A vin̈aj Jeconías sreyal Judá, yuninal vin̈aj Joacim, ix icꞌjibꞌat vin̈ preso yuj vin̈aj Nabucodonosor sreyal Babilonia. Ix icꞌchajpaxbꞌat ebꞌ ayoch yajalil yedꞌ vin̈, ebꞌ bꞌoum pat yedꞌ ebꞌ tenum qꞌueen. Ix lajvi chiꞌ icha dꞌa vayichal ix aj schꞌoxan chabꞌ mooch sat teꞌ higo Jehová dꞌayin, ayecꞌ dꞌa yichan̈ templo. 2 A dꞌa yol junoc mooch chiꞌ, ayem teꞌ sat higo te vachꞌ, qꞌuin̈xo, aton teꞌ bꞌabꞌel sat, axo dꞌa yol junxo teꞌ mooch chiꞌ, ayem teꞌ higo te chucxolaj, maxtzac yal-laj co loani. 3 Axo ix scꞌanbꞌan Jehová dꞌayin: ¿Jeremías, tas tzil chiꞌ? xchi. Ix in tacꞌvi, ix valani: Ay chabꞌ mooch teꞌ sat higo svilaꞌ. Ay teꞌ man̈xo jantacoc svachꞌil, ay pax teꞌ te chucxolaj, maxtzac yal-laj co loani, xin chi. 4 Ix lajvi chiꞌ, ix yalan Jehová dꞌayin icha tic: 5 A in Jehová e Diosal in svalaꞌ: Icha val sat teꞌ higo vachꞌ chiꞌ, icha chiꞌ yaj chon̈abꞌ Judá dꞌa yol in sat, aton ebꞌ ix vacꞌ icꞌjocbꞌat dꞌa smacbꞌen ebꞌ caldeo. Te vachꞌ ol vutoc in bꞌa dꞌa ebꞌ. 6 Ol in tan̈vejn̈ej ebꞌ, ol vicꞌanxi meltzaj ebꞌ dꞌa jun schon̈abꞌ tic. A tic ol vicꞌchaan̈ ebꞌ, man̈xo ol in satel-laj ebꞌ. Icha val to ol vavejem ebꞌ, man̈xo ol in tocꞌqꞌueta ebꞌ. 7 Ol vacꞌ val spensar ebꞌ, yic syojtaquejel ebꞌ to a in ton Jehová Dios in. Ol och ebꞌ in chon̈abꞌoc, a inxo ol in och sDiosaloc ebꞌ. Yujto dꞌa smasanil scꞌol ebꞌ ol meltzajcot dꞌayin.