Cꞌaybꞌubꞌal dꞌa lum pojel chꞌubꞌ
19
Ix yalan Jehová dꞌayin icha tic: Bꞌat man junoc lum chꞌubꞌ, tzicꞌanbꞌat ebꞌ yichamtac vinaquil chon̈abꞌ edꞌoc yedꞌ ebꞌ sacerdote ichamtac vinacxo. 2 Tzach el dꞌa puerta bꞌaj tzꞌel ebꞌ sbꞌat acꞌojcan cꞌalem dꞌa schꞌolanil yic Ben-hinom, ataꞌ ol al juntzan̈ lolonel sval tic dꞌayach dꞌa ebꞌ. 3 Tzalan icha tic: Ex sreyal Judá yedꞌ ex cajan ex dꞌa Jerusalén tic, abꞌec val slolonel Jehová co Diosal Yajal dꞌa Smasanil: Abꞌec, ol vacꞌbꞌat jun nivan yaelal dꞌa yibꞌan̈ e chon̈abꞌ tic. Masanil mach ol abꞌanoc, ol sat scꞌol ebꞌ yabꞌani. 4 Yujto tzin eyactejcani, tzeyacꞌanoch jun lugar tic yicoc comon dios. Tze n̈usan incienso dꞌa juntzan̈ comon dios man̈ eyojtacoc yedꞌ ebꞌ e mam eyicham. Man̈xa yalnabꞌil jantac ebꞌ unin malaj smul tze milchamoc. 5 Ix e bꞌoqꞌue juntzan̈ altar bꞌaj tze n̈ustzꞌa ebꞌ eyuninal silabꞌil dꞌa Baal. Tze cꞌulan val tas man̈oc in svacꞌ e cꞌulej, max ecꞌ dꞌa in pensar juntzan̈ tas tze cꞌulej chiꞌ. 6 Yuj chiꞌ, a in val Jehová in tic svalaꞌ: Ay val jun cꞌual to a jun chꞌolan tic, man̈xo ol scuch Tofet, ma schꞌolanil yic Ben-hinom, palta schꞌolanil bꞌaj smiljicham anima ol sbꞌiejcani. 7 Yuj jantac anima ol cham dꞌa jun chꞌolan tic, ol vacꞌ ixtaxel tas nabꞌil eyuj ex aj Judá yedꞌ ex aj Jerusalén. Ol ex vacꞌ acꞌjoc ganar yuj ebꞌ eyajcꞌol snibꞌej tzex milanchamoc. Axo e nivanil ol och schibꞌejoc nocꞌ ostoc yedꞌ nocꞌ caltacteꞌal nocꞌ. 8 Ol ochcan e chon̈abꞌ tic tzꞌinan lumal, xivubꞌtac ol ajcanoc. A ebꞌ ol ecꞌ dꞌa tic, ol xiv ebꞌ, ol sat scꞌol ebꞌ yilani, ol bꞌuchvaj ebꞌ yuj tas ol ajcan chiꞌ. 9 Ol vacꞌ e chilajbꞌat eyuninal yedꞌ eyisil yuj vejel, ol vacꞌan e chilajbꞌat e bꞌa, ayic ol oymaj ebꞌ ajcꞌol dꞌa spatic e chon̈abꞌ, xchi Jehová, xa chi dꞌa ebꞌ.10 Ayic slajvi alan juntzan̈ tic, tza macꞌanpoj jun lum chꞌubꞌ chiꞌ dꞌa yichan̈ ebꞌ anima ajun edꞌ chiꞌ, 11 tzalan dꞌa ebꞌ icha tic: A Jehová Yajal dꞌa Smasanil tzꞌalan icha tic: Ol in satel jun chon̈abꞌ tic, icha tzꞌaj smacꞌjipoj junoc lum chꞌubꞌ maxtzac yal sbꞌo junelxo. A dꞌa lum Tofet tic ol e muquem ebꞌ e chamnac, yujto man̈xa bꞌaj ol yal e mucan ebꞌ. 12 A in Jehová in svalaꞌ, icha chiꞌ ol vutej jun chon̈abꞌ tic yedꞌ ebꞌ cajan dꞌay, lajan ol aj icha ol aj Tofet tic. 13 Te yajbꞌentac ol ajcan masanil pat dꞌa Jerusalén tic yedꞌ spalacio ebꞌ sreyal Judá. An̈ejtonaꞌ yajbꞌentac ol ajcan span̈anil yibꞌan̈tac pat bꞌaj sn̈usji incienso dꞌa qꞌuen cꞌanal dꞌa satchaan̈ yedꞌ bꞌaj tze sequem vino ofrendail dꞌa comon dios. Icha Tofet chiꞌ ol ajcanoc, xchi Jehová, xa chi dꞌa ebꞌ, xchi Jehová dꞌayin.
14 Ayic ix lajvi in cꞌulan juntzan̈ tic, a in Jeremías in tic, in paxta dꞌa Tofet chiꞌ, bꞌaj ix valcanel slolonel Jehová. In och lin̈an dꞌa yol yamaqꞌuil stemplo Dios, ix valan dꞌa masanil ebꞌ anima icha tic: 15 A Jehová co Diosal Yajal dꞌa Smasanil tzꞌalan icha tic: Ol vacꞌbꞌat yaelal dꞌa yibꞌan̈ jun e chon̈abꞌ tic yedꞌ dꞌa yibꞌan̈ juntzan̈xo chon̈abꞌ ay dꞌa e lacꞌanil. Ol javoc masanil juntzan̈ yaelal toxo ix val tic dꞌa eyibꞌan̈, yujto ix e pitej e bꞌa, maxtzac e cꞌanabꞌajej tas svalaꞌ, xchi Jehová, xin chi dꞌa ebꞌ.