A tas ix alchaj dꞌa ebꞌ sreyal Judá
22
Ix yalan Jehová dꞌayin: Ixic dꞌa spalacio vin̈ sreyal Judá, tzalan juntzan̈ lolonel tic 2 dꞌa vin̈, aton vin̈ yin̈tilal vin̈aj David. Tzalan pax dꞌa yichan̈ masanil ebꞌ ayoch yopisio yedꞌ vin̈ yedꞌ pax dꞌa ebꞌ anima ay taꞌ to smaclej yabꞌ in lolonel tic ebꞌ. 3 A tojolal yedꞌ vachꞌilal a tze bꞌeybꞌalej. Man̈ eyixtej ebꞌ eyetanimail, man̈ eyixtej ebꞌ chꞌoc chon̈abꞌil, ma ebꞌ unin chamnac smam yedꞌ ebꞌ ix ix chamnac yetbꞌeyum. Man̈ e milcham ebꞌ anima malaj smul. 4 Tato dꞌa val yel ol e bꞌeybꞌalej juntzan̈ sval tic, ol ochn̈ej ebꞌ yin̈tilal vin̈aj David reyal dꞌa tic. Ayoch ebꞌ dꞌa yol carruaje yedꞌ dꞌa yibꞌan̈ chej ol ochta ebꞌ dꞌa spuertail palacio tic, ajun masanil ebꞌ ay yopisio yedꞌ ebꞌ yedꞌ pax ebꞌ anima. 5 Palta tato man̈ ol e cha eyabꞌ juntzan̈ ix val a in Jehová in tic jun, a jun palacio tic ol sateloc, xchi Jehová, xa chi dꞌa ebꞌ, xchi dꞌayin.6 Ix yalanxi Jehová icha tic.
A spalacio vin̈ sreyal Judá, a dꞌa yol in sat lajan val icha svachꞌil yilji lum Galaad, icha pax lum jolom vitz Líbano. Palta svacꞌ in tiꞌ svalani to ol meltzajcanoch icha tzꞌinan luumal. Man̈xa mach ol cajnaj dꞌay.
7 Ol vicꞌcot ebꞌ anima ay syamcꞌabꞌ yic oval dꞌa jun palacio tic yic satanel ebꞌ. Ol smacꞌanelta teꞌ cꞌuteꞌ ebꞌ, aton teꞌ man̈ jantacoc svachꞌil ayoch spatzabꞌiloc, ol sn̈usancantzꞌa teꞌ ebꞌ.
8 Ol cot ebꞌ anima dꞌa juntzan̈xo chon̈abꞌ, ol ecꞌ ebꞌ dꞌa stzꞌey jun chon̈abꞌ tic, ol laj scꞌanbꞌan ebꞌ dꞌay junjun: ¿Tas yuj icha tic ix yutej jun nivan chon̈abꞌ tic Jehová? xcham ebꞌ. 9 Ol tacꞌvoc juntzan̈xo ebꞌ icha tic: Icha tic ix yutej Jehová sDiosal ebꞌ, yujto ix yactejcan strato ebꞌ sbꞌonac yedꞌoc, axo dꞌa juntzan̈ comon dios bꞌaj ix och ebꞌ ejmelal, xcham ebꞌ, xchi Jehová.
A tas ix yal vin̈aj Jeremías dꞌa vin̈aj Salum
10-11 Man̈ ex ocꞌ yuj schamel vin̈aj Josías, ocꞌan̈ec yuj vin̈aj Salum yuninal vin̈aj Josías chiꞌ. Yujto ix icꞌjibꞌat vin̈ dꞌa juneln̈ej, man̈xa bꞌaqꞌuin̈ ol meltzaj vin̈, man̈xo ol yil-laj schon̈abꞌ vin̈ bꞌaj aljinac.
A yuj vin̈aj Salum chiꞌ, vin̈ ix och sreyaloc Judá ayic toxo ix cham vin̈ smam vin̈ chiꞌ, a Jehová tzꞌalan yuj vin̈ icha tic. Ix icꞌjiel vin̈ dꞌa jun chon̈abꞌ tic, man̈xo ol meltzajlaj vin̈. 12 A dꞌa jun chon̈abꞌ bꞌaj ix icꞌjibꞌat vin̈ chiꞌ, ataꞌ ol cham vin̈. Man̈xo ol ul yilxi schon̈abꞌ vin̈ tic.
A tas ix alchaj dꞌa vin̈aj Joacim
13 Obꞌiltac ach, yuj val a chucal tza bꞌoanqꞌue a palacio yedꞌ a nivac pat. Tzacꞌ munlaj ebꞌ anima, palta max a tuplaj scꞌu ebꞌ.
14 Tzalan icha tic: Ol in bꞌoqꞌue junoc in nivan palacio, axo dꞌa yibꞌan̈ ol in bꞌoqꞌue juntzan̈xo levan tzꞌaj yool. Ol jacvoccan sventenail, axo teꞌ cꞌuteꞌ ol vacꞌoch yichtacoc, axo yelav, chacchac ol ajoc, xa chi.
15 ¿Am a naani to yujn̈ejto ayachecꞌ dꞌa yoltac pat nabꞌa cꞌuteꞌ ayoch dꞌay, yuj chiꞌ rey ach to nivan elcꞌochi? A vin̈ a mam ix yacꞌ tzalajbꞌoc scꞌol vin̈, yujto tojol ix yutej sbꞌa vin̈, vachꞌn̈ej tas ix scꞌulej vin̈, yuj chiꞌ vachꞌn̈ej ix ajelcꞌoch vin̈.
16 Ix scol ebꞌ mebꞌaꞌ vin̈ yedꞌ ebꞌ tzꞌixtaj yuj ebꞌ chuc spensar. Yuj chiꞌ vachꞌn̈ej ix elcꞌoch vin̈. A in Jehová in svalaꞌ to a sbꞌeybꞌal vin̈ chiꞌ schꞌoxani to yojtac in vin̈.
17 Palta a ach tic, an̈ej bꞌeyumal tza nibꞌej dꞌa spatic chucal. Tza checan miljoccham ebꞌ anima malaj smul, tzixtan ebꞌ etchon̈abꞌ, xchi Jehová.
18 Syal Jehová yuj vin̈aj Joacim yuninal vin̈aj Josías sreyal Judá icha tic:
Malaj ebꞌ ol ocꞌ yuj schamel vin̈. Malaj ebꞌ ol alan icha tic: Ay, ach vetanimail. Obꞌiltac on̈. Toxo ix cham vin̈ co reyal, icha co mam yaj vin̈, man̈ xchioc ebꞌ.
19 Icha tzꞌaj junoc nocꞌ chamnac bꞌuru, icha chiꞌ ol utaj vin̈, ol n̈erchajcanel vin̈ dꞌa tiel chon̈abꞌ Jerusalén, xchi Jehová.
A tas ix alchaj dꞌa yibꞌan̈ Jerusalén
20 Ix yalanxi Jehová icha tic: Ex aj Judá, qꞌuean̈ec dꞌa jolom vitz Líbano tzex avaj taꞌ. Te chaan̈ tzex avaj dꞌa jolomtac vitz yic Basán yedꞌ dꞌa tzalquixtac yic Abarim, yujto masanil ebꞌ ayoch eyedꞌoc toxo ix satel ebꞌ.
21 A in tic, ix val dꞌayex yic vachꞌ eyajecꞌ dꞌa e chon̈abꞌ, palta maj yal e cꞌol ix eyabꞌi. Ichan̈ej chiꞌ ix eyutej e bꞌa yictax vanto eyoch chon̈abꞌil, toxon max e cha eyabꞌ tas svalaꞌ.
22 Ol icꞌjocbꞌat ebꞌ eyajalil yuj ebꞌ ajcꞌool, icha yicꞌjibꞌat junoc tas yuj oval icꞌ, axo ebꞌ ayoch eyedꞌoc ol icꞌjocbꞌat ebꞌ dꞌa junocxo chꞌoc chon̈abꞌil. Toxon̈ej ol ex qꞌuixvoccanoc. Man̈xa ol ajcan eyelcꞌoch yuj jantac e chucal.
23 A ticnaic, te tzalajcꞌolal eyajecꞌ dꞌa e pat nabꞌa cꞌuteꞌ cotnac steꞌal dꞌa Líbano. Palta ayic ol javoc yaelal dꞌa eyibꞌan̈, ol el eyav eyabꞌan syail, icha yabꞌan syail junoc ix ix tzꞌalji yuneꞌ, xchi Jehová.
A tas ix yal Dios dꞌa vin̈aj rey Jeconías
24 Ix yalan Jehová dꞌa vin̈aj Jeconías yuninal vin̈aj Joacim sreyal Judá: Vachꞌchom aylaj tzach och vuj icha junoc colcꞌabꞌ ayoch dꞌa svachꞌ cꞌabꞌ ebꞌ nivac vinac, palta svacꞌ in tiꞌ to ol ach in julcaneli. 25 Ol ach vacꞌcanoch dꞌa yol scꞌabꞌ ebꞌ ajcꞌol bꞌaj tzach te xivi, ebꞌ snibꞌan ach smilanchamoc, aton vin̈aj Nabucodonosor sreyal Babilonia yedꞌ ebꞌ ajun yedꞌoc. 26 Ol ach vacꞌ icꞌjocbꞌat yedꞌ ix a nun dꞌa lum luum bꞌaj man̈oc taꞌ ex alji, ataꞌ ol ex cham e chavan̈il. 27 Man̈xo ol ex meltzaj dꞌa tic, vachꞌchom olto e nibꞌej meltzajxi e bꞌa, xchi Jehová.
A tas ix scꞌanbꞌej vin̈aj Jeremías
28 ¿Tom lajan vin̈aj Jeconías tic yedꞌ junoc lum chen pojeltac man̈xa yopisio, ma icha junoc yamcꞌabꞌ man̈xa mach snibꞌani? ¿Tas yuj sjuljicanbꞌat vin̈ yedꞌ ebꞌ yin̈tilal dꞌa jun lum luum man̈ yojtacoc?
29 Abꞌec val ex aj Judá, scham val eyabꞌan tas syal Jehová.
30 A Jehová tzꞌalanxi icha tic: Tzꞌibꞌchajocabꞌcan bꞌaj ay sbꞌi ebꞌ yin̈tilal ebꞌ rey to a jun vinac tic, lajan tzꞌajcan icha junoc vinac malaj yuninal, icha junoc vinac man̈ vachꞌoc ix aj yelcꞌochi. Yujto man̈xa junoc yin̈tilal vin̈ ol och reyal dꞌa spalaciocan vin̈aj David, syacꞌanxi reyal dꞌa Judá tic, xchi Jehová.