A tas scacꞌoch yipoc co cꞌol dꞌa bꞌaqꞌuin̈
23
A Jehová tzꞌalan icha tic: Ex yilumal in chon̈abꞌ, obꞌiltac ex, lajan ex icha junoc tan̈vum calnel smilancham nocꞌ scalnel chiꞌ, saclemcanbꞌat nocꞌ yuuj. Icha chiꞌ tzeyutej ebꞌ in chon̈abꞌ tic, xchi Jehová.2 A Jehová co Diosal a on̈ israel on̈ tic, a tzꞌalan dꞌa ebꞌ yilumal schon̈abꞌ tzꞌacꞌan yajalil dꞌay: Ex yilumal in chon̈abꞌ, ix e saclemcanbꞌat ebꞌ in chon̈abꞌ, ix e xibꞌtancanbꞌat ebꞌ, maj e tan̈vej ebꞌ. Yuj chiꞌ a in Jehová in tic svalaꞌ, ol vacꞌoch eyaelal yuj tas ix e cꞌulej chiꞌ. 3 Axo ebꞌ ix in saclemcanbꞌat dꞌa juntzan̈xo chꞌoc chon̈abꞌil, a in Jehová in tic svalaꞌ, ol vicꞌ meltzaj ebꞌ. Ol vacꞌanxi cajnaj ebꞌ dꞌa schon̈abꞌ, ol vacꞌanxi qꞌuibꞌ sbꞌisul ebꞌ. 4 Ol vacꞌanoch yilumal ebꞌ, yic maxtzac xiv ebꞌ, man̈xa junoc ebꞌ ol satoc, xchi Jehová.
5 Ix yalan Jehová icha tic: Ay jun cꞌu ol javoc, ol vacꞌoch jun yin̈tilal vin̈aj rey David reyal dꞌa in chon̈abꞌ tic. A jun rey chiꞌ te tojol spensar. Yedꞌ sjelanil ol yacꞌ reyal, tojol ol yutej schꞌolbꞌitan masanil chon̈abꞌ.
6 A dꞌa stiempoal ol yacꞌ reyal chiꞌ, ol colchajcanel ebꞌ aj Judá yedꞌ pax ebꞌ aj Israel, man̈xalaj tas ol sna ebꞌ. Aton jun bꞌi tic ol acꞌjoc sbꞌioc: A Jehová sbꞌoanel tas tzon̈ aj dꞌa stojolal.
7-8 A ticnaic, sloc in bꞌi ebꞌ anima tic, syalan ebꞌ icha tic: Yojtac val Jehová, jun icꞌannaquelta ebꞌ co mam quicham dꞌa Egipto, xchi ebꞌ. Palta svacꞌcan in tiꞌ ticnaic to ay jun cꞌu ol javoc ol yal ebꞌ icha tic: Yojtac val Jehová, jun ix on̈ icꞌanelta dꞌa norte yedꞌ dꞌa juntzan̈xo chon̈abꞌ bꞌaj ix on̈ saclemcanbꞌati, xcham ebꞌ. Ichato chiꞌ ol cajnajxi ebꞌ israel chiꞌ dꞌa sluum, xchi Jehová.
Lolonel ix alchaj dꞌa ebꞌ syaloch sbꞌa schecabꞌoc Dios
9 Icha tic ix val dꞌa ebꞌ syaloch sbꞌa schecabꞌoc Dios: A Jehová ix alan jun lolonel nivan yelcꞌoch dꞌayin. Yuj chiꞌ ix och val pitzꞌan dꞌa in pixan sicꞌlabꞌil, ix ibꞌxiqꞌue in nivanil. Icha squetconecꞌ ebꞌ ucꞌum an̈ toxo val stelvi, icha chiꞌ ix in aji.
10 A ebꞌ anima cajan dꞌa jun chon̈abꞌ tic, an̈ej val ajmulal scꞌulej ebꞌ, syacꞌ val yip ebꞌ scꞌulan chucal. A ebꞌ nivac yelcꞌochi, an̈ej ixtoj anima syacꞌ ebꞌ. Yuj chiꞌ toxo ix catabꞌaj lum luum tic yuj Jehová, toxo ix tacjiel luum, toxo ix tzꞌabꞌat an̈ an̈cꞌultac bꞌaj sva nocꞌ nocꞌ.
11 A Jehová tzꞌalan icha tic: A val ebꞌ syaloch sbꞌa in checabꞌoc tic yedꞌ ebꞌ sacerdote, malaj velcꞌoch dꞌa yol sat ebꞌ. Svil val scꞌulan chucal ebꞌ dꞌa yol in templo.
12 A in Jehová in svalaꞌ to yuj chiꞌ te qꞌuicꞌalqꞌuinal ol ajcan sbꞌe ebꞌ, te n̈ereri ol aj paxoc. Ichato ol ecchajbꞌat ebꞌ, ol telvoc ebꞌ. Axo yic ol in chꞌolbꞌitan ebꞌ, ol vacꞌancot yaelal te ya dꞌa yibꞌan̈ ebꞌ.
13 Vilnac val ebꞌ yalnacoch sbꞌa in checabꞌoc dꞌa Samaria, te chuc tas scꞌulejnac ebꞌ. Yalnaquel slolonel Baal ebꞌ, icha chiꞌ aj scuchbꞌannac satbꞌat in chon̈abꞌ Israel ebꞌ.
14 Ix vilpax ebꞌ syaloch sbꞌa in checabꞌoc dꞌa Jerusalén, te chuc tas scꞌulej ebꞌ. An̈ej ajmulal scꞌulej ebꞌ, ixtum anima pax ebꞌ, syiptzitan ebꞌ scꞌulan chucal ebꞌ. Malaj junoc mach syactejcan scꞌulan chucal. A val tzꞌaj vilani, a juntzan̈ anima tic yedꞌ ebꞌ cajan dꞌa Jerusalén, lajan val ebꞌ yedꞌ ebꞌ aj Sodoma yedꞌ ebꞌ aj Gomorra.
15 Yuj chiꞌ a in Jehová Yajal in dꞌa Smasanil, sval juntzan̈ lolonel tic yuj juntzan̈ ebꞌ syaloch sbꞌa in checabꞌoc chiꞌ: Yujto yuj ebꞌ sqꞌuechaan̈ chucal dꞌa masanil smacbꞌen ebꞌ tic, yuj chiꞌ ol vacꞌ tas cꞌaꞌ sva ebꞌ yedꞌ yuqꞌuej ebꞌ, to scham anima yuuj.
16 A in Jehová Yajal in dꞌa Smasanil sval icha tic: Ex aj Israel, man̈ eyacꞌoch tas syal ebꞌ syaloch sbꞌa in checabꞌoc chiꞌ yipoc e cꞌool, yujto a tas syal ebꞌ chiꞌ esn̈ej, dꞌa yol yic ebꞌ snaelta, man̈oc in tzin chec yal ebꞌ.
17 A dꞌa ebꞌ bꞌaj malaj yelcꞌoch in lolonel, ataꞌ syal ebꞌ icha tic: Vachꞌn̈ej ol aj eyelcꞌochi, xchi ebꞌ. A dꞌa ebꞌ stecꞌbꞌej sbꞌa scꞌulan tas snaelta dꞌa yol yicoꞌ, syal ebꞌ icha tic: Malaj junoc yaelal ol javoc dꞌa eyibꞌan̈, xchi ebꞌ.
18 Palta a in Jehová in, a in svalaꞌ to a ebꞌ syaloch sbꞌa in checabꞌoc chiꞌ, malaj juneloc xidꞌecꞌ ebꞌ bꞌaj tzꞌoch molchajel, ayic tzin lolon yedꞌ ebꞌ in checabꞌ. Malaj juneloc syabꞌ ebꞌ in loloni.
19 Te chuc ebꞌ, yuj chiꞌ ol vacꞌoch syaelal ebꞌ yedꞌ yoval in cꞌool. A yoval in cꞌol chiꞌ lajan val icha junoc oval icꞌ n̈abꞌ sja xumnajoc.
20 Man̈ ol vanaj yoval in cꞌol chiꞌ, masanto ol elcꞌoch tas nabꞌil vuuj. Ato bꞌaqꞌuin̈, ol nachajel juntzan̈ tic eyuuj.
21 Man̈oc in tzin chec juntzan̈ checabꞌ chiꞌ, malaj tas sval dꞌa ebꞌ. Ton̈ej scomon bꞌat lemnaj ebꞌ yalel slolonel chiꞌ dꞌa in bꞌi.
22 Comonoc syojtaquejel ebꞌ tas nabꞌil vuuj, a am in lolonel syal ebꞌ dꞌa in chon̈abꞌ. Tato icha chiꞌ, toxom ix yactejcan schuc bꞌeybꞌalil in chon̈abꞌ tic, man̈xa am chucal scꞌulej ebꞌ.
23 A in Jehová in svalxi icha tic: Vachꞌchom dꞌa lacꞌan, ma dꞌa te najat, a in tic Dios inn̈ej dꞌa smasanil bꞌaj.
24 A in val Jehová in svalaꞌ: Malaj junoc bꞌaj vachꞌ e cꞌubꞌanel e bꞌa dꞌayin. ¿Tom man̈ eyojtacoc to ayinn̈ej ecꞌ dꞌa masanil satchaan̈ yedꞌ dꞌa masanil sat luum?
25 Svabꞌ val tas syal juntzan̈ checabꞌ esalvum chiꞌ, stecꞌbꞌej val sbꞌa ebꞌ yalani to a in lolonel syal ebꞌ, a in tzin lolon dꞌa ebꞌ dꞌa svayich yalani. 26 ¿Bꞌaqꞌuin̈ ol yactej juntzan̈ syaloch sbꞌa in checabꞌoc chiꞌ yalan esal lolonel chiꞌ? ¿Bꞌaqꞌuin̈ ol yactej ebꞌ yalan juntzan̈ lolonel ton̈ej snaqꞌue dꞌa yol yic chiꞌ? 27 A ebꞌ chiꞌ sna ebꞌ tas tzꞌaj in bꞌatcan satcꞌolal yuj in chon̈abꞌ yuj svayich ebꞌ syal-laj dꞌay junjun, icha val scꞌulejnac ebꞌ e mam eyicham, ayic in bꞌatnac satcꞌolal yuj ebꞌ, axon̈ej comon dios Baal bꞌaj yacꞌnaquem sbꞌa ebꞌ. 28-29 A in val Jehová in svalaꞌ: Tato ay junoc checabꞌ chiꞌ ay tas svayichej, yalocabꞌi to vayich. Palta tato a in lolonel scha jun, yalocabꞌ dꞌa sjichanil. ¿Tom lajan yopisio ixim sat trigo yedꞌ yoc? Icha chiꞌ in lolonel, man̈ lajanoc yedꞌ vayich. A in lolonel lajan val icha teꞌ cꞌacꞌ, ma icha qꞌuen almágana chocꞌ tzꞌaj qꞌuen nivac qꞌueen yuuj.
30 Yuj chiꞌ, te aycot yoval in cꞌol dꞌa juntzan̈ checabꞌ ton̈ej syal-laj yabꞌ slolonel junjun, syalan ebꞌ to a in lolonel syal ebꞌ. 31 A in svalaꞌ, te aycot yoval in cꞌol dꞌa juntzan̈ checabꞌ te vachꞌ syutej sloloni, syalan ebꞌ to a in lolonel syalel ebꞌ. 32 A in svalaꞌ, te aycot yoval in cꞌol dꞌa juntzan̈ checabꞌ stzꞌac yal svayich. A yuj juntzan̈ nivac esal lolonel syal ebꞌ chiꞌ, satcanbꞌat ebꞌ in chon̈abꞌ. Man̈oc in tzin checbꞌat ebꞌ, man̈oc in svacꞌ in checnabꞌil dꞌa ebꞌ, yuj chiꞌ malaj tas vachꞌ yicꞌan ebꞌ in chon̈abꞌ tic dꞌa ebꞌ, xchi Jehová.
A tas tzꞌaj yalchajel slolonel Jehová
33 Ix yalanxi Jehová dꞌayin icha tic: Ach Jeremías, tato ay junoc anima dꞌa yol chon̈abꞌ tic, ma junoc syaloch sbꞌa in checabꞌoc, ma junoc sacerdote scꞌanbꞌan dꞌayach: ¿Tas syal srazón Jehová? tato xchi ebꞌ. Tzalan dꞌa ebꞌ icha tic: Lajan ex icha val junoc icatz dꞌa Jehová, yuj chiꞌ ol ex actajem yuuj, xa chi.* 34 Tato a junoc checabꞌ, ma junoc sacerdote, ma junoc comon anima tzꞌalan icha tic: Srazón Jehová, tato xchi ebꞌ, a in ol vacꞌoch yaelal dꞌa yibꞌan̈ ebꞌ yedꞌ ebꞌ cajan yedꞌoc.
35 Tato ay junoc mach scꞌanbꞌan dꞌa junoc yamigo, ma dꞌa junoc scꞌabꞌ yoc yuj tas svalaꞌ, syal yalan icha tic: ¿Tas ix yutej Jehová spacani? ma ¿tas ix yal Jehová? xchiocabꞌi. 36 Palta max yal yalan icha tic: A srazón Jehová tzin cꞌanbꞌej. Tato syal icha chiꞌ, a jun lolonel chiꞌ ol meltzajcanoch icatzil dꞌay. Yujto ix yixtejbꞌat ebꞌ anima tic tas sval a in e Diosal pitzan in tic, Jehová Yajal in dꞌa Smasanil.
37 Icha tic tzꞌaj e cꞌanbꞌan dꞌa jun in checabꞌ: ¿Tas spac ix yal Jehová, ma tas ix yalaꞌ? xe chi. 38 Ach Jeremías, tato tzato yal ebꞌ: Srazón Jehová, tato xchi ebꞌ, tzal dꞌa ebꞌ icha tic: A val Jehová tzꞌalani: Yujto a ex tic tzeyaln̈ej juntzan̈ lolonel bꞌaj ix ex in cachaꞌ to maxtzac eyalaꞌ, 39 yuj chiꞌ ol ex bꞌat satcꞌolal vuuj yedꞌ pax jun chon̈abꞌ ix vacꞌ dꞌayex yedꞌ dꞌa ebꞌ e mam eyicham. Najat ol ex in yumcaneli. 40 Masanil tiempo ol ex vacꞌcan qꞌuixvelal, man̈xalaj jabꞌoc yelcꞌoch ol ex ajcanoc. Man̈xo ol bꞌat satcꞌolal eyuj tas ol ex utaj chiꞌ, xchi Jehová.