A tas albꞌil dꞌa yibꞌan̈ vin̈aj Pasur
20
Ay jun vin̈ scuchan Pasur yuninal vin̈aj Imer, sat sacerdote yaj vin̈ dꞌa stemplo Jehová. Ayic ix yabꞌan vin̈ tas ix val a in Jeremías in tic, 2 ix in schecan macꞌjoc vin̈, ix in schecan acꞌjocpaxoch vin̈ dꞌa teꞌ cepo dꞌa spuertail templo dꞌa stojolal smacbꞌen Benjamín. 3 Axo dꞌa junxo cꞌu, a vin̈ ix alani to tzin icꞌchajel dꞌa yol teꞌ cepo chiꞌ. Yuj chiꞌ ix valan dꞌa vin̈ icha tic: A Jehová ix qꞌuexan a bꞌi. Magor-misabib ol a bꞌiejcani, syalelcꞌochi xivcꞌolaln̈ej yaji. 4 Yujto syal Jehová icha tic: Ol vacꞌoch xivcꞌolal dꞌa ibꞌan̈ yedꞌ masanil ebꞌ vachꞌ acꞌan yedꞌoc. Qꞌuelan ach val ochi ol miljoccham ebꞌ a vachꞌcꞌool yuj yespada ebꞌ ajcꞌool. A exxo aj Judá ex tic ol ex vacꞌoch dꞌa yol scꞌabꞌ vin̈ sreyal Babilonia. Ay ex ol ex yicꞌbꞌat vin̈ dꞌa Babilonia chiꞌ, ayex pax ol ex smilcham vin̈. 5 Masanil e bꞌeyumal yedꞌ masanil tastac ay stojol ay dꞌayex yedꞌ sbꞌeyumal ebꞌ sreyal Judá ol vacꞌoch dꞌa yol scꞌabꞌ ebꞌ ajcꞌol chiꞌ, ol yicꞌanbꞌat ebꞌ dꞌa Babilonia chiꞌ. 6 A achxo tic ach Pasur, ol ach icꞌchajbꞌat checabꞌoc dꞌa Babilonia chiꞌ yedꞌ masanil ebꞌ cajan edꞌ dꞌa a pat. Ataꞌ ol ach chamoc, ol ach mucchajcan taꞌ yedꞌ ebꞌ a vachꞌcꞌool chiꞌ, aton ebꞌ bꞌaj ix esejcanel in tiꞌoc, xchi Jehová, xin chi.A scuscꞌolal vin̈aj Jeremías dꞌa yichan̈ Jehová
7 Mamin Jehová, ton̈ej ix in a montej. Ix in cꞌanabꞌajan tas ix alaꞌ. Yelxo te tecꞌan ach, yuj chiꞌ ix in acꞌ ganar. Masanil tiempo tzin tzetzaji, masanil anima tzin bꞌuchan uuj.
8 Ayic svalan dꞌa ebꞌ juntac el icha tic: Ol javoc yaelal dꞌa eyibꞌan̈, ol ex lajvoqueloc, xin chin̈ej dꞌa ebꞌ. Yuj chiꞌ ayn̈ejoch ebꞌ yalan chucal lolonel dꞌayin, tzin sbꞌuchan pax ebꞌ, yujto svalel a lolonel.
9 Tato svalaꞌ to maxtzac ach vacꞌ bꞌinajoc, maxtzac valpaxel a lolonel, axo tzꞌaji, icha teꞌ cꞌacꞌ tzꞌaj a lolonel chiꞌ dꞌayin. Stzꞌabꞌat in bꞌaquil yuj svabꞌi. Tzin nibꞌej tzin och vaan valanel a lolonel tic, palta maxtzac yal-laj.
10 Svabꞌ val sajson ebꞌ in sbꞌuchani: Syalan ebꞌ icha tic: Ina vin̈ xivcꞌolaln̈ej yaj tic, xchi ebꞌ. Syalanpax ebꞌ: Coyec, bꞌat quiqꞌuecchaan̈ esal lolonel dꞌa yibꞌan̈ vin̈, xchi ebꞌ. An̈ejtonaꞌ ebꞌ in vachꞌcꞌool, snibꞌej ebꞌ bꞌaj tzin lectaji. Syalan ebꞌ vuuj icha tic: Co sayec modo tas tzꞌaj cacꞌan ganar cacꞌanec ecꞌ co pac dꞌa vin̈, xchi ebꞌ.
11 Palta a ach tic Mamin Jehová, ayachn̈ej ecꞌ vedꞌoc, icha junoc soldado malaj mach tzꞌacꞌan ganar. A ebꞌ tzin pechani ol acꞌjoc ganar ebꞌ, a inxo jun man̈ ol in yacꞌ ganar ebꞌ. Ol qꞌuixvoccanel ebꞌ, man̈ ol satlaj scꞌol ebꞌ dꞌa sqꞌuixvelal chiꞌ.
12 Mamin Jehová, Yajal ach dꞌa Smasanil, a ach tza chꞌolbꞌitej ebꞌ tojol sbꞌeybꞌal, tzilan tastac sna ebꞌ anima. Chꞌox vil tas ol utej acꞌan syaelal juntzan̈ anima tic, yujto toxo ix vacꞌoch in bꞌa abꞌenal dꞌa yol a cꞌabꞌ.
13 Bꞌitejec Jehová, alec vachꞌ lolonel dꞌay. A scolanel ebꞌ tzꞌabꞌan syail dꞌa yol scꞌabꞌ ebꞌ ixtum anima.
14 Te chuc jun cꞌu bꞌaj aljinac in. Mocabꞌ alchaj vachꞌil dꞌa jun cꞌu bꞌaj aljinac in dꞌa in nun.
15 Obꞌiltac jun vinac xidꞌ alannac dꞌa vin̈ in mam to ix alji jun yuninal vin̈ yic stzalaj vin̈.
16 Satocabꞌel jun vinac chiꞌ, icha juntzan̈ chon̈abꞌ ix satjiel yuj Dios dꞌa juneln̈ej. Yabꞌocabꞌ vin̈ yel av yuj yaelal dꞌa qꞌuin̈ibꞌalil yedꞌ av yic acꞌoj oval dꞌa chimcꞌualil.
17 ¿Tas yuj maj in macꞌjicham yuj jun vinac chiꞌ ayic manto in alji? Tato icha chiꞌ, cann̈ejnac in am dꞌa ix in nun chiꞌ, ichato dꞌa ix mucchajnac in cani.
18 ¿Tas val yuj aljinac in? ¿Tom yuj vilan syaelal, yic tzin cham dꞌa qꞌuixvelal? xin chi.