A ebꞌ ajcꞌol scot dꞌa norte
25
Ayic schan̈il abꞌil yoch vin̈aj Joacim yuninal vin̈aj Josías reyal dꞌa Judá, aton yic bꞌabꞌel abꞌil yoch vin̈aj Nabucodonosor reyal dꞌa Babilonia, ix lolon Jehová dꞌayin a in Jeremías in tic yuj tas ol aj chon̈abꞌ Judá. 2 Ix valan jun lolonel tic dꞌa masanil ebꞌ anima ay dꞌa yol yic Judá yedꞌ dꞌa masanil ebꞌ cajan dꞌa Jerusalén. Yuj chiꞌ ix valan icha tic: 3 Ayic 13 abꞌil yoch vin̈aj Josías yuninal vin̈aj Amón reyal dꞌa Judá tic, ix el yich slolon Jehová dꞌayin, yuj chiꞌ 23 abꞌilxo slolonn̈ej dꞌayin. Tzijtum el ix val dꞌayex, palta man̈ jabꞌoc tze cha eyabꞌi. 4 Vachꞌchom tzijtum el ix scheccot ebꞌ schecabꞌ Jehová dꞌayex, palta maj e chan̈ej eyabꞌ tas ix checji yal ebꞌ, maj e cꞌanabꞌajej. 5 Ix yal val ebꞌ dꞌayex to tzeyactejcan e chuc bꞌeybꞌal, yic vachꞌ tzex cajnajn̈ej dꞌa lum luum yacꞌnac Jehová dꞌa ebꞌ co mam quicham. 6 Man̈ ex bꞌat dꞌa spatic comon dios, man̈ ex och ejmelal dꞌay. Man̈ e tzuntzejcot yoval scꞌol Jehová yuj eyoch ejmelal dꞌa juntzan̈ dios to a ex tze bꞌo tic, yic vachꞌ max yacꞌcot junoc yaelal Jehová dꞌa eyibꞌan̈, xchi ebꞌ schecabꞌ chiꞌ. 7 Axo ticnaic, syal Jehová icha tic: A ex tic max yal e cꞌol tze cha eyabꞌ tas svalaꞌ. Tze tzuntzej val cot yoval in cꞌool, yujto tzex och ejmelal dꞌa juntzan̈ e diosal tze bꞌoꞌo. Yuj chiꞌ an̈ejaꞌ ex tzeyicꞌcot yaelal dꞌa eyibꞌan̈, xchi Jehová.8 Yuj chiꞌ syalanxi Jehová Yajal dꞌa Smasanil icha tic: Yujto max e cha eyabꞌ tas svalaꞌ, 9 yuj chiꞌ ol vavtejcot masanil juntzan̈ chꞌoc chon̈abꞌil scot dꞌa norte yedꞌ pax vin̈aj Nabucodonosor sreyal Babilonia. Ol vacꞌlabꞌej vin̈ yic sjavi vin̈ yedꞌ juntzan̈ chon̈abꞌ chiꞌ yacꞌ oval dꞌa jun chon̈abꞌ tic yedꞌ dꞌa juntzan̈xo chon̈abꞌ ay dꞌa slacꞌanil yedꞌ ebꞌ anima cajan dꞌay. Ol vacꞌ satel ebꞌ smasanil. Juneln̈ej ol vacꞌ lajvoquel ebꞌ. A ebꞌ ol ilanoc, ol xivqꞌue ebꞌ, ol bꞌuchvaj ebꞌ dꞌa ebꞌ. 10 A val ol vutejcan ebꞌ chiꞌ, man̈xa bꞌaj ol abꞌchaj yoch bꞌit yic qꞌuin̈ yuj tzalajcꞌolal, ma bꞌit yic nupnajel. Man̈xa bꞌaj ol abꞌchaj scꞌan̈ qꞌuen chaꞌ, man̈xa bꞌaj ol ilchaj yoc candil. 11 Masanil jun chon̈abꞌ tic ol can tzꞌinan, ol em lan̈najoc. A jun chon̈abꞌ tic yedꞌ juntzan̈xo chon̈abꞌ ay dꞌa slacꞌanil tic, 70 abꞌil ol can dꞌa yalan̈ smandar vin̈ sreyal Babilonia chiꞌ. 12 A in val Jehová in svacꞌ in tiꞌ, ayic ol lajvoc 70 abꞌil chiꞌ, ol in chꞌolbꞌitan smul vin̈ sreyal Babilonia chiꞌ yedꞌ masanil ebꞌ cajan dꞌa smacbꞌen vin̈, aton ebꞌ caldeo. Ol in satel ebꞌ dꞌa juneln̈ej. 13 Masanil juntzan̈ yaelal ix valaꞌ, ol vaqꞌuem dꞌa yibꞌan̈ jun chon̈abꞌ chiꞌ, aton tastac tzꞌibꞌabꞌilcan dꞌa jun uum tic, aton tas ix in chec yalcan vin̈aj Jeremías yuj masanil juntzan̈ chon̈abꞌ. 14 Ol vacꞌoch ebꞌ dꞌa yol scꞌabꞌ nivac chon̈abꞌ yedꞌ ebꞌ nivac yajal. Icha chiꞌ ol aj schaan spac ebꞌ, icha val smojal tas scꞌulej, xchi Jehová.
A jun copa yechel yaelal
15 A Jehová co Diosal a on̈ israel on̈ tic, aꞌ ix chꞌoxan dꞌayin icha vayichal, ix yalan dꞌayin: Ina jun copa tic, bꞌudꞌan yuj vino, schꞌoxel yoval in cꞌool. Icꞌbꞌati, tzacꞌan yucꞌ masanil nación bꞌaj ol ach in checbꞌati. 16 Ayic ol yucꞌan ebꞌ, ol xej ebꞌ, ol quistalax ebꞌ yuuj. Icha chiꞌ ol aj ebꞌ yuj jun oval ol vacꞌbꞌat dꞌa scal, xchi Jehová.
17 Ix in chaan jun copa chiꞌ dꞌa Jehová, ix vacꞌan yucꞌ masanil chon̈abꞌ chiꞌ tas ayem dꞌa yool, aton juntzan̈ bꞌaj ix in schecaꞌ. 18 Ix vacꞌ yucꞌ ebꞌ aj Jerusalén yedꞌ masanil ebꞌ cajan dꞌa junjun chon̈abꞌ dꞌa yol yic Judá. Ix yucꞌ ebꞌ yedꞌ sreyal yedꞌ yajalil, yic slajviel ebꞌ yuuj. A ebꞌ ol ilan ebꞌ, ol xiv ebꞌ, ol bꞌuchjoc ebꞌ, ol catabꞌaj ebꞌ yuj ebꞌ, icha van quilan ticnaic. 19 Ix vacꞌanpax yucꞌ vin̈ sreyal Egipto, ebꞌ yajal, ebꞌ nivac vinac yedꞌ masanil ebꞌ anima cajan taꞌ, 20 yedꞌ pax ebꞌ anima ton̈ej tzꞌecꞌ taꞌ. Ix vacꞌanpax yucꞌ masanil ebꞌ rey ay dꞌa chon̈abꞌ Uz yedꞌ masanil ebꞌ ay dꞌa yol smacbꞌen ebꞌ filisteo: Aton dꞌa Ascalón, dꞌa Gaza, dꞌa Ecrón yedꞌ ebꞌ anima ixto can dꞌa Asdod. 21 Ix vacꞌanpax dꞌa ebꞌ sreyal Edom, Moab yedꞌ dꞌa ebꞌ yin̈tilal Amón. 22 Yedꞌ dꞌa ebꞌ sreyal Tiro yedꞌ Sidón yedꞌ masanil ebꞌ sreyal junjun nación ay dꞌa stitac aꞌ mar Mediterráneo. 23 Ix vacꞌanpax dꞌa ebꞌ aj Dedán, dꞌa ebꞌ aj Tema, dꞌa ebꞌ aj Buz yedꞌ dꞌa masanil ebꞌ anima spiljoxejel yibꞌtac schiquin. 24 Ix vacꞌanpax dꞌa ebꞌ rey dꞌa Arabia yedꞌ dꞌa masanil macan̈il anima cajan dꞌa taquin̈ luum. 25 Ix vacꞌpax yucꞌ ebꞌ rey dꞌa Zimri, dꞌa Elam yedꞌ dꞌa Media, 26 yedꞌ dꞌa ebꞌ rey dꞌa norte, aton ebꞌ lacꞌnic ma ebꞌ najtic scal. Syalelcꞌochi, masanil ebꞌ rey dꞌa yolyibꞌan̈qꞌuinal ix ucꞌani. Slajvubꞌalxo ol yucꞌ vin̈ sreyal Babilonia.
27 Ix lajvi chiꞌ ix yalanxi Jehová dꞌayin icha tic: Alaꞌ to a in Jehová Yajal in dꞌa Smasanil, sDiosal in Israel, a in ix valaꞌ: Uqꞌuejec e masanil ex yajal ex tic masanto sqꞌue dꞌa e jolom, ol ex xejoc, ol ex telvoc. Man̈xo ol ex qꞌue vaan. Icha chiꞌ ol ex aj yuj jun oval ol vacꞌbꞌat dꞌa e cal, xchi Jehová. 28 Tato malaj sgana ebꞌ schaan jun copa chiꞌ dꞌayach, max yucꞌ pax ebꞌ, al dꞌa ebꞌ icha tic: A Jehová Yajal dꞌa Smasanil, aꞌ tzꞌalani: Yovalil ol eyuqꞌuej. 29 Tic val tzin chael yich vacꞌanbꞌat yaelal dꞌa yibꞌan̈ jun chon̈abꞌ vic yaji. ¿Tzam e naꞌ to man̈ ol cꞌoch yaelal chiꞌ dꞌa eyibꞌan̈? A in val Jehová in svalaꞌ to a jun chiꞌ man̈ ol ecꞌbꞌat scꞌoch dꞌa eyibꞌan̈, yujto ol vacꞌbꞌat oval dꞌa yibꞌan̈ masanil ebꞌ cajan dꞌa sat luum tic, xchi Jehová, xa chi.
30 Ach Jeremías, al masanil juntzan̈ lolonel tic dꞌa ebꞌ:
A Jehová icha scꞌan̈ cꞌu, icha chiꞌ ol aj yavajemta dꞌa satchaan̈, aton dꞌa scajnubꞌ to yicn̈ej yaji. Icha val yel yav ebꞌ tecꞌumel yal uva, icha chiꞌ ol aj yel yav scot yoval dꞌa masanil anima cajan dꞌa sat luum tic.
31 Olto abꞌchaj scꞌan̈ bꞌaj slajvicꞌoch lum luum tic, yujto ay tas ol yal Jehová dꞌa yibꞌan̈ masanil nación. Ol chꞌolbꞌitaj ebꞌ anima yuuj, ol yacꞌancanoch chamel dꞌa yibꞌan̈ masanil ebꞌ chuc, xchi Jehová, xa chi, xchi dꞌayin.
32 A Jehová Yajal dꞌa Smasanil tzꞌalan icha tic: Abꞌec, dꞌa stzolal ol aj syamchaj junjun nación yuj jun yaelal ol javoc, icha sjavi junoc oval icꞌ n̈abꞌ. Van smolbꞌan sbꞌa jun nivan yaelal chiꞌ bꞌaj slajvicꞌoch lum luum tic, xchi Jehová.
33 A ebꞌ ol cham yuj Jehová dꞌa jun cꞌu chiꞌ, teltumbꞌa ol ajcan ebꞌ dꞌa smasanil yolyibꞌan̈qꞌuinal tic. Malaj mach ol ocꞌ yuj ebꞌ, malaj mach ol molbꞌan snivanil ebꞌ yic smucji. Toxon̈ej ol can bꞌulan snivanil ebꞌ dꞌa sat luum icha stzaꞌ nocꞌ nocꞌ.
34 Elocabꞌ eyav yuj yaelal ex yilumal chon̈abꞌ. Ecꞌan̈ec bꞌalbꞌon dꞌa sat luum, yujto toxo ix ja scꞌual e miljichamoc. Ol ex saclemcanbꞌatoc. Ol ex acꞌjoc ganar, ol ex miljoccham icha nocꞌ chꞌac calnel te bꞌaqꞌuech.
35 A ebꞌ yilumal chon̈abꞌ, man̈ ol yal sbꞌat ebꞌ elelal. A ebꞌ stan̈vumal chon̈abꞌ chiꞌ man̈ ol colchajcanel ebꞌ.
36 Abꞌec val scꞌacvi ebꞌ yilumal chon̈abꞌ chiꞌ. Tzꞌel yav ebꞌ yuj yaelal, yujto toxo ix satel schon̈abꞌ ebꞌ yuj Jehová, icha stacjiel an̈ an̈cꞌultac bꞌaj sva nocꞌ calnel.
37 Ix satjiel schon̈abꞌ ebꞌ chiꞌ yuj yoval scꞌol Jehová.
38 Ix elta jucnaj Jehová dꞌa yedꞌtal icha junoc nocꞌ choj. Yedꞌ val yoval scꞌool ix yacꞌancot jun oval te ay smay dꞌa scal juntzan̈ anima chiꞌ, chocꞌ ix ajem lan̈naj schon̈abꞌ ebꞌ.