehová icha tic: Ol ach in satel dꞌa sat lum tic. Yuj a lolonel ix al chiꞌ, ix vachꞌ pitbꞌiel juntzan̈ anima tic dꞌayin, yuj chiꞌ a dꞌa jun abꞌil tic ol ach chamoc, xchi Jehová, xin chi dꞌa vin̈.

17 A dꞌa yuquil uj dꞌa jun abꞌil chiꞌ, ix cham vin̈aj Hananías chiꞌ.