Ix acꞌjioch chamel dꞌa yibꞌan̈ vin̈aj Jeremías
26
Ayic ix och vin̈aj Joacim yuninal vin̈aj Josías reyal dꞌa Judá, ataꞌ ix lolon Jehová dꞌayin Jeremías in tic. 2 Ix yalan icha tic: Ajan̈ tecꞌtecꞌ dꞌa yamaqꞌuil in templo, tzalan masanil tas ix val tic dꞌayach dꞌa ebꞌ aj Judá tzul och ejmelal dꞌa in templo tic. Malaj junoc lolonel to max alaꞌ. 3 Talaj scha yabꞌ ebꞌ dꞌayach, syactancan schuc bꞌeybꞌal ebꞌ, tato icha chiꞌ, man̈xo ol vacꞌbꞌat yaelal nabꞌil vuj vacꞌanbꞌat dꞌa yibꞌan̈ ebꞌ yuj schuc bꞌeybꞌal chiꞌ. 4 Tzal dꞌa ebꞌ to a in Jehová in sval dꞌa ebꞌ icha tic: Yujto max e cha eyabꞌ in cꞌaybꞌubꞌal svalaꞌ, max e cꞌanabꞌajej paxi, 5 max e cha eyabꞌ e cachji yuj ebꞌ in checabꞌ, vachꞌchom tzijtum el ix in checbꞌat ebꞌ, palta maj e cꞌanabꞌajej ebꞌ, 6 yuj chiꞌ, icha vutejnac in cajnubꞌ dꞌa Silo, icha chiꞌ ol vutej jun templo tic. Ol vacꞌbꞌat catabꞌ dꞌa yibꞌan̈ jun chon̈abꞌ tic dꞌa scal masanil juntzan̈xo chon̈abꞌ ay dꞌa yolyibꞌan̈qꞌuinal, xchi Jehová, xa chi dꞌa ebꞌ.7 A ebꞌ sacerdote, ebꞌ syaloch sbꞌa schecabꞌoc Dios yedꞌ masanil ebꞌ anima, ix yabꞌ val ebꞌ valan juntzan̈ lolonel chiꞌ dꞌa templo. 8 Ayic ix lajvi valan masanil tas ix schec Jehová valaꞌ, ix in syaman ebꞌ. Ix yalan ebꞌ dꞌayin icha tic: Ol ach chamoc. 9 ¿Tas val yuj tza tecꞌbꞌej a bꞌa alan dꞌa sbꞌi Jehová to a jun stemplo tic lajan ol ajcan icha ajnac scajnubꞌ dꞌa Silo? Tzalani to ol satel jun chon̈abꞌ tic, man̈xa mach ol cajnaj dꞌay, xa chi, xchi ebꞌ. Masanil anima ix ja n̈ilnaj dꞌa yamaqꞌuil templo chiꞌ, ix oymaj ebꞌ dꞌa in patic.
10 Ayic ix yabꞌan ebꞌ yajal dꞌa Judá tas van yuji chiꞌ, ix cot ebꞌ dꞌa spalacio vin̈ rey, ix javi ebꞌ dꞌa templo bꞌaj ay jun acꞌ puerta, ataꞌ ix javi cꞌojan ebꞌ. 11 Ix yalan ebꞌ sacerdote yedꞌ ebꞌ syaloch sbꞌa schecabꞌoc Dios chiꞌ dꞌa ebꞌ yajal yedꞌ dꞌa ebꞌ anima chiꞌ icha tic: A jun vin̈ tic smoj scham vin̈, yujto ix yal vin̈ to ay yaelal ol ja dꞌa yibꞌan̈ co chon̈abꞌ tic. A ex tic tzeyabꞌn̈ej tas syal vin̈ chiꞌ, xchi ebꞌ.
12 Ix valan dꞌa ebꞌ yajal chiꞌ yedꞌ dꞌa ebꞌ anima chiꞌ icha tic: A Jehová ix checan val tas ix eyabꞌ dꞌa spatic jun templo tic yedꞌ dꞌa spatic co chon̈abꞌ tic. 13 Bꞌoec e bꞌeybꞌal yedꞌ tas tze cꞌulej, cꞌanabꞌajejec Jehová co Diosal yic vachꞌ man̈ ol yacꞌcot juntzan̈ yaelal toxo ix alchaj chiꞌ dꞌa eyibꞌan̈. 14 A in tic, ayin val ecꞌ dꞌa yol e cꞌabꞌ, syaln̈ej e cꞌulan tas tze nibꞌej dꞌayin. 15 Palta, ojtaquejec val el sicꞌlabꞌil: Tato a ex yedꞌ ebꞌ anima tic tzin e milchamoc, ol och e mul yujto tze milcham junoc mach malaj smul. Yujto val yel, a Jehová ix checan val juntzan̈ lolonel tic, xin chi dꞌa ebꞌ.
16 Yuj chiꞌ ix yalan ebꞌ yajal yedꞌ ebꞌ anima chiꞌ dꞌa ebꞌ sacerdote yedꞌ dꞌa ebꞌ syaloch sbꞌa schecabꞌoc Dios chiꞌ: Man̈ smojoc scham jun vin̈ tic, yujto a dꞌa sbꞌi Jehová co Diosal ix lolon vin̈ dꞌayon̈, xchi ebꞌ. 17 Ay juntzan̈ ebꞌ yichamtac vinaquil chon̈abꞌ ix qꞌue vaan, ix yalan ebꞌ dꞌa ebꞌ anima molanecꞌ chiꞌ: 18 A dꞌa stiempoal vin̈aj Ezequías sreyal Judá, a vin̈aj Miqueas aj Moreset ix lolon dꞌa sbꞌi Jehová dꞌa masanil ebꞌ cajan dꞌa Judá, ix yalan vin̈ icha tic:
A Jehová Yajal dꞌa Smasanil tzꞌalan icha tic: A Sion tic ol can yicoc munlajel. A pax Jerusalén ol emcan lan̈najoc, axo jun tzalan bꞌaj ay templo tic, vayumtac ol ajoc, xchi Jehová, xchi vin̈.
19 Palta tocval ix miljicham vin̈ yuj vin̈aj rey Ezequías chiꞌ yedꞌ pax yuj ebꞌ anima. An̈ej to ix xiv vin̈, ix tevi vin̈ dꞌa Jehová. Yuj chiꞌ majxo yacꞌcot yaelal Jehová toxo ix yal chiꞌ. Tato sco milcham vin̈aj Jeremías tic, ol quicꞌcot yaelal dꞌa quibꞌan̈, xchi ebꞌ.
20 (Yedꞌ pax vin̈ schecabꞌ Dios scuchan Urías yuninal vin̈aj Semaías, aj Quiriat-jearim, a vin̈ ix lolon dꞌa sbꞌi Jehová dꞌa jun chon̈abꞌ tic yedꞌ dꞌa juntzan̈xo chon̈abꞌ ay dꞌa yol smacbꞌen, icha ix aj valan Jeremías in tic. 21 A vin̈aj rey Joacim yedꞌ ebꞌ ayoch yajalil yedꞌoc yedꞌ ebꞌ nivac yopisio, ix yabꞌ ebꞌ tas ix yal vin̈. Ix snibꞌej vin̈ rey chiꞌ smilcham vin̈. Axo yic ix yabꞌan vin̈aj Urías chiꞌ tas yaji, ix xivbꞌat vin̈, ix bꞌat vin̈ elelal dꞌa Egipto. 22 Ix checjibꞌat vin̈aj Elnatán yuninal vin̈aj Acbor yedꞌ juntzan̈xo ebꞌ vin̈ vinac yuj vin̈aj rey Joacim dꞌa Egipto chiꞌ. 23 Aton ebꞌ vin̈ ix bꞌat icꞌancot vin̈aj Urías chiꞌ, ix yacꞌanoch vin̈ ebꞌ dꞌa yol scꞌabꞌ vin̈ rey chiꞌ. Ix yalan vin̈ to smiljicham vin̈, syumjibꞌat snivanil vin̈ bꞌaj sbꞌatcan snivanil ebꞌ comon anima. Icha chiꞌ ix aji.)
24 Palta a in Jeremías in tic, maj in acꞌjioch dꞌa yol scꞌabꞌ ebꞌ anima yic tzin smilancham ebꞌ, yujto a vin̈aj Ahicam yuninal vin̈aj Safán ix yacꞌoch sbꞌa vedꞌoc.