A teꞌ yugo ayoch chꞌoxnabꞌiloc
27
Ayic toto ochnac vin̈aj Sedequías yuninal vin̈aj Josías reyal dꞌa Judá, ix lolon Jehová dꞌayin Jeremías in tic. 2 Ix yalan icha tic: Bꞌo junoc teꞌ yugo yedꞌ juntzan̈oc nocꞌ tzꞌuum, tzacꞌanqꞌue dꞌa yibꞌan̈ a jaj. 3 Slajvi chiꞌ, tzacꞌanbꞌat junoc checnabꞌil dꞌa ebꞌ sreyal Edom, dꞌa ebꞌ yic Moab, dꞌa ebꞌ yic Amón, dꞌa ebꞌ yic Tiro yedꞌ dꞌa ebꞌ yic Sidón. A dꞌa ebꞌ checabꞌ sjavi ul yil vin̈aj rey Sedequías dꞌa Jerusalén, ataꞌ tzacꞌbꞌati. 4 Tzal dꞌa ebꞌ to syal ebꞌ dꞌa ebꞌ sreyal, to a in Jehová Yajal in dꞌa Smasanil, sDiosal in Israel tic, a in svalaꞌ: 5 Yedꞌ val in poder te nivan, in bꞌonac yolyibꞌan̈qꞌuinal tic yedꞌ masanil tastac ay dꞌay. In bꞌonac ebꞌ anima yedꞌ nocꞌ nocꞌ, yuj chiꞌ syal vacꞌan dꞌa yaln̈ej mach bꞌaj in gana svacꞌaꞌ. 6 Yuj chiꞌ, a ticnaic svacꞌcanoch juntzan̈ nación tic dꞌa yol scꞌabꞌ vin̈ in checabꞌ aj Nabucodonosor sreyal Babilonia. Svacꞌpaxcanoch nocꞌ caltacteꞌal nocꞌ dꞌa yalan̈ smandar vin̈. 7 Masanil nación ol can dꞌa yol scꞌabꞌ vin̈, dꞌa yol scꞌabꞌ yuninal vin̈ yedꞌ dꞌa yol scꞌabꞌ yixchiquin vin̈, masanto ol ja scꞌual yacꞌji ganar Babilonia chiꞌ. Ichato chiꞌ ol can Babilonia chiꞌ dꞌa yol scꞌabꞌ juntzan̈xo nación yedꞌ dꞌa yol scꞌabꞌ juntzan̈xo rey nivac yelcꞌoch yedꞌ yopisio. 8 A in Jehová in svalaꞌ, tato ay junoc nación max yacꞌoch sbꞌa dꞌa yalan̈ smandar vin̈aj Nabucodonosor chiꞌ, ol vacꞌoch yaelal dꞌa yibꞌan̈, aton oval, vejel yedꞌ ilya, masanto ol satel ebꞌ yuj vin̈.9 Yuj chiꞌ, man̈ e cha eyabꞌ tas syal ebꞌ tzꞌalan dꞌayex to max eyacꞌoch e bꞌa dꞌa yalan̈ smandar vin̈aj Nabucodonosor sreyal Babilonia chiꞌ. A ebꞌ tzꞌalan juntzan̈ chiꞌ, aton ebꞌ tic: Ebꞌ syaloch sbꞌa in checabꞌoc, ebꞌ naumel lolonel, ebꞌ snaanel tas syal vayich yalani yedꞌ ebꞌ schuman yedꞌ qꞌuen cꞌanal yedꞌ ebꞌ scomon alan tastac toto ol ujoc. 10 Masanil juntzan̈ tas syal ebꞌ chiꞌ, esn̈ej, yujto ol ex icꞌjocbꞌat dꞌa juntzan̈xo chꞌoc nacional. A in ol ex in pechbꞌati, ataꞌ ol ex chamoc. 11 Axo pax juntzan̈ nación syacꞌoch sbꞌa dꞌa yol scꞌabꞌ vin̈ sreyal Babilonia chiꞌ, a in Jehová in svalaꞌ to ol vacꞌn̈ejcan ebꞌ dꞌa sluum, ol munlaj ebꞌ taꞌ, xchi Jehová, xa chibꞌati, xchi dꞌayin.
12 Yuj chiꞌ ix valanxi juntzan̈ tic dꞌa vin̈aj Sedequías sreyal Judá icha tic: Acꞌoch a bꞌa dꞌa yol scꞌabꞌ vin̈ sreyal Babilonia yedꞌ schon̈abꞌ vin̈, yic vachꞌ max ex chami. 13 ¿Tas yuj tza bꞌeccham a bꞌa yedꞌ a chon̈abꞌ yuj oval, vejel yedꞌ pax yuj ilya? Yujto toxo ix yal Jehová to a juntzan̈ chiꞌ ol icꞌan masanil nación man̈ ol yacꞌoch sbꞌa dꞌa yol scꞌabꞌ vin̈ sreyal Babilonia chiꞌ. 14 Man̈ a cha abꞌ tas syal juntzan̈ ebꞌ syaloch sbꞌa schecabꞌoc Dios, ebꞌ tzꞌalani to max acꞌoch a bꞌa dꞌa yol scꞌabꞌ vin̈ sreyal Babilonia chiꞌ, yujto nabꞌa es tas syal ebꞌ chiꞌ. 15 A Jehová ix alani to man̈oc schecan yal juntzan̈ chiꞌ ebꞌ, nabꞌa es tas syal ebꞌ. Tato tza cꞌanabꞌajej tas syal ebꞌ chiꞌ jun, ol ach icꞌjoquel dꞌa tic yedꞌ ebꞌ esalvum checabꞌ tzꞌalan chiꞌ dꞌayach, ol ach cham yedꞌ ebꞌ, xin chi dꞌa vin̈ rey chiꞌ.
16 Ix lajvi chiꞌ, ix valan pax dꞌa ebꞌ sacerdote yedꞌ dꞌa masanil anima icha tic: A val Jehová tzꞌalani: Man̈ e cha eyabꞌ tas syal juntzan̈ ebꞌ syaloch sbꞌa in checabꞌoc chiꞌ. Syalan ebꞌ dꞌayex to toxo ol acꞌjoc meltzaj masanil yamcꞌabꞌ yic templo icꞌbꞌilbꞌat dꞌa Babilonia. A juntzan̈ syal ebꞌ chiꞌ dꞌayex, esal lolonel. 17 Yuj chiꞌ man̈ e cha eyabꞌi. Aqꞌuec val och e bꞌa dꞌa yol scꞌabꞌ vin̈ sreyal Babilonia chiꞌ, yic vachꞌ ol ex cajnajn̈ej dꞌa tic. ¿Tas yuj ol can tzꞌinan jun chon̈abꞌ tic? 18 Tato yel in checabꞌ ebꞌ, tato yedꞌnac in lolonel ebꞌ, tevocabꞌ ebꞌ dꞌayin a in Jehová Yajal in dꞌa Smasanil, yic max vachꞌ icꞌjibꞌat juntzan̈xo yamcꞌabꞌ yic in templo dꞌa Babilonia yedꞌ tastac cannac dꞌa spalacio ebꞌ tzꞌacꞌan reyal dꞌa Judá yedꞌ dꞌa Jerusalén, xchi Jehová, xin chi dꞌa ebꞌ.
19-21 Ayic ix icꞌjibꞌat vin̈aj Jeconías sreyal Judá, vin̈ yuninal vin̈aj Joacim yuj vin̈aj Nabucodonosor sreyal Babilonia, ix icꞌjipaxbꞌat ebꞌ ayoch yajalil dꞌa Jerusalén yedꞌ vin̈. Ayic ix icꞌjibꞌat ebꞌ chiꞌ maj icꞌjibꞌatlaj juntzan̈ nivac oy, jun nivan pila nabꞌa bronce yedꞌ sbꞌachnubꞌal yedꞌ juntzan̈xo syamcꞌabꞌil templo yedꞌ tas ix can dꞌa spalacio ebꞌ sreyal Judá yedꞌ Jerusalén. Yuj chiꞌ ix yal Jehová icha tic: Abꞌec tas sval a in Jehová Yajal in dꞌa Smasanil, e Diosal in a ex israel ex tic. 22 A in svalaꞌ to masanil tas ix can chiꞌ ol icꞌjocbꞌat dꞌa Babilonia, ataꞌ ol cann̈ej, masanto ayic ol ex vicꞌanxi meltzaj dꞌa e chon̈abꞌ tic, xchi Jehová.