Cꞌaybꞌubꞌal dꞌa yibꞌan̈ vin̈ tzꞌacum
18
Ix lolon Jehová dꞌayin, ix yalan icha tic: 2 Ixic, eman̈ dꞌa spat jun vin̈ tzꞌacum luum. Ataꞌ ol val jun lolonel dꞌayach, xchi dꞌayin. 3 Ix in em bꞌian, van stzꞌacvi vin̈ dꞌa jun tzꞌaclabꞌ tzꞌecꞌ sururoc. 4 Ayic van stzꞌacan jun lum chen vin̈, axo ix aji ix ixtaxbꞌat lum dꞌa yol scꞌabꞌ vin̈. Yuj chiꞌ an̈ejaꞌ yedꞌ lum slumal chiꞌ ix sbꞌo junxo luum vin̈ icha snibꞌej.5 Dꞌa jun rato chiꞌ ix yalan Jehová dꞌayin icha tic: 6 A in val Jehová in sval dꞌayex israel ex tic: ¿Tom max yal ex vutan icha syutej lum luum vin̈ tzꞌacum tic stzꞌacani? A ex tic, lajan eyaj dꞌa yol in cꞌabꞌ icha yaj lum luum dꞌa yol scꞌabꞌ vin̈ tzꞌacum tic. 7 Qꞌuinaloc a in tic tzin naꞌ in juanbꞌati, ma in satanel junoc chon̈abꞌ, ma junoc macbꞌen, 8 palta tato a jun chon̈abꞌ chiꞌ sna sbꞌa scꞌool, syicꞌanel sbꞌa dꞌa scal chucal, an̈ejtonaꞌ in tzin qꞌuexpax in pensar, maxtzac vacꞌbꞌat jun yaelal chiꞌ dꞌa yibꞌan̈. 9 Qꞌuinaloc tzin naꞌ in bꞌoanqꞌue junoc chon̈abꞌ yedꞌ vacꞌan qꞌuibꞌoc, 10 palta tato an̈ej chucal scꞌulej, max scꞌanabꞌajej pax tas svalaꞌ, tzin qꞌuexpax in pensar, maxtzac vacꞌ in vachꞌcꞌolal nabꞌil vuj vacꞌan dꞌay.
11 Al dꞌa ebꞌ cajan dꞌa Judá yedꞌ dꞌa Jerusalén to a in sval juntzan̈ lolonel tic: Van in naan tas ol ex vutej, tas ol aj vacꞌanoch eyaelal, yuj chiꞌ actejeccan e chuc bꞌeybꞌal, cꞌulejec vachꞌil, xchi Jehová, xa chi. 12 Ol yalan ebꞌ dꞌayach icha tic: Man̈ ixtej a bꞌa on̈ a cachani. A on̈ tic ol co cꞌulejn̈ej chucal, icha tas scot dꞌa co pensar co cꞌulani, xcham ebꞌ, xchi Jehová.
13 Yuj chiꞌ ix yalanxi Jehová icha tic: Cꞌanbꞌejec ecꞌ dꞌa junjun nación, tato ay bꞌaj ix abꞌchaj scꞌulaj icha tas scꞌulej ebꞌ etisraelal tic. A ebꞌ tic yelxo val te chuc tas scꞌulej ebꞌ.
14 ¿Toc ay junoc tiempoal man̈ ayoquem qꞌuen sacbꞌacom dꞌa jolomtac vitz dꞌa yol yic Líbano? ¿Ay am bꞌaj stup a aꞌ te siic scot dꞌa jolomtac vitz chiꞌ?
15 Palta a ex in chon̈abꞌ ex tic, man̈ junn̈ejoc bꞌaj ayexcani, cotac scal tze qꞌuexan e pensar. Tzin eyactancani, axo dꞌa tas man̈ diosoc tze n̈us incienso. Ex satbꞌat dꞌa jun bꞌe aytaxon dꞌa pecaꞌ. Axo dꞌa bꞌe yic chucal bꞌaj tzex bꞌati.
16 Yuj e chucal chiꞌ ol can tzꞌinan e chon̈abꞌ tic. Ol te bꞌuchjocn̈ej. Masanil ebꞌ ol ecꞌ dꞌa tic, ol laj syum sat ebꞌ ex stzetzani, yujto satubꞌtac ol aj yilji.
17 Icha tzꞌaj saclembꞌat tastac yuj icꞌ scot bꞌaj sjavi cꞌu, icha chiꞌ ol aj ex vacꞌan saclembꞌat yuj ebꞌ eyajcꞌool. Ol in bꞌat mican dꞌayex ayic ol ja scꞌual sjavi e yaelal chiꞌ. Man̈xo ol in bꞌat qꞌuelan dꞌayex, xchi Jehová.
A tas ix nachaj dꞌa yibꞌan̈ vin̈aj Jeremías
18 Ix yalan ebꞌ anima chiꞌ icha tic: Co naec tas scutej vin̈aj Jeremías tic yuj tas syal vin̈ dꞌa quibꞌan̈. Tocval ol lajvoquel ebꞌ sacerdote tzon̈ cꞌaybꞌani, ma ebꞌ aj pensar tzꞌacꞌan co razón, ma ebꞌ schecabꞌ Dios tzꞌalan slolonel Dios chiꞌ dꞌayon̈. Yuj chiꞌ co naecqꞌue esal lolonel dꞌa spatic vin̈, yic smiljicham vin̈. Man̈ ol co cꞌanabꞌajejlaj tas syal vin̈ chiꞌ, xchi ebꞌ.
Slesal vin̈aj Jeremías
19 Mamin Jehová, cotan̈ val qꞌuelan dꞌayin, tzabꞌan val tas syal ebꞌ ayoch ajcꞌolal tic dꞌayin.
20 ¿Tom yedꞌ chucal tzꞌaj spactzitaj vachꞌcꞌolal? A ebꞌ chiꞌ toxo ix sna ebꞌ tas ol yutej ebꞌ in smilanchamoc.
Nacoti to ix in cꞌoch dꞌa ichan̈ in tevi dꞌayach yuj svachꞌiloc ebꞌ, yic max acꞌcot yoval a cꞌol dꞌa yibꞌan̈ ebꞌ.
21 Axo ticnaic jun, acꞌ cham yuninal ebꞌ yuj vejel yedꞌ yuj oval. Canocabꞌ ebꞌ ix yetbꞌeyum ebꞌ junixtaquil, man̈xaocabꞌ junoc yuneꞌ ebꞌ ix scani. Miljocabꞌcham ebꞌ vin̈ yetbꞌeyum ebꞌ ix, axo ebꞌ vin̈ yuneꞌ ebꞌ ix quelemtacxo, chamocabꞌ ebꞌ dꞌa oval.
22 Acꞌcot junoc n̈ilan̈ soldado elcꞌum dꞌa scal ebꞌ. Abꞌchajocabꞌ yel yav ebꞌ yuj syaelal, yujto ichato sjoy olan ebꞌ bꞌaj ol in mucchajoc, say modo ebꞌ tas tzꞌaj in telvi dꞌa yol scꞌabꞌ ebꞌ.
23 Palta a ach tic Mamin Jehová, ojtac masanil tastac smol alej ebꞌ dꞌa vibꞌan̈ yic tzin smilancham ebꞌ yalani. Man̈ acꞌ nivancꞌolal ebꞌ, mocabꞌ bꞌat smul ebꞌ chiꞌ satcꞌolal uuj. Satocabꞌel ebꞌ dꞌa ichan̈, acꞌoch syaelal ebꞌ yuj yoval a cꞌool.