Yaelal ol javoc dꞌa yibꞌan̈ Jerusalén
21
A vin̈aj rey Sedequías ix checancot vin̈aj Pasur yuninal vin̈aj Malquías yedꞌ vin̈aj sacerdote Sofonías yuninal vin̈aj Maasías, yic sjavi ebꞌ vin̈ in yil a in Jeremías in tic, yic syalan ebꞌ vin̈ dꞌayin icha tic: 2 Tzon̈ tevi dꞌayach to tza cꞌan dꞌa Jehová cuuj, yujto a vin̈aj Nabucodonosor sreyal Babilonia, van yacꞌan oval vin̈ quedꞌoc. Cꞌan dꞌa Jehová chiꞌ to schꞌox spoder, icha scꞌulejnac dꞌa pecataxo, yic syicꞌanel vin̈aj Nabucodonosor chiꞌ, xchi ebꞌ vin̈.3 Ix lajvi chiꞌ ix lolon Jehová dꞌayin. Ix in tacꞌvi dꞌa ebꞌ vin̈ schecabꞌ vin̈ rey chiꞌ icha tic: Alec dꞌa vin̈aj Sedequías chiꞌ 4 to a Jehová co Diosal a on̈ israel on̈ tic, a tzꞌalani: Ol vacꞌ meltzaj ebꞌ a soldado dꞌa spatic, aton ebꞌ tzꞌacꞌan oval yedꞌ vin̈ sreyal Babilonia. Axo ebꞌ soldado vin̈ chiꞌ aton ebꞌ oyanxo och dꞌa spatictac jun chon̈abꞌ tic, ol in molbꞌejoch ebꞌ dꞌa yol jun chon̈abꞌ tic. 5 A in ol vacꞌ oval eyedꞌoc yedꞌ in poder yedꞌ pax yoval in cꞌol te ay smay. 6 Ol vacꞌcham masanil ebꞌ anima cajan dꞌa jun chon̈abꞌ tic, ol cham ebꞌ yedꞌ nocꞌ nocꞌ yuj jun nivan yabꞌil. 7 Ol lajvoc chiꞌ, a achxo tic ach Sedequías, ol ach vacꞌoch dꞌa yol scꞌabꞌ vin̈aj Nabucodonosor yedꞌ dꞌa juntzan̈xo ebꞌ ayoch ajcꞌolal dꞌayach. Ol ach vacꞌoch dꞌa yol scꞌabꞌ ebꞌ yedꞌ ebꞌ a checabꞌ, ebꞌ a soldado yedꞌ ebꞌ anima pitzanto ol can dꞌa jun chon̈abꞌ tic, aton ebꞌ olto can yuj jun nivan yabꞌil, oval yedꞌ vejel. A in val Jehová in svalaꞌ, man̈ ol ocꞌ scꞌol jun vin̈ rey chiꞌ dꞌa ebꞌ, ol miljoccham ebꞌ yuj vin̈.
8 Ix yalanxi Jehová dꞌayin icha tic: Al dꞌa juntzan̈ anima tic to a in sval icha tic: Svacꞌ e sicꞌlej, ¿tom a e qꞌuinal, mato a e chamel? 9 A mach ol can dꞌa jun chon̈abꞌ tic, ol cham yuj oval, yuj vejel yedꞌ yuj ilya. Axo pax ebꞌ ol el yacꞌoch sbꞌa dꞌa yol scꞌabꞌ ebꞌ aj Babilonia van yacꞌan oval dꞌa jun chon̈abꞌ tic jun, man̈ ol chamlaj ebꞌ, tevelxon̈ej ol colchaj ebꞌ. 10 A in Jehová in svalaꞌ, toxo ix in naꞌ vacꞌancot yaelal dꞌa yibꞌan̈ jun chon̈abꞌ tic, man̈xooc vachꞌil ol vacꞌcoti. Ol vacꞌoch dꞌa yol scꞌabꞌ vin̈ sreyal Babilonia, axo vin̈ ol n̈usantzꞌaoc.
A tas ix alchaj dꞌa yibꞌan̈ vin̈ sreyal Judá
11-12 Alpax dꞌa ebꞌ sreyal Judá yin̈tilal vin̈aj David icha tic:
Scham val eyabꞌan tas sval a in Jehová in tic: Vachꞌocabꞌ tzeyutej e bꞌoan yaj yoval ebꞌ anima dꞌa junjun cꞌu. Tze col ebꞌ tzꞌixtaj yuj ebꞌ ixtum anima. Tato chuc tzeyutej e bꞌoan yaj jun, ol cot yoval in cꞌol dꞌa eyibꞌan̈, icha teꞌ cꞌacꞌ te ov sqꞌue n̈iln̈on yoc man̈xa mach syal stupani.
Yaelal ol ja dꞌa yibꞌan̈ Jerusalén
13 Ex aj Jerusalén, te chaan̈ eyajqꞌue dꞌa yibꞌan̈ lum acꞌlic, icha yajqꞌue junoc nivan tenam dꞌa lum acꞌlic chiꞌ. Palta a in Jehová in svalaꞌ to aycot yoval in cꞌol dꞌayex. Tzeyal icha tic: ¿Mach ol yal yacꞌan oval quedꞌoc? ¿Mach ol yal sqꞌueul bꞌaj sco col co bꞌa tic? xe chi.
14 A in Jehová in svalaꞌ to ol vacꞌoch eyaelal icha val smojal yuj tastac tze cꞌulej. Ol vacꞌoch scꞌacꞌal e palacio. Axo tastac ay dꞌa spatictac e chon̈abꞌ, ol lajvoquel stzꞌabꞌati, xchi Jehová, xin chi dꞌa ebꞌ schecabꞌ vin̈aj Sedequías chiꞌ.